Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 13:1-18
13 Moropai mîrîrî tîpo, kureꞌnan tuna katapai oꞌmaꞌ eseuka eraꞌmaꞌpîuya. Mîîkîrî retî wanîꞌpî miaꞌ tamîꞌnawîrî kaisarî. Moropai ipuꞌpai wanîꞌpî asakîꞌne miaꞌ pona tîîmoꞌtai kaisarî. Moropai iretîkon kaisarî tiwin pîꞌ tîîse aroꞌ pe wanîꞌpî, rei pe. Moropai ipuꞌpai pîꞌ aweꞌmenukasaꞌ wanîꞌpî Paapa pe tîwanî pîꞌ teeseurîmasen, seruꞌyeꞌ pe.
2 Mîîkîrî oꞌmaꞌ uneraꞌmaꞌpî wanîꞌpî kaikusi warantî araremene. Mîîkîrî puukon wanîꞌpî inonkon pe, tiaron oꞌmaꞌ urso puu warantî. Moropai mîîkîrî mata wanîꞌpî leão mata warantî. Mîîkîrî pia dragãoya tîmeruntîri tîrîꞌpî. Moropai taponseꞌ pona eereutatoꞌpe ikupîꞌpîiya. Moropai tamîꞌnawîrî tîmaimu pe îꞌ kuꞌtoꞌpeiya ikupîiya.
3 Tiwin mîîkîrî oꞌmaꞌ puꞌpai yonpa wanîꞌpî erekîꞌ pe aasaꞌmantatoꞌ teuren. Tîîse aasaꞌmanta pra, erekîꞌ pe tîweꞌsen esepiꞌtîsaꞌ wanîꞌpî. Mîîkîrî esepiꞌtîsaꞌ eraꞌmaꞌpî tamîꞌnawîronkon sîrîrî nonponkonya. Mîrîrî pîꞌ toꞌ esenumenkaꞌpî mararî pra teesewankonoꞌmai. Moropai mîîkîrî oꞌmaꞌ wenairî toꞌ wîtî piaꞌtîꞌpî.
4 Moropai dragão yapurîꞌpî tamîꞌnawîronkonya, maasa pra tamîꞌnawîrî tîmaimu pe îꞌ kuꞌtoꞌpe oꞌmaꞌya tîmeruntîri tîîsaiꞌya yeꞌnen. Moropai mîîkîrî oꞌmaꞌ yapurîꞌpî nîrî toꞌya. Taꞌpî toꞌya: —Anîꞌ moro nai meruntî puꞌkuru mîserî oꞌmaꞌ warainon? Anîꞌ moro nai yarakkîrî eeseyaꞌnama ton, meruntî puꞌkuru itentainon? —taꞌpî toꞌya.
5 Moropai mîîkîrî oꞌmaꞌ pia tîmeruntîri ton eꞌtîsaꞌ wanîꞌpî, taatapurîpa Paapa pe tîweꞌkuꞌse. Mîrîrî yeꞌka tîmaimu pe imakuiꞌpî kupî pîꞌ aakoꞌmamî eseuwarapo 42 kapoi kaisarî neken.
6 Mîîkîrî eseurîma piaꞌtîꞌpî imakuiꞌpî pe Paapa winîkîi moropai Paapa eseꞌ winîkîi, moropai Paapa pata, oꞌnon pata aakoꞌmantoꞌ winîkîi seruꞌyeꞌ pe eeseurîma piaꞌtîꞌpî. Moropai tamîꞌnawîronkon kaꞌ po tîîkoꞌmansenon winîkîi imakuiꞌpî pe eeseurîma piaꞌtîꞌpî.
7 Meruntî puꞌkuru yapisîꞌpîiya, tîmaimu wenai tamîꞌnawîronkon Paapa pemonkonoyamîꞌ yarakkîrî teepîpa, moropai toꞌ yentai teenapa. Moropai tamîꞌnawîronkon pemonkonyamîꞌ esaꞌ pe eꞌtîrîꞌpî iipia. Manniꞌkan tamîꞌnawîronkon pata ponkon, siꞌta mai kuꞌnenan, manniꞌkan pemonkonyamîꞌ tepuꞌse pra, tamîꞌnawîronkon esaꞌ pe eenaꞌpî.
8 Tamîꞌnawîronkon tarî non po tîîkoꞌmansenonya mîîkîrî yapurî pe man. Manniꞌkan koꞌmannîtoꞌ kaareta po iteseꞌ ton pînonya yapurî pe man. Manniꞌ kaareta esaꞌ wanî carneiro pe. Mîîkîrî wanî aasaꞌmantaton pe pena, maasa pata koneka pra tîîse.
9 Mîrîrî yeꞌnen tauya apîꞌnîkon sîrîrî anetapai awanîkon ya, etakî morî pe.
10 Anîꞌ yarakkamo toꞌya ya,mîîkîrî yarakkamo toꞌya eꞌpai awanî mîrîrî.Moropai anîꞌ wîî toꞌya ya kasupara ke,mîîkîrî saꞌmanta eꞌpai man kasupara kamo pe.
Mîrîrî yeꞌnen mîrîrî yapîtanîpîyaꞌnîkon yuwatî. Paapa pemonkono pe awanîkon wenai, yairî awanîkon yuwatî.
11 Moropai mîrîrî tîpo tiaron oꞌmaꞌ eꞌmîꞌsaꞌka eraꞌmaꞌpîuya non poi. Mîîkîrî retî wanîꞌpî asakîꞌne carneiro retî warantî awanîꞌpî. Tîîse mîîkîrî maimu wanîꞌpî dragão maimu warantî.
12 Mîîkîrîya tamîꞌnawîrî eꞌmaiꞌnon oꞌmaꞌ meruntîri yapurîꞌpî mîrîrî yai. Mîîkîrîya tamîꞌnawîronkon pemonkonyamîꞌ pîꞌ taꞌpî pata ponkon pîꞌ. Mîîkîrî eꞌmaiꞌnon oꞌmaꞌ yapurîtoꞌpe toꞌya ikupîꞌpîiya, manniꞌ aasaꞌmantatoꞌ erekîꞌ tîweꞌtoꞌ yapai oꞌmaꞌ esepiꞌtîꞌpî yapurîtoꞌpe toꞌya.
13 Kureꞌne anîꞌ nîkupî eserîkan pepîn kupîꞌpî itakon iteꞌkaron oꞌmaꞌya. Mîîkîrîya kureꞌnan apoꞌ ena emapuꞌtîꞌpî kaꞌ poi sîrîrî non pona, eraꞌma tamîꞌnawîronkon pemonkonyamîꞌya tanne. Mîrîrî pîꞌ toꞌ esiꞌnîpîꞌpî mararî pra.
14 Mîrîrî wenai tamîꞌnawîronkon pemonkonyamîꞌ sîrîrî non po tîîkoꞌmansenon yenkuꞌtîꞌpîiya, mîîkîrî eꞌmaiꞌnon oꞌmaꞌ ton pe. Moropai mîîkîrî itakon iteꞌkaron oꞌmaꞌya taꞌpî tamîꞌnawîronkon sîrîrî pata ponkonya tînapurîkon ton konekatoꞌpe kaiꞌma, manniꞌ erekîꞌ pe esiꞌpî tîîse aasaꞌmanta pra esiꞌpî warantî.
15 Mîîkîrî itakon iteꞌkaron oꞌmaꞌya meruntî yapiꞌsaꞌ tîuya ke, mîrîrî toꞌ nîkonekaꞌpî, tînapurîkon pîꞌ mîrîrî puumaꞌpî, enen aweꞌtoꞌpe, moropai eeseurîmatoꞌpe. Moropai mîîkîrîya manniꞌkan innape tapurînenan pepîn tîꞌkatoꞌpe kaiꞌma tamîꞌnawîrî, ikupîꞌpîiya.
16 Moropai mîîkîrîya tamîꞌnawîronkon pemonkonyamîꞌya tenyakon meruntî winon pîꞌ moropai tepinkon pîꞌ eeseraꞌma ton yekiꞌkatoꞌpe taꞌpî. Pemonkonyamîꞌ ipîkkukon pîꞌ moropai mîîpankon pepîn pîꞌ, moropai yemanne keꞌkon pîꞌ nîrî, moropai îꞌ ton pînon pîꞌ nîrî, moropai toꞌ poitîrîtonon pîꞌ, moropai toꞌ poitîrîtonon pepîn pîꞌ taꞌpîiya, ituꞌse pra toꞌ tîîse toꞌ tekaꞌnunkai.
17 Maasa pra anîꞌya îꞌ yenna eserîke pra awanîꞌpî. Moropai anîꞌ eꞌrepa eserîke pra awanîꞌpî, mîrîrî teraꞌmasen ton pra siꞌma tenyakon pîꞌ moropai tepinkon pîꞌ. Mîrîrî wanîꞌpî mîîkîrî oꞌmaꞌ eseꞌ pe. Moropai iteseꞌ kuꞌneꞌtîtoꞌpe awanîꞌpî.
18 Mîrîrî epuꞌtoꞌpe, kureꞌne epuꞌnen pe eꞌnî yuꞌse awanî mîrîrî. Anîꞌ wanî ya, pakko pe pra epuꞌnen pe, oꞌmaꞌ eseꞌ kuꞌneꞌtînen pe awanî ya, mîîkîrîya ikuꞌneꞌtî. Maasa pra mîrîrî wanî pemonkon eseꞌ pe. Mîrîrî ikuꞌneꞌtîtoꞌ wanî eseuwarapo 666 kaisarî awanî.
