Jesus Cristo Yekare João Nîmenukaꞌpî 9:1-41
9 Moropai tuutî pe, warayoꞌ eraꞌmaꞌpîiya, enkaruꞌnan. Enkaruꞌne eesenpo pe mîîkîrî wanîꞌpî.
2 Inenupaꞌsanya eraꞌmaꞌpî nîrî. Jesus pîꞌ taꞌpî toꞌya: —Anna yenupanen, anîꞌ nîkupîꞌpî imakuiꞌpî wenai mîserî warayoꞌ esenpoꞌpî enkaruꞌne? Tînkonekaꞌpî wenai kaꞌrî? Tîsan, tun nîkonekaꞌpî wenai kaꞌrî?
3 Jesusya taꞌpî: —Anîꞌ nîkonekaꞌpî imakuiꞌpî wenai mîserî warayoꞌ eꞌtarumaꞌtî pra man, inkupîꞌpî wenai moropai itun, isan nîkupîꞌpî wenai. Paapaya ikuꞌsaꞌ pra man enkaruꞌne. Enkaruꞌne eesenpoꞌpî Paapa esenyakaꞌmatoꞌ ipîꞌ eraꞌmatoꞌpe arinîkonya.
4 Uyarimatîpon esenyakaꞌmatoꞌ kupî pîꞌ koꞌmannî eꞌpai man wei pe awanî tanne. Ewaron ke eena kupî sîrîrî. Mîrîrî yai anîꞌ esenyakaꞌma eserîke pra awanî kupî sîrîrî.
5 Sîrîrî non po uukoꞌmamî pîkîrî pemonkonyamîꞌ weiyuꞌma pîꞌ uukoꞌmamî —taꞌpî Jesusya.
6 Mîrîrî taa tîpo, Jesusya tetaku yenumîꞌpî non pona. Mîrîrî ke non kiꞌmaꞌpîiya. Enkaruꞌnan yenu kîꞌpaꞌpîiya mîrîrî ke.
7 Moropai taꞌpîiya enkaruꞌnan pîꞌ: —Tuna yenseꞌ iteseꞌ Siloé kaꞌ eꞌpîta —taꞌpîiya. (“Yarimaꞌpî” taatoꞌ mîrîrî Siloé umaimukon ta.) Attîꞌpî Jesus maimu pe. Aweꞌpîꞌpî moropai eesepiꞌtîꞌpî. Enkaruꞌne pra eenaꞌpî. Tamîꞌnawîron eraꞌmaꞌpîiya.
8 Mîrîrî yai tiaronkonya eraꞌmaꞌpî, itonpayamîꞌ moropai tiaronkonya. Mîîkîrî epuꞌtîꞌpî toꞌya enkaruꞌnan pe. —Aꞌkî mîîkîrî eraꞌmakî —taꞌpî toꞌya. —Mîîkîrî manniꞌ enkaruꞌnan. Tîpîikaꞌtîtoꞌ ton esatî pîꞌ aakoꞌmanpîtîꞌpî manniꞌ tamîꞌnawîronkon pîꞌ —taꞌpî toꞌya.
9 Mîrîrî pîꞌ tiaronkonya taꞌpî: —Inna, mîîkîrî mîîkîrî seruꞌ pepîn. Tîîse tiaronkonya taꞌpî: —Kaane, mîîkîrî pepîn. Enkaruꞌnan warainon seruꞌ pepîn, tîîse tiaron pe man, enkaruꞌne pra. Mîrîrî yeꞌnen mîîkîrî pîꞌ ekaranmapoꞌpî toꞌya. Taꞌpîiya toꞌ pîꞌ: —Inna, uurî mîîkîrî —taꞌpîiya.
10 Taꞌpî toꞌya ipîꞌ: —Oꞌnon yeꞌka pe ayenu esepiꞌtîsaꞌ mîrîrî?
11 Taꞌpîiya toꞌ pîꞌ: —Warayoꞌ iteseꞌ Jesusya non kiꞌma pîꞌ man mararî mîrikkî. Moropai uyenu kîꞌpa pîꞌ man ike. Moropai taa pîꞌ man upîꞌ, “Eꞌpîta Siloé iteseꞌ tuna kaꞌ”. Mîrîrî yeꞌnen wîtîn pîꞌ wai. Eꞌpîn pîꞌ wai. Tarîpai tamîꞌnawîrî eraꞌma pîꞌ wai —taꞌpîiya.
12 —Oꞌnon see mîîkîrî ayepiꞌtîtîpon? —taꞌpî toꞌya ipîꞌ. —Epuꞌtîuya pra wai —taꞌpîiya.
Fariseuyamîꞌya Enkaruꞌnan Esepiꞌtîsaꞌ Ekaranmapo
13 Mîrîrî tîpo enkaruꞌnan esepiꞌtîsaꞌ yarîꞌpî toꞌya fariseuyamîꞌ pia.
14 Maasa pra erîꞌkaꞌnîtoꞌ weiyu yai Jesusya non kiꞌmaꞌpî manniꞌ enkaruꞌnan yenu yepiꞌtîpa.
15 Mîrîrî wenai fariseuyamîꞌya ekaranmapoꞌpî esepiꞌtîꞌpî pîꞌ: —Oꞌnon yeꞌka pe akuꞌsaiꞌya mîrîrî? —taꞌpî toꞌya. Taꞌpîiya toꞌ pîꞌ: —Uyenu kîꞌpaꞌpîiya ikuisaꞌ ke. Eꞌpîꞌpî, tarîpai tamîꞌnawîrî eraꞌmauya sîrîrî.
16 Fariseuyamîꞌya taꞌpî ipîꞌ: —Paapa piapainon pepîn mîîkîrî Jesus. Aꞌkî, erîꞌkaꞌnîtoꞌ weiyu yai eesenyakaꞌmasaꞌ Paapa maimu yawîrî pra eraꞌmakî —taꞌpî toꞌya. Tîîse tiaronkonya taꞌpî: —Imakuiꞌpî pe Jesus wanî ya, ikoneka eserîkan pepîn kupîiya pepîn eꞌpainon? Imakuiꞌpî pe awanî pepîn. Seꞌ kaisarî pra toꞌ esenumenkaꞌpî Jesus pîꞌ.
17 Inîꞌrî enkaruꞌnan esepiꞌtîsaꞌ pîꞌ taꞌpî toꞌya: —Amîrî kanan? Ayepiꞌtîtîpon mîîkîrî. Îꞌ kaiꞌma esenumenkan pîꞌ nan ipîꞌ? —taꞌpî toꞌya. Yuukuꞌpîiya: —Mîîkîrî man Paapa maimu ekaremeꞌnen pe —taꞌpîiya.
18 Moropai Judeuyamîꞌya enkaruꞌnan esepiꞌtîꞌpî muꞌtunpaꞌpî. Innape enkaruꞌne tîîkoꞌmamî tîpo eesepiꞌtîsaꞌ kupî toꞌya pra awanîꞌpî. Mîrîrî yeꞌnen isan moropai iyun yanno meꞌpoꞌpî toꞌya. Judeuyamîꞌ pia toꞌ erepamîꞌpî.
19 Taꞌpî Judeuyamîꞌya tînannoꞌsankon pîꞌ: —Anmukukon pe mîseniꞌ warayoꞌ nai? Yuukuꞌpî toꞌya: —Inna, anna more mîserî. Inîꞌrî taꞌpî Judeuyamîꞌya toꞌ pîꞌ: —Enkaruꞌne esenpoꞌpî mîserî? —Inna —taꞌpî toꞌya. —Moriya oꞌnon yeꞌka pe itenu esepiꞌtîsaꞌ mîrîrî? —taꞌpî Judeuyamîꞌya toꞌ pîꞌ.
20 —Anna munkî pe mîserî epuꞌtî pîꞌ anna man. Enkaruꞌne eesenpoꞌpî moropai tîkoꞌman pe aakoꞌmansaꞌ enkaruꞌne.
21 Tîîse oꞌnon yeꞌka pe eesepiꞌtîsaꞌ epuꞌtî annaya pra man. Anîꞌya yepiꞌtîsaꞌ epuꞌtî annaya pra man. Tîîse more pepîn mîserî. Ekaranmapotî see ipîꞌ. Tîîwarîrî ekaremekîiya —taꞌpî iyun, isanya Judeuyamîꞌ pîꞌ.
22 Mîrîrî warantî toꞌ eseurîmaꞌpî eranneꞌ pe tîwanîkon yeꞌnen. Maasa pra Judeuyamîꞌ esanon eseurîmasaꞌ wanîꞌpî, innape Jesus, Paapa nîmenkaꞌpî kupîtîpon yenpaꞌka epereꞌnîtoꞌ yewîꞌ tapai kaiꞌma toꞌ eseurîmaꞌpî. Mîrîrî pîꞌ toꞌ esiꞌnîpîꞌpî.
23 Mîrîrî wenai taꞌpî iyunya: —Aꞌyekeꞌton pe man. Ekaranmapotî ipîꞌ.
24 Inîꞌrî mîîkîrî pîꞌ taꞌpî toꞌya: —Aꞌkî, Paapaya uyepiꞌtîsaꞌ kaꞌkî. Maasa pra mîîkîrî Jesus man imakuiꞌpî kuꞌnen pe, epuꞌtî pîꞌ anna man.
25 Yuukuꞌpîiya: —Imakuiꞌpî pe mîîkîrî wanî epuꞌtîuya pra wai. Sîrîrî neken epuꞌtî pîꞌ wai. Enkaruꞌne wanîꞌpî tîîse sîrîrî eraꞌmauya.
26 Inîꞌrî taꞌpî toꞌya ipîꞌ: —Îꞌ konekaꞌpîiya apîꞌ? Oꞌnon yeꞌka pe ayenu yepiꞌtîꞌpîiya?
27 Taꞌpîiya toꞌ pîꞌ: —Aasîrî ekaremekî pîꞌ wai apîꞌnîkon, tîîse innape ikupîyaꞌnîkon pra naatîi. Îꞌ waniꞌ awanî yeꞌnen anetapai awanîkon inîꞌrî? Ipemonkono pe enapai awanîkon kaꞌrî? —taꞌpîiya.
28 Mîrîrî pîꞌ toꞌ ekoreꞌmaꞌpî. Esepiꞌtîꞌpî pîꞌ toꞌ woꞌmaꞌtaꞌpî. —Amîrî man ipemonkono pe. Anna kaane. Anna man Moisés nurîꞌtîya yenupantoꞌ yawîrî esenupaꞌsan pe.
29 Innape Paapaya tîmaimu ekaremekîꞌpî Moisés nurîꞌtî pîꞌ. Mîrîrî epuꞌtî pîꞌ anna man. Tîîse mîîkîrî epuꞌtî annaya pra man, oꞌnon pata paino pe awanî.
30 Mîrîrî taa toꞌya pîꞌ taꞌpî warayoꞌya: —Esenumenkantoꞌ mîrîrî. Oꞌnon pata pai mîîkîrî erepansaꞌ epuꞌtîyaꞌnîkon pra awanî. Tîîse uurî enkaruꞌnan yenu yepiꞌtîsaiꞌya mîrîrî.
31 Paapaya imakuiꞌpî kuꞌnenan maimu yuuku pepîn. Tamîꞌnawîronkonya epuꞌtî mîrîrî. Tapurînen kupî Paapaya meruntî ke. Ituꞌse tîweꞌtoꞌ kuꞌnen kupîiya meruntî ke.
32 More pe esenpoꞌpî enkaruꞌne. Aꞌyekeꞌton pe wanî tanne uyenu yepiꞌtîsaiꞌya. Sîrîrî pata esippiaꞌtîꞌpî pata pai eesetasaꞌ pra man, enkaruꞌnan esepiꞌtîsaꞌ sîrîrî warantî. Tîîse ikuꞌsaiꞌya mîrîrî.
33 Paapa piawon pe pra mîîkîrî wanî ya, mîrîrî yeꞌka kupîꞌpîiya pepîn eꞌpainon —taꞌpî warayoꞌya toꞌ pîꞌ.
34 Ipîꞌ toꞌ ekoreꞌmaꞌpî. —Kane, kane, amîrî. Imakuiꞌpî amîrî. Imakuiꞌpî yaꞌ puꞌkuru esenpoꞌpî amîrî. Anna panamaya pepîn —taꞌpî toꞌya ipîꞌ. Moropai yenpaꞌkaꞌpî toꞌya tîkoreꞌtapaiꞌnîkon.
Paapa Winîkîi Enkaruꞌnankon
35 Mîrîrî etaꞌpî Jesusya, warayoꞌ yenpaꞌkasaꞌ toꞌya yekare. Moropai yuwai attîꞌpî. Eporîꞌpîiya. Taꞌpî Jesusya ipîꞌ: —Kaꞌ poi iipîꞌpî pemonkon pe, Paapa narimaꞌpî kupî pîꞌ nan innape? —taꞌpîiya.
36 —Anîꞌse mîîkîrî? Upîꞌ kaꞌkî innape ikuꞌtoꞌpeuya, —taꞌpîiya.
37 Jesusya taꞌpî: —Eraꞌma pîꞌ nai, ayarakkîrî eeseurîma manniꞌ, uurî.
38 Warayoꞌya taꞌpî: —Uyepotorî, innape akupî pîꞌ wai. Moropai Jesus yapurîꞌpîiya.
39 Jesusya taꞌpî: —Pemonkonyamîꞌ nîkupîꞌpî imakuiꞌpî yenpoi uuipîꞌpî sîrîrî non pona, enkaruꞌnankonya eraꞌmatoꞌpe moropai eraꞌmanenan enatoꞌpe enkaruꞌne. Tiaronkon wanî enkaruꞌne, tîîse toꞌ esenumenkatoꞌ wanî enkaruꞌne pra. Tewankon ke uyepuꞌtî toꞌya. Tiaronkon wanî priꞌya puꞌkuru toꞌ yenu, tîîse teesenumenkatoꞌkon ke uyeraꞌma toꞌya pepîn, innape ukupî tîuyaꞌnîkon pra awanî yeꞌnen.
40 Moro awanîꞌpî tiaronkon fariseuyamîꞌ iipia. Mîrîrî taiya etaꞌpî toꞌya. Tîîse —Enkaruꞌne pra anna man, Paapa epuꞌnenan anna —taꞌpî toꞌya.
41 Jesusya taꞌpî: —Enkaruꞌne anna man, epuꞌtî annaya kaiꞌma eesenumenkasaꞌkon ya amakuyikon kupîꞌpî Paapaya eꞌpainon tîîwanmîra. Tîîse amîrîꞌnîkonya taa: “Enkaruꞌne pra anna man”. Mîrîrî yeꞌnen Paapaya amakuyikon kuꞌsaꞌ pra man tîîwanmîra —taꞌpîiya.
