Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 7:1-17
7 Mîrîrî tîpo asakîrîronkon inserîyamîꞌ eraꞌmaꞌpîuya. Inkamoro wanîꞌpî satippe, patakon kîꞌpî yaꞌ, wei epaꞌka winî, moropai wei ewomî winî, moropai meruntî winî, moropai kamaiꞌ winî kaiꞌma. Inkamoroya aꞌsitun yapîtanîpîꞌpî, aataꞌseꞌma namai. Mararî pîrana poro yaꞌseꞌmaiya namai. Moropai yeikon yaꞌseꞌmaiya namai.
2 Moropai inîꞌrî tiaron inserî esenpoꞌpî wei epaꞌka winîpai. Eraꞌmaꞌpîuya Paapa tîîkoꞌmansenya tîpemonkono yekiꞌkatoꞌ yarakkîrî. Mîîkîrî entaimeꞌpî meruntî ke puꞌkuru, manniꞌkan asakîrîronkon inserîyamîꞌ pata kîꞌpîya tîweꞌsanon pîꞌ, manniꞌkan meruntî yapisîtîponkon sîrîrî pata po, moropai pîrana po imakuiꞌpî kupî tonkon pîꞌ.
3 Mîîkîrîya taꞌpî: —Maasa imakuiꞌpî kîꞌkuꞌtî pata po moropai pîrana po moropai yeikon pîꞌ. Maasa Uyepotorîkon Paapaya tîpoitîrîtonon yekiꞌka tanne toꞌ yepin pîꞌ —taꞌpîiya.
4 Mîrîrî tîpo îꞌ warapo kaisarî inkamoro, toꞌ yepin pîꞌ tîpemonkono tonpe, Paapa nekiꞌkaꞌsan ekaremekîꞌpî toꞌya upîꞌ. Inkamoro wanîꞌpî eseuwarapo 144.000 kaisarî. Inkamoro wanîꞌpî tamîꞌnawîronkon Israel pariꞌpî pe, ipemonkono pe tiwin pîꞌ toꞌ tîîse.
5 7:5-8 Tiwin pîꞌ toꞌ tîîse eseuwarapo 12.000 kaisarîꞌne toꞌ wanîꞌpî:Judá payanyamîꞌ 12.000 kaisarî,moropai Rubem payanyamîꞌ 12.000 kaisarî,moropai Gade payanyamîꞌ 12.000 kaisarî,moropai Aser payanyamîꞌ 12.000 kaisarî,moropai Naftali payanyamîꞌ 12.000 kaisarî,moropai Manassés payanyamîꞌ 12.000 kaisarî,moropai Simeão payanyamîꞌ 12.000 kaisarî,moropai Levi payanyamîꞌ 12.000 kaisarî,moropai Issacar payanyamîꞌ 12.000 kaisarî,moropai Zebulom payanyamîꞌ 12.000 kaisarî,moropai José payanyamîꞌ 12.000 kaisarî,moropai Benjamim payanyamîꞌ 12.000 kaisarî.Eseuwarapoꞌne toꞌ wanîꞌpî Paapa poitîrîtonon.
6 Eraꞌmakî 7:5
7 Eraꞌmakî 7:5
8 Eraꞌmakî 7:5
Arinîkon Ikuꞌneꞌtî Yentainokon
9 Mîrîrî tîpo arinîkon pemonkonyamîꞌ oꞌnon pata ikuꞌneꞌtî yentainokon eraꞌmaꞌpîuya. Inkamoro wanîꞌpî tamîꞌnawîron pata ponkon pe. Tepuꞌse pra toꞌ wanîꞌpî siꞌta mai wanîꞌpî. Inkamoro wanîꞌpî satippe mîrîrî ereutantoꞌ rawîrî moropai carneiro rawîrî toꞌ wanîꞌpî. Inkamoro epontîsaꞌ wanîꞌpî aimutun tîponkon yaꞌ. Moropai inkamoro yenyaꞌ yuꞌ yare wanîꞌpî, imakuiꞌpî yentai tîwanîkon yeꞌnen.
10 Inkamoro entaimepîtîꞌpî meruntî ke puꞌkuru:—Anna Yepotorî Paapa taponseꞌ po manniꞌ,moropai carneiro winîpai anna eꞌpîikaꞌtîtoꞌ iipî.Kureꞌne anna pîikaꞌtîꞌpî toꞌya
—taꞌpî toꞌya.
11 Mîrîrî yai tamîꞌnawîronkon inserîyamîꞌ wanîꞌpî satippe Paapa ereutatoꞌ taponseꞌ woi, moropai inkamoro ipîkkukon yaponseꞌ woi, moropai asakîrîronkon manniꞌkan enenankon woi. Mîrîrîya inkamoro inserîyamîꞌ esenumîꞌpî Paapa ereutatoꞌ rawîrî non pona, tenpatakon tîrennuꞌse. Moropai inkamoroya Paapa yapurîꞌpî.
12 Taꞌpî toꞌya:—Inna, mîrîrî warantî eꞌpai man.Yapurîpaiꞌnîkon man!Morî pe, ipîkku pe nai.Epuꞌnen pe nai, Paapa.“Morî pe man, Paapa”, taapaiꞌnîkon man!Anna nînama amîrî.Meruntî puꞌkuru amîrî Paapa, anna yepotorî.Mîrîrî warantî taa pîꞌ koꞌmanpaiꞌnîkon ipatîkarî, tîꞌnapanse pra.Inna mîrîrî warantî nîsi
—taꞌpî toꞌya.
13 Mîrîrîya tiwin ipîkkukon yonpaya uyekaranmapoꞌpî: —Anîꞌkan see insamoro aimutunkon toꞌ pon? Oꞌnon patapai toꞌ iiꞌsaꞌ mîrîrî? —kaiꞌma.
14 —Inna paꞌye, Uyepotorî. Toꞌ epuꞌtîuya pra wai. Amîrîya neken toꞌ epuꞌtî —taꞌpîuya.
Mîrîrî yeꞌnen taꞌpîiya upîꞌ: —Insamoro wanî manniꞌkan kureꞌnan eꞌtarumaꞌtîntoꞌ koreꞌtapainonkon pe. Tarîpai insamoro eꞌpîikaꞌtîsaꞌ mîrîrî winîpai. Morî pe toꞌ eꞌronasaꞌ, tîponkon ronasaꞌ toꞌya aimutun pe, carneiro mînî ke. Imakuiꞌpî toꞌ nîkupîꞌpî moꞌkasaiꞌya wanîꞌpî.
15 Mîrîrî yeꞌnen carneiro yaponseꞌ ereutantoꞌ rawîrîsatippe toꞌ wanî mîrîrî.Moropai inkamoroya epîremantoꞌ yewîꞌ ta siꞌmayapurî koꞌmannîpîꞌpî wei kaisarî moropai ewaron kaisarî.Mîrîrî yeꞌnen mîîkîrî taponseꞌ pona eereutasaꞌ manniꞌ yaꞌ,toꞌ koneka koꞌmannîpî,toꞌ yarakkîrî tîwanî yeꞌnen.
16 Mîrîrî yeꞌnen inkamoroya inîꞌrî emiꞌnan epuꞌtî pepîn.Moropai inîꞌrî tuna aninnîpai toꞌ wanî pepîn.Moropai inîꞌrî aꞌneꞌ pe wei epuꞌtî toꞌya pepîn.Weiya toꞌ yekiꞌka pepîn inîꞌrî.
17 Maasa pra mîîkîrî carneiro,ereutantoꞌ koreꞌta wanî manniꞌ,mîîkîrî koꞌmamî toꞌ esaꞌ pe.Moropai mîîkîrîya toꞌ pinunpa,toꞌ yarîiya tîîwarîrî teepaꞌkasenipatîkaron koꞌmannîtoꞌ tuna enîꞌse.Moropai Paapaya inkamoro yenu yaꞌmananîpîtoꞌ karawatoꞌ winîpai.Mîrîrî tîpo inîꞌrî toꞌ karau pepîn
—taꞌpîiya upîꞌ.
