Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 15:1-8
15 Mîrîrî tîpo tiaron kureꞌnan anîꞌ nepuꞌtî pepîn tîweꞌkuꞌsen eraꞌmaꞌpîuya kaꞌ po. Inkamoro wanîꞌpî asakîꞌne miaꞌ pona tîîmoꞌtaiꞌnonkon inserîyamîꞌ eꞌtarumaꞌtîntoꞌ yenseꞌ yarakkîrî tîweꞌsanon pe. Mîrîrî wanî tiwinkanoꞌpî Paapa ekoreꞌmatoꞌ pe awanî. Mîrîrî warantî tamîꞌnawîron Paapa ekoreꞌmatoꞌ yaretîꞌkasaꞌ wanîꞌpî.
2 Mîrîrî tîpo kureꞌnan tuna, pîrana eraꞌmaꞌpîuya, pattîre warainon. Mîrîrî wanîꞌpî apoꞌ yarakkîrî yaiꞌmesaꞌ warantî. Moropai manniꞌkan oꞌmaꞌ moropai iwarantî miaꞌ ke ikonekasaꞌ yentai yapurîtîponkon pepîn eraꞌmaꞌpîuya. Manniꞌkan oꞌmaꞌ eseꞌ kuꞌneꞌtîtoꞌ yarakkîronkon pepîn eraꞌmaꞌpîuya. Inkamoro wanîꞌpî satippe pîrana ena po, mîrîrî tuna awaiꞌnan, pattîre warainon. Inkamoroya tîîpiaꞌnîkon Paapa nîtîrîꞌpî tîsinarîkon harpa yeꞌnunpaꞌpî.
3 Inkamoroya Moisés nurîꞌtî, Paapa poitîrî yeremu kupîꞌpî. Moropai Carneiro erenkatoꞌ pîꞌ toꞌ eserenkaꞌpî:Paapa, anna yepotorî, amîrî wanîmeruntî ke puꞌkuru tamîꞌnawîron yentai tîweꞌsen pe.Îꞌ kaiꞌma ipîkku pe puꞌkuru awanî yeꞌnenkureꞌnan esenumenkantoꞌ ton kuꞌsaꞌya, Paapa.Moropai tamîꞌnawîronkon esaꞌ pe tîweꞌsen pe awanî, Paapa.Yairon puꞌkuru amîrî, tamîꞌnawîron pîꞌmoropai yairon puꞌkuru eesenumenkatoꞌ amîrî,îꞌ pensa seruꞌyeꞌ pepîn!
4 Anîꞌ anamanen pepîn ton pra man, Paapa.Tîîse tamîꞌnawîronkonya anamaipîkku pe puꞌkuru awanî yeꞌnen.Mîrîrî yeꞌnen tamîꞌnawîronkon wanîipîkku pe aweꞌtoꞌ anekaremeꞌpaiipîkku pe puꞌkuru awanî epuꞌtî tîuyaꞌnîkon yeꞌnen.Maasa pra morî puꞌkuru, imakuiꞌpî ton pînamîrî neken tamîꞌnawîronkon yentainon, Paapa.Mîrîrî yeꞌnen tamîꞌnawîronkon pata ponkonya ayapurîyairon pe puꞌkuru awanî epuꞌtî tîuyaꞌnîkon yeꞌnen.Yairon pe puꞌkuru ayeseru wanîeraꞌma tamîꞌnawîronkonya, Paapa
kaiꞌma toꞌ eserenkaꞌpî.
5 Mîrîrî pe rî kaꞌ pon epîremantoꞌ yewîꞌ atarakkanmokaꞌpî. Moropai mîrîrî tawon yuwaꞌtoꞌ tarakkanmokasaꞌ wanîꞌpî ita Paapa koꞌmantoꞌ eraꞌmaꞌpîuya.
6 Mîrîrî tapai asakîꞌne miaꞌ pona tîîmoꞌtaiꞌnonkon inserîyamîꞌ epaꞌkaꞌpî. Inkamoro kaisarî toꞌ yenyaꞌ pata ponkon eꞌtarumaꞌtîtoꞌ yenseꞌkon wanîꞌpî. Inkamoro pon wanîꞌpî morî pe puꞌkuru, aimutun pe. Moropai inkeꞌ pe toꞌ pon, teepîremasanon pon warantî wanîꞌpî. Moropai inkamoro pia woromî ton wanîꞌpî ouro konekasaꞌ. Toꞌ mota woinokon wanîꞌpî.
7 Inkamoro inserîyamîꞌ pia toꞌ kaisarî Paapa ekoreꞌmatoꞌ yenseꞌkon tîrîꞌpî, manniꞌkan asakîrîronkon enenankon yonpaya. Asakîꞌne miaꞌ pona tîîmoꞌtai kaisarî itîrîꞌpîiya toꞌ pia. Manniꞌ Paapa ipatîkarî tîîkoꞌmansen ekoreꞌmatoꞌ tîrîꞌpîiya.
8 Mîrîrî tîpo, mîrîrî epîremantoꞌ yewîꞌ ta ereꞌtî wanîꞌpî, mararî pra tannîꞌse. Mîrîrî wanîꞌpî morî pe puꞌkuru Paapa wanî ekaremeꞌnen pe. Moropai meruntî ke puꞌkuru awanî. Mîrîrî yeꞌnen anîꞌ ewomî eserîke pra awanîꞌpî, mîrîrî pata ponkon eꞌtarumaꞌtîtoꞌ tîpamî pra tîîse, inkamoro asakîꞌne miaꞌ pona tîîmoꞌtaiꞌnonkon inserîyamîꞌ nenepîꞌpî.
