Jesus Cristo Yekare João Nîmenukaꞌpî 3:1-36
3 Moro awanîꞌpî warayoꞌ iteseꞌ Nicodemos. Awanîꞌpî fariseu pe, Judeuyamîꞌ panamanen pe.
2 Mîîkîrî wîtîꞌpî Jesus pia ewaron yaꞌ. Jesus pîꞌ taꞌpîiya: —Uyenupanen, yenupaton amîrî Paapa piapainon. Amîrî epuꞌtî pîꞌ anna man. Ankupîꞌpî anna neraꞌma ton kupî anîꞌya eserîke pra awanî, Paapa ton pra awanî ya iipia —taꞌpîiya.
3 Jesusya yuukuꞌpî: —Ayenkuꞌtîuya pepîn. Itakon teꞌka pe pemonkon esenpo pra awanî ya, itepotorî pe Paapa wanî pepîn. Mîîkîrî pataꞌseꞌ eraꞌmaiya pepîn.
4 Nicodemosya taꞌpî: —Oꞌnon yeꞌka pe pemonkon esenpo inîꞌrî aꞌyekeꞌton pe siꞌma? Inîꞌrî tîsan roꞌta yaꞌ eewomî itakon teꞌka pe teesenpopa kaꞌrî? —taꞌpîiya.
5 Mîrîrî pîꞌ Jesusya taꞌpî: —Ayenkuꞌtîuya pepîn. Pemonkon esenpo eꞌpai awanî esenponîꞌpî warantî moropai Morî Yekaton Wannî yai esenpon nîrî. Asakîꞌne iteꞌka eesenpo pra awanî ya, Paapa wanî pepîn itesaꞌ pe, ipata yaꞌ eewomî pepîn.
6 Ipun pe eesenpoꞌpî wanî ipun pe rî neken. Morî Yekaton Wannî yai eesenpoꞌpî wanî yekaton awanî pe.
7 Inîꞌrî eesenpo eꞌpai man tauya manniꞌ pîꞌ teesewankonoꞌmai pra eꞌkî.
8 Aꞌkî, aꞌsitun aꞌtaꞌseꞌma ituꞌse tîweꞌtoꞌ yawîrî. Aꞌsitun pe awanî epuꞌtî maasa pra eeseta yeꞌnen, tîîse oꞌnon pata pai aaipî epuꞌtî pepîn. Moropai oꞌnon pata poro attî epuꞌtî pepîn. Mîrîrî warantî epuꞌtî Morî Yekaton Wannî yai esenpoꞌpî pemonkon wanî tîîkoꞌmantoꞌ ke, eesenpo emapuꞌtîsaiꞌya yeꞌnen —taꞌpî Jesusya.
9 Taꞌpî Nicodemosya: —Oꞌnon yeꞌka pe awanî mîrîrî?
10 Jesusya yuukuꞌpî: —Israel ponkon yenupanen pe siꞌma mîrîrî epuꞌtîya pra awanî mîrîrî?
11 Ayenkuꞌtîuya pepîn. Anna eseurîma anna nepuꞌtî pîꞌ moropai anna neraꞌmaꞌpî ekaremekî annaya. Tîîse anna maimu kupîya pra awanî innape.
12 Sîrîrî non po koꞌmannîtoꞌ yeseru pîꞌ ayeurîmauya tanne, innape ikupîya pra awanî ya, kaꞌ ponkon yeseru ekaremekîuya ya, oꞌnon yeꞌka pe mîrîrî kupîya eꞌpainon innape?
13 Anîꞌ enuꞌsaꞌ pra man sîrîrî tîpose Paapa pataꞌseꞌ yaꞌ. Tîîse uurî, pemonkon pe esenpoꞌpî uurî autîꞌpî kaꞌ poi.
14 Pena Moisés nurîꞌtîya bronze konekasaꞌ îkîi pe pîmîꞌsaꞌkaꞌpî keren po. Mîrîrî warantî uurî, kaꞌ poi iipîꞌpî pîmîꞌsaꞌka toꞌya eꞌpai awanî pakîꞌnan pona.
15 Mîrîrî kupî toꞌya eꞌpai awanî innape ukuꞌnenan koꞌmantoꞌpe ipatîkarî Paapa pia —taꞌpîiya.
16 —Maasa pra tamîꞌnawîronkon pemonkonyamîꞌ yuꞌse Paapa wanîꞌpî ipîra teesekaꞌnunkai. Mîrîrî yeꞌnen tiwinan tînmu tîrîꞌpîiya, innape ikuꞌnenan wîtî namai apoꞌ yaꞌ, ipatîkarî enen toꞌ koꞌmantoꞌpe tîîpia.
17 Tînmu yarimaiya pra Paapa wanîꞌpî sîrîrî non pona, apoꞌ yaꞌ tamîꞌnawîronkon yarimai, tîîse yarimaꞌpîiya toꞌ pîikaꞌtîpa kaiꞌma, tînmu wenai —taꞌpîiya.
18 —Innape ikuꞌnen wîtî pepîn apoꞌ yaꞌ. Tîîse innape ikuꞌnen pepîn wîtî koꞌmannîpî sîrîrî apoꞌ yaꞌ, maasa pra tewan yapisîiya pra awanî, tiwinan Paapa munmu pîꞌ.
19 Toꞌ wîtî koꞌmannîpî apoꞌ yaꞌ maasa pra pemonkonyamîꞌ wanî aꞌka yuꞌse pra, tamîꞌnawîronkon weiyuꞌmasaꞌ aꞌkaya tanne. Tîîse ewaron yuꞌse toꞌ wanî, maasa pra imakuiꞌpî kupî pîꞌ toꞌ koꞌmamî.
20 Imakuiꞌpî pîꞌ tîîkoꞌmansenonya tîweiyuꞌmatoꞌkon kupî tewanmakon pe. Aꞌka yaꞌ toꞌ ewomî pepîn, “Imakuiꞌpî kupî pîꞌ naatîi”, taa anîꞌya namai tîpîꞌnîkon.
21 Tîîse Paapa maimu yairon yawîron ewomî aꞌka yaꞌ, tînkoneka, teseru eseraꞌmatoꞌpe, innape ituꞌse Paapa eꞌtoꞌ yairî awanî esepuꞌtoꞌpe —taꞌpî Jesusya.
João Batista Yentai Jesus Wanî
22 Mîrîrî tîpo Jesus wîtîꞌpî Judéia pata pona tînenupaꞌsan pokonpe. Moro aakoꞌmanpîtîꞌpî toꞌ pokonpe. Pemonkonyamîꞌ yenpatakonaꞌpîiya moro.
23 João Batista nîrî wanîꞌpî pemonkonyamîꞌ yenpatakona pîꞌ Enom pata po, aminke pra Salim pata pîꞌ, maasa pra tuna wanîꞌpî moro mararî pra. Pemonkonyamîꞌ wîtîꞌpî João pia moropai toꞌ esenpatakonaꞌpî,
24 mîîkîrî João yarakkamo toꞌya pra tîîse maasa.
25 Mîrîrî yai João Batista nenupaꞌsan esiyuꞌpîtîꞌpî Judeu yarakkîrî Paapa wakîri pe koꞌmannîtoꞌ yeseru pîꞌ, toꞌ ronatoꞌ pîꞌ.
26 Toꞌ wîtîꞌpî João pia. —Anna yenupanen —taꞌpî toꞌya. —Amîrî pia awanîꞌpî manniꞌ Jordão ratai po, ipîꞌ eeseurîma neꞌtîkini mîîkîrî man nîrî pemonkonyamîꞌ yenpatakona pîꞌ. Moropai tamîꞌnawîronkon wîtî iipia —taꞌpî toꞌya.
27 Joãoya taꞌpî: —Îꞌ rî eporî eserîke pra man Paapaya itîrî pra awanî tanne.
28 Pena Paapa nîmenkaꞌpî pîikaꞌtîton pepîn uurî, taapîtîꞌpîuya. Irawîrî Paapa narimaꞌpî uurî, taapîtîꞌpîuya. Mîrîrî epuꞌtî pîꞌ naatîi.
29 Eꞌmarimantoꞌ yai warayoꞌ aweꞌmariꞌmaton pia wîriꞌ tîrî toꞌya inoꞌpî pe, tiaron pia pra. Tîîse aweꞌmariꞌmaton yonpa wanî moro. Tînoꞌpî pe yapisîiya eta itonpaya. Mîrîrî eta tîuya pîꞌ aweꞌmariꞌmaton yonpa atausinpa mararî pra. Mîrîrî warantî uurî atausinpan pîꞌ wai kureꞌne.
30 Mîîkîrî Cristo yapurî tamîꞌnawîronkonya eꞌpai awanî. Mîrîrî yeꞌnen urumaka toꞌya eꞌpai awanî —taꞌpî Joãoya.
31 —Mîîkîrî kaꞌ poi iipîꞌpî man tamîꞌnawîron yentai. Tîîse uurî wanî sîrîrî non pon pe. Sîrîrî non po tîîkoꞌmansenon yeseru pîꞌ eseurîma. Tîîse kaꞌ poi iipîꞌpî man tamîꞌnawîron yentai.
32 Tîneraꞌmaꞌpî, tînetaꞌpî, mîrîrî pîꞌ eeseurîma. Tîîse anîꞌya innape imaimu kupî pepîn.
33 Anîꞌya innape imaimu kupî ya, seruꞌyeꞌ pe pra Paapa wanî taiya mîrîrî.
34 Maasa pra Mîîkîrî Paapa narimaꞌpîya Paapa maimu ekaremekî mîrîrî. Mararî Tekaton tîrî Paapaya pepîn Mîîkîrî pona tîîse mararî pra itîrîiya.
35 Tînmu pînînma Iyunya mararî pra. Mîrîrî yeꞌnen tamîꞌnawîron rumakasaiꞌya man itenyaꞌ.
36 Mîîkîrî Paapa munmu kuꞌnen wanî ya innape, ipatîkarî enen tîîkoꞌmantoꞌ ton eporîiya. Moropai innape Paapa munmu kuꞌnen pepînya enen koꞌmannîtoꞌ eraꞌma pepîn. Tîîse Paapa ekoreꞌmatoꞌ koꞌmamî ipo.
