Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 11:1-19
11 Moropai mîrîrî tîpo îꞌ kuꞌneꞌtîtoꞌ yapisîꞌpîuya, kusan yei warainon. Moropai taꞌpî toꞌya upîꞌ: —Eꞌmîꞌsaꞌkakî moropai epîremantoꞌ yewîꞌ kuꞌneꞌtîpîꞌkî. Moropai Paapa yapurî tîuyaꞌnîkon pe toꞌ nîpoꞌtî yaponseꞌ kuꞌneꞌtîkî. Moropai epîremantoꞌ yewîꞌ ta teepîremasanon nîrî kuꞌneꞌtîkî.
2 Tîîse poro po winî tîweꞌsen kîꞌkuꞌneꞌtîi. Maasa pra mîrîrî wanî Judeuyamîꞌ pepîn erepantoꞌ pataꞌseꞌ pe. Inkamoroya morî puꞌkuru cidade tarumaꞌtî pe man eseuwarapo 42 kapoi kaisarî.
3 Mîrîrî yai asakîꞌne kaisarî upîꞌ teeseurîmasanon yarimauya pe man, saaku yaꞌ teepontîi teesewankonoꞌmasaꞌkon ekaremeꞌtoꞌpe toꞌya toꞌ koreꞌta. Moropai inkamoroya Paapa maimu ekaremekî kupî sîrîrî eseuwarapo 1.260 wei kaisarî toꞌ pîꞌ —taꞌpîiya upîꞌ.
4 Inkamoro asakîꞌnankon upîꞌ teeseurîmasanon wanî manniꞌ yei, oliveira yeꞌ asakîꞌnan warantî. Manniꞌkan pîꞌ Paapa maimu ekaremeꞌnen Zacarias nurîꞌtî nekaremekîꞌpî. Moropai asakîꞌnan apoꞌ yaponseꞌ warantî toꞌ wanî, manniꞌkan satippe Uyepotorî, pata ponkon koꞌmannîꞌnen rawîrî tîweꞌsanon.
5 Inkamoro antîꞌkapai anîꞌkan wanî ya, inkamoro mata yapai apoꞌ epaꞌka, moropai mîrîrî ke teyatonkon tîꞌka toꞌya. Mîrîrî warantî anîꞌkan wanî ya toꞌ tarumaꞌtî yuꞌse, inkamoro, toꞌ tarumaꞌtînenan eꞌtîꞌka pe man.
6 Maasa pra inkamoro pia meruntî wanî. Mîrîrî toꞌ maimu pe konoꞌ rena eserîke pra awanî kaꞌ poi, Paapa maimu ekaremekî pîꞌ toꞌ koꞌmamî pîkîrî konoꞌ rena pepîn. Moropai inkamoro pia meruntî wanî, toꞌ maimu pe mîn pe tuna yanikon enatoꞌpe. Moropai inkamoro pia meruntî wanî, tîmaimukon ke, tuꞌke siꞌta eꞌtarumaꞌtîntoꞌ iiꞌtoꞌpe non pona, ituꞌse tîwanîkon pîkîrî.
7 Îꞌ pensa inkamoro asakîꞌnankonya Paapa maimu ekaremekî tîuyaꞌnîkon yaretîꞌka yai, ituꞌnakan nariꞌ yaꞌ tîweꞌsen oꞌmaꞌ iipî pe man. Moropai eeseyaꞌnama toꞌ yarakkîrî. Moropai mîîkîrî oꞌmaꞌya inkamoro tîꞌka pe man.
8 Moropai inkamoro esaꞌrîꞌpî koꞌmamî pe man eꞌma ta kureꞌnan cidade po. Oꞌnon pata toꞌ yepotorî pokapîtîꞌpî toꞌya manniꞌ cidade po. Mîrîrî cidade esatî toꞌya manniꞌ imakuiꞌpî kupîꞌpî toꞌya pataꞌpî Sodoma moropai Egito warantî, imakuiꞌpî pe awanî yeꞌnen.
9 Mîrîrî yai tamîꞌnawîron patakon ponkonya toꞌ esaꞌrîꞌpî eraꞌma koꞌmannîpî pe man eseurîwîꞌne wei arakkita pairî kaisarî. Anîꞌya toꞌ esaꞌrîꞌpî yuꞌnaꞌtî tîrî toꞌya pepîn mîrîrî yai.
10 Mîrîrî kupî toꞌya pîꞌ tamîꞌnawîron pata ponkon pemonkonyamîꞌ wanî taatausinpai, mararî pra inkamoro saꞌmantasaꞌ yeꞌnen. Mararî pra taatausinpai, tiaronkon pia îꞌ rî tîrî toꞌya epeꞌmîra. Maasa pra inkamoro asakîꞌnankon profetayamîꞌ, pemonkonyamîꞌ yewankonoꞌmatîponkon ataretîꞌkasaꞌ yeꞌnen, toꞌ atausinpa pe man.
11 Tîîse mîrîrî tîpo, eseurîwîꞌne wei arakkita pairî kaisarî tîîse, inkamoro yettapusin ton iipîꞌpî Paapa winîpai, inîꞌrî enen toꞌ eꞌtoꞌpe. Mîrîrî yeꞌnen inkamoro eꞌmîꞌsaꞌkaꞌpî inîꞌrî. Moropai eraꞌmasaꞌ tamîꞌnawîronkonya yai, kureꞌne eranneꞌ pe toꞌ enaꞌpî.
12 Moropai inkamoro asakîꞌnankon profetayamîꞌya mai etaꞌpî kaꞌ winîpainon. Taꞌpî maiya: —Enuꞌtî tarîwaya —kaiꞌma mai eseurîmaꞌpî. Moropai teeraꞌmakon teyatonkonya tanne, inkamoro profetayamîꞌ enukuꞌpî katupuru po kaꞌ pona.
13 Mîrîrî pe rî kureꞌne pata eserentîkîꞌmaꞌpî. Mîrîrîya iwaikkatoi pe cidade yankaꞌpî. Mîrîrî cidade ponkon isaꞌmantaꞌsan wanîꞌpî eseuwarapo 7.000 kaisarî pemonkonyamîꞌ. Mîrîrî eꞌkupî eraꞌmasaꞌ tîuyaꞌnîkon pe, toꞌ yonparîꞌsan eꞌnîmîꞌsanya Paapa kaꞌ pon yapurîꞌpî, ipîkku pe aweꞌtoꞌ wenai.
14 Sîrîrî itakon iteꞌkaron eꞌtarumaꞌtîntoꞌ esuwaꞌkasaꞌ man. Tîîse eraꞌmatî maasa itentainon, iteseurîno iteꞌka iipî pe man kaꞌneꞌ pe, tîîkoꞌmanse pra.
Toꞌ Asakîꞌneno Miaꞌ Pona Tîîmoꞌtaiꞌno Trombeta
15 Toꞌ yonparîꞌpî inserîya asakîꞌneno miaꞌ pona tîîmoꞌtaiꞌno trombeta yeꞌnunpaꞌpî. Moropai tuꞌkankon maimu wanîꞌpî kaꞌ po, meruntî ke puꞌkuru. Taapîtîꞌpî maiya:—Tarîpai Uyepotorîkon Paapa piameruntî puꞌkuru man,tamîꞌnawîronkon pemonkonyamîꞌ koꞌmannîꞌnen pe,moropai inmenkaꞌpî Cristo pia nîrî.Inkamoro esaꞌ pe aakoꞌmamî ipatîkarî,ikîꞌpî ton pra
—taꞌpîiya.
16 Mîrîrî taa toꞌya tanne, inkamoro ipîkkukon eseuwaraponkon 24 kaisaronkon Paapa rawîrî taponseꞌkon pona ereutaꞌsan, inkamoro eꞌsekunkaꞌpî teseꞌmukon pona, moropai itenpatakon rennukuꞌpî non pona. Moropai inkamoroya Paapa yapurîꞌpî.
17 Taꞌpî toꞌya:Anna yepotorî Paapa,meruntî puꞌkuru tamîꞌnawîron yentainon amîrî.Ipatîkarî tîîkoꞌmansen amîrî.Moropai pena esiꞌpî,sîrîrîpe nîrî aakoꞌmamî.“Morî pe puꞌkuru man”, taa annaya apîꞌ.Maasa pra meruntî ke puꞌkuru aweꞌtoꞌ ke,tamîꞌnawîronkon esaꞌ pe eenasaꞌ yeꞌnen,ayapurî annaya, Paapa.
18 Innape akuꞌnenan pepîn,inkamoro ekoreꞌmasaꞌ koꞌmamî mararî pra,maasa pra inkamoro tarumaꞌtîtoꞌya erepansaꞌ yeꞌnen.Isaꞌmantaꞌsan yenuntoꞌya weiyu erepansaꞌ man.Moropai apemonkonoyamîꞌ, innape akupîtîponkon penaronkonprofetayamîꞌ yeꞌmaya weiyu erepansaꞌ man.Moropai tamîꞌnawîronkon ayapurînenan,moropai tamîꞌnawîronkon innape akuꞌnenan anama tîuyaꞌnîkon yeꞌnen,manniꞌkan ipîkkukon, moropai ipîkkukon pepîn yeꞌmaya,toꞌ nîkupîꞌpî wenai mîrîrî yai.Tîîse manniꞌkan non ponkon maꞌtanîpîtîponkontarumaꞌtîtoꞌya weiyu erepansaꞌ sîrîrî
taꞌpî toꞌya.
19 Mîrîrî tîpo Paapa yapurî yewîꞌ esettapurukaꞌpî, kaꞌ po awanî manniꞌ. Moropai ita tîweꞌsen, Paapa yarakkîrî esetantoꞌ imaimu yenseꞌ manniꞌ, mîrîrî eseraꞌmaꞌpî, eesettapurîkasaꞌ tanne. Mîrîrîya mararî pra sisiupan wanîꞌpî. Tîrîn tîrînpan wanîꞌpî mararî pra. Moropai waraꞌnapiyamîꞌ wanîꞌpî. Moropai pata eserentîkîꞌmaꞌpî. Moropai mararî pra konoꞌ renaꞌpî tîꞌkon pe.
