Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 20:1-15
20 Mîrîrî tîpo kaꞌ poi inserî autî eraꞌmaꞌpîuya kureꞌnan ituꞌnakan yarakkantoꞌ chave yarakkîrî awanîꞌpî. Moropai saꞌman karena amîiꞌne yarakkîrî awanîꞌpî.
2 Mîîkîrîya oꞌmaꞌ dragão yapisîꞌpî. Manniꞌ penaroꞌ îkîi pe esiꞌpî Makui, Satanás. Moropai mîîkîrî yewaꞌtîꞌpîiya eseuwarapo mil kaisarî konoꞌ aakoꞌmantoꞌpe yewaꞌtîsaꞌ pe.
3 Moropai mîîkîrî inserîya makui yenumîꞌpî kureꞌnan ituꞌnakan yaꞌ. Mîrîrî ituꞌnakan manaꞌta yettapurîꞌpîiya mîrîrî yarakkamoꞌpîiya tenyawon chave ke. Maasa pra inîꞌrî sîrîrî pata ponkon pemonkonyamîꞌ yenkuꞌtî pîꞌ aakoꞌmamî namai, mîrîrî mil kaisarî konoꞌ ataretîꞌka pîkîrî. Mîrîrî warapon mil kaisaron konoꞌ ataretîꞌkasaꞌ yai inîꞌrî eeturumaka eꞌpai awanî, tîîse mararî aakoꞌmantoꞌpe, kureꞌne pra.
4 Moropai mîrîrî pe rî tiaronkon ereutantoꞌkon eraꞌmaꞌpîuya. Mîrîrîkon pona ereutaꞌsanya meruntî puꞌkuru yapisîꞌpî pemonkonyamîꞌ yenumîi. Moropai manniꞌkan innape Jesus kuꞌnenan isaꞌmantaꞌsan yekatonoꞌpî eraꞌmaꞌpîuya. Inkamoro pîmîrîkkîtîꞌpî toꞌya Paapa maimu ekaremekî toꞌya wenai. Manniꞌkan yairî esiꞌsan oꞌmaꞌ moropai miaꞌ ke ikonekasaꞌ yapurîtîponkon pepîn, moropai tepinkon pîꞌ moropai tenyakon pîꞌ oꞌmaꞌ winîpainon eeseraꞌma ton yapisîtîponkon pepîn, inkamoro eꞌmîꞌsaꞌkaꞌpî enen. Moropai inkamoro enaꞌpî tamîꞌnawîronkon esaꞌ pe Cristo yarakkîrî mil konoꞌ kaisarî.
5 (Tîîse tiaronkon isaꞌmantaꞌsan ena pra awanîꞌpî enen maasa, mil konoꞌ ataretîꞌka pîkîrî toꞌ koꞌmamîꞌpî.) Mîrîrî wanî eꞌmaiꞌnon eꞌmîꞌsaꞌkantoꞌ pe.
6 Morî pe puꞌkuru inkamoro wanî taatausinpai, eꞌmaiꞌnon eꞌmîꞌsaꞌkantoꞌ yai toꞌ eꞌmîꞌsaꞌka yeꞌnen. Maasa pra inîꞌrî toꞌ saꞌmanta pepîn saꞌmantantoꞌ yentai toꞌ enasaꞌ yeꞌnen. Inkamoro wanî pe man teepîremasanon Paapa moropai Cristo rawîrî teesenyakaꞌmasanon. Moropai Cristo pokonpe siꞌma inkamoroya pata ponkon koꞌmannîpî mil konoꞌ kaisarî.
Makui Yentai Cristo Wanî
7 Moropai tamîꞌnawîrî mîrîrî mil konoꞌ kaisarî ataretîꞌkasaꞌ tîpo, Makui eturumaka taatarakkantoꞌ yapai.
8 Moropai mîîkîrî wîtî pata poro tamîꞌnawîronkon pemonkonyamîꞌ yenkuꞌtîi tamîꞌnawîrî patakon kaisarî. Mîrîrî kupîiya Gogue pata po moropai Magogue pata po. Mîîkîrî Makuiya inkamoro pemonkonyamîꞌ yannuku teepîkonpa. Mararî pra ikuꞌneꞌtî yentai toꞌ wanî, tuꞌke kasapan warantî.
9 Inkamoro eꞌparaipîka pata kaisarî. Moropai inkamoroya Paapa pemonkonoyamîꞌ koꞌmantoꞌ woimaꞌtî, manniꞌ cidade Paapa nîsaꞌnama kureꞌne. Tîîse kaꞌneꞌ pe kureꞌnan apoꞌ autîꞌpî kaꞌ poinon. Moropai mîrîrîya inkamoro tîꞌkaꞌpî.
10 Mîrîrî yai mîîkîrî makui, yenkuꞌtîton yenumîꞌpî toꞌya kureꞌnan apoꞌ ikuꞌpî pe tîweꞌsen kaꞌ, enxofre yarakkîrî, oꞌnon pata manniꞌ oꞌmaꞌ moropai ipoitîrî profeta seruꞌyeꞌ yenunsaꞌ toꞌya manniꞌ pata. Moropai miarî inkamoro koꞌmamî tîmoronkon epuꞌtîꞌpî ipatîkarî aataretîꞌka tonpe pra, wei kaisarî moropai ewaron kaisarî.
Tiwinanoꞌpî Pe Paapaya Yenumîtoꞌ
11 Moropai inîꞌrî kureꞌnan ereutantoꞌ aimutun eraꞌmaꞌpîuya. Moropai ipona ereutaꞌpî eraꞌmaꞌpîuya nîrî. Moropai pata teeseraꞌmasen ataretîꞌkaꞌpî moropai kaꞌ ataretîꞌkaꞌpî nîrî. Inîꞌrî eeseraꞌma pra eenaꞌpî, aatîpamîꞌpî yeꞌnen.
12 Moropai isaꞌmantaꞌsan nîrî eraꞌmaꞌpîuya. Manniꞌkan ipîkkukon moropai ipîkkukon pepîn, manniꞌkan ereutantoꞌ rawîrî satippe esiꞌsan eraꞌmaꞌpîuya. Moropai kaaretakon yarakkanmokaꞌpî toꞌya moropai tiaron kaareta yarakkanmokaꞌpî toꞌya nîrî, mîrîrî ipatîkarî enen koꞌmannîtoꞌ kaaretarî. Mîrîrîya inkamoro isaꞌmantaꞌsan yenumîꞌpî toꞌya îꞌ toꞌ nîkupîꞌpî wenairî. Îꞌ kaiꞌma kaareta pona aweꞌmenukasaꞌ manniꞌ yawîrî ikupî toꞌya.
13 Moropai tuna ka isaꞌmantaꞌsan yekatonoꞌpî eꞌmîꞌsaꞌkaꞌpî. Moropai tamîꞌnawîronkon isaꞌmantaꞌsan pataꞌseꞌ yawonkon eꞌmîꞌsaꞌkaꞌpî. Moropai toꞌ nîkupîꞌpî wenai toꞌ yenumîꞌpî Paapaya.
14 Mîrîrî yeꞌnen inkamoro isaꞌmantaꞌsan yenumî toꞌya ikuꞌpî pe tîweꞌsen apoꞌ yaꞌ. (Mîrîrî ikuꞌpî pe tîweꞌsen apoꞌ wanî itakon iteꞌka pe saꞌmantantoꞌ, maasa pra aminke Paapa pîꞌ eꞌtarumaꞌtîn ipatîkarî.)
15 Mîrîrî yeꞌnen anîꞌ iteseꞌ ton pra tîweꞌsen mîrîrî ipatîkarî enen koꞌmannîtoꞌ kaareta po, mîîkîrî yenumîꞌpî toꞌya ikuꞌpî pe tîweꞌsen apoꞌ yaꞌ.
