Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 16:1-21
16 Mîrîrî tîpo mai meruntî puꞌkuru etaꞌpîuya, epîremantoꞌ yewîꞌ ta teeseurîmasen. Inkamoro asakîꞌne miaꞌ pona tîîmoꞌtaiꞌnonkon inserîyamîꞌ pîꞌ taꞌpîiya: —Atîtî moropai mîrîrî asakîꞌne miaꞌ pona tîîmoꞌtaiꞌnon Paapa ekoreꞌmatoꞌ yenseꞌ yaꞌ, manniꞌ kantî non pona.
2 Mîrîrîya eꞌmaiꞌnon inserîya tenyaꞌ manniꞌ kamoꞌpî non pona. Mîrîrî wanîꞌpî paran pe awîiꞌpîꞌnîtoꞌpe wanîꞌpî mararî pra neꞌneꞌ pe awanîꞌpî. Mîrîrî epaꞌkaꞌpî manniꞌkan oꞌmaꞌ pemonkono pe tîwanîkonpa tepinkon pîꞌ teraꞌmasen tîrî tîponoꞌsan pîꞌ, moropai mîîkîrî oꞌmaꞌ konekasaꞌ yapurîtîponoꞌsan pîꞌ.
3 Moropai itakon iteꞌkaron inserîya tenyaꞌ tîweꞌsen kamoꞌpî kureꞌnan pîrana kaꞌ. Tiwinarî tuna enaꞌpî pemonkon saꞌmantasaꞌ mînî etiꞌkansaꞌ warantî mîn pe. Mîrîrî yeꞌnen tamîꞌnawîrî tuna kawonkon enenankon oꞌmaꞌkon eꞌtîꞌkaꞌpî.
4 Moropai iteseurînon iteꞌka inserîya tenyaꞌ tîweꞌsen kamoꞌpî iren kaꞌ moropai tuna teepaꞌkasen yaꞌmî yaꞌ. Mîrîrî yeꞌnen mîrîrîkon irenkon eraꞌtîꞌpî mîn pe.
5 Moropai mîîkîrî imaimu yawîrî tuna eꞌtoꞌ inserî eseurîma etaꞌpîuya. Taꞌpîiya see warantî:—Yairon puꞌkuru amîrî,ikupîuya taꞌpîya yawîrî ikupîya yeꞌnen,eꞌtarumaꞌtîntoꞌ kupîya yeꞌnen.Morî puꞌkuru see amîrî, imakuiꞌpî ton pîn.Ipatîkaron tîîkoꞌmansen,pena aakoꞌmamîꞌpîmoropai sîrîrîpe aakoꞌmamî koꞌmannîpî ipatîkarî.
6 Inkamoroya Paapa pemonkonoyamîꞌ tîꞌkaꞌpî.Moropai penaronkon imaimu ekaremeꞌnenanprofetayamîꞌ nurîꞌtî mînî kamoꞌpî toꞌya.Mîrîrî wenai inkamoro eꞌtarumaꞌtî,mîn pe toꞌ wuku wanî.Mîrîrî enîꞌtoꞌpe toꞌya ikuꞌsaꞌya,maasa pra mîrîrî yuꞌse inkamoro eꞌsaꞌ yeꞌnen.
7 Moropai inîꞌrî mai etaꞌpîuya. Tîîse mîrîrî wanîꞌpî Paapa yapurî toꞌya toꞌ nîpoꞌtî yaponseꞌ winîpai tuiꞌsen wanîꞌpî. Taꞌpîiya:—Paapa, anna yepotorî,meruntî puꞌkuru tamîꞌnawîron yentainon.Innape puꞌkuru ayeseru manîꞌ kupîuya taꞌpîya yawîrî ikupîya yeꞌnen.Yairî puꞌkuru nai, Paapa
—taꞌpîiya.
8 Moropai toꞌ saakîrîrîno inserîya tenyaꞌ tîweꞌsen kamoꞌpî wei yaꞌ. Mîrîrî yeꞌnen pemonkonyamîꞌ yekiꞌkatoꞌpeiya ikupîꞌpîiya aꞌneꞌ pe aweꞌtoꞌpe apoꞌ pe.
9 Mîrîrîya inkamoro pemonkonyamîꞌ yekiꞌkaꞌpî apoꞌya. Moropai inkamoro ekoreꞌmaꞌpî Paapa winîkîi. Imakuiꞌpî pe toꞌ eseurîmaꞌpî Paapa pîꞌ, mîrîrî eꞌtarumaꞌtîntoꞌ esaꞌ pe tîweꞌsen pîꞌ. Tîîse imakuiꞌpî pe tîweꞌtoꞌkon rumaka toꞌya pra toꞌ wanîꞌpî. Ipîkku pe Paapa eꞌtoꞌ pîꞌ yapurî toꞌya pra toꞌ wanîꞌpî tiwin kin.
10 Moropai toꞌ miaꞌtaikinon inserîya tenyaꞌ tîweꞌsen kamoꞌpî oꞌmaꞌ yaponseꞌ pona. Mîrîrî yeꞌnen ipemonkonoyamîꞌ pataꞌseꞌ enaꞌpî ewaron pe. Mîrîrî yai inkamoroya tînukon yeꞌkapîtîꞌpî mararî pra neꞌneꞌ pe epuꞌtî tîuyaꞌnîkon wenai.
11 Mîrîrî wenai imakuiꞌpî pe Paapa, kaꞌ pon winîkîi inkamoro pemonkonyamîꞌ wanîꞌpî, neꞌneꞌ pe tîwanîkon wenai moropai erekîꞌ pe tîwanîkon wenai. Tîîse tîwî imakuiꞌpî kupî pîꞌ tîîkoꞌmamîkon tîrumakai, Paapa yapurî toꞌya pra toꞌ wanîꞌpî.
12 Mîrîrî tîpo toꞌ tiwin miaꞌ ponaꞌno inserîya tenya tîweꞌsen kamoꞌpî kureꞌnan iren Eufrates ka. Mîrîrî yeꞌnen iren kureꞌnan apaꞌpî, awaꞌmunaꞌpî. Ipîkkukon pata esanon tuiꞌsanon wei epaꞌka winîpai yeꞌmarî ton pe aapaꞌpî.
13 Mîrîrîya imakuiꞌsan yekaton eseurîwîꞌne awanî nurakon pîretîku warainonkon eraꞌmaꞌpîuya. Inkamoro iipîꞌpî dragão mata winîpai, moropai oꞌmaꞌ mata winîpai, moropai seruꞌyeꞌ profeta mata winîpai toꞌ iipîꞌpî.
14 Inkamoro wanîꞌpî Makui poitîrîtonon yekaton pe, manniꞌ anîꞌ nîkupî eserîkan pepîn kuꞌnenan pe. Inkamoro eseurîwîꞌnankon yekaton awanî wîtî pe man tamîꞌnawîrî pata poro, pata esanon kaisarî. Inkamoroya tamîꞌnawîronkon muurukuntîi teepîkonpa, tiwinanoꞌpî kureꞌnan wei yai, Paapa, meruntî puꞌkuru tamîꞌnawîron yentainon weiyu yainon tonpe.
15 —Maasa etatî —taꞌpîiya. —Uuipî pe wai amaꞌyeꞌ iipî warantî. Mîrîrî yai morî puꞌkuru manniꞌkan enpen tîweꞌsanon ekonekaꞌsan, tîponkon yapisîtîponkon wanî. Maasa pra inkamoro asarî pepîn ipon pra. Moropai toꞌ eppepî pepîn tamîꞌnawîronkon rawîrî —taꞌpîiya.
16 Mîrîrî tîpo inkamoro eseurîwîꞌnankon yekaton wannîya inkamoro ipîkkukon pata esanon muurukuntî toꞌ pataꞌseꞌ yaꞌ. Iteseꞌ hebraico pe Armagedom kaiꞌma tesaꞌsen yaꞌ.
17 Moropai toꞌ ataretîꞌkatoꞌ tiwinanoꞌpî inserîya tenyaꞌ tîweꞌsen kamoꞌpî kawîne pata po. Mîrîrî yai meruntî mai esetaꞌpî ereutantoꞌ epîremantoꞌ yewîꞌ ta tîweꞌsen winîpai. Taꞌpîiya: —Tamîꞌnawîron eꞌkuꞌsaꞌ man —kaiꞌma.
18 Mîrîrî yai sisiupan wanîꞌpî. Mararî pra teesetasen wanîꞌpî moropai waraꞌnapi wanîꞌpî. Moropai kureꞌnan pata eserentîkîꞌmatoꞌ wanîꞌpî. Îꞌ pensa pena Paapaya warayoꞌ ton koneka yai, eꞌkupîꞌpî pepîn. Mîrîrî wanîꞌpî tiaronkon eꞌtarumaꞌtîntoꞌkon yentai puꞌkuru awanîꞌpî.
19 Mîrîrîya kureꞌnan cidade rataikapîtîꞌpî eseurîwîꞌne ne kaisarî. Moropai tamîꞌnawîron pata cidadekon kaisaron yaretîꞌkaꞌpî. Mîrîrî yai Paapa enpenataꞌpî kureꞌnan Babilônia iteseꞌ pîꞌ. Moropai teekoreꞌmatoꞌ yenseꞌ intapîkîrî tannîꞌse tîrîꞌpîiya, mîrîrîya kureꞌne toꞌ tarumaꞌtîtoꞌpe kaiꞌma.
20 Mîrîrî yai tamîꞌnawîron iwono pe tîweꞌsanon esenomîꞌpî, eeseraꞌma pra eenaꞌpî. Moropai tamîꞌnawîron wîꞌkon esenomîꞌpî, eeseraꞌma pra eenaꞌpî.
21 Mîrîrî yai konoꞌ renaꞌpî kureꞌnan inonkon pe tîꞌkon kaisarî aweꞌsorokaꞌpî pemonkonyamîꞌ pona. Mîrîrî tîꞌkon yamaiꞌnatî wanîꞌpî 50 quilos kaisarî. Mîrîrî wenai pemonkonyamîꞌ ekoreꞌmaꞌpî Paapa winîkîi. Moropai toꞌ eseurîmaꞌpî imakuiꞌpî pe, ipîꞌ konoꞌya tîtarumaꞌtîkon wenai, maasa pra kureꞌne eꞌtarumaꞌtîntoꞌ wanî yeꞌnen.
