Jesus Cristo Yekare João Nîmenukaꞌpî 8:1-59
8 Moropai Jesus wîtîꞌpî wîꞌ iteseꞌ Oliveira pona.
2 Tiaron wei yai attîꞌpî penane marî Judeuyamîꞌ epîrematoꞌ yewîꞌ ta. Moro arinîkon pemonkonyamîꞌ eperepîꞌpî iipia. Toꞌ koreꞌta eereutaꞌpî moropai toꞌ yenupaꞌpîiya.
3 Mîrîrî pîꞌ awanî tanne, fariseuyamîꞌ moropai Moisés nurîꞌtîya yenupantoꞌ pîꞌ yenupatonkonya wîriꞌ enepîꞌpî iipia imakuiꞌpî konekaꞌtîpon. Mîîkîrî enepîꞌpî toꞌya Jesus pia, tamîꞌnawîronkonya eraꞌma tanne.
4 Taꞌpî toꞌya Jesus pîꞌ: —Anna yenupanen, mîseniꞌ wîriꞌ eporî pîꞌ anna man warayoꞌ yarakkîrî tîîse tînyo pepîn. Yarakkîrî awanî tanne eporî pîꞌ anna man.
5 Moisés nurîꞌtîya taꞌpî: “Tînyo kenan wîriꞌ eꞌsaꞌ ya tiaron warayoꞌ yarakkîrî mîwîtîi tîꞌ ke”. Tîîse amîrî esenumenkatoꞌ anepuꞌpai anna wanî —taꞌpî toꞌya.
6 Tîîse Jesus pîꞌ toꞌ oꞌmaꞌta kinî ipîꞌ teeseurîmakonpa kaiꞌma. Jesus eꞌmuruikaꞌpî moropai kasapan menukaꞌpîiya tenya yeperu ke. Etaiya pra man kaiꞌma toꞌ esenumenkaꞌpî ipîꞌ.
7 Inîꞌ panpîꞌ ipîꞌ ekaranmapopîtîꞌpî toꞌya. Mîrîrî yeꞌnen aweꞌmîꞌsaꞌkaꞌpî. Toꞌ pîꞌ taꞌpîiya: —Akoreꞌtawonkon anîꞌ wanî ya imakuiꞌpî ton pîn, mîîkîrîya eꞌmaiꞌ pe tîꞌ yenumî yuꞌse wai iwîpa —taꞌpîiya.
8 Inîꞌrî aweꞌmuruikaꞌpî moropai non menukaꞌpîiya.
9 Mîrîrî taa Jesusya pîꞌ toꞌ esenumenkaꞌpî. Imakuiꞌpî pe tîwanîkon epuꞌtîꞌpî toꞌya. Mîrîrî yeꞌnen toꞌ eppepîꞌpî. Toꞌ wîtîꞌpî iipiapai tiwin pîꞌ. Aꞌyekeꞌton panpîꞌ wîtîꞌpî eꞌmaiꞌ pe. Iteꞌmaꞌpî pîꞌ aꞌyekeꞌtonon puꞌkuru pepîn wîtîpîtîꞌpî tiwin pîꞌ, tamîꞌnawîrî. Jesus eꞌnîmîꞌpî moropai wîriꞌ.
10 Jesus eꞌmîꞌsaꞌkaꞌpî. Wîriꞌ eraꞌmaꞌpîiya tîîse ipîꞌ eseurîmaꞌsan wîtîꞌpî wanîꞌpî. Taꞌpîiya wîriꞌ pîꞌ: —Oꞌnonan see inkamoro imakuiꞌpî ankonekaꞌpî ekaremekîꞌtîponkon? Aasaꞌmanta eꞌpai man taa toꞌya pra nai? —taꞌpîiya.
11 —Inna, uyepotorî, uwî toꞌya pra man —taꞌpî wîriꞌya ipîꞌ. —Moriya aasaꞌmanta eꞌpai man tauya pepîn nîrî —taꞌpî Jesusya. —Atîkî apata yaꞌ. Tîîse inîꞌ imakuiꞌpî kîꞌkonekai ikuꞌsaꞌya manniꞌ warantî —taꞌpîiya.
Pemonkonyamîꞌ Weiyuꞌmanen Pe Jesus Wanî
12 Mîrîrî tîpo Jesusya pemonkonyamîꞌ yeurîmaꞌpî inîꞌrî. —Uurî wanî non po tîîkoꞌmansenon weiyuꞌmanen pe. Anîꞌ iipî ya uwenairî asarî pepîn ewaron ta, tîweiyu eposaiꞌya yeꞌnen, tîîkoꞌmantoꞌ ton tîînen.
13 Mîrîrî pîꞌ fariseuyamîꞌya taꞌpî: —Aawarîrî apîꞌrî eeseurîma tiaronya taa pra man apîꞌ. Mîrîrî yeꞌnen anîꞌya innape akupî pepîn.
14 Mîrîrî yuukuꞌpî Jesusya. Taꞌpîiya: —Innape upîꞌrî eseurîma, tîîse useruku pepîn. Oꞌnon pata pai iipîꞌpî uurî epuꞌtî pîꞌ wai. Oꞌnon pata pona uutî epuꞌnen uurî. Tîîse amîrîꞌnîkonya epuꞌtî pepîn oꞌnon pata pai uuipîꞌpî moropai oꞌnon pata pona uutî.
15 Amîrîꞌnîkon esenumenka upîꞌ anepuꞌtîkon aneraꞌmaꞌpîkon yawîrî. Mîrîrî wenai seruꞌyeꞌ wanî kaiꞌma eeseurîmakon. Tîîse uurîya anîꞌ yakoꞌmenka pepîn, anîꞌ yenumîuya pepîn sîrîrî.
16 Tîîse anîꞌ yakoꞌmenkauya ya, yairî eseurîma, seruꞌyeꞌ pra, maasa pra uuwarîrî eseurîma pepîn unepuꞌtî pe. Uyun nîrî eseurîma, uupia tîîkoꞌmansen, uyarimaꞌtîpon.
17 Moisés nurîꞌtîya yenupantoꞌya taa:Tiwinan pemonkon eseurîma ya,tiwinsarî siꞌma innape ikupî pepîn.Tîîse asakîꞌnankon eseurîma ya seꞌ kaisarî,innape awanî mîrîrî.
Ayeserukon mîrîrî.
18 Uurî eseurîmasaꞌ eꞌtoꞌ pîꞌ anîꞌ pe wanî pîꞌ. Moropai uyarimatîpon Paapa eseurîmasaꞌ upîꞌ eseurîmaꞌpî kaisarî. Mîrîrî yeꞌnen ayeserukon yawîrî innape awanî —taꞌpî Jesusya.
19 Fariseuyamîꞌya taꞌpî ipîꞌ: —Oꞌnon patawon ayun? Jesusya taꞌpî: —Uurî epuꞌnenan pepîn amîrîꞌnîkon. Uyun epuꞌnenan pepîn nîrî. Anîꞌ pe wanî epuꞌnen pe awanîkon ya, anîꞌ pe uyun wanî epuꞌtîꞌpîyaꞌnîkon eꞌpainon nîrî.
20 Mîrîrî warantî pemonkonyamîꞌ yenupaꞌpî Jesusya Judeuyamîꞌ epîrematoꞌ yewîꞌ ta aminke pra toꞌ nîtîrî yenseꞌ pîꞌ. Anapiꞌpai tiaronkon wanîꞌpî tîîse yapisî toꞌya pra awanîꞌpî, maasa pra iweiyu eseposaꞌ pra awanî yeꞌnen.
21 Moropai inîꞌrî Jesusya toꞌ yeurîmaꞌpî: —Uurî uutî kupî sîrîrî tarîpai. Uutîsaꞌ yai, uyuwayaꞌnîkon kupî sîrîrî tîîse uyeporîyaꞌnîkon pepîn. Aponaꞌnîkon amakuyikon koꞌmamî tanne aasaꞌmantakon. Oꞌnon pata uutî ya attîkon pepîn.
22 Mîrîrî taa Jesusya pîꞌ Judeuyamîꞌ esenumenkaꞌpî. —Oꞌnon pata pona attî? —kaiꞌma toꞌ eseurîmaꞌpî. —Amîrîꞌnîkon wîtî pepîn upîkîrî taiya manniꞌ. Aweꞌwî kaꞌrî? —taꞌpî toꞌya.
23 Inîꞌrî Jesus eseurîmaꞌpî toꞌ pîꞌ: —Amîrîꞌnîkon man tarîronkon pe. Sîrîrî non po tîîkoꞌmansenon amîrîꞌnîkon. Tîîse uurî wanî kaꞌ poino pe. Sîrîrî non pon pepîn uurî.
24 Uurî mîîkîrî taꞌpîuya saꞌrî, mîîkîrî pe ukupîyaꞌnîkon pra awanîkon ya innape, aasaꞌmantakon, amakuyikon eꞌronasaꞌ pra tîîse. Mîrîrî yeꞌnen amakuyikon koꞌmamî tanne aasaꞌmantakon tauya manniꞌ —taꞌpîiya toꞌ pîꞌ.
25 Jesus pîꞌ taꞌpî toꞌya: —Anîꞌ kin amîrî, moriya? Jesusya yuukuꞌpî: —Amîrîꞌnîkon yeurîma piaꞌtîꞌpîuya pata pai, taꞌpîuya anîꞌ pe wanî.
26 Mararon pepîn eseurîmatoꞌ man amîrîꞌnîkon pîꞌ, imakuiꞌpî pe awanîkon pîꞌ. Uyarimatîpon wanî seruꞌyeꞌ pepîn. Yairî awanî. Mîîkîrî nekaremekîꞌpî upîꞌ ekaremeꞌnen pe wanî tamîꞌnawîronkon pîꞌ —taꞌpîiya.
27 Tîyun pîꞌ Jesus eseurîma mîrîrî, tîîse epuꞌtî toꞌya pra awanîꞌpî.
28 Moropai Jesusya taꞌpî toꞌ pîꞌ: —Uurî kaꞌ poi iipîꞌpî pemonkon pe, uurî pîmîꞌsaꞌkayaꞌnîkon pe naatîi pakîꞌnan pona. Mîrîrî tîpo Paapa munmu pe uyepuꞌtîyaꞌnîkon kupî sîrîrî. Uuwarîron pe pra uyepuꞌtîyaꞌnîkon pe naatîi. Paapaya upanamasaꞌ yawîrî ayeurîmauyaꞌnîkon sîrîrî.
29 Uupia uyarimatîpon man. Urumakaiya pra man. Maasa pra ituꞌse Uyun eꞌtoꞌ kuꞌnen pe wanî —taꞌpîiya.
30 Mîrîrî warantî Jesus eseurîma eta tîuyaꞌnîkon pe arinîkonya innape ikupîꞌpî.
Abraão Nurîꞌtî Munkîyamîꞌ
31 Mîrîrî yeꞌnen Jesusya taꞌpî Judeuyamîꞌ pîꞌ, innape tîkuꞌnenan pîꞌ: —Umaimu yawîrî aakoꞌmamîkon ya, upemonkono pe awanîkon.
32 Moropai yairon epuꞌtîyaꞌnîkon kupî sîrîrî. Moropai mîrîrî wenai amoꞌkasaiꞌyaꞌnîkon, anîꞌ poitîrî pe awanîkon namai —taꞌpîiya.
33 Mîrîrî pîꞌ taꞌpî toꞌya: —Abraão nurîꞌtî payannîꞌsan anna. Oꞌnon pata anîꞌ poitîrî pe anna eꞌsaꞌ pra man. Îꞌ waniꞌ awanî yeꞌnen anîꞌ poitîrî pe pra eenakon taaya manniꞌ?
34 Jesusya taꞌpî toꞌ pîꞌ: —Useruku pepîn. Imakuiꞌpî kuꞌnen pe awanîkon ya, amakuyikon enasaꞌ man ayentaiꞌnîkon, ipoitîrî pe awanîkon.
35 Ipoitîrî wanî ya, aakoꞌmamî pepîn ipatîkarî tesaꞌ yewîꞌ ta. Ipoitîrî pe neken mîîkîrî wanî. Tîîse inmu wanî ya, mîîkîrî koꞌmamî ipatîkarî tîyun yewîꞌ ta, inmu pe tîwanî yeꞌnen.
36 Tîîse uurî Paapa munmuya amoꞌkakon ya, anîꞌrî poitîrî pe awanîkon pepîn tarîpai. Imakuiꞌpî yentai awanîkon.
37 Abraão nurîꞌtî payannîꞌsan amîrîꞌnîkon seruꞌ pepîn. Tîîse uurî anwîpai awanîkon sîrîrî. Maasa pra awakîrikon pe pra unekaremekî eta pîꞌ naatîi, ankuꞌpai pra awanîkon yeꞌnen.
38 Uurî, uyunya uyenupaꞌpî ekaremekîuya apîꞌnîkon. Moropai amîrîꞌnîkon nîrî ayunkonya apanamaꞌpîkon yawîrî awanîkon —taꞌpî Jesusya.
39 Taꞌpî toꞌya Jesus pîꞌ: —Anna man Abraão nurîꞌtî payannîꞌsan pe. Jesusya yuukuꞌpî: —Abraão yonpa pe awanîkon ya, morî kuꞌnen pe awanîkon morî kuꞌnen pe Abraão nurîꞌtî wanîꞌpî warantî.
40 Tîîse uurî anwîpai awanîkon, yairî ayeurîmasauꞌyaꞌnîkon tanne, Paapaya uyeurîmaꞌpî yawîrî. Mîrîrî yeꞌka kuꞌnen pe pra Abraão nurîꞌtî wanîꞌpî.
41 Innape ayunkon yeseru yawîrî ayeserukon wanî mîrîrî, tîîse Abraão nurîꞌtî yeseru yawîrî pra —taꞌpî Jesusya. Taꞌpî toꞌya Jesus pîꞌ: —Paapa munkîyamîꞌ anna. Paapa man anna yun pe. Iyun pîn more warantî anna wanî pepîn sîrîrî —taꞌpî toꞌya.
Makui Munkîyamîꞌ
42 Tîîse Jesusya taꞌpî: —Uurî iipîꞌpî Paapa piapai. Uuwarîrî iipîꞌpî pepîn tîîse uyarimatîpon maimu pe puꞌkuru uuipîꞌpî. Ayunkon pe Paapa wanî ya, uꞌnînmayaꞌnîkon eꞌpainon, uyonpa pe awanîkon yeꞌnen.
43 Umaimu epuꞌtîyaꞌnîkon pra awanî. Mîrîrî yeꞌnen aatakaꞌmakon ayeurîmauyaꞌnîkon pîꞌ.
44 Amîrîꞌnîkon yun wanî Makui pe. Ituꞌse mîîkîrî eꞌtoꞌ kuꞌnen pe awanîkon. Pemonkon wîînen pe mîîkîrî eꞌsaꞌ pena pata pai. Seruꞌyeꞌ pe awanî, maasa pra yairî aweꞌtoꞌ ton pra awanî yeꞌnen. Seruꞌyeꞌ pe aweꞌsaꞌ ya, teseru ta awanî mîrîrî. Seruꞌyeꞌ mîîkîrî moropai seruꞌyeꞌkon yunkon pe awanî.
45 Seruꞌyeꞌ pe pra ayeurîmauyaꞌnîkon. Tîîse innape umaimu kupîyaꞌnîkon pra awanîkon.
46 “Imakuiꞌpî ankonekaꞌpî moro man, epuꞌnen uurî”, taa anîꞌya pepîn upîꞌ. Imakuiꞌpî kuꞌsauꞌya pra wai. Ayenkuꞌtîuyaꞌnîkon pepîn. Îꞌ waniꞌ awanî yeꞌnen umaimu kupîyaꞌnîkon pra awanî innape?
47 Paapa pemonkono wanî imaimu etanen pe moropai yawîron pe. Tîîse amîrîꞌnîkonya Paapa maimu yapurî pepîn, yawîrî pra awanîkon. Maasa pra Paapa pemonkono pe pra awanîkon yeꞌnen —taꞌpî Jesusya.
Abraão Nurîꞌtî Ton Pra Tîîse Jesus Wanîꞌpî
48 Mîrîrî pîꞌ Judeuyamîꞌya taꞌpî Jesus pîꞌ: —Kane kane amîrî, Samaria poinon. Oꞌmaꞌ yenseꞌ pe nai —taꞌpî toꞌya.
49 Jesusya taꞌpî: —Oꞌmaꞌ yenseꞌ pepîn uurî. Uyun yapurîuya sîrîrî. Tîîse amîrîꞌnîkonya uyapurî pra man.
50 Uurî yapurî pemonkonyamîꞌya yuwauya pepîn. Tîîse mîrîrî yuwa tiaronya, uyunya. Moropai yairî mîîkîrî wanî pemonkonyamîꞌ yakoꞌmenkanen pe.
51 Ayenkuꞌtîuyaꞌnîkon pepîn. Yairî ayeurîmauyaꞌnîkon. Umaimu yawîrî aakoꞌmamîkon ya, aasaꞌmantakon pepîn tiwin kin —taꞌpî Jesusya.
52 Judeuyamîꞌya taꞌpî ipîꞌ: —Mîrîrî taaya pîꞌ oꞌmaꞌ yenseꞌ pe ayepuꞌtî pîꞌ anna man. Abraão nurîꞌtî saꞌmantaꞌpî, moropai penaroꞌ Paapa maimu ekaremeꞌnenan saꞌmantaꞌpî nîrî. Tarîpai amîrîya taa: “Umaimu yawîrî anîꞌ koꞌmamî ya, aasaꞌmanta pepîn”, kaiꞌma.
53 Anna tamo Abraão nurîꞌtî yentai awanî kaiꞌma eesenkuꞌtîsaꞌ, Paapa maimu ekaremeꞌnenan yentai awanî kaiꞌma eesenkuꞌtîsaꞌ. Anîꞌ pe renamo awanî kaiꞌma eesenkuꞌtîsaꞌ mîrîrî? —taꞌpî toꞌya.
54 Jesusya taꞌpî: —Uuwarîrî morî uurî tauya ya, îꞌ pe pra rî awanî mîrîrî. Anîꞌya uyapurî pepîn mîrîrî pîꞌ. Tîîse uuwarîrî atapurî pepîn. Uyunya taꞌpî upîꞌ: “Morî Mîîkîrî”. “Mîîkîrî anna yepotorî” taanenan amîrîꞌnîkon, manniꞌya taꞌpî.
55 Uyun epuꞌsaꞌyaꞌnîkon pra naatîi. Tîîse uurî mîîkîrî epuꞌnen puꞌkuru. Uurî nîrî epuꞌnen pepîn kaiꞌma eseurîma ya, seruꞌyeꞌ pe awanî, seruꞌyeꞌ pe awanîkon warantî. Maasa pra mîîkîrî epuꞌtîuya yeꞌnen moropai imaimu yawîrî ikuꞌnen uurî.
56 Atamokon Abraão nurîꞌtî esenumenkaꞌpî uuipî weiyu pîꞌ. Mîrîrî pîꞌ aatausinpaꞌpî. Kureꞌne aatausinpaꞌpî uuipî epuꞌtî tîuya pîꞌ —taꞌpî Jesusya.
57 Judeuyamîꞌya taꞌpî ipîꞌ: —Aseruku mîrîrî, pena Abraão nurîꞌtî saꞌmantaꞌpî. Amîrî 50 konoꞌ maꞌre akonopo man. Abraão nurîꞌtî eraꞌmatîpon pepîn amîrî. Aseruku —taꞌpî toꞌya.
58 Jesusya taꞌpî toꞌ pîꞌ: —Ayenkuꞌtîuyaꞌnîkon pepîn. Abraão nurîꞌtî ton pra tîîse moro wanîꞌpî. Ipatîkaron uurî.
59 Mîrîrî taiya pîꞌ toꞌ ekoreꞌmaꞌpî. Inonkon tîꞌkon yanumîꞌpî toꞌya, iwîkonpa kaiꞌma. Tîîse Jesus esonomîꞌpî arinîkon koreꞌta. Eepaꞌkaꞌpî Judeuyamîꞌ epîrematoꞌ yewîꞌ tapai.
