Jesus Cristo Yekare João Nîmenukaꞌpî 6:1-71
6 Mîrîrî tîpo Jesus wîtîꞌpî Galiléia kuꞌpî ratai pona. Mîrîrî ikuꞌpî eseꞌ wanîꞌpî tiaron pe nîrî, Tiberíades iteseꞌ.
2 Moropai arinîkon pemonkonyamîꞌ wîtîꞌpî iteꞌmaꞌpî pîꞌ. Ipîkîrî toꞌ wîtîꞌpî priꞌyawonkon pepîn yepiꞌtîpîtîiya eraꞌma tîuyaꞌnîkon yeꞌnen anîꞌya ikupî eserîkan pepîn eraꞌma tîuyaꞌnîkon yeꞌnen.
3 Moropai Jesus enukuꞌpî wîꞌ pona tînenupaꞌsan pokonpe. Wîꞌ po toꞌ ereutaꞌpî.
4 Moropai awanîꞌpî Judeuyamîꞌ entamoꞌkatoꞌ weiyu aminke pra, iteseꞌ páscoa.
5 Arinîkon pemonkonyamîꞌ erepamî tîîpia eraꞌmaꞌpî Jesusya. Moropai Filipe pîꞌ taꞌpîiya: —Oꞌnon pata toꞌ yuu ton yenna eꞌpainon toꞌ entamoꞌkatoꞌpe?
6 Tîîse îꞌ taa Filipeya anepuꞌpai awanîꞌpî. Aasîrî îꞌ kupî tîuya epuꞌtîꞌpîiya.
7 Filipeya taꞌpî: —Toꞌ yuu yepeꞌ ton pe 200 wei kaisarî esenyakaꞌmannîꞌpî yepeꞌpî tîꞌkasaꞌ ya, mîîwîni tîîse toꞌ maꞌre awanî. Tamîꞌnawîronkonya iipiaꞌpî mîrikkî yapisî eserîke pra awanî —taꞌpîiya.
8 Moropai awanîꞌpî Jesus nenupaꞌpî iteseꞌ André, Simão Pedro yakon. Mîîkîrîya taꞌpî Jesus pîꞌ:
9 —Moro man more pia cevada puusaꞌ, pão, miaꞌtaikin kaisarî moropai moroꞌyamîꞌ asakîꞌne. Tîîse arinîkon yepiꞌtîiya eserîke pra awanî.
10 Mîrîrî eta tîpo, Jesusya taꞌpî tînenupaꞌsan pîꞌ: —Tamîꞌnawîronkon ereutatoꞌpe non pona kaꞌtî toꞌ pîꞌ. Parîꞌ pe awanîꞌpî moro. Mîrîrî yeꞌnen Jesus maimu pe toꞌ ereutaꞌpî non pona. Warayoꞌkon wanîꞌpî 5.000 yairî.
11 Moropai pão manniꞌ yapisîꞌpî Jesusya moropai taꞌpîiya Paapa pîꞌ: —Morî pe man Paapa. Anna yuu ton tîrî pîꞌ nai —taꞌpîiya. Moropai toꞌ kaisarî itîîpîtî meꞌpoꞌpîiya. Mîrîrî warantî nîrî moroꞌyamîꞌ tîrîꞌpîiya, ituꞌse toꞌ eꞌtoꞌ pîkîrî.
12 Awore tamîꞌnawîronkon enaꞌpî. Mîrîrî tîpo tînenupaꞌsan pîꞌ taꞌpî Jesusya: —Iipiaꞌsan eꞌnîmîꞌsaꞌ yannuꞌtî aamaꞌta namai.
13 Imaimu yawîrî ikupîꞌpî toꞌya. Miaꞌtaikin kaisarî cevada puusaꞌ yonparîꞌpî yannukuꞌpî toꞌya. 12 waikaraꞌpî kaisarî itîrîꞌpîiya, entamoꞌkaꞌsan yuu yonparîꞌpîya.
14 Mîrîrî kupî Jesusya pîꞌ pemonkonyamîꞌ esenumenkaꞌpî. Taꞌpî toꞌya: —Mîserî Paapa maimu ekaremeꞌnen pena inekaremekîꞌpî, sîrîrî non pona tuiꞌsen mîîkîrî.
15 Mîrîrî yeꞌnen anapiꞌpai toꞌ wanîꞌpî tesaꞌkon pe aweꞌtoꞌpe rei pe kaiꞌma. Mîrîrî toꞌ esenumenkatoꞌ epuꞌtîꞌpî Jesusya. Mîrîrî yuꞌse pra tîwanî yeꞌnen attîꞌpî inîꞌrî tiwinsarî wîꞌ pona.
Tuna Poro Jesus Asarî
16 Pata koꞌmamî pe Jesus nenupaꞌsan autîꞌpî ikuꞌpî ena pona.
17 Kanau yaꞌ toꞌ asaraꞌtîꞌpî. Moropai toꞌ eseꞌmaꞌtîꞌpî Cafarnaum pona, ikuꞌpî ratai pona. Moropai pata ewaronpamîꞌpî maasa toꞌ pia Jesus erepansaꞌ pra tîîse.
18 Mîrîrî tanne, aꞌsitun pe eenaꞌpî mararî pra. Sipa sipa pe tuna enaꞌpî.
19 Aminke maꞌre toꞌ wîtîsaꞌ tanne, yai pra 5 ou 6 km., tuna poro Jesus asarî eraꞌmaꞌpî toꞌya tîponayaꞌnîkon. Mararî pra toꞌ esiꞌnîpîꞌpî ipîꞌ.
20 Tîîse Jesusya taꞌpî toꞌ pîꞌ: —Jesus uurî. Teesiꞌnîꞌse pra eꞌtî.
21 Eerepamîꞌpî toꞌ pia. Taatausinpai yapisîꞌpî toꞌya kanau yaꞌ. Mîrîrî pe rî toꞌ erepamîꞌpî ikuꞌpî ratai pona tuutîtoꞌkon yaꞌ.
22 Tiaron wei yai arinîkon pemonkonyamîꞌ Jesus yeꞌmaꞌpî pîꞌ itîꞌsan eꞌnîmîꞌpî ikuꞌpî ena po. Inkamoroya Jesus yuwaꞌpî. Tiwinan kanau pataꞌpî neken eporîꞌpî toꞌya kasapan po, Jesus nenupaꞌsan yenseꞌ pataꞌpî. Tînenupaꞌsan pokonpe Jesus asaraꞌtî pra awanî eraꞌmaꞌpî toꞌya. Mîrîrî epuꞌtîꞌpî toꞌya. Jesus ton pra toꞌ eseꞌmaꞌtîꞌpî.
23 Tîîse tiaronkon kanaukon erepansaꞌ wanîꞌpî aminke pra Jesusya pemonkonyamîꞌ yekkariꞌtîꞌpî Paapa yarakkîrî teeseurîma pataꞌ, Tiberíades cidaderî poinokon kanaukon. Mîrîrî eraꞌmaꞌpî toꞌya.
24 Anîꞌ ton pra awanî eraꞌmaꞌpî toꞌya, Jesus ton pra moropai inenupaꞌsan ton pra. Mîrîrî yeꞌnen toꞌ asaraꞌtîꞌpî kanau yaꞌ nîrî moropai toꞌ wîtîꞌpî Cafarnaum cidaderî pona Jesus yuwai.
Uyukon Ton Paapa Nîtîrî
25 Ikuꞌpî ratai po Jesus eporî tîuyaꞌnîkon pe, ekaranmapoꞌpî toꞌya: —Anna yenupanen, îꞌ pensa eerepamîꞌpî tarîniꞌ? —taꞌpî toꞌya.
26 Jesusya taꞌpî toꞌ pîꞌ: —Ayenkuꞌtîyaꞌnîkon pepîn. Uurî yuwa pîꞌ naatîi awore awanîkon pîkîrî ayekkariꞌtîsauꞌyaꞌnîkon wenai. Mîrîrî anîꞌya ikupî eserîkan pepîn kuꞌsauꞌya eraꞌmayaꞌnîkon tanne, tîîse îꞌ taatoꞌpe awanî epuꞌtîyaꞌnîkon pepîn.
27 Ayekkarikon ton pîꞌ kîsekaꞌnunkatî mîrîrî tîweꞌtîꞌkasen pîꞌ. Tîîse esenyakaꞌmatî untîrî ayekkarikon pîꞌ, ipatîkarî enen aakoꞌmantoꞌkon tîînen pîꞌ. Uurî kaꞌ poi iipîꞌpî pemonkon pe mîrîrî yeꞌka tîînen. Maasa pra tîwakîri pe Uyunkon Paapaya uyaipontîꞌpî itîîtoꞌpeuya.
28 —Îꞌ kupî annaya yuꞌse Paapa wanî? —taꞌpî toꞌya Jesus pîꞌ.
29 Jesusya taꞌpî: —Innape Paapa narimaꞌpî kuꞌtî. Mîrîrî kupîyaꞌnîkon yuꞌse Paapa wanî mîrîrî.
30 Mîrîrî pîꞌ taꞌpî toꞌya: —Innape akupî annaya yuꞌse awanî ya, anna neraꞌma ton konekakî. Mîrîrî eraꞌma annaya moropai innape akupî annaya. Îꞌ konekaya? —taꞌpî toꞌya.
31 —Anna tamokon Moisés nurîꞌtî yarakkîronkon entamoꞌkaꞌpî Paapa nîtîrîꞌpî pîꞌ iteseꞌ maná, keren po. Paapa kaaretarîya taa:“Toꞌ yuu ton tîrîꞌpîiya kaꞌ poinon, toꞌ entamoꞌkatoꞌpe”,
taiya —taꞌpî toꞌya Jesus pîꞌ.
32 Moropai Jesusya taꞌpî toꞌ pîꞌ: —Moisés nurîꞌtî nîtîrîꞌpî pepîn mîrîrî penaronkon yuu ton, tîîse mîrîrî Paapa nîtîrîꞌpî. Tîîse uyun nîtîrî sîrîrîpe aapiaꞌnîkon yairon, ayukon ton kaꞌ poinon.
33 Mîrîrî ayukon ton Paapa nîtîrî iipî kaꞌ poi moropai enen tîîkoꞌmantoꞌkon ton tîrîiya sîrîrî non po tîîkoꞌmansenon pia.
34 Moropai taꞌpî toꞌya Jesus pîꞌ: —Anna yenupanen, anna yuu ton mîrîrî yeꞌka tîîkî ipatîkarî.
35 Taꞌpî Jesusya toꞌ pîꞌ: —Uurî mîîkîrî, manniꞌ ayukon ton, ipatîkarî aakoꞌmantoꞌkon tîînen. Paapa anepuꞌpainon iipî ya uupia, epuꞌtîiya. Moropai innape ukupîtîpon ena morî pe, ituꞌse tîweꞌtoꞌ pîkîrî.
36 Tauya neꞌtîkini uyeraꞌma pîꞌ naatîi. Mîîwîni tîîse innape ukupîyaꞌnîkon pra naatîi.
37 Tîîse Paapa nîtîrîꞌsan pemonkonyamîꞌ iipî uupia tamîꞌnawîrî. Moropai uupia tuiꞌsen yaipontîuya pepîn uupiapai.
38 Maasa pra ituꞌse eꞌtoꞌ kuꞌse uuiꞌsaꞌ pra wai kaꞌ poi. Tîîse ituꞌse uyarimatîpon eꞌtoꞌ kuꞌse iipîꞌpî uurî.
39 Paapaya uyarimaꞌpî. Tîntîrîꞌsan koꞌmannîpîuya yuꞌse Paapa wanî, tamîꞌnawîrî, tiwinan atakaꞌma namai. Moropai tamîꞌnawîronkon insanan pîmîꞌsaꞌkauya yuꞌse awanî tîîsaꞌmantakon tîpo tiwinanoꞌpî wei yai. Mîrîrî yuꞌse Paapa wanî.
40 Paapa munmu pe uyeraꞌmatîponkon, innape ukupîtîponkon koꞌmamî yuꞌse uyun wanî ipatîkarî. Toꞌ pîmîꞌsaꞌkauya yuꞌse Paapa wanî tiwinanoꞌpî wei yai.
41 Tîîse ipîꞌ Judeuyamîꞌ atakoꞌmenkaꞌpî, —Uurî ayukon pe kaꞌ poi iipîꞌpî —taiya yeꞌnen.
42 Taapîtîꞌpî toꞌya: —José munmu mîserî warayoꞌ, Jesus iteseꞌ —taꞌpî toꞌya. —Iyun moropai isan anna nepuꞌtî. Innape nai? Oꞌnon yeꞌka pe “Kaꞌ poi iipîꞌpî uurî”, taiya mîrîrî? —kaiꞌma toꞌ eseurîmapîtîꞌpî tîîwarîrîꞌnîkon.
43 Jesusya taꞌpî toꞌ pîꞌ: —Amaꞌ pe kîseurîmatî upîꞌ.
44 Tîîwarîrî anîꞌ iipî pepîn uupia. Tîîse Paapa uyarimatîponya enepî ya, eerepamî. Moropai iꞌmîꞌsaꞌkauya tiwinanoꞌpî wei yai.
45 Penaroꞌkon Paapa maimu ekaremeꞌnenan maimu rîꞌpîya taa see warantî:Moropai Paapaya inkamoro yenupa, tamîꞌnawîronkon.
Mîrîrî warantî aweꞌmenukasaꞌ wanîꞌpî. Mîrîrî yeꞌnen anîꞌrîya Paapa maimu etasaꞌ ya, moropai Paapa pîꞌ eesenupasaꞌ ya, uupia aaipî.
46 Anîꞌya Paapa eraꞌmasaꞌ pra man tîîse uurî, iipiapainon. Uurî Paapa eraꞌmatîpon.
47 Ayenkuꞌtîuyaꞌnîkon pepîn. Anîꞌya innape ukuꞌsaꞌ ya, ipatîkarî enen tîîkoꞌmantoꞌ ton eposaiꞌya mîrîrî.
48 Inna, uurî ayukon, enen koꞌmannîtoꞌ tîînen.
49 Atamokon nurîꞌsan Moisés piawonkon entamoꞌkaꞌpî kaꞌ poi Paapa nîtîrîꞌpî pîꞌ, maná pîꞌ, tîîse toꞌ saꞌmantaꞌpî.
50 Tîîse sîrîrî man ayukon pe kaꞌ poinon. Mîrîrî pîꞌ entamoꞌkaꞌsan saꞌmanta pepîn.
51 Uurî mîîkîrî ayukon, enenan, kaꞌ poi iipîꞌpî. Uurî pîꞌ anîꞌ entamoꞌka ya, ipatîkarî aakoꞌmamî enen. Ayukon pe untîrî wanî upun pe. Upun tîrîuya kupî sîrîrî pemonkonyamîꞌya tîîkoꞌmantoꞌkon epotoꞌpe enen ipatîkarî —taꞌpî Jesusya.
52 Mîrîrî pîꞌ Judeuyamîꞌ esiyuꞌpîtîꞌpî tîmurukun pe siꞌma. —Oꞌnon yeꞌka pe mîserî warayoꞌya tîpun tîrî anna yoꞌ pe?
53 Moropai Jesusya taꞌpî toꞌ pîꞌ: —Uurî kaꞌ poi iipîꞌpî pemonkon pe, upun pîꞌ awentamoꞌkakon pra awanî ya, umînî enîrîyaꞌnîkon pra awanî ya, enen awanîkon pepîn.
54 Upun yanîtîpon, umînî enîrîtîpon, mîîkîrîya ipatîkarî enen tîîkoꞌmantoꞌ ton eporî moropai iꞌmîꞌsaꞌkauya tiwinanoꞌpî wei yai.
55 Upun wanî ayoꞌkon yairon pe moropai umînî wanî awukukon yairon pe.
56 Upun pîꞌ entamoꞌkaꞌpî, umînî enîrîtîpon koꞌmamî uupia moropai uukoꞌmamî iipia.
57 Paapa, enen tîîkoꞌmansenya uyaipontîꞌpî moropai enen ukoꞌmannîpîiya. Mîrîrî warantî nîrî upîꞌ entamoꞌkaꞌpî koꞌmannîpîuya enen.
58 Mîrîrî yeꞌnen tauya kaꞌ poi iipîꞌpî uurî wanî awentamoꞌkakonpa. Atamokon rîꞌsan entamoꞌkaꞌpî maná pîꞌ tîîse toꞌ saꞌmantaꞌpî. Mîrîrî warantî pra sîrîrî wanî. Sîrîrî tauya uurî pîꞌ entamoꞌkaꞌpî koꞌmamî ipatîkarî enen —taꞌpî Jesusya.
59 Mîrîrî warantî Jesusya toꞌ yenupaꞌpî Judeuyamîꞌ epereꞌtoꞌ yewîꞌ ta Cafarnaum cidaderî po.
Arinîkon Inenupaꞌsanya Jesus Rumaka
60 Tîîse arinîkon Jesus maimu pîꞌ teesenupasanon esewankonoꞌmaꞌpî imaimu pîꞌ. —Saꞌme puꞌkuru imaimu man —taꞌpî toꞌya. —Anîꞌya innape ikupî eserîke pra man.
61 Tîmaimu pîꞌ tînenupaꞌsan atakoꞌmenka epuꞌtîꞌpî Jesusya. —Mîrîrî pîꞌ eesewankonoꞌmakon mîrîrî? —taꞌpîiya toꞌ pîꞌ.
62 —Mîrîrî pîꞌ aatakaꞌmakon ya, îꞌ kaiꞌma eesenumenkakon uurî kaꞌ poi iipîꞌpî pemonkon pe enuku kaꞌ pona eraꞌmayaꞌnîkon ya, manniꞌ uukoꞌmamîꞌpî pata pona?
63 Mîrîrî enen koꞌmannîtoꞌ pîꞌ eseurîma manniꞌ wanî Morî Yekaton Wannî winîpaino pe. Tîîwarîrî pemonkonya yeporî pepîn. Apîꞌnîkon unekaremekîꞌpî wanî ayekatonkon ton pe moropai enen aakoꞌmantoꞌkon tîînen pe.
64 Tîîse tiaronkon amîrîꞌnîkonya innape ukupî pra man —taꞌpî Jesusya toꞌ pîꞌ.
Aasîrî Jesusya innape tîkuꞌnenan pepîn epuꞌtîꞌpî moropai anîꞌya tekaremekî teyatonon pîꞌ epuꞌtîꞌpîiya.
65 Taꞌpîiya toꞌ pîꞌ: —Mîrîrî warantî awanî yeꞌnen anîꞌ iipî pepîn uupia Paapaya enepî pra awanî ya, tauya neꞌtîkini.
66 Mîrîrî yai arinîkon Jesus nenupaꞌsanya irumakaꞌpî. Inîꞌrî ipîkîrî toꞌ wîtî pra awanîꞌpî.
67 Moropai Jesusya taꞌpî tînenupaꞌsan pîꞌ asakîꞌne puꞌ pona tîîmoꞌtaiꞌnîkon, (12) kaisaronkon pîꞌ: —Amîrîꞌnîkon kanan? Urumakayaꞌnîkon nîrî?
68 Tîîse Simão Pedroya taꞌpî ipîꞌ: —Uyepotorî, anîꞌ pia anna wîtî? Amîrî neken ipatîkarî enen anna koꞌmantoꞌ yekare esaꞌ.
69 Innape akupî pîꞌ anna man. Cristo pe awanî epuꞌtî pîꞌ anna man. Enen tîîkoꞌmansen Paapa munmu pe awanî —taꞌpîiya.
70 Jesusya taꞌpî: —Unmoꞌkaꞌsan amîrîꞌnîkon asakîꞌne puꞌ pona tîîmoꞌtaiꞌnîkon, (12) kaisaronkon, moropai akoreꞌtaꞌnîkon man tiwinan Makui poitîrî.
71 (Mîrîrî taꞌpîiya Simão munmu Judas Iscariotes pîꞌ. Maasa pra mîîkîrî Judas wanî tîîse asakîꞌne puꞌ pona tîîmoꞌtaiꞌnîkon, (12) kaisaronkon yonpa pe, mîîkîrîya tekaremekî maasa, mîrîrî epuꞌtîꞌpî Jesusya.)
