Apocalipse Wanî Paapa Nenpoꞌpî João Pia Innape Tîkuꞌnenan Nepuꞌtî Ton Pe 9:1-21
9 Moropai miaꞌtaikinon inserîya tîwayi trombeta yeꞌnunpaꞌpî. Mîrîrîya kaiwanoꞌ, manniꞌ non pona enaꞌpî kaꞌ poi eraꞌmaꞌpîuya. Mîîkîrîya nariꞌ ituꞌnakan yettapuru yarakkanmokatoꞌ yapisîꞌpî.
2 Moropai mîîkîrîya mîrîrî ituꞌnakan yettapurîkaꞌpî. Mîrîrî yapai ureꞌtî epaꞌkaꞌpî mararî pra kureꞌnan apoꞌ tîrukasaꞌ ureꞌsin warantî. Mîrîrî ureꞌsinya wei moropai pata ewaronpannîpîꞌpî ewaron pe.
3 Mîrîrî ureꞌtî koreꞌta waꞌnapiꞌyamîꞌ epaꞌkaꞌpî mararî pra. Inkamoro eꞌsorokaꞌpî non pona. Moropai inkamoro wanîꞌpî ekiꞌkatonkon pe, mariꞌtîya ekiꞌkansaꞌ warantî neꞌneꞌ pe.
4 Inkamoro pîꞌ taꞌpî toꞌya, parîꞌ moropai yeikon tarumaꞌtî toꞌya namai. Moropai tiaron taroꞌtasen tarumaꞌtî toꞌya namai. Tîîse pemonkonyamîꞌ neken tarumaꞌtîtoꞌpe toꞌya, manniꞌkan Paapa nekiꞌkaꞌsan pepîn toꞌ yepin pîꞌ, inkamoro tarumaꞌtîtoꞌpe toꞌya.
5 Moropai taꞌpî toꞌya, inkamoro pemonkonyamîꞌ tîꞌka kairayamîꞌya namai. Tîîse toꞌ tarumaꞌtîtoꞌpe toꞌya neken. Miaꞌtaikin kapoi kaisarî inkamoroya neꞌneꞌ epuꞌtoꞌpe mariꞌtîya yekiꞌkansaꞌ kaisarî.
6 Mîrîrî yai tîweꞌtarumaꞌtîkon kapoi pîꞌ inkamoro wanî isaꞌmantapai mîrîrî wenai. Tîîse toꞌ saꞌmanta pepîn tiwin kin. Maasa pra saꞌmantantoꞌ epe toꞌ piapai, toꞌ wîiya eserîke pra.
7 Inkamoro waꞌnapiꞌyamîꞌ wanîꞌpî kawareyamîꞌ warantî, teepîkonpa ekonekaꞌsan warantî. Inkamoro puꞌpaikon po wanîꞌpî aroꞌ pe ouro konekasaꞌ warainonkon. Moropai inkamoro yenpata wanîꞌpî warayoꞌ yenpatakon warantî.
8 Moropai toꞌ puꞌpai siꞌpo wanîꞌpî wîriꞌ puꞌpai warantî. Moropai inkamoro yee wanîꞌpî kaikusi yeekon warantî.
9 Moropai inkamoro rippoꞌta pon toꞌ eꞌnapontîtoꞌ teyatonkon namai wanîꞌpî saꞌman ferro warantî. Moropai inkamoro yapîꞌsaꞌ eꞌnatoꞌ wanîꞌpî mararon pepîn kawareyamîꞌya tararan yekuꞌnasaꞌ teekaꞌtunsen epîi tuutîkonya eꞌnatoꞌ warantî.
10 Moropai inkamoro yaukî pîꞌ toꞌ yekîkon wanîꞌpî mariꞌtî yekî warantî. Mîrîrî taukîkon pîꞌ wanî manniꞌ tekîkon ke pemonkonyamîꞌ yekiꞌka toꞌya eꞌpai awanî miaꞌtaikin kapoi kaisarî.
11 Inkamoro wanîꞌpî tesaꞌkon ke mîîkîrî toꞌ esaꞌya toꞌ koꞌmannîpîꞌpî. Mîîkîrî wanîꞌpî inserî pe, Makui poitîrî pe, manniꞌ nariꞌ ituꞌnakan koꞌmannîꞌnen pe tîweꞌsen. Mîîkîrî eseꞌ wanîꞌpî hebraico maimu pe Abadom kaiꞌma. Moropai Grego pe awanîꞌpî Apoliom kaiꞌma. Tarumaꞌtîton taatoꞌ mîrîrî.
12 Eꞌmaiꞌnon eꞌtarumaꞌtîntoꞌ esuwaꞌkasaꞌ man. Tîîse mîrîrî tîpo inîꞌrî panpîꞌ asakîꞌne iteꞌka itentainon eꞌtarumaꞌtîntoꞌ iipî pe man kureꞌnan.
13 Moropai mîrîrî tîpo, tiwin miaꞌ pona tîîmoꞌtaiꞌnonya trombeta yeꞌnunpaꞌpî. Mîrîrîya mai etaꞌpîuya saakîrîron iretîkon winîpai tiwinan maimu. Manniꞌkan mîrîrî Paapa yawîrî tîweꞌsen toꞌ nîpoꞌtî yaponseꞌ ouro konekasaꞌ winîpai.
14 Mîrîrî maiya taꞌpî tiwin miaꞌ pona tîîmoꞌtaiꞌnon inserî pîꞌ, mîîkîrî trombeta yarakkîrî awanî manniꞌ pîꞌ: —Inkamoro saakîrîronkon inserîyamîꞌ rumakakî ewaꞌtîsaꞌ pe toꞌ wanî mannan. Mîrîrî kureꞌnan iren Eufrates pia toꞌ wanî mannan —taꞌpîiya.
15 Mîrîrî yeꞌnen inkamoro inserîyamîꞌ saakîrîronkon rumakaꞌpî toꞌya. Inkamoro wanîꞌpî ekonekaꞌsan pe mîrîrî horarî yai, moropai mîrîrî Paapaya ikuꞌneꞌtîsaꞌ weiyu yai, moropai mîrîrî konoꞌ pîꞌ teepîkonpa. Arakkita pairî yonpa pemonkonyamîꞌ tîꞌkakonpa kaiꞌma.
16 Moropai toꞌ pemonkonoyamîꞌ iipî etaꞌpîuya. Inkamoro wanîꞌpî eseuwarapo 200 milhões kaisarî kawareponkon, mararon pepîn.
17 Moropai kawareyamîꞌ eraꞌmaꞌpîuya. Moropai inkamoro ponkon eraꞌmaꞌpîuya. Inkamoro rippoꞌta yaꞌsan iwaꞌtoꞌ wanîꞌpî suuyu pe, apoꞌ warantî. Moropai awanîꞌpî rora pe nîrî, tîꞌ safira iteseꞌ warantî. Moropai enkaiꞌmuꞌne awanîꞌpî, enxofre warantî. Moropai kawareyamîꞌ puꞌpai wanîꞌpî nariꞌ pe, kaikusi, leão puꞌpai warantî. Inkamoro mata yapai apoꞌ epaꞌkapîtîꞌpî. Moropai ureꞌtî epaꞌkaꞌpî. Moropai enxofre epaꞌkaꞌpî.
18 Mîrîrî eseurîwîꞌnan eꞌkupîꞌpî eꞌtarumaꞌtîntoꞌya pemonkonyamîꞌ tîꞌkaꞌpî. Arakkita pairî yonpa toꞌ wîꞌpîiya. Apoꞌya moropai ureꞌtîya moropai enxofreya kawareyamîꞌ mata yapai teepaꞌkasenya.
19 Inkamoro kawareyamîꞌ meruntîri wanîꞌpî toꞌ mata yaꞌ, moropai toꞌ yaukî pîꞌ. Inkamoro yaukî wanîꞌpî îkîiyamîꞌ warantî tîpuꞌpai ke. Mîrîrî yeꞌnen pemonkonyamîꞌ yeparantîꞌpî toꞌya mîrîrî ke.
20 Tîîse isaꞌmantaꞌsan pepîn pemonkonyamîꞌ yonparîꞌsanya imakuiꞌpî kuꞌtoꞌ tîuyaꞌnîkon rumaka pra toꞌ wanîꞌpî. Makui poitîrîtonon yapurî pîꞌ toꞌ koꞌmamîꞌpî. Moropai miaꞌ ke ikonekasaꞌ bronze pe, moropai yei konekasaꞌ pemonkon warantî tenu ke, tîîse eraꞌmanen pepîn. Tîpana kenan tîîse etanen pepîn, moropai tîꞌpu kenan tîîse asakoi pepîn yapurîꞌpî toꞌya.
21 Moropai imakuiꞌpî tînkupîꞌpîkon pîꞌ tîwenpenatai teserukon moꞌtanîpî toꞌya pra toꞌ wanîꞌpî. Pemonkonyamîꞌ wîꞌpî tîuyaꞌnîkon wenai toꞌ enpenata pîn. Moropai piaꞌsan pe tîweꞌtoꞌkon rumaka toꞌya pra toꞌ wanîꞌpî. Moropai seꞌ tapairî wîriꞌsanyamîꞌ yarakkîrî tîweꞌtoꞌkon rumaka toꞌya pîn. Moropai amaꞌyeꞌ pe tîweꞌtoꞌkon rumaka toꞌya pra nîrî toꞌ wanîꞌpî.
