Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 12:1-17
12 Mîrîrî yai kureꞌnan anîꞌ nepuꞌtî pepîn teraꞌmasen ton esenpoꞌpî kaꞌ po. Mîîkîrî wanîꞌpî wîriꞌ pe. Mîîkîrî epontîꞌpî wei yaꞌ. Mîîkîrî puu yoꞌkoi kapoi wanîꞌpî. Moropai mîîkîrî puꞌpai po aroꞌ wanîꞌpî, kaiwanoꞌyamîꞌ ke, asakîꞌne puꞌ pona tîîmoꞌtai kaisarî.
2 Mîîkîrî wanîꞌpî more yan pe. Mîrîrî yeꞌnen awentaimepîtî koꞌmannîpîꞌpî neꞌneꞌ more wanî pîꞌ, tînre yenpo tîuya yai.
3 Moropai tiaron teraꞌmasen ton esenpoꞌpî kaꞌ po, oꞌmaꞌ iteseꞌ dragão, kureꞌnan kuratu warainon. Mîîkîrî wanîꞌpî suuyu pe. Mîîkîrî puꞌpai wanîꞌpî asakîꞌne miaꞌ pona tîîmoꞌtai kaisarî. Moropai iretî wanîꞌpî miaꞌ tamîꞌnawîrî kaisarî. Moropai mîîkîrî puꞌpai po nîrî aroꞌ wanîꞌpî, inkeꞌ pe ipuꞌpaikon kaisarî.
4 Mîîkîrîya taukî ke arakkita pairî yonpa sirikkîyamîꞌ worokaꞌpî kaꞌ poi. Inkamoro sorokaꞌpîiya non pona. Moropai mîîkîrî emîꞌpamîꞌpî wîriꞌ rawîrî îꞌ pensa tînre yenpo wîriꞌya ya, yanîpa kaiꞌma.
5 Moropai wîriꞌya tînre yenpoꞌpî warayoꞌ pe. Mîîkîrîya tamîꞌnawîronkon koꞌmannîpî pe man meruntî ke, mîrîrî tenyaꞌ awanî manniꞌ, saꞌman ferro yarakkîrî siꞌma. Nariꞌ pe awanî pe man. Tîîse mîîkîrî moꞌkaꞌpî Paapaya moropai yarîꞌpîiya tîîpia. Moropai taponseꞌ pona itîrîꞌpîiya.
6 Moropai mîîkîrî wîriꞌ epeꞌpî oꞌnon pata pemonkon ton pîn yaꞌ. Mîîkîrî pataꞌseꞌ ton konekasaꞌ Paapaya, miarî aakoꞌmantoꞌpe. Miarî Paapaya mîîkîrî koꞌmannîpî eseuwarapo 1.260 wei kaisarî.
7 Mîrîrî tîpo toꞌ epîꞌpî kaꞌ po. Inserîyamîꞌ esaꞌ Miguel epîꞌpî tiaronkon inserîyamîꞌ pokonpe siꞌma, mîîkîrî dragão yarakkîrî. Moropai mîîkîrî dragão epîꞌpî yarakkîrî mararî pra, tîpemonkonoyamîꞌ pokonpe siꞌma.
8 Tîîse mîîkîrî dragão yentai toꞌ wanîꞌpî. Mîrîrî yeꞌnen dragão moropai inserîyamîꞌ, ipemonkonoyamîꞌ koꞌmamî eserîke pra awanîꞌpî kaꞌ po, toꞌ maꞌre tîwanîkon yeꞌnen.
9 Mîrîrî yeꞌnen mîîkîrî kureꞌnan dragão yenumîꞌpî toꞌya poro pona. Manniꞌ mîîkîrî penaroꞌ îkîi, makui, seruꞌyeꞌ tamîꞌnawîronkon yenkuꞌtî pîꞌ tîîkoꞌmansen mîîkîrî. Mîîkîrî yenumîꞌpî toꞌya non pona. Moropai ipemonkonoyamîꞌ nîrî yenumîꞌpî toꞌya yarakkîrî.
10 Mîrîrî tîpo mai etaꞌpîuya meruntî ke kaꞌ winîpai. Taꞌpîiya:—Tarîpai Paapa winîpai eꞌpîikaꞌtîntoꞌ erepansaꞌ man!Moropai Paapaya îꞌ kaiꞌma tîmeruntîri,moropai îꞌ kaiꞌma tamîꞌnawîronkon koꞌmannîꞌnen pe tîweꞌtoꞌ yenposaiꞌya man.Moropai îꞌ kaiꞌma inmenkaꞌpî,Cristoya tamîꞌnawîronkon koꞌmannîpî tîmaimu pe,manniꞌ yenposaiꞌya man.Maasa pra manniꞌkan uyonpakon pokonoma pîꞌ tîîkoꞌmansenPaapa pîꞌ wei kaisarî moropai ewaron kaisarî,mîîkîrî yenumîꞌpî toꞌya man kaꞌ poi non pona.
11 Mîrîrî yeꞌnen uyonpakon enaꞌpî mîîkîrî yentai,carneiro mînî wenai.Maasa pra aasaꞌmantaꞌpî inkamoro ton pe.Moropai mîrîrî pîꞌ toꞌ eseurîma koꞌmannîpîꞌpî,tîsaꞌmantatoꞌkon tînamai pra.
12 Mîrîrî yeꞌnen taatausinpai eꞌtî,innape Paapa yapurînenan, tamîꞌnawîronkon kaꞌ po toꞌ wanî manniꞌkan.Tîîse non ponkon, amîrîꞌnîkon atausinpa pepîn.Maasa pra aweꞌtarumaꞌtîkon pe naatîi,moropai tamîꞌnawîronkon tuna kawonkon nîrî.Maasa pra Makui erepansaꞌ man amîrîꞌnîkon koreꞌta.Mîîkîrî ekoreꞌmasaꞌ man mararî pra,maasa pra mararî neken non po tîîkoꞌmantoꞌ epuꞌtî tîuya yeꞌnen.
13 Non pona tenunsaꞌ toꞌya epuꞌtî tîuya pe, dragãoya mîîkîrî wîriꞌ, warayoꞌ pe tînre yenpotîpon pokonoma piaꞌtîꞌpî. Moropai iwenairî attîꞌpî yapisîpa kaiꞌma.
14 Tîîse mîîkîrî wîriꞌya asakîꞌne tapîꞌsaꞌ ton yapisîꞌpî, kureꞌnan kuwanu yapîꞌsaꞌ warainon, awainumîpa tîpataꞌseꞌ pe Paapa nîkoneka yaꞌ, oꞌnon pata pemonkon ton pîn yaꞌ. Mîîkîrî koꞌmannîpî Paapaya miarî, eseurîwîꞌne konoꞌ arakkita pairî kaisarî, mîrîrî warapo konoꞌ kaisarî mîîkîrî îkîi, makuiya ipokonoma namai.
15 Mîrîrî yeꞌnen mîîkîrî îkîiya tuna kamoꞌpî tînta yapai kureꞌne iren warantî, mîîkîrî wîriꞌ yeꞌmaꞌpî pîꞌ mîrîrî tunaya yaatoꞌpe kaiꞌma.
16 Tîîse nonya mîîkîrî wîriꞌ pîikaꞌtîꞌpî. Non esenkaramoꞌpî, moropai mîrîrî tuna, dragão mata yapai teepaꞌkasen tuna yennoꞌmaꞌpîiya.
17 12:17-18 Mîrîrîya mîîkîrî wîriꞌ pîꞌ dragão ekoreꞌmaꞌpî mararî pra. Mîrîrî yeꞌnen ipayanyamîꞌ rîꞌsan pîꞌ teeseꞌma kupîꞌpî dragãoya, manniꞌkan Paapa maimu yawîrî tîweꞌsanon, yairon Jesus nekaremekîꞌpî yawîrî tîweꞌsanon pîꞌ.
18 Moropai mîrîrî tîpo, mîîkîrî dragão wanîꞌpî satippe kasapan po, pîrana ena po.
