Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 10:1-11
10 Mîrîrî tîpo tiaron inserî meruntî autî eraꞌmaꞌpîuya kaꞌ poi. Mîîkîrî eꞌwontîsaꞌ wanîꞌpî katupuru ke, aimutun pe tîponya wanî warantî. Moropai mîîkîrî puꞌpai yepoi merenmereꞌ wanîꞌpî. Moropai itenpata wanîꞌpî inkeꞌ pe, wei warantî. Moropai iꞌsi yeꞌpî wanîꞌpî apoꞌ eꞌtîrukasaꞌ kakîsiya eseraꞌma warantî.
2 Mîîkîrî yenyaꞌ kaareta siꞌmîrikkî yarakkanmokasaꞌ wanîꞌpî. Moropai mîîkîrîya tîꞌpu meruntî winon tîîsaꞌ wanîꞌpî pîrana pona. Moropai kamaiꞌ winon iꞌpu wanîꞌpî non pona.
3 Moropai mîîkîrî entaimeꞌpî meruntî ke. Kaikusi, leão etun warantî. Mîîkîrî entaimesaꞌ tîpo, asakîꞌne miaꞌ pona tîîmoꞌtaiꞌnîkon waraꞌnapiyamîꞌ eꞌtîrînkaꞌpî, imaimu yuukuꞌpî toꞌya.
4 Inkamoro eseurîmaꞌpî. Toꞌ eseurîmatoꞌ menukauya mîrîrî teuren, tîîse mai etaꞌpîuya kaꞌ winîpainon. Taꞌpîiya upîꞌ: —Mîrîrî konekakî tîmenukai pra. Îꞌ taa inkamoro asakîꞌne miaꞌ pona tîîmoꞌtaiꞌnîkon waraꞌnapiyamîꞌya, manniꞌ kîꞌmenukai —taꞌpîiya.
5 Moropai mîîkîrî inserî satippe pîrana po moropai non po uneraꞌmaꞌpîya meruntî winon tenya yanumîꞌpî kaꞌ ekaya.
6 Moropai innape mîîkîrî eseurîmaꞌpî Paapa ipatîkarî tîîkoꞌmansen eseꞌ pîꞌ, manniꞌ tamîꞌnawîron konekatîpon, kaꞌ moropai pata moropai tuna moropai tamîꞌnawîron patapon konekatîpon eseꞌ pîꞌ. Mîîkîrî inserîya taꞌpî: —Inîꞌrî tîkoꞌman pe aakoꞌmamî pra man —taꞌpîiya.
7 Îꞌ pensa asakîꞌne miaꞌ ponaꞌno iteꞌka inserîya trombeta yeꞌnunpa yai, îꞌ kaiꞌma taasaꞌ tîuya manniꞌ yawîrî ikupî Paapaya pe man, manniꞌ anîꞌ nepuꞌtî pepîn. Pena îꞌ kaiꞌma taꞌpî tîuya yawîrî, tîpoitîrîtonon penaronkon profetayamîꞌ nurîꞌtî pîꞌ taasaꞌ tîuya yawîrî ikupîiya pe man.
8 Mîrîrî mai unetaꞌpî wanîꞌpî kaꞌ winîpainon pe. Eeseurîmaꞌpî inîꞌrî uyarakkîrî. Taꞌpîiya upîꞌ: —Atîkî moropai mîîkîrî inserî pîrana po tîꞌpu tîîsaiꞌya manniꞌ, moropai non po iꞌpu wanî manniꞌ, yenyaꞌ kaareta yarakkanmokasaꞌ pe wanî manniꞌ yapiꞌta —taꞌpîiya.
9 Mîrîrî yeꞌnen uutîꞌpî moropai mîrîrî kaareta esatîꞌpîuya ipîꞌ. Mîîkîrîya taꞌpî upîꞌ: —Maa, sîrîrî kaareta yapiꞌkî moropai yaꞌkî. Sîrîrî yakuya ya, yennoꞌmasaꞌya pe aroꞌta yaꞌ, soꞌri ke ikupîiya. Tîîse anta yaꞌ awanî ya, aꞌkiꞌku pe puꞌkuru awanî, wan warantî —taꞌpîiya.
10 Moropai mîrîrî kaareta siꞌmîrikkî yapisîꞌpîuya mîîkîrî inserî yenya pai. Moropai mîrîrî yakuꞌpîuya. Unta yaꞌ awanî tanne, aꞌkiꞌku pe awanîꞌpî wan warantî. Tîîse mîrîrî kaareta yennoꞌmasauꞌya tîpo, uroꞌta yaꞌ soꞌri ke awanîꞌpî.
11 Mîrîrî yeꞌnen upîꞌ taꞌpîiya: —Tarîpai inîꞌrî îꞌ kupî Paapaya pe man ekaremekîya eꞌpai man arinîkon pemonkonyamîꞌ pîꞌ, tamîꞌnawîronkon pata ponkon pîꞌ, manniꞌkan tuꞌkan mai kuꞌnenan tepuꞌse pra pemonkonyamîꞌ pîꞌ, moropai ipîkkukon pata esanon reiyamîꞌ pîꞌ ekaremekîya eꞌpai man —taꞌpîiya.
