Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 3:1-22
3 Inîꞌrî taꞌpîiya: —Sardes soosirî koꞌmannîꞌnen inserî pia kaareta menukakî, see warantî taatoꞌ:
Sîrîrî itekare wanî umaimu pe. Uupia morî puꞌkuru, eꞌtoꞌ yawîron, Paapa Yekaton man. Moropai asakîꞌne miaꞌ pona tîîmoꞌtaiꞌnonkon kaiwanoꞌyamîꞌ man uyenyaꞌ. Epuꞌtî pîꞌ wai tamîꞌnawîrî îꞌ kupî pîꞌ aakoꞌmamîkon. Tiaronkonya taa: “Enenankon inkamoro, Paapa pemonkonoyamîꞌ inkamoro” taa toꞌya apîꞌnîkon teuren, tîîse isaꞌmantaꞌsan pe awanîkon tanne, aminke Paapa piapai aatarimasaꞌkon tanne.
2 Mîrîrî yeꞌnen tauya enpen eꞌtî. Aakoꞌmantoꞌkon pîꞌ enpenatatî. Aꞌtuꞌmîra awanîkon. Moropai meruntî ke enatî aakoꞌmantoꞌkon konekatî morî pe awanîkonpa, tîwî ikupîyaꞌnîkon namai. Maasa ipatîkarî aasaꞌmantakon rawîrî mîrîrî yuwatî. Maasa pra tamîꞌnawîrî ankupîꞌpîkon epuꞌtî pîꞌ wai. Mîrîrî ankupîkon koꞌmannî pîꞌ man eꞌtoꞌ yawîrî pra Uyun Paapa pia.
3 Mîrîrî yeꞌnen tauya enpenatatî îꞌ kaiꞌma eesenupaꞌpîkon pîꞌ moropai anetaꞌpîkon pîꞌ. Mîrîrî yawîrî akoꞌmantî. Moropai ayeserukon miakanmatî morî pe. Mîrîrî warantî aakurantakon pra awanîkon ya, amaꞌyeꞌ iipî warantî, uuipî aapiaꞌnîkon. Îꞌ pensa uuipî weiyu epuꞌtîyaꞌnîkon pra naatîi.
4 Tîîse epuꞌtî pîꞌ wai tiaronkon ayonpakon man moro Sardes po morî pe tîweꞌsanon tîponkon tîkîꞌpai pra tîîkoꞌmansenon. Inkamoro koꞌmamî pe man uyarakkîrî, morî puꞌkuru aimutun tîponkon yaꞌ. Maasa pra morî pe toꞌ yewan wanî, ikîꞌpasaꞌ pe pra.
5 Tamîꞌnawîrî manniꞌ imakuiꞌpî yentai enaꞌpî ya, epontî pe man inkamoro warantî, morî puꞌkuru aimutun tîpon yaꞌ. Iteseꞌ moꞌkauya pepîn tiwin kin, ipatîkarî enen koꞌmannîtoꞌ kaareta poi. Tîîse Uyun Paapa moropai inserîyamîꞌ rawîrî siꞌma, eseurîma ipîꞌ: “Mîîkîrî upemonkono” tauya ipîꞌ.
6 Mîrîrî yekare anetapainon wanî ya, etakî îꞌ taa Morî Yekaton Wannîya soosikon tawonkon pîꞌ
—taꞌpîiya.
Filadélfia Ponkonya Itekare Eta
7 Inîꞌrî taꞌpîiya: —Filadélfia soosirî koꞌmannîꞌnen inserî pia kaareta menukakî, see warantî taatoꞌ:
Sîrîrî itekare wanî umaimu pe. Uurî morî puꞌkuru Paapa piawon, moropai yairon puꞌkuru yepuru. Meruntî man uupia. Umaimu pe Paapa koꞌmantoꞌ manaꞌta yarakkanmokauya, anîꞌ ewontoꞌpe. Moropai yarakkamouya ya, anîꞌ ewomî pepîn tiwin kin.
8 Anîꞌya imoꞌka eserîke pra awanî. Tamîꞌnawîrî îꞌ kupî pîꞌ aakoꞌmamîkon epuꞌtî pîꞌ wai. Kureꞌne ameruntîrikon ton pra man epuꞌtî pîꞌ wai. Mararonkon amîrîꞌnîkon, îꞌ ton pînon pe awanîkon. Tîîse umaimu tîwaꞌkai pra awanîkon. “Jesus epuꞌnen pepîn uurî” taayaꞌnîkon pra awanîkon. Mîrîrî yeꞌnen apataꞌseꞌkon ton tîîsauꞌya wai.
9 Maasa etatî, manniꞌkan Makui pemonkono epereꞌtoꞌ tawonkon wanî seruꞌyeꞌ pe. Inkamoro eseurîma Judeuyamîꞌ pe tîwanîkon yeꞌnen, Paapa pemonkono pe tîwanîkon, taa toꞌya. Tîîse inkamoro wanî pepîn upemonkono pe. Tîîse inkamoro iipî emapuꞌtîuya kupî sîrîrî arawîrîꞌnîkon teseꞌmukon pona tenai. Moropai mîrîrî yai, inkamoroya epuꞌtî kupî sîrîrî, îꞌ kaiꞌma upemonkono pe kureꞌne asaꞌnamanenkon pe uurî wanî.
10 Amîrîꞌnîkon eꞌsaꞌ man umaimu yawîrî îꞌ taꞌpîuya yawîrî. Yapîtanîꞌsaꞌyaꞌnîkon naatîi teekoreꞌmai pra. Mîrîrî yeꞌnen amîrîꞌnîkon pîikaꞌtîuya îꞌ pensa eꞌtarumaꞌtîntoꞌ erepamî yai, sîrîrî non pona. Maasa pra tamîꞌnawîronkon pemonkonyamîꞌ epuꞌtoꞌ wanî kupî sîrîrî, sîrîrî non po.
11 Kaꞌneꞌ pe uuipî kupî sîrîrî. Mîrîrî yeꞌnen mîrîrî innape ukupî pîꞌ aakoꞌmamîkon manniꞌ warantî, akoꞌmantî, tîrumakai pra. Mîrîrî ikuꞌtî, anîꞌya epeꞌmîra untîrî moꞌka namai aapiapaiꞌnîkon.
12 Manniꞌ meruntî ke yapîtanîpîtîpon wanî ya, mîîkîrî kupîuya pe wai manniꞌ uyun yewîꞌ yapîtanîꞌtoꞌ yanrakiꞌ warantî aakoꞌmantoꞌpe. Îꞌ pensa mîîkîrî epaꞌka pepîn inîꞌrî mîrîrî pata pai. Moropai mîîkîrî pona Uyepotorî Paapa eseꞌ menukauya. Moropai aakoꞌmantoꞌ ipata eseꞌ manniꞌ amenan cidaderî Jerusalém eseꞌ menukauya ipona. Manniꞌ kaꞌ poi aaipî kupî manniꞌ Paapa winîpainon. Moropai amenan uyeseꞌ menukauya nîrî mîîkîrî pîꞌ, ipatîkarî aakoꞌmantoꞌpe upata yaꞌ.
13 Mîrîrî yeꞌnen sîrîrî itekare anetapainon wanî ya, etakî îꞌ taa Morî Yekaton Wannîya soosikon tawonkon pîꞌ
—taꞌpîiya.
Laodicéia Ponkonya Itekare Eta
14 Inîꞌrî taꞌpîiya: —Laodicéia soosirî koꞌmannîꞌnen inserî pia kaareta menukakî, see warantî taatoꞌ:
Sîrîrî itekare wanî umaimu pe. Uurî wanî sîrîrî Amém, mîrîrî warantî aweꞌkupî taatoꞌpe. Uurî yairon puꞌkuru teeseurîmasen. Tamîꞌnawîron Paapa nîkonekaꞌpî, uurî winîpainon.
15 Tamîꞌnawîrî epuꞌtî pîꞌ wai îꞌ kupî pîꞌ aakoꞌmamîkon. Kureꞌne Paapa yeseru yuꞌse pra awanîkon pepîn. Moropai tiwin kin Paapa yeseru yuꞌse pra awanîkon pepîn. Aꞌneꞌ warantî pra, moropai iꞌnîꞌ warantî pra, tîîse tîkuinan warantî awanîkon. Mîrîrî yeꞌnen oꞌnon yeꞌka warantî awanîkon yuꞌse wai.
16 Tîîse tîkuine awanîkon yeꞌnen aꞌneꞌ pe pra moropai iꞌnîꞌ pe pra, ayarakkapîtîuyaꞌnîkon unta yapai, uwakîri pe pra awanîkon yeꞌnen.
17 Amîrîꞌnîkonya taa aawarîrîꞌnîkon: “Ipîkku pe anna wanî, tamîꞌnawîron esaꞌ pe anna wanî. Îꞌ ituꞌse anna eꞌtoꞌ wanî anna pia”, taayaꞌnîkon. Tîîse epuꞌtîyaꞌnîkon pepîn, imakuiꞌpî pe eesenumenkakon, imakuiꞌsan amîrîꞌnîkon. Îꞌ ton pînon amîrîꞌnîkon, ipon pînon. Moropai enkaruꞌnankon itenu pînon warainonkon.
18 Mîrîrî yeꞌnen amîrîꞌnîkon panamauya sîrîrî. Upîꞌ ayemannekon ton yennatî. Maasa pra morî uwinîpainon wanî ouro apoꞌ ke yaimenkasaꞌ warantî, imakuiꞌpî pe pra. Mîrîrî yeꞌnen ipîkku pe puꞌkuru awanîkon pe man uupia. Upîꞌ yennatî aponkon ton, aimutun anekaꞌmakon ton, imakuiꞌpî pe aweꞌtoꞌkon napontînen ton, aweppepîkon namai. Moropai ayenukon yepiꞌ ton yennatî upîꞌ, morî pe îꞌ eraꞌmakonpa, yairon uupiapainon epuꞌtîkonpa.
19 Uurî wanî tamîꞌnawîrî ayakoꞌmenkanenkon pe moropai tarumaꞌtîton pe nîrî. Tamîꞌnawîrî unsaꞌnamakon kupîuya mîrîrî warantî. Mîrîrî namai tepuꞌse eꞌtî moropai ayeserukon moꞌtanîꞌtî tîwenpenatai.
20 Maasa etatî. Uurî wanî aminke pra aapiaꞌnîkon. Aakoꞌmantoꞌkon ta ewonpai wai. Mîrîrî yeꞌnen anîꞌ manaꞌta paꞌtîuya ya, moropai anîꞌya umaimu eta ya, manaꞌta yarakkanmoka moropai uurî ewomî iipia. Moropai mîîkîrî yarakkîrî uyekkari yonpauya. Moropai mîîkîrîya uyarakkîrî tekkari yonpa, tîmurukun pe koꞌmannî yeꞌnen.
21 Tamîꞌnawîron yapîtanîꞌsaꞌ anîꞌya ya, mîîkîrî ereutatoꞌpe tauya, uyaponseꞌ pona uyarakkîrî, ipîkku pe aweꞌtoꞌpe. Tamîꞌnawîron yapîtanîꞌsauꞌya yeꞌnen, uyunya tarakkîrî ereutatoꞌpe taꞌpî warantî nîrî, uurîya ereutatî taa apîꞌnîkon.
22 Mîrîrî yekare anetapainon wanî ya, etakî îꞌ taa Morî Yekaton Wannîya soosikon tawonkon pîꞌ
—taꞌpîiya.
