Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 5:1-14
5 Moropai mîîkîrî ereutantoꞌ pona eereutaꞌpî eraꞌmaꞌpîiya. Mîîkîrî yenyaꞌ meruntî winî kaareta yanmakoꞌmasaꞌ wanîꞌpî. Mîrîrî kaareta wanîꞌpî seꞌ yataimîrî imenukasaꞌ pe. Moropai ipona yapiꞌsaꞌ pe awanîꞌpî asakîꞌne miaꞌ pona tîîmoꞌtaiꞌnonkon kaareta ke.
2 Moropai inserî meruntî eraꞌmaꞌpîuya. Mîîkîrîya ekaranmapopîtîꞌpî meruntî ke puꞌkuru: —Anîꞌ moro nai morî pe puꞌkuru, sîrîrî kaareta yarakkanmokatoꞌpe? —taꞌpîiya.
3 Tîîse anîꞌ ton pra awanîꞌpî kaꞌ po. Moropai non po mîrîrî kaareta yarakkanmoka ton moropai yaꞌ tîweꞌsen eraꞌmaton ton pra awanîꞌpî.
4 Mîrîrî yeꞌnen ukaruwaꞌpî mararî pra. Maasa pra mîrîrî kaareta yarakkanmokanen ton pra awanîꞌpî. Moropai yaꞌ tîweꞌsen eraꞌmanen ton pra awanîꞌpî mîîtoꞌpe.
5 Mîrîrî yeꞌnen tiwinan, ipîkku pe tîweꞌsenya taꞌpî upîꞌ: —Tîkarawai pra eꞌkî. Aꞌkî, leão, kaikusi warainon eraꞌmakî. Mîîkîrî wanî Judáyamîꞌ yonpa pe puꞌkuru. Moropai Davi nurîꞌtî paarîꞌpî pe awanî. Mîîkîrî tamîꞌnawîron yentai tîweꞌsen. Mîrîrî yeꞌnen kaareta yarakkanmokaiya. Mîrîrî asakîꞌne miaꞌ pona tîîmoꞌtaiꞌnon kaareta ipo awanî manniꞌ waikatîiya moropai yarakkanmokaiya —taꞌpîiya.
6 Mîrîrî yai carneiro eraꞌmaꞌpîuya iwîsaꞌ pe. Satippe awanîꞌpî mîrîrî ereutantoꞌ koreꞌta. Mîîkîrî woimaꞌtîsaꞌ inkamoro asakîrîronkonya wanîꞌpî, moropai ipîkkukonya nîrî. Mîîkîrî retîkon wanîꞌpî asakîꞌne miaꞌ pona tîîmoꞌtai kaisarî. Moropai itenu wanîꞌpî mîrîrî warapo nîrî. Mîrîrîkon wanîꞌpî morî puꞌkuru, eꞌtoꞌ yawîron Paapa Yekaton pe, tamîꞌnawîrî sîrîrî pata po yarimasaꞌ pe.
7 Moropai mîîkîrî carneiro wîtîꞌpî mîîkîrî ereutaꞌpî yenyawon, meruntî winî tîweꞌsen kaareta yapisîꞌpîiya.
8 Mîrîrî kupî mîîkîrîya eraꞌma tîuyaꞌnîkon yeꞌnen inkamoro asakîrîronkon moropai manniꞌkan 24 kaisaronkon ipîkkukon eꞌsekunkaꞌpî teseꞌmukon pona irawîrî. Tiwin pîꞌ toꞌ tîîse toꞌ kaisarî toꞌ yenyaꞌ harpa moropai ourokon konekasaꞌ wanîꞌpî, aꞌpusin, toꞌ nîpoꞌtî yenseꞌ. Mîrîrî aꞌpusin yaa tîweꞌsen wanî Paapa pemonkonoyamîꞌ epîrematoꞌ pe.
9 Inkamoro eserenka koꞌmannîpîꞌpî amenan eren eserenkantoꞌ pîꞌ. Taꞌpî toꞌya:Morî pe amîrî neken wanîsîrîrî kaareta yapisîpamoropai yapiꞌtoꞌkon moꞌkapa.Maasa pra iwîsaꞌ pe awanîꞌpî.Mîrîrî amînî kamoꞌpîya wenaipemonkonyamîꞌ yennaꞌpîya Paapa ton pe.Tamîꞌnawîron pata ponkon koreꞌtapai,manniꞌkan tamîꞌnawîron mai kuꞌnenan koreꞌtapai,inkamoro yennaꞌpîya toꞌ tîmenkai pra.
10 Inkamoro kupîꞌpîya Paapa,anna yepotorî yapurînenan pe toꞌ eꞌtoꞌpe,teepîremasanon pe toꞌ eꞌtoꞌpe.Moropai inkamoro enatoꞌpe pata esaꞌ pe toꞌ kupîꞌpîya
kaiꞌma toꞌ eserenkaꞌpî mararî pra.
11 Moropai inîꞌrî eraꞌmaꞌpîuya. Mîrîrî yai etaꞌpîuya tuꞌkankon inserîyamîꞌ oꞌnon pata ikuꞌneꞌtî yentainokon etaꞌpîuya. Inkamoro wanîꞌpî asakîrîronkon yaponseꞌ woi. Moropai ipîkkukon woi toꞌ wanîꞌpî.
12 Moropai inkamoro eserenka koꞌmannîpîꞌpî meruntî ke toꞌ maimu wanîꞌpî. Taꞌpî toꞌya:Manniꞌ carneiro iwîꞌpî wanî morî pe puꞌkuru,îꞌ pe pra rî awanî pepîn.Mîrîrî yeꞌnen meruntî ke tîweꞌtoꞌ pîꞌ,moropai ipîkku pe tîweꞌtoꞌ pîꞌ,moropai epuꞌnen pe tîweꞌtoꞌ pîꞌ,moropai kureꞌnan morî pe tîweꞌtoꞌ pîꞌatausinpanpaiꞌnîkon.Mararî pra yapurîpaiꞌnîkon man
taꞌpî toꞌya.
13 Mîrîrî yai tamîꞌnawîronkon pemonkonyamîꞌ kaꞌ ponkonya moropai non yoꞌkonkonya moropai tuna kawonkonya. Moropai tamîꞌnawîronkon pata ponkon eserenka koꞌmannîpî etaꞌpîuya. Toꞌ eserenkaꞌpî see warantî:Itaponseꞌ pona eereutasaꞌ manniꞌmoropai mîîkîrî carneiro wanî morî pe puꞌkuru,annaya yapurî eꞌpai awanî.Morî pe tîweꞌtoꞌ pîꞌ,ipîkku pe tîweꞌtoꞌ pîꞌ,moropai meruntî ke puꞌkuru tîweꞌtoꞌ pîꞌyapurî pîꞌ anna man, tîꞌnapanse pra
kaiꞌma toꞌ eserenkaꞌpî.
14 Mîrîrî warantî taa toꞌya tanne, inkamoro asakîrîronkon enenankonya yuukuꞌpî. —Inna, mîrîrî warantî eꞌpai man. Moropai inkamoro asakîrîronkon eꞌsekunkaꞌpî teseꞌmukon pona toꞌ enaꞌpî. Moropai yapurîꞌpî toꞌya.
