Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 6:1-17
6 Mîrîrî yai mîîkîrî carneiroya eꞌmaiꞌnon kaareta yapiꞌtoꞌ asakîꞌnan miaꞌ pona tîîmoꞌtaiꞌnon yonpa yarakkamo eraꞌmaꞌpîuya. Moropai inkamoro asakîrîronkon yonpaya taꞌpî meruntî ke. Imaimu wanîꞌpî tîrîn taa waraꞌnapiya warantî. —Asiꞌkî —taiya etaꞌpîuya.
2 Moropai eraꞌmaꞌpîuya. Mîrîrîya kaware aimutun eraꞌmaꞌpîuya. Mîîkîrî kaware po tîweꞌsen yenyaꞌ yurapa wanîꞌpî. Moropai mîîkîrî pia aroꞌ tîrîꞌpî toꞌya, tamîꞌnawîron yentai awanî yeꞌnen. Moropai mîîkîrî epaꞌkaꞌpî meruntî ke teyatonon yarakkîrî eseyaꞌnamai. Teeyatonon yentai tîwanîpa eepaꞌkaꞌpî.
3 Moropai mîrîrî tîpo mîîkîrî carneiroya itakon iteꞌkanon kaareta yapiꞌtoꞌ yarakkanmokaꞌpî. Moropai inkamoro yonpa itakonya taa etaꞌpîuya upîꞌ, asiꞌkî kaiꞌma.
4 Mîrîrîya tiaron kaware epaꞌkaꞌpî. Mîîkîrî wanîꞌpî suuyu pe. Ipo tîweꞌsenya meruntî yapisîꞌpî. Tînepî ton sîrîrî non pona kureꞌnan eseyaꞌnamantoꞌ, îꞌ kaiꞌma tiaronkon eꞌtîꞌkatoꞌpe tonpakon yarakkîrî. Mîîkîrî yenyaꞌ kureꞌnan kasupara eꞌtîrîꞌpî.
5 Moropai inîꞌrî carneiroya iteseurîno iteꞌka kaareta yapiꞌtoꞌ yarakkanmokaꞌpî. Moropai inkamoro eseurînoya taa etaꞌpîuya, asiꞌkî kaiꞌma. Mîrîrîya kaware îrikkutun eraꞌmaꞌpîuya. Mîîkîrî po tîweꞌsen yenyaꞌ îꞌ rî kuꞌneꞌtîtoꞌ wanîꞌpî.
6 Mîrîrîya mai warainon etaꞌpîuya inkamoro asakîrîronkon koreꞌtapai etaꞌpîuya. Mîrîrîya taꞌpîiya: —Tiwin trigo kuꞌneꞌtîtoꞌ tîîse tiwin wei kaisarî esenyakaꞌmannîꞌpî yepeꞌpî pe awanî, epeꞌke pe puꞌkuru. Moropai eseurîwîꞌne cevada kuꞌneꞌtîtoꞌ tîîse, mîrîrî nîrî wanî tiwin wei kaisarî esenyakaꞌmannîꞌpî yepeꞌpî pe. Epeꞌke pe puꞌkuru awanî maasa pra mararî mîrikkî awanîꞌpî. Tîîse tîwarî eꞌtî, kaiwan moropai vinho amaꞌta namai. —taꞌpî toꞌya.
7 Moropai mîrîrî tîpo carneiroya itasakîrîrîno iteꞌka kaareta yapiꞌtoꞌ yarakkanmokaꞌpî. Mîrîrîya inkamoro saakîrîrînoya taa etaꞌpîuya, asiꞌkî kaiꞌma.
8 Mîîkîrî eraꞌmaꞌpîuya. Mîrîrîya kaware enkaimuꞌnan eraꞌmaꞌpîuya. Mîîkîrî po tîweꞌsen esatîꞌpî toꞌya saꞌmantantoꞌ kaiꞌma. Moropai iwenairî tamîꞌnawîronkon sîrîrî pata ponkon saꞌmantaꞌsan wanîꞌpî. Inkamoroya meruntî yapiꞌsaꞌ arakkita pairon rataikasaꞌ kaisarî sîrîrî pata ponkon pemonkonyamîꞌ wîîkonpa teepîkon yai. Moropai toꞌ eꞌtîꞌka iwan pîꞌ. Moropai inkamoro eꞌtîꞌka paran pîꞌ. Paran pîꞌ neken pepîn tîîse oꞌmaꞌkonya kaikusiyamîꞌya toꞌ tîꞌka.
9 Mîrîrî tîpo carneiroya miaꞌtaikinon kaareta yapiꞌtoꞌ yarakkanmokaꞌpî. Mîrîrîya toꞌ nîpoꞌtî Paapa yapurîkonpa yaponseꞌ yoꞌkoi Paapa maimu ekaremeꞌnenan ekaremekî toꞌya wenai, toꞌ nîtîꞌkaꞌsan yekaton eraꞌmaꞌpîuya. Manniꞌkan yairî puꞌkuru esiꞌsan wîîsaꞌ toꞌya yekatonoꞌsan.
10 Inkamoro entaimepîtî koꞌmannîpî meruntî ke puꞌkuru. Taa pîꞌ toꞌ koꞌmamî: —Anna Yepotorî Paapa tamîꞌnawîron yentainon meruntî puꞌkuru. Moropai morî puꞌkuru imakuiꞌpî ton pîn. Moropai yairon puꞌkuru. Îꞌ pensa sîrîrî pata po tîîkoꞌmansenon pemonkonyamîꞌ tarumaꞌtîya kupî sîrîrî? Mîrîrî yai manniꞌkan anna tîꞌkatîponkon pemonkonyamîꞌ pîꞌ eseꞌma kupî sîrîrî? —taꞌpî toꞌya.
11 Inkamoroya tîkaisarîꞌnîkon tîponkon ton yapisîꞌpî, aimutunkon. Moropai inkamoro pîꞌ taꞌpî Paapaya: —Erîꞌkapîkon eꞌpai man inîꞌ panpîꞌ manniꞌkan ayonpakon esenyakaꞌman yonpayamîꞌ moropai manniꞌkan ayonpakon amîrîꞌnîkon saꞌmantaꞌpî warantî, toꞌ saꞌmanta kupî mannan erepamî pîkîrî —taꞌpîiya toꞌ pîꞌ.
12 Moropai mîrîrî tîpo, mîrîrî pe rî carneiroya tiwin miaꞌ pona tîîmoꞌtaiꞌnon kaareta yapiꞌtoꞌ yarakkanmoka eraꞌmaꞌpîuya. Yarakkamosaiꞌya tîpo, meruntî ke pata eserentîkîꞌmaꞌpî mararî pra. Moropai wei enaꞌpî ewaron pe, teesewankonoꞌmasenya îrikkutun tîpon yekaꞌmasaꞌ warantî. Moropai kapoi enaꞌpî suuyu pe, mîn warantî.
13 Moropai sirikkîyamîꞌ eꞌsorokaꞌpî kaꞌ poi non pona. Kureꞌne aꞌsitun wanî ya, teperu kenan yei yeperu yaꞌpîre sorokaiya warantî toꞌ eꞌsorokaꞌpî.
14 Mîrîrî tîpo kaꞌ eseraꞌma pra eenaꞌpî, kaareta atanmokoꞌma warantî eeseraꞌma pra inîꞌrî eena warantî. Moropai tamîꞌnawîron wîꞌkon moropai iwonokon moꞌtapîtîꞌpî tîpataꞌseꞌkon yapai tiaron pataꞌ, meruntî ke eeserentîkîꞌma yeꞌnen.
15 Mîrîrî yai tamîꞌnawîronkon pemonkonyamîꞌ esenomîꞌpî tîꞌ ta aꞌta yaꞌ. Ipîkkukon reiyamîꞌ sîrîrî pata po tîweꞌsanon, moropai pemonkonyamîꞌ esanon, moropai surarayamîꞌ esanon ipîkkukon, moropai ipîkkukon, yemanne keꞌkon sîrîrî non po, moropai meruntîkon puꞌkuru, moropai pemonkonyamîꞌ poitîrîtonon moropai itesaꞌ pînon, tamîꞌnawîrî inkamoro esenomîꞌpî mararî pra eranneꞌ pe tîwanîkon yeꞌnen.
16 Moropai inkamoro entaimepîtî koꞌmannîpî. Taapîtîꞌpî toꞌya wîꞌkon pîꞌ, moropai tîꞌkon pîꞌ: —Anna pona enatî anna wîîpa, anna yenontî. Mîîkîrî ereutasaꞌ manniꞌ yenu yapai anna yenontî. Moropai mîîkîrî carneiro ekoreꞌmatoꞌ winîpai anna yenontî —taapîtîꞌpî toꞌya teuren.
17 —Maasa pra kureꞌnan eꞌtarumaꞌtîntoꞌ weiyu erepansaꞌ man, Paapaya utarumaꞌtîkon weiyu. Anîꞌya mîrîrî yapîtanîpî eserîke pra man —taapîtîꞌpî toꞌya.
