Jesus Cristo Yekare João Nîmenukaꞌpî 7:1-53
7 Mîrîrî tîpo Jesus asarîꞌpî Galiléia pata yapîꞌ tîîse Judéia pata yaꞌ eewomî pra awanîꞌpî. Maasa pra Judéia ponkon Judeuyamîꞌ wanîꞌpî Jesus anwîpai.
2 Judeuyamîꞌ festarî weiyu eseporîꞌpî iteseꞌ tîtappîikon festarî.
3 Mîrîrî yai Jesus yakontononya taꞌpî ipîꞌ: —Judéia pona matîi ayeseru ankupî eraꞌmatoꞌpe anenupaꞌsanya.
4 Tamîꞌnawîronkonya tepuꞌtî yuꞌsan anîꞌ wanî ya, amaꞌ pe îꞌ rî kupîiya pepîn. Anîꞌya ikupî eserîkan pepîn ankonekapai awanî ya, aronne mîkonekai tamîꞌnawîronkon esenumenkatoꞌpe apîꞌ —taꞌpî toꞌya.
5 Mîrîrî taꞌpî toꞌya maasa pra innape ikupî tîuyaꞌnîkon pra awanî yeꞌnen.
6 Jesusya taꞌpî toꞌ pîꞌ: —Îꞌ waniꞌ pra amîrîꞌnîkon wîtî mîrîrî. Tîîse uurî uutî pepîn. Uweiyu erepansaꞌ pra man.
7 Tewanmakon pe tamîꞌnawîronkonya akupîkon pepîn, tîîse tewanmakon pe ukuꞌsaꞌ toꞌya. Imakuiꞌpî pe toꞌ wanî kaiꞌma toꞌ panamanen uurî toꞌ yewanma pe.
8 Entamoꞌkantoꞌ pona matîtîi. Uurî uutî pepîn sîrîrî maasa. Uweiyu erepansaꞌ pra man.
9 Mîrîrî taa tîpo Jesus koꞌmamîꞌpî moro Galiléia po.
10 Moropai itakontonon wîtîꞌpî festa pona. Mîrîrî tîpo Jesus nîrî wîtîꞌpî toꞌ yeꞌmaꞌpî pîꞌ, tîîse amaꞌ pe attîꞌpî anîꞌya tepuꞌtî namai.
11 Jesus yuwa pîꞌ Judeuyamîꞌ wanîꞌpî entamoꞌkantoꞌ yai. —Oꞌnon pata awanî? —taꞌpî toꞌya. —Aaiꞌsaꞌ pra kaꞌrî awanî?
12 Arinîkon eseurîmapîtîꞌpî ipîꞌ. —Morî pe mîîkîrî man —kaiꞌma tiaronkon eseurîmaꞌpî. Tîîse tiaronkonya taꞌpî: —Kaane, morî pepîn mîîkîrî. Pemonkonyamîꞌ yenkuꞌtînen mîîkîrî —taꞌpî toꞌya.
13 Tîîse amaꞌ pe toꞌ eseurîmapîtîꞌpî ipîꞌ. Aronne toꞌ eseurîma pra awanîꞌpî tepotorîkon nama tîuyaꞌnîkon yeꞌnen.
Pemonkonyamîꞌ Yenupa Jesusya Festa Po
14 Moropai festa arakkita pairî tîîse, Jesus ewomîꞌpî Judeuyamîꞌ epîrematoꞌ yewîꞌ ta. Moro pemonkonyamîꞌ yenupaꞌpîiya.
15 Jesusya tenupakon pîꞌ Judeuyamîꞌ esenumenkaꞌpî kureꞌne. —Oꞌnon yeꞌka mîserî warayoꞌ esenupaꞌpî pepîn teuren, tîîse uurîꞌnîkon yenupaiya epuꞌnen ke? —kaiꞌma toꞌ eseurîmaꞌpî.
16 Jesusya taꞌpî toꞌ pîꞌ: —Esenumenkatoꞌ ke ayenupauyaꞌnîkon pepîn mîrîrî, tîîse uyarimatîpon maimu pîꞌ ayenupauyaꞌnîkon.
17 Ituꞌse Paapa eꞌtoꞌ ankuꞌpainon wanî ya, mîîkîrîya epuꞌtî anîꞌ maimu pe eseurîma, uuwarîrî pra, tîîse Paapa maimu pe.
18 Tîîwarîrî tîpîꞌrî teeseurîmasen wanî ya, ipîkku pe eꞌpai awanî mîrîrî. Tîîse uurî, ipîkku pe uyarimatîpon wanî epuꞌtî yuꞌse wanî. Mîrîrî yeꞌnen yairon uurî. Imakuiꞌpî unkupîꞌpî ton pra man.
19 Paapa maimu ankupîkon ton ekaremekîꞌpî Moisés nurîꞌtîya. Mîrîrî man aapiaꞌnîkon tîîse mîrîrî yawîrî aakoꞌmamîkon pra naatîi. Îꞌ waniꞌ awanî yeꞌnen uurî anwîpai awanîkon mîrîrî?
20 Mîrîrî yuukuꞌpî toꞌya Jesus maimu: —Imariwaꞌkaꞌ pe nai. Anîꞌse mîîkîrî anwîpainon? —taꞌpî toꞌya.
21 Jesusya taꞌpî: —Tiwin ikoneka pîꞌ wai, ikupî eserîkan pepîn erîꞌkaꞌnîtoꞌ weiyu yai. Tîîse mîrîrî pîꞌ eesewankonoꞌmakon, erîꞌkaꞌnîtoꞌ weiyu yai ikuꞌsauꞌya pîꞌ.
22 Tîîse erîꞌkaꞌnîtoꞌ weiyu yai anmukukon mere piꞌpî yaꞌtîyaꞌnîkon, maasa pra Moisés nurîꞌtîya ayeserukon ton tîrîꞌpî aapiaꞌnîkon ikupîkonpa. Tîîse mîrîrî wanî Moisés nurîꞌtî winîpainon pepîn tîîse penaronkon, irawîronkon itamokon nurîꞌsan winîpainon.
23 Mîrîrî warantî Moisés nurîꞌtîya yenupatoꞌ esuwaꞌka namai anmukukon mere piꞌpî yaꞌtîyaꞌnîkon erîꞌkaꞌnîtoꞌ weiyu yai. Îꞌ waniꞌ awanî yeꞌnen eekoreꞌmasaꞌkon priꞌyawon pepîn yepiꞌtîsauꞌya pîꞌ? —taꞌpîiya.
24 —Teesenumenkai pra “Imakuiꞌpî pe man”, taayaꞌnîkon eꞌpai pra man. Morî pe esenumenkatî tînîn pîꞌ eeseurîmakon rawîrî yairî eeseurîmakonpa.
Cristo Pe Jesus Wanî Pîꞌ Tiaronkon Esenumenka
25 Moropai tiaronkon Jerusalém ponkon eseurîmaꞌpî tonpakon yarakkîrî. —Mîîkîrî naka anwîpai toꞌ wanî manniꞌ?
26 Aꞌkî, aronne eeseurîma moropai îꞌ taa toꞌya pra awanî ipîꞌ. “Paapa nîmenkaꞌpî Cristo pe awanî” kaiꞌma uyesaꞌkon esenumenka ipîꞌ kaꞌrî —taꞌpî toꞌya.
27 —Tîîse Cristo pepîn mîîkîrî. Anna nepuꞌtî mîserî warayoꞌ oꞌnon pata painon. Tîîse Cristo, Paapa nîmenkaꞌpî iipî yai, oꞌnon pata pai aaipî epuꞌtî anîꞌya pepîn —taꞌpî toꞌya.
28 Tamîꞌnawîronkon yenupa pe epîremantoꞌ yewîꞌ ta, Jesus entaimeꞌpî aronne: —Inna, uyepuꞌnenan amîrîꞌnîkon —taꞌpîiya. —Oꞌnon pata paino pe wanî epuꞌtî pîꞌ naatîi, tîîse uuwarîrî iipîꞌpî pepîn uurî. Uyarimaꞌtîpon wanî yairon pe puꞌkuru. Mîîkîrî epuꞌnenan pepîn amîrîꞌnîkon.
29 Tîîse uurî epuꞌnen. Iipiapainon uurî. Inarimaꞌpî uurî —taꞌpîiya toꞌ pîꞌ.
30 Mîrîrî yai Jesus anapiꞌpai toꞌ wanîꞌpî, tîîse anîꞌya yapisî pra awanîꞌpî, maasa pra iweiyu erepansaꞌ pra awanî yeꞌnen.
31 Moropai arinîkonya innape Jesus kupîꞌpî. —Cristo pe awanî eserîke epuꞌtî pîꞌ anna man. Maasa pra Cristo, Paapa nîmenkaꞌpî erepamî yai, mîserî warayoꞌ nîkupîꞌpî yentai konekaiya eserîke pra man —taꞌpî toꞌya.
32 Mîrîrî warantî pemonkonyamîꞌ eseurîma etaꞌpî fariseuyamîꞌya moropai teepîremasanon esanonkonya tîwakîrikon pe pra. Mîrîrî yeꞌnen epîremantoꞌ yewîꞌ eraꞌmanenan yarimaꞌpî toꞌya Jesus yapiꞌse.
33 Moropai Jesusya taꞌpî tamîꞌnawîronkon pîꞌ: —Mararî uukoꞌmantoꞌ man amîrîꞌnîkon koreꞌta. Mîrîrî tîpo uutî pe wai uyarimatîpon pia.
34 Uutîꞌpî pataꞌpî yaꞌ uyuwayaꞌnîkon kupî sîrîrî tîîse uyeporîyaꞌnîkon pepîn. Moropai uupia attîkon eserîke pra awanîkon nîrî —taꞌpîiya.
35 Mîrîrî taiya pîꞌ Judeuyamîꞌ eseurîmaꞌpî tîîwarîrîꞌnîkon. —Oꞌnon pata mîîkîrî wîtî mîrîrî anîꞌya teporî namai? Yai pra Judeuyamîꞌ Gregoyamîꞌ pata poro eꞌparaipîkaꞌsan koreꞌta attî kaꞌrî Gregoyamîꞌ yenupai.
36 Oꞌnon yeꞌka pe awanî koo? Îꞌ pîꞌ eeseurîma esepuꞌtî pra man. Uyuwayaꞌnîkon kupî sîrîrî tîîse uyeporîyaꞌnîkon pepîn. Moropai uupia aaipîkon pepîn nîrî taiya manniꞌ —kaiꞌma toꞌ eseurîmaꞌpî.
37 Mîrîrî tîpo Judeuyamîꞌ festarî ataretîꞌka weiyu yai awanîꞌpî. Ipîkku panpîꞌ mîrîrî wei wanîꞌpî toꞌ ataretîꞌka yeꞌnen. Mîrîrî yai Jesus eꞌmîꞌsaꞌkaꞌpî toꞌ koreꞌta. Aronne awentaimeꞌpî. —Tuna aninnîpainon wanî ya, uupia asiꞌkî moropai awuku ton eporîya.
38 Paapa maimu eꞌmenukasaꞌya taasaꞌ yawîrî, innape ukuꞌnen yewan yapai kureꞌne teepaꞌkasen tuna wanî pe man, manniꞌ enen koꞌmannîtoꞌ tîînen —taꞌpîiya.
39 Tîîse tuna pîꞌ eeseurîma pepîn mîrîrî. Morî Yekaton Wannî pîꞌ eeseurîma. Manniꞌ innape Jesus kuꞌnenanya yapisî pe man, tewankon yaꞌ aakoꞌmantoꞌpe. Tîîse Morî Yekaton Wannî erepansaꞌ pra awanîꞌpî. Maasa pra Jesus ennaꞌposaꞌ pra awanîꞌpî tun pia.
40 Mîrîrî warantî Jesus eseurîma eta tîuyaꞌnîkon pe arinîkonya innape ikupîꞌpî. —Mîîkîrî man, Paapa narimaꞌpî tîmaimu ekaremeꞌnen pe, manniꞌ Moisés nurîꞌtî nekaremekîꞌpî manniꞌ —taꞌpî toꞌya.
41 Tiaronkonya taꞌpî: —Mîîkîrî man pîikaꞌtîton Paapa nîmenkaꞌpî pe. Tîîse mîrîrî pîꞌ tiaronkonya taꞌpî: —Paapa nîmenkaꞌpî pe pra man. Maasa pra Cristo iipî pepîn Galiléia poi.
42 Paapa maimuya taa penaroꞌ Davi nurîꞌtî parîꞌpî pe Cristo wanî. Moropai Davi nurîꞌtî koꞌmamîꞌpî Belém po, moroniꞌ Cristo esenpo pe man, taasaiꞌya man —taꞌpî toꞌya.
43 Mîrîrî wenai toꞌ esiyuꞌpîtîꞌpî.
44 Tiaronkon wanîꞌpî Jesus anapiꞌpai yarakkamokonpa. Tîîse anîꞌya yapisî pra awanîꞌpî.
Innape Jesus Kupî Judeuyamîꞌ Esanonya Pepîn
45 Epîremantoꞌ yewîꞌ eraꞌmanenan ennaꞌpoꞌpî tesanonkon pia, teepîremasanon esanonkon moropai fariseuyamîꞌ pia. —Îꞌ waniꞌ awanî yeꞌnen enepîyaꞌnîkon pra awanî? —taꞌpî toꞌya.
46 —Oꞌnon pata morî pe mîîkîrî eseurîma warantî anîꞌ eseurîma etasaꞌ annaya pra man —taꞌpî toꞌya.
47 —Amîrîꞌnîkon esenkuꞌtîsaꞌ nîrî kaꞌrî —taꞌpî fariseuyamîꞌya toꞌ pîꞌ.
48 —Epuꞌnenan pepîn amîrîꞌnîkon. Anna wanî ayesaꞌkon pe moropai fariseuyamîꞌ, epuꞌnen pe anna wanî. Moropai annaya ikupî pra man innape —taꞌpî toꞌya.
49 —Insanan pemonkonyamîꞌ poroponkon Paapa maimu epuꞌnenan pepîn. Eꞌtarumaꞌtîntoꞌ yaꞌ tuutîsanon insanan —taꞌpî toꞌya.
50 Moropai tiaron toꞌ yonpa wanîꞌpî toꞌ koreꞌtawon iteseꞌ Nicodemos. Mîîkîrî manniꞌ ewaron yaꞌ Jesus pia iipîꞌpî pena. Mîîkîrîya taꞌpî:
51 —Uyeserukon wanî eꞌmaiꞌ pe pemonkon maimu eta moropai iteseru pîꞌ esenumenkan. Mîrîrî tîpo imakuiꞌpî pe awanî esepuꞌtî, morî pe awanî esepuꞌtî. Tîîse uyeserukon yairî pra imakuiꞌpî mîîkîrî taa pîꞌ uurîꞌnîkon man, tetai pra —taꞌpîiya.
52 Taꞌpî toꞌya Nicodemos pîꞌ: —Amîrî Galiléia pon nîrî kaꞌrî. Maasa Paapa maimu pîꞌ esenupakî. Galiléia poi tîmaimu ekaremeꞌnen ton yarima Paapaya taasaꞌ pra man —taꞌpî toꞌya.
53 Mîrîrî tîpo toꞌ eꞌparaipîkaꞌpî tewîꞌkon kaisarî.
