Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 8:1-13
8 Asakîꞌne miaꞌ pona tîîmoꞌtaiꞌnon yonparîꞌpî tiwinanoꞌpî yarakkamo carneiroya yai, tamîꞌnawîron atîꞌnapamîꞌpî kaꞌ po. Tiwin hora yonpa wanîꞌpî moo, îꞌ aweꞌkupî nîmîkî pîꞌ tamîꞌnawîronkon koꞌmamîꞌpî.
2 Mîrîrîya inserîyamîꞌ eraꞌmaꞌpîuya asakîꞌne miaꞌ pona tîîmoꞌtaiꞌnîkon Paapa rawîrî toꞌ wanîꞌpî satippe. Inkamoroya asakîꞌne miaꞌ pona tîîmoꞌtaiꞌnon teꞌnunpasen trombeta yapisîꞌpî tîkaisarîꞌnîkon.
3 Moropai tiaron inserî iipîꞌpî. Mîîkîrî yenyaꞌ ouro konekasaꞌ wanîꞌpî, pisa warantî toꞌ nîpoꞌtî yenseꞌ. Moropai mararî pra aꞌpusin tîrîꞌpî toꞌya iipia, ipoꞌtîtoꞌpeiya tamîꞌnawîronkon Paapa pemonkonoyamîꞌ epîrematoꞌ pokonpe. Moropai mîrîrî rumakaꞌpîiya Paapa yapurîtoꞌpe toꞌ nîpoꞌtî yaponseꞌ ouro konekasaꞌ pona, manniꞌ ereutantoꞌ rawîrî tîweꞌsen pona.
4 Moropai mîîkîrî inserî Paapa rawîrî awanî manniꞌ, yenyapai mîrîrî tîpoꞌtîsen aꞌpusin ureꞌtîrî enukuꞌpî kaꞌ ekaya. Manniꞌkan Paapa pemonkonoyamîꞌ epîrematoꞌ pokonpe awanîꞌpî.
5 Mîrîrî yeꞌnen inserîya mîrîrî ouro konekasaꞌ pisa warantî yapisîꞌpî. Mîrîrî yannîpîꞌpîiya, apoꞌ mîrîrî Paapa yapurî pe toꞌ nîpoꞌtî yaponseꞌ po tîweꞌsen ke. Moropai kaꞌ po siꞌma mîrîrî yenumîꞌpî mîîkîrîya non pona. Mîrîrî yenunsaiꞌya tîpo, mararî pra waraꞌnapiyamîꞌ eꞌmopîtîꞌpî. Moropai sisiuppan wanîꞌpî mararî pra. Moropai pata eserentîkîꞌmaꞌpî mararî pra.
Toꞌ Neꞌnunpa Trombetakon
6 Mîrîrî pe rî inkamoro inserîyamîꞌ asakîꞌne miaꞌ pona tîîmoꞌtaiꞌnonkon ekonekaꞌpî trombeta yeꞌnunpakonpa kaiꞌma.
7 Mîrîrîya eꞌmaiꞌnon inserîya trombeta yeꞌnunpaꞌpî. Moropai yeꞌnunpasaiꞌya tîpo, apoꞌ moropai konoꞌ renaꞌpî tîꞌkon pe. Mîrîrî wanîꞌpî mîn pokonpe ataiꞌmeꞌpî pe. Mîrîrî eꞌsorokaꞌpî non pona. Mîrîrîya arakkita pairî yonpa pata po tîweꞌsen yarannîpîꞌpî. Yeikon yarannîpîꞌpîiya. Moropai tamîꞌnawîrî parîꞌkon enenankon yarannîpîꞌpîiya.
8 Moropai tiaron inserîya trombeta yeꞌnunpaꞌpî. Mîrîrîya wîꞌ taransen warainon wanîꞌpî. Moropai mîrîrî yenumîꞌpî toꞌya kureꞌnan pîrana ka. Mîrîrî yenunsaꞌ toꞌya tîpo, arakkita pairî yonpa pîrana enaꞌpî mîn pe.
9 Mîrîrî yeꞌnen mîrîrî tuna katawonkon oꞌmaꞌkon eꞌtîꞌkaꞌpî arakkita pairî yonpa. Moropai arakkita pairî yonpa tuna poro tîweꞌsanon apoꞌyenkon aramîꞌpî, toꞌ eꞌtîꞌkaꞌpî tamîꞌnawîrî.
10 Moropai toꞌ eseurîno inserîya trombeta yeꞌnunpaꞌpî. Mîrîrîya kureꞌnan kaiwanoꞌya apoꞌ yapiꞌsaꞌ taaramîpa warainon enaꞌpî kaꞌ poi iren kaꞌ arakkita pairî yonpa. Moropai tuna yeutta eepaꞌkatoꞌ ka eenaꞌpî.
11 Mîrîrî kaiwanoꞌ enaꞌpî eseꞌ wanîꞌpî maiꞌ pe. Mîrîrî yeꞌnen arakkita pairî yonpa tuna enaꞌpî maiꞌ pe. Mîrîrî yeꞌnen tuꞌke pemonkonyamîꞌ eꞌtîꞌkaꞌpî, mîrîrî tuna tenîꞌse.
12 Moropai toꞌ saakîrîrîno inserîya trombeta yeꞌnunpaꞌpî. Moropai mîrîrîya arakkita pairî yonpa wei moropai kapoi moropai kaiwanoꞌ yiꞌnîpîꞌpî. Mîrîrî yeꞌnen arakkita pairî yonpa aꞌka pe aweꞌtoꞌ esiꞌnîpîꞌpî. Aꞌka pe pra awanîꞌpî wei arakkita pairî yonpa. Moropai ewaron arakkita pairî yonpa aakoꞌmamîꞌpî, aꞌka pe pra.
13 Mîrîrî tîpo eraꞌmaꞌpîuya toron kureꞌnan kuwanu awainunsaꞌ wanîꞌpî kawîne kaꞌraꞌta. Moropai meruntî ke eeseurîmaꞌpî. Mîîkîrîya taꞌpî: —Tamîꞌnawîronkon pemonkonyamîꞌ non po tîîkoꞌmansenon, eesekaꞌnunkakon pe naatîi. “Ekenne” taayaꞌnîkon pe naatîi. Teꞌnunpasen trombeta yeꞌnunpa inserîyamîꞌ yonparîꞌsan, eseurîwîꞌnankonya etayaꞌnîkon ya yai, “ekenne” taayaꞌnîkon pe naatîi.
