Jesus Cristo Yekare João Nîmenukaꞌpî 5:1-47
5 Tîkoꞌman pe tîîkoꞌmamî tîpo Jesus wîtîꞌpî Jerusalém pona, Judeuyamîꞌ festarî weiyu eseporî yai.
2 Jerusalém cidaderî woimaꞌtîtoꞌ manaꞌta kureꞌnan yai awanî carneiroyamîꞌ ewontoꞌ. Aminke pra mîrîrî pîꞌ tuna yenseꞌ wanîꞌpî, iteseꞌ Betesda. Tuna yenseꞌ woi awanî pemonkonyamîꞌ koꞌmantoꞌ tappîikon, miaꞌtaikin kaisarî.
3 Mîrîrî tappîikon ta pemonkonyamîꞌ wanîꞌpî arinîkon priꞌyawonkon pepîn, enkaruꞌnankon, tîkîipankon, ekeꞌnepamîꞌsan, tamîꞌnawîrî. Tuna eserentîkîꞌma nîmîkî pîꞌ toꞌ wanîꞌpî.
4 Maasa pra tiaron pensa inserî autîpîtîꞌpî mîrîrî tuna ka, moropai tuna eserentîkîꞌma pe eꞌmaiꞌnon priꞌyawon pepîn, tuna ka teenasen esepiꞌtîꞌpî.
5 Moro awanîꞌpî priꞌyawonkon pepîn koreꞌta warayoꞌ, priꞌyawon pepîn nîrî. 38 konoꞌ kaisarî aakoꞌmansaꞌ wanîꞌpî priꞌya pra.
6 Moro mîîkîrî esenunsaꞌ eraꞌmaꞌpî Jesusya. Tîkoꞌman pe aakoꞌmansaꞌ epuꞌtîꞌpî Jesusya. Mîrîrî yeꞌnen taꞌpîiya priꞌyawon pepîn pîꞌ: —Esepiꞌtîpai nan? —taꞌpîiya.
7 Priꞌyawon pepînya yuukuꞌpî: —Uyepotorî, tuna eserentîkîꞌma yai, upîikaꞌtînen ton pra awanî, tuna pia uyarî ton, yaꞌ enatoꞌpe. Moropai tînîn pîꞌ uuwarîrî uutî tanne, tiaron ewomî urawîrî —taꞌpîiya.
8 Jesusya taꞌpî ipîꞌ: —Eꞌmîꞌsaꞌkakî. Aweꞌnatoꞌ yaponseꞌ konekakî moropai asakî.
9 Mîrîrî pe rî mîîkîrî esepiꞌtîꞌpî. Tîweꞌnatoꞌ yaponseꞌ konekaꞌpîiya moropai aasarîꞌpî. Erîꞌkaꞌnîtoꞌ weiyu yai awanîꞌpî mîrîrî.
10 Mîrîrî yeꞌnen Judeuyamîꞌya esepiꞌtîꞌpî warayoꞌ panamaꞌpî. —Erîꞌkaꞌnîtoꞌ weiyu pe man —taꞌpî toꞌya ipîꞌ. —Yairî pra aweꞌnatoꞌ yaponseꞌ yarî pîꞌ nai sábado yai, uyeserukon yawîrî pra.
11 Yuukuꞌpîiya: —Kaane, aweꞌnatoꞌ yaponseꞌ yanunkî, asakî, taa pîꞌ uyepiꞌtîtîpon man —taꞌpîiya.
12 —Anîꞌ see mîîkîrî, aweꞌnatoꞌ yaponseꞌ yanunkî, asakî taatîpon? —taꞌpî toꞌya ipîꞌ.
13 Tîîse anîꞌya tepiꞌtîsaꞌ epuꞌtîiya pra mîîkîrî wanîꞌpî. Yepiꞌtî tîpo Jesus esonomîꞌpî moro arinîkon koreꞌta mîîtoꞌpe.
14 Mîrîrî tîpo Jesusya yeporîꞌpî epîremantoꞌ yewîꞌ ta. Taꞌpî Jesusya ipîꞌ: —Aꞌkî, eesepiꞌtîsaꞌ nai. Inîꞌrî imakuiꞌpî kîꞌkonekai ayeparanrîꞌpî yentainonya ayeporî namai.
15 Moropai mîîkîrî wîtîꞌpî Judeuyamîꞌ pia. —Jesus mîîkîrî uyepiꞌtîtîpon —taꞌpîiya toꞌ pîꞌ.
16 Mîrîrî kupîꞌpî Jesusya erîꞌkaꞌnîtoꞌ weiyu yai. Mîrîrî yeꞌnen Judeuyamîꞌ wanîꞌpî antarumaꞌtîpai.
17 Tîîse toꞌ pîꞌ taꞌpîiya: —Sîrîrîpe Uyun esenyakaꞌma koꞌmannîpî. Uurî nîrî esenyakaꞌmatoꞌ pîꞌ uukoꞌmamî mîrîrî warantî —taꞌpîiya.
18 Erîꞌkaꞌnîtoꞌ weiyu yai Judeuyamîꞌ koꞌmantoꞌ yawîrî Jesus koꞌmamî pra awanîꞌpî. Moropai Paapa pîꞌ eeseurîmaꞌpî tun pe awanî pîꞌ, Paapa kaisarî tîwanî pîꞌ. Mîrîrî wenai iwî yuꞌse Judeuyamîꞌ esekaꞌnunkaꞌpî.
Paapaya Imeruntîri Ton Tîrî Tînmu Pia
19 Mîrîrî yeꞌnen Jesusya toꞌ yeurîmaꞌpî: —Ayenkuꞌtîuyaꞌnîkon pepîn. Uuwarîrî îꞌ rî kupîuya eserîke pra awanî. Uyunya ikupî eraꞌmauya ya, uurîya nîrî ikupî. Îꞌ rî kuꞌnen pe Paapa wanî ya, uurî nîrî inmu ikuꞌnen pe wanî, mîrîrî warantî rî.
20 Paapa wanî tînmu yapurînen pe. Tamîꞌnawîrî tînkoneka ekaremekîiya tînmu pîꞌ. Moropai aneraꞌmaꞌpîkon yentai teesenyakaꞌmatoꞌ ekaremekîiya kupî sîrîrî tînmu pîꞌ mîrîrî pîꞌ eesenumenkakonpa.
21 Paapa wanî isaꞌmantaꞌsan pîmîꞌsaꞌkanen pe. Inîꞌrî enen toꞌ eꞌtoꞌ ton tîrîiya. Mîrîrî warantî nîrî ituꞌse tîweꞌtoꞌ yawîrî enen koꞌmannîtoꞌ ton tîrî inmuya.
22 Paapaya taa pra awanî anîꞌrî pîꞌ “Imakuiꞌpî amîrî. Atîkî apoꞌ yaꞌ”. Mîrîrî yeꞌka teesenyakaꞌmatoꞌ rumakasaiꞌya tînmu pia.
23 Mîrîrî kupîꞌpîiya tamîꞌnawîronkonya tapurî kaisarî tînmu yapurîtoꞌpe toꞌya. Anîꞌya inmu yapurî pra awanî ya, Paapa nîrî tînmu yarimatîpon yapurîiya pepîn.
24 Ayenkuꞌtîuyaꞌnîkon pepîn. Umaimu yawîrî awanîkon ya, moropai innape uyarimatîpon kupîyaꞌnîkon ya, ipatîkarî aakoꞌmamîkon pe naatîi uupia. “Imakuiꞌsan amîrîꞌnîkon, atîtî apoꞌ yaꞌ”, tauya eserîke pra awanî apîꞌnîkon. Saꞌmantantoꞌ esuwaꞌkasaꞌ, enen aakoꞌmamîkon pe naatîi.
25 Ayenkuꞌtîuyaꞌnîkon pepîn. Awanî kupî sîrîrî moropai sîrîrî puꞌkuru awanî see warantî. Tiaronkon Paapa winîpai tîîkoꞌmantoꞌkon yapisîtîponkon pepînya Paapa munmu maimu eta pe man. Moropai inkamoroya yapisî kupî sîrîrî.
26 Maasa pra tîîwarîrî enen Paapa koꞌmamî warantî, enen tînmu koꞌmamî nîrî. Mîrîrî yeꞌnen itîrîuya eserîke awanî inkamoro pia.
27 Moropai tînmu pia meruntî tîrîꞌpî Paapaya pemonkonyamîꞌ repatoꞌpeuya morî ke moropai eꞌtarumaꞌtîntoꞌ ke. Maasa pra uurî wanî kaꞌ poi iipîꞌpî pemonkon pe.
28 Mîrîrî tauya manniꞌ pîꞌ tîmuꞌtunpai pra eꞌtî. Awanî kupî sîrîrî, tamîꞌnawîronkon isaꞌmantaꞌsanya umaimu eta kupî sîrîrî.
29 Mîrîrî yai toꞌ eꞌmîꞌsaꞌka kupî sîrîrî. Morî kupîtîponkon eꞌmîꞌsaꞌka kupî sîrîrî ipatîkarî enen tîwanîkonpa uupia. Moropai imakuiꞌpî kupîtîponkon yenumî Paapaya kupî sîrîrî ipatîkarî toꞌ eꞌtarumaꞌtîtoꞌpe —taꞌpî Jesusya.
Jesus Pîꞌ Teeseurîmasanon
30 —Uuwarîrî îꞌ rî kupîuya pepîn. Paapaya uyaipontî yawîrî pemonkonyamîꞌ repauya. Yairî toꞌ repauya mîrîrî maasa ituꞌse eꞌtoꞌ kupîuya pepîn mîrîrî. Tîîse ituꞌse uyarimatîpon eꞌtoꞌ kupîuya.
31 Uuwarîrî, tiwinsarî siꞌma, uyeseru pîꞌ eseurîmasaꞌ ya, seruꞌyeꞌ pe wanî eꞌpainon.
32 Tîîse moro man tiaron uyeseru pîꞌ teeseurîmasen. Yairî upîꞌ eeseurîmatoꞌ man, seruꞌ pe pra. Epuꞌtî pîꞌ wai.
33 João Batista ekaranmapo meꞌpoꞌpîyaꞌnîkon upîꞌ moropai yairon ekaremekîꞌpîiya.
34 Uurî, pemonkon maimu yapurînen puꞌkuru pepîn. Tîîse mîrîrî tauya apîꞌnîkon pîikaꞌtîtoꞌpeuya.
35 João eꞌpîtîꞌpî uꞌkumaꞌtukon warantî ewaron yaꞌ. Uꞌkumaꞌtukonya uweiyuꞌmakon pîꞌ atausinpan warantî aatausinpaꞌpîkon João pîꞌ tîkoꞌman pe pra.
36 Tîîse João maimu yentainon uyeseru ekaremeꞌnen moro wanî. Esenyakaꞌmatoꞌ Paapa nîtîrîꞌpî, aretîꞌkatoꞌpeuya aneraꞌmakon ton kupîuya wenai Paapa narimaꞌpî pe uyepuꞌtî tamîꞌnawîronkonya eꞌpainon.
37 Moropai uyarimatîpon Paapa eseurîmasaꞌ nîrî upîꞌ, tînmu pe wanî pîꞌ. Oꞌnon pata imaimu etatîponkon pepîn amîrîꞌnîkon. Mîîkîrî eraꞌmatîponkon pepîn amîrîꞌnîkon.
38 Moropai imaimu koꞌmamî pra awanî ayewankon yaꞌ maasa pra innape inarimaꞌpî kupîyaꞌnîkon pra awanî.
39 Paapa maimu pîꞌ eesenupakon ipatîkarî enen aakoꞌmantoꞌkon ton eporî yuꞌse. Moropai uurî pîꞌ eseurîmakoi Paapa maimu.
40 Tîîse upîꞌ enen aakoꞌmantoꞌkon ton esatîyaꞌnîkon pepîn.
41 Morî pe upîꞌ pemonkonyamîꞌ eseurîma yuꞌse wai, tauya pepîn. Mîrîrî yeꞌka yuwauya pepîn.
42 Tîîse ayewankon yaꞌ Paapa pînînmayaꞌnîkon pra awanîkon. Mîrîrî epuꞌtî pîꞌ wai.
43 Aapiaꞌnîkon uuiꞌsaꞌ sîrîrî Paapa maimu pe, inarimaꞌpî pe, tîîse uyapisîyaꞌnîkon pra awanîꞌpîkon. Tîîwarîrî tiaron iiꞌsaꞌ ya, yapisîyaꞌnîkon eserîke awanî.
44 Apîꞌnîkon morî pe ayonpakon eseurîma yuꞌse eesekaꞌnunkakon tanne, innape ukupîyaꞌnîkon eserîke pra awanî. Morî pe tiwinan Paapa eseurîmatoꞌ apîꞌnîkon yuwayaꞌnîkon pepîn.
45 Paapa pîꞌ imakuiꞌpî pe puꞌkuru toꞌ man tauya pîꞌ kîsenumenkatî. Tauya pepîn. Moro man apîꞌnîkon eseurîmaton, imakuiꞌpî pe awanîkon ekaremeꞌnen pe. Moisés nurîꞌtî mîîkîrî, anna napurî ton taayaꞌnîkon neꞌtîkini ipîꞌ.
46 Tîîse innape Moisés nurîꞌtîya yenupantoꞌ kupîyaꞌnîkon awanî ya, uurî nîrî kupîyaꞌnîkon eꞌpai awanî innape. Maasa pra upîꞌ Moisés nurîꞌtî eseurîmaꞌpî.
47 Tîîse innape Moisés nurîꞌtî yenupatoꞌ kupîyaꞌnîkon pra awanî ya, innape umaimu kupîyaꞌnîkon pepîn nîrî —taꞌpî Jesusya.
