Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 21:1-27
21 Moropai amenan kaꞌ moropai amenan pata eraꞌmaꞌpîuya. Eꞌmaiꞌnon kaꞌ moropai eꞌmaiꞌnon pata eseraꞌma pra eenaꞌpî. Moropai kureꞌnan tuna pîrana esenomîꞌpî inîꞌrî eeseraꞌma pra.
2 Moropai morî puꞌkuru Jerusalém cidaderî amenan eraꞌmaꞌpîuya. Mîrîrî autîꞌpî kaꞌ poi. Paapa piapai aaipîꞌpî, morî pe puꞌkuru taatariꞌkuꞌtîi. Moropai teepontîi morî tîpon yaꞌ, manniꞌ wîriꞌ ekonekasaꞌ tawasirî yarakkîrî teeseporîpa warantî awanîꞌpî.
3 Moropai mai etaꞌpîuya meruntî ke puꞌkuru. Mîrîrî wanîꞌpî ereutantoꞌ winîpai tuiꞌsen pe. Moropai taꞌpîiya: —Tarîpai Paapa koꞌmantoꞌ man pemonkonyamîꞌ yarakkîrî. Mîrîrî yeꞌnen toꞌ pokonpe Paapa koꞌmamî. Moropai inkamoro wanî ipemonkono pe. Mîrîrî yeꞌnen toꞌ yarakkîrî puꞌkuru Paapa wanî. Moropai inkamoro yepotorî pe Paapa wanî.
4 Mîîkîrî Paapaya toꞌ karawatoꞌ yaꞌmananîpî toꞌ yenu parukon inîꞌ toꞌ karau namai. Tarî anîꞌ saꞌmanta pepîn. Anîꞌ esewankonoꞌma pepîn. Anîꞌ karau pepîn inîꞌrî. Anîꞌrî neꞌneꞌ moronka pepîn. Maasa pra pena îꞌ kaiꞌma koꞌmannîtoꞌ, mîrîrî esuwaꞌkaꞌpî yeꞌnen —taꞌpîiya.
5 Manniꞌ ereutantoꞌ pona ereutaꞌpîya taꞌpî: —Tarîpai tamîꞌnawîron konekauya amenan pe. Moropai uyarakkîrî eeseurîmaꞌpî. —Sîrîrî menukakî. Maasa pra sîrîrî mai wanî sîrîrî yairon pe puꞌkuru tîweꞌsen pe. Moropai innape tîkupî yuꞌse tîweꞌsen pe.
6 Moropai eeseurîma koꞌmannîpîꞌpî: —Tamîꞌnawîron ekonekasaꞌ man aasîrî! Uurî wanî eꞌmaiꞌnon pe puꞌkuru moropai tamîꞌnawîron ataretîꞌkatoꞌpe. Eesippiaꞌtîtoꞌpe moropai ikîꞌpî pe wanî. Anîꞌ wanî ya tuna aninnîpai mîîkîrî pia tuna tîrîuya, inenîrî ton, tuna epeꞌmîn tîîwarîrî teepaꞌkasen enen koꞌmannîtoꞌ tîînen.
7 Anîꞌ eꞌsaꞌ ya tamîꞌnawîron Paapa maimu yawîrî pra tîwanî emapuꞌtînenan yentai, mîîkîrîya untîrî yapisî mîrîrî. Uurî wanî itepotorî pe moropai mîîkîrî wanî pe man unmu pe puꞌkuru.
8 Tîîse eranneꞌkon, moropai yenkuꞌtîtonkon, moropai îꞌ imakuiꞌpî kupî pîꞌ esenupaꞌsan, moropai pemonkon wîîtîponkon, moropai tiaron nura kuꞌnenan, moropai piaꞌsan pe tîwanîkon wenai imakuiꞌpî kuꞌnenan, moropai miaꞌ ke ikonekasaꞌ yapurînenan, moropai tamîꞌnawîronkon seruꞌyeꞌkon, inkamoro yeꞌka pataꞌseꞌ wanî pe man mîrîrî kureꞌnan apoꞌ ikuꞌpî pe tîweꞌsen moropai enxofre apoꞌ yarakkîron. Mîrîrî wanî itakon iteꞌka pe saꞌmantantoꞌpe wanî. Miarî tîmoronkon epuꞌtî toꞌya ipatîkarî awanî pe man —taꞌpîiya.
Amenan Jerusalém
9 Moropai manniꞌ inserî toꞌ asakîꞌne miaꞌ pona tîîmoꞌtaiꞌnon manniꞌ eꞌtarumaꞌtîntoꞌ yenseꞌ itenyaꞌ wanî manniꞌ iipîꞌpî. Moropai taꞌpîiya: —Asiꞌkî, mîserî Carneiro yawasirî, inoꞌpî ekaremeꞌtoꞌpeuya apîꞌ.
10 Mîrîrî yeꞌnen Morî Yekaton Wannîya uyarîꞌpî kawînan wîꞌ pona. Moropai mîîkîrîya morî puꞌkuru Jerusalém cidaderî ekaremekîꞌpî. Manniꞌ kaꞌ poi awautî uneraꞌmaꞌpî Paapa piapai tuiꞌsen ekaremekîꞌpîiya upîꞌ.
11 Mîrîrî wanîꞌpî inkeꞌ morî pe Paapa yaꞌkaru wenai. Mîrîrî cidade wanîꞌpî sisiu pe aawittapîtîꞌpî isarawire tîꞌ jaspe wanî warantî. Tuꞌke aawittapîtîꞌpî manniꞌ tîꞌ cristal warantî awaiꞌne awanîꞌpî.
12 Mîrîrî yuwaꞌtoꞌ wanîꞌpî kureꞌnan moropai kawînan. Moropai mîrîrî manaꞌtakon wanîꞌpî asakîꞌne puꞌ pona tîîmoꞌtai kaisarî. Mîrîrî manaꞌtakon konekanen inserîyamîꞌ wanîꞌpî asakîꞌne puu pona tîîmoꞌtai kaisarî. Mîrîrî manaꞌtakon kaisarî asakîꞌne puu pona tîîmoꞌtaiꞌnonkon Israel payanîꞌsan eseꞌkon eꞌmenukasaꞌ wanîꞌpî.
13 Eseurîwîꞌneꞌne tiwin iratai tîîse manaꞌtakon wanîꞌpî. Eseurîwîꞌne wei epaꞌka winî, moropai eseurîwîꞌne kamaiꞌ winî, moropai eseurîwîꞌne meruntî winî, moropai eseurîwîꞌne wei ewomî winî awanîꞌpî.
14 Mîrîrî cidade yuwaꞌtoꞌ konekasaꞌ toꞌya wanîꞌpî asakîꞌne puꞌ pona tîîmoꞌtaiꞌnon tîꞌkon pona. Mîrîrî tîꞌkon pîꞌ asakîꞌne puꞌ pona tîîmoꞌtaiꞌnonkon Carneiro naipontîꞌsan eseꞌkon eꞌmenukasaꞌ wanîꞌpî.
15 Manniꞌ inserî uyarakkîrî eseurîmaꞌpî mîîkîrî yenya kusan yei siruru warainon ouro konekasaꞌ wanîꞌpî. Mîrîrî wanîꞌpî mîrîrî cidade kîꞌpî kuꞌneꞌtîtoꞌpe. Moropai manaꞌtakon nîrî. Moropai yuwaꞌtoꞌ kuꞌneꞌtîtoꞌpe awanîꞌpî.
16 Mîrîrî cidade wanîꞌpî seꞌ kaisarî itawenetî ikonekasaꞌ pe. Mîrîrî kawînetî wanîꞌpî itawenetî kaisarî. Moropai mîîkîrî inserîya tenya manniꞌ ke cidade kuꞌneꞌtîꞌpî. Mîrîrî kîꞌpî ikusano wanîꞌpî eseuwarapo 1.200 kilômetros kaisarî ikusano. Moropai itawenetî moropai ikawînnetî wanîꞌpî seꞌ kaisarî eꞌsentai pra.
17 Moropai inserîya yuwaꞌtoꞌ kuꞌneꞌtîꞌpî. Mîrîrîya itîrîꞌpî eseuwarapo 74 metros kaisarî itawenetî, pemonkonyamîꞌya ikuꞌneꞌtî warantî inserîya ikuꞌneꞌtîsaꞌ tanne.
18 Mîrîrî cidade yuwaꞌtoꞌ wanîꞌpî tîꞌ jaspe ke ikonekasaꞌ. Moropai cidade puꞌkuru yuwaꞌtoꞌ pepîn wanîꞌpî teken ouro konekasaꞌ pe. Awaiꞌne awanîꞌpî pattîre warantî.
19 Moropai mîrîrî yuwaꞌtoꞌ yaponseꞌ pe toꞌ nîtîrîꞌpî tîꞌkon, yariꞌkuꞌtasaꞌ toꞌya wanîꞌpî tuꞌke siꞌta morîkon tîꞌkon ke.Eꞌmaiꞌnon tîꞌ wanîꞌpî jaspe pe.Iteꞌmaꞌpî pokon tîꞌ wanîꞌpî safira pe.Iteseurînon wanîꞌpî tîꞌ ágata pe.Itasakîrîrîno wanîꞌpî tîꞌ esmeralda pe.
20 Miaꞌtaikinon wanîꞌpî tîꞌ sardônio pe.Tiwin miaꞌ ponaꞌno wanîꞌpî tîꞌ sárdio pe.Asakîꞌne miaꞌ ponaꞌno wanîꞌpî tîꞌ crisólite pe.Eseurîwîꞌne miaꞌ ponaꞌno wanîꞌpî tîꞌ berilo pe.Itasakîrîrîno miaꞌ pona tîîmoꞌtaiꞌnon wanîꞌpî tîꞌ topázio pe.Miaꞌtaikin miaꞌ pona tîîmoꞌtaiꞌnon wanîꞌpî tîꞌ crisópraso pe.Tiwin puꞌ pona tîîmoꞌtaiꞌnon wanîꞌpî tîꞌ jacinto pe.Asakîꞌne puꞌ pona tîîmoꞌtaiꞌnon wanîꞌpî tîꞌ ametista pe.
Tamîꞌnawîrî inkeꞌkon mîrîrîkon tîꞌ ke yariꞌkuꞌtasaꞌ pe awanîꞌpî, suuyu pe, rora pe, tuꞌke siꞌta morîkon tîꞌkon ke.
21 Moropai mîrîrî manaꞌtakon wanîꞌpî manniꞌ tîꞌ epeꞌkeꞌkon puꞌkuru pérola pe awanîꞌpî. Mîrîrî yeꞌnen teken mîrîrî tîꞌ ke ikonekasaꞌ pe mîrîrî manaꞌta wanîꞌpî. Tiwin pîꞌ tîîse tiwinan pérola ke ikonekasaꞌ pe awanîꞌpî. Tîîse cidade ta wanîꞌpî iporo asanîtoꞌ tekenan puꞌkuru ouro konekasaꞌ pe awaiꞌne, aꞌkare, pattîre warantî.
22 Miarî cidade po epîremantoꞌ yewîꞌ ton pra awanîꞌpî. Maasa pra Uyepotorîkon Paapa wanî moro, meruntî puꞌkuru manniꞌ tamîꞌnawîron yentainon. Moropai Carneiro nîrî wanî moro. Toꞌ koꞌmantoꞌ wanî epîremantoꞌpe.
23 Miarî cidade po wei yuꞌse wanî pepîn. Moropai kapoi yuꞌse wanî pepîn iweiyuꞌmanen ton. Maasa pra Paapa yaꞌkaruya iweiyuꞌmasaꞌ koꞌmamî. Moropai Carneiro yaꞌkaruya yaꞌkaruꞌmasaꞌ koꞌmamî yeꞌnen.
24 Mîrîrî yeꞌnen tamîꞌnawîron pata ponkon sîrîrî pata po tîîkoꞌmansenon asarî iweiyu ta. Moropai manniꞌkan ipîkkukon pata esanon reiyamîꞌya ipîkku pe tîweꞌtoꞌkon enepî mîrîrî yai.
25 Mîrîrî cidade manaꞌta koꞌmamî ipatîkarî aꞌta ke, aatarakkamo pepîn tiwin kin. Maasa pra miarî ewaron ton pra awanî.
26 Mîrîrî yai tamîꞌnawîron pata ponkonya ipîkku pe tîweꞌtoꞌkon enepî cidade pona.
27 Tîîse miarî manniꞌkan imakuiꞌsan ewomî pepîn tiwin kin. Moropai manniꞌkan tîweppeꞌsanon ewomî pepîn. Moropai seruꞌ pe tîweꞌsanon ewomî pepîn. Tîîse mîrîrî cidade pona manniꞌkan neken teseꞌkon eꞌmenukasaꞌ ipatîkarî enen koꞌmannîtoꞌ kaaretarî po ewomî, inkamoro mîîkîrî Carneiro pemonkono pe tîweꞌsanon.
