Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 17:1-18
17 Mîrîrî tîpo asakîꞌne miaꞌ pona tîîmoꞌtaiꞌnîkon yonpa pata ponkon eꞌtarumaꞌtîtoꞌ yenseꞌ itenyaꞌ tîweꞌsen mîîkîrî iipîꞌpî uupia upîꞌ kai. —Asiꞌkî uupia, îꞌ kaiꞌma mîserî wîriꞌ seꞌ tapairon eꞌtarumaꞌtîtoꞌ ekaremeꞌtoꞌpeuya. Manniꞌ kureꞌnan cidade tuꞌkan irenkon ena po ikonekasaꞌ pe wîriꞌ wanî.
2 Mîîkîrî yarakkîrî pata esanonkon esanon reiyamîꞌya imakuiꞌpî kupîꞌpî, ipîꞌ tîwanîkon ke. Moropai sîrîrî pata po tîîkoꞌmansenon pemonkonyamîꞌ etînsaꞌ wanîꞌpî imakuiꞌpî seꞌ tapairî wîriꞌsanyamîꞌ yarakkîrî tîwanîkon ke.
3 Moropai Morî Yekaton Wannî wanîꞌpî uyarakkîrî uyesaꞌ pe. Moropai inserîya uyarîꞌpî keren pona. Miarî wîriꞌ ereutasaꞌ eraꞌmaꞌpîuya oꞌmaꞌ suuyu pe tîweꞌsen pona. Mîîkîrî pîꞌ aweꞌmenukasaꞌ wanîꞌpî Paapa eseꞌkon maasa pra imakuiꞌpî pe Paapa pe mîîkîrî eꞌkupîꞌpî. Moropai mîîkîrî oꞌmaꞌ puꞌpai wanîꞌpî asakîꞌne miaꞌ pona tîîmoꞌtai kaisarî. Moropai iretî wanîꞌpî miaꞌ tamîꞌnawîrî kaisarî.
4 Mîîkîrî ipo tîweꞌsen wîriꞌ epontîsaꞌ wanîꞌpî suuyu tîpon yaꞌ. Mîrîrî ipon poro yariꞌkuꞌtasaꞌ pe wanîꞌpî ourokon ke. moropai morîkon puꞌkuru epeꞌkeꞌkon tîꞌkon ke, moropai pérolakon ke. Mîîkîrîya tenyaꞌ yanunsaꞌ wanîꞌpî tuꞌkan îꞌ kon nurakon yenseꞌ intapîkîrî tannîꞌse. Mîrîrî wanîꞌpî inkupîꞌpî imakuiꞌpî yenseꞌ pe, seꞌ tapairî warayoꞌkon yarakkîrî awanîꞌpî yenseꞌ pe.
5 Mîîkîrî yepin pîꞌ aweꞌmenukasaꞌ wanîꞌpî, anîꞌ nepuꞌtî pepîn ekaremeꞌnen.BABILÔNIA WANÎ KUREꞌNE IPÎKKU PE.MÎSERÎ WANÎ TAMÎꞌNAWÎRONKON SEꞌ TAPAIRONKON WÎRIꞌSANYAMÎꞌ YANKON PE.MOROPAI TAMÎꞌNAWÎRON IMAKUIꞌPÎ SÎRÎRÎ PATA PO TÎWEꞌSEN YENTAIIMAKUIꞌPÎ PE AWANÎ.
6 Mîrîrî yai mîîkîrî wîriꞌ etînsaꞌ eraꞌmaꞌpîuya, Paapa pemonkonoyamîꞌ mînî pîꞌ. Manniꞌkan yairî puꞌkuru Jesus yapurî toꞌya wenai, toꞌ nîtîꞌkaꞌsan mînî pîꞌ eetînsaꞌ.
Mîîkîrî eraꞌmauya pe mararî pra esiꞌnîpîꞌpî ipîꞌ.
7 Moropai inserîya uyekaranmapoꞌpî. Taꞌpîiya: —Îꞌ waniꞌ awanî yeꞌnen eesiꞌnîꞌsaꞌ mîrîrî? Apîꞌ ekaremekîuya îꞌ taatoꞌpe mîrîrî anîꞌ nepuꞌtî pepîn wîriꞌ yekare wanî. Moropai oꞌmaꞌ yekare wanî. Wîriꞌ ereutasaꞌ manniꞌ ipona, asakîꞌne miaꞌ pona tîîmoꞌtaiꞌnon ipuꞌpai, moropai miaꞌ tamîꞌnawîron iretîkon.
8 Manniꞌ oꞌmaꞌ eraꞌmaya manniꞌ enen mîîkîrî wanîꞌpî. Tarîpai enen pra man. Mîîkîrî epaꞌka kupî sîrîrî kureꞌnan ituꞌnakan yapai. Moropai aatîpamî kupî sîrîrî. Moropai sîrîrî pata po tîîkoꞌmansenon pemonkonyamîꞌ Paapaya pata konekaꞌpî pata pai toꞌ eseꞌkon imenukasaꞌkon pepînkon ipatîkarî enen koꞌmannîtoꞌ kaaretarî po, inkamoro esiꞌnîpî kupî sîrîrî oꞌmaꞌ eraꞌma tîuyaꞌnîkon ya pîꞌ. Mîîkîrî wanîꞌpî enen, tîîse mîîkîrî man enen pra. Tîîse eesenpo kupî sîrîrî inîꞌrî.
9 Sîrîrî epuꞌtîtoꞌpe mararî pra epuꞌnen pe eꞌnî eꞌpai awanî. Mîrîrî asakîꞌne miaꞌ pona tîîmoꞌtaiꞌnon ipuꞌpai wanî asakîꞌne miaꞌ pona tîîmoꞌtaiꞌnon wîꞌkon pe ipona wîriꞌ ereutasaꞌ manniꞌ. Moropai mîrîrîkon wanî nîrî asakîꞌne miaꞌ pona tîîmoꞌtaiꞌnonkon ipîkkukon pata esanon, reiyamîꞌ pe.
10 Miaꞌtaikin toꞌ yonpayamîꞌ saꞌmantaꞌpî. Tiwinan wanî pata esaꞌ pe. Moropai tiaron esenpo pra man maasa. Tîîse mîîkîrî esenposaꞌ ya, kureꞌne aakoꞌmamî pe pra man. Mararî neken aakoꞌmantoꞌ wanî pe man.
11 Moropai mîîkîrî oꞌmaꞌ enen esiꞌpî eꞌmaiꞌ pe, tîîse mîîkîrî man enen pra tarîpai, mîîkîrî wanî mîrîrî oꞌmaꞌkon asakîꞌne miaꞌ pon tîîmoꞌtaiꞌnîkon yonpa pe, toꞌ eseurîwîꞌne miaꞌ pona tîîmoꞌtainorî pe. Mîîkîrî saꞌmanta kupî sîrîrî, aakoꞌmamî pepîn.
12 Manniꞌ oꞌmaꞌ miaꞌ tamîꞌnawîron iretî aneraꞌmaꞌpî wanî miaꞌ tamîꞌnawîronkon reiyamîꞌ pe, maasa pata esanon pe esiꞌsan pe pra. Tîîse inkamoroya meruntî yapisî kupî sîrîrî, meruntî ke sîrîrî pata esaꞌ pe tîwanîkonpa mîîkîrî oꞌmaꞌ yarakkîrî. Tîîse kureꞌne toꞌ koꞌmamî pepîn. Mararî neken toꞌ koꞌmamî.
13 Tamîꞌnawîrî insamoro reiyamîꞌ eseta pe man. Inkamoroya meruntî tîrî pe man oꞌmaꞌ pia, pemonkonyamîꞌ esaꞌ pe aweꞌtoꞌpe.
14 Inkamoro eseyaꞌnama pe man carneiro yarakkîrî, tîîse toꞌ yentai awanî pe man. Maasa pra tamîꞌnawîronkon ipîkkukon yentai tîwanî yeꞌnen, toꞌ yepotorî pe tîwanî yeꞌnen, pemonkonyamîꞌ esanon esaꞌ pe tîwanî yeꞌnen. Tamîꞌnawîronkon tapurînenan tîmenkaꞌsan pokonpe siꞌma toꞌ yentai eena pe man.
15 Moropai inîꞌrî inserîya taꞌpî upîꞌ: —Manniꞌ tunakon aneraꞌmaꞌpî oꞌnon pata seꞌ tapairon wîriꞌ ereutasaꞌ manniꞌ, inkamoro wanî arinîkon pemonkonyamîꞌ pe. Tuꞌkankon pata ponkon, tamîꞌnawîron siꞌta mai kuꞌnenan arinîkon pemonkonyamîꞌ tepuꞌse pra toꞌ wanî.
16 Moropai oꞌmaꞌ retî aneraꞌmaꞌpî moropai oꞌmaꞌya mîîkîrî seꞌ tapairon wîriꞌ pokonoma pe man. Tamîꞌnawîrî itesaꞌ aweꞌtoꞌ moꞌka toꞌya kupî sîrîrî. Moropai îꞌ ton pra inîmîkî toꞌya ipon pra. Moropai yanî toꞌya, apoꞌ ke itîpannîpî toꞌya pe man.
17 Maasa pra Paapaya inkamoro esenumenkatoꞌ ton tîrîꞌpî mîrîrî kuꞌtoꞌpe toꞌya. Mîrîrî yeꞌnen toꞌ esenumenkaꞌpî oꞌmaꞌ pia meruntî tîrî tîuyaꞌnîkon pîꞌ, pemonkonyamîꞌ esaꞌ pe aweꞌtoꞌpe. Moropai mîîkîrî koꞌmamî pe man, ituꞌse Paapa eꞌtoꞌ pîkîrî, îꞌ pensa îꞌ taꞌpî Paapaya eꞌkupî pîkîrî.
18 Mîîkîrî wîriꞌ aneraꞌmaꞌpî wanî kureꞌnan cidade pe. Tamîꞌnawîronkon pata esanon ipîkkukon reiyamîꞌ esaꞌ pe awanî —taꞌpîiya.
