Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 4:1-11
4 Mîrîrî tîpo eraꞌmaꞌpîuya inîꞌrî. Mîrîrî yai kaꞌ manaꞌta atarakkanmokasaꞌ eraꞌmaꞌpîuya. Moropai mai etaꞌpîuya. Mîrîrî wanîꞌpî meruntî ke, toꞌ waiyi trombeta eꞌnatoꞌ warantî. Pena eꞌmaiꞌ pe uyarakkîrî eseurîmaꞌpî pe manniꞌ wanîꞌpî. Mîîkîrîya taꞌpî upîꞌ: —Enuꞌkî tarîwaya. Moropai apîꞌ ekaremeꞌtoꞌpeuya îꞌ aweꞌkupî ton sîrîrî tîpo —taꞌpîiya.
2 Mîrîrî pe rî Morî Yekaton Wannî enaꞌpî uyesaꞌ pe. Mîrîrî yai kaꞌ po eraꞌmaꞌpîuya ereutantoꞌ. Mîrîrî pona ereutaꞌpî pemonkon eraꞌmaꞌpîuya.
3 Mîîkîrî yenpata wanîꞌpî inkeꞌ pe, manniꞌ morî puꞌkuru tîꞌ jaspe moropai sardônio warantî. Mîrîrî ereutantoꞌ woi merenmereꞌ wanîꞌpî inkeꞌ pe puꞌkuru manniꞌ tîꞌ esmeralda sakari warantî.
4 Mîrîrî ereutantoꞌ woi tiaronkon ereutantoꞌkon wanîꞌpî eseuwarapo 24 kaisarî. Moropai mîrîrî po eseuwarapo 24 kaisarî ipîkkukon ereutasaꞌ wanîꞌpî. Inkamoro ponkon wanîꞌpî aimutunkon pe. Moropai inkamoro puꞌpai po toꞌ yarakko pe ouro konekasaꞌ wanîꞌpî.
5 Mîrîrî arakkita tîweꞌsen ereutantoꞌ piapai, sisiuppan epaꞌkapîtîꞌpî waraꞌnapi warantî. Mai epaꞌkaꞌpî tîrîn taa waraꞌnapiya warantî. Mîrîrî rawîrî asakîꞌne miaꞌ pona tîîmoꞌtai kaisarî apoꞌya wittanîꞌsaꞌ wanîꞌpî. Mîrîrî wanî Paapa Yekaton pe, manniꞌ morî puꞌkuru, eꞌtoꞌ yawîron pe.
6 Mîrîrî ereutantoꞌ rawîrî awanîꞌpî kureꞌnan pîrana warainon, tîꞌ cristal manniꞌ awaiꞌnan warantî awanîꞌpî.
Mîrîrî woi seꞌ yataimîrî eꞌwinî pairî asakîrîrî tîîkoꞌmansenon wanîꞌpî. Inkamoro yenu wanîꞌpî tamîꞌnawîrî taretîꞌkai iporo. Eꞌmaiꞌ pe irawîrî moropai iteꞌmaꞌpî pîꞌ.
7 Mîîkîrî eꞌmaiꞌnon wanîꞌpî Leão, kaikusi warantî. Moropai iteꞌmaꞌpî pokon wanîꞌpî paaka yunkon warantî. Moropai toꞌ eseurîno wanîꞌpî warayoꞌ yenpata ke. Moropai toꞌ saakîrîrîno wanîꞌpî kuwanu awainunsaꞌ warantî.
8 Tamîꞌnawîrî tiwin pîꞌ insamoro tîîse toꞌ yapîꞌsaꞌkon wanîꞌpî toꞌ kaisarî eseuwarapoꞌne tiwin miaꞌ pona tîîmoꞌtaiꞌne. Mîrîrî pîꞌ yenu ton wanîꞌpî tamîꞌnawîrî taretîꞌkai iporo moropai ituꞌna pîꞌ. Moropai inkamoro eserenka koꞌmannîpîꞌpî wei kaisarî moropai ewaron kaisarî. Toꞌ eserenkatoꞌ atîꞌnapamî pepîn. Tîîse taa pîꞌ toꞌ koꞌmamî see warantî:—Anna Yepotorî Paapa, tiwinan amîrî,tiaron awarainon ton pîn.Morî puꞌkuru amîrî, imakuiꞌpî ton pîn.Meruntî tamîꞌnawîron yentainon amîrî.Pena esiꞌpî amîrî,moropai sîrîrîpe tîîkoꞌmansen amîrî,moropai ipatîkarî aakoꞌmamî kupî sîrîrî, Paapa
—taapîtîꞌpî toꞌya.
9 Mîrîrî warantî teeserenkakon kaisarî inkamoro asakîrîronkonya Paapa yapurîꞌpî. —Morî pe puꞌkuru man —taꞌpî toꞌya tamîꞌnawîron pîꞌ. Manniꞌ ereutantoꞌ pona teereutasen pîꞌ, manniꞌ pîꞌ, ipatîkarî tîîkoꞌmansen pîꞌ taꞌpî toꞌya.
10 Moropai inkamoro eseuwaraponkon 24 kaisaronkon ipîkkukon eꞌsekunkaꞌpî irawîrî, moropai inkamoroya yapurîꞌpî. Moropai inkamoroya tîpuꞌpaikon poi tarakko pe tîweꞌsen ouro konekasaꞌ moꞌka mîîkîrî, ipatîkarî tîîkoꞌmansen rawîrî moropai taapîtî toꞌya:
11 —Anna Yepotorî Paapa, morî pe amîrî wanî yeꞌnen,ayapurî eꞌpai anna wanî.Mîrîrî yeꞌnen ayapurîtoꞌ annaya yapiꞌkî etakî.Ayapurî annaya maasa pra tamîꞌnawîron konekaꞌpîyaituꞌse awanî yeꞌnen.Mîrîrî yeꞌnen tamîꞌnawîron koꞌmamîmîrîrî ituꞌse awanî yeꞌnen, Paapa
—taapîtî toꞌya.
