Jesus Naipontîꞌsan Nîkupîꞌpîkon Yekare Atos 10:1-48
10 Cesaréia cidaderî po warayoꞌ wanîꞌpî iteseꞌ Cornélio. Mîîkîrî wanîꞌpî 600 kaisaronkon surarayamîꞌ Itália ponkon esaꞌ pe tîweꞌsen pe.
2 Mîîkîrî wanîꞌpî Paapa yapurînen pe. Tîpemonkonoyamîꞌ pokonpe siꞌma Paapa yapurîꞌpî toꞌya. Moropai tuꞌke morî kuꞌpîtîꞌpîiya, Judeuyamîꞌ îꞌ ton pînon tîpakkoriꞌtasanon pîikaꞌtîpîtîꞌpîiya. Moropai wei kaisarî eepîremapîtîꞌpî Paapa pîꞌ.
3 Tiwin wei koꞌmamîiya Cornélio weꞌneꞌpîtî warantî awanîꞌpî iweꞌnasaꞌ pra tîîse. Eraꞌmaꞌpîiya Uyepotorîkon narimaꞌpî. Inserî wanî tîîpia eraꞌmaꞌpîiya. Mîîkîrîya taꞌpî ipîꞌ: —Cornélio.
4 Eranneꞌ pe siꞌma inserî eraꞌmaꞌpîiya. Moropai ekaranmapoꞌpî Cornélioya: —Îꞌ waniꞌ nai, uyepotorî? —taꞌpîiya. Inserîya yuukuꞌpî. Taꞌpîiya ipîꞌ: —Paapaya tîwakîri pe eepîrematoꞌ etasaꞌ man, maasa pra îꞌ ton pînon pîikaꞌtîsaꞌya yeꞌnen. Apîꞌ Paapa atausinpasaꞌ man —taꞌpî inserîya ipîꞌ.
5 —Mîrîrî yeꞌnen apemonkonoyamîꞌ yarimakî Jope cidaderî pona toꞌ wîtîtoꞌpe, warayoꞌ iteseꞌ Simão Pedro yannoi toꞌ wîtîtoꞌpe —taꞌpîiya.
6 —Mîîkîrî wanî Paaka piꞌpî sakariꞌmanen, tuna ena po aakoꞌmamî manniꞌ Simão yewîꞌ ta —taꞌpîiya.
7 Mîrîrî tîpo inserî wîtîꞌpî Cornélio piapai. Mîrîrî yeꞌnen Cornélioya asakîꞌne tîpoitîrîtonon yannoꞌpî kaꞌneꞌ pe, moropai tiwin surara toꞌ pokonpe. Mîîkîrî surara wanîꞌpî Paapa yapurînen pe nîrî. Moropai Cornélio esenyakaꞌmatoꞌ kuꞌnen pe awanîꞌpî. Inkamoro yarimaꞌpîiya Jope cidaderî pona.
8 Cornélioya toꞌ pîꞌ tamîꞌnawîrî îꞌ taꞌpî inserîya tîpîꞌ ekaremekîꞌpî toꞌ pîꞌ: —Aꞌkî sîrîrîpe uyewîꞌ ta koꞌmamîiya epîrema tanne, Paapa narimaꞌpî inserî esenpon pîꞌ man —taꞌpîiya toꞌ pîꞌ. —Mîîkîrîya taa pîꞌ man upîꞌ: “Asakîꞌne apemonkonoyamîꞌ yarimakî toꞌ wîtîtoꞌpe warayoꞌ iteseꞌ Pedro yannoi Jope cidaderî pona”, taa pîꞌ man —taꞌpîiya. —Mîrîrî yeꞌnen atîtî —taꞌpîiya.
9 Tiaron wei yai toꞌ wîtîꞌpî Jope cidaderî pona aminke pra toꞌ erepamî tanne, Jope cidaderî pîꞌ inekaꞌta pairî wei tîîse, Pedro enukuꞌpî wîttî nekaꞌta pona epîremai. Miarî eepîrema tanne inkamoro warayoꞌkon erepamîꞌpî Jope cidaderî pona.
10 Moropai Pedroya emiꞌnan epuꞌtîꞌpî tekkari anonpapai enaꞌpî. Maasa pra tekkarikon ton koneka wîriꞌya tanne Pedro weꞌneꞌpîtî warantî awanîꞌpî.
11 Tîîweꞌneꞌpîꞌtoꞌ yaꞌ eraꞌmaꞌpîiya kaꞌ esettapurukasaꞌ. Mîrîrîya kureꞌnan kamisa warainon autîꞌpî ewaꞌtîsaꞌ pe asakîrîrî yaretîkon pîꞌ. Mîrîrî autîꞌpî non tîpose iipia.
12 Mîrîrî yaꞌ tuꞌke siꞌkoreꞌta kamoyamîꞌ moropai oꞌmaꞌkon tîroꞌtakon po taasaꞌsenon moropai toronyamîꞌ wanî eraꞌmaꞌpî Pedroya.
13 Mîrîrî yai Pedroya mai etaꞌpî, Paapa eseurîmatoꞌ. Taꞌpî maiya Pedro pîꞌ: —Eꞌmîꞌsaꞌkakî ayoꞌ ton wîîkî insanan yonpa moropai entamoꞌkakî —taꞌpîiya ipîꞌ.
14 Tîîse Pedroya yuukuꞌpî: —Kaane Uyepotorî. Maasa pra inkamoro yeꞌkakon anna nanîkon pepîn. Yanîuya eserîke pra wai —taꞌpî Pedroya.
15 Moropai inîꞌrî Paapa eseurîmaꞌpî Pedro yarakkîrî. —Inkamoro yeꞌka anna nanîkon pepîn tîkai pra eꞌkî uurî nîkupîꞌsan pîꞌ —taꞌpî Paapaya Pedro pîꞌ.
16 Mîrîrî warantî Paapa eseurîmaꞌpî eseurîwîꞌne iteꞌka. Taꞌpîiya: —Insanan yonpa wîîkî, entamoꞌkakî —taꞌpîiya. Mîrîrî tîpo mîrîrî kamisa warainon mennaꞌpoꞌpî Paapaya kaꞌ pona.
17 Mîrîrî tîpo Pedro esenumenkaꞌpî mîrîrî tîweꞌneꞌpîꞌtoꞌ pîꞌ. Îꞌ taatoꞌpe epuꞌtîiya pra awanîꞌpî. Mîrîrî yeꞌnen awanîꞌpî yairî maꞌre eenaꞌpî. Mîrîrî tanne, warayoꞌkon Cornélio narimaꞌsan erepamîꞌpî. Oꞌnon pata Simão yewîꞌ wanî ekaranmapo tîuyaꞌnîkon tîpo toꞌ emîꞌpamîꞌpî manaꞌta pia.
18 Toꞌ emîꞌpamîꞌpî wîttî esaꞌ yannoꞌpî toꞌya. Moropai ekaranmapoꞌpî toꞌya.
—Oꞌnon pata warayoꞌ nai Pedro iteseꞌ tarî nai? —taꞌpî toꞌya.
19 Pedro esenumenka koꞌmannîpî tanne tîweꞌneꞌpîꞌtoꞌ pîꞌ, Morî Yekaton Wannîya taꞌpî: —Pedro, aꞌkî, eseurîwîꞌnankon warayoꞌkon erepannî pîꞌ man. Inkamoroya ayuwa pîꞌ man —taꞌpî Morî Yekaton Wannîya ipîꞌ.
20 Moropai taꞌpîiya Pedro pîꞌ: —Ekonekakî autîkî toꞌ pia. Tîîwanmîra atîkî teesewankonoꞌmai pra, uutî naka taꞌyeꞌ tîkai pra atîkî. Maasa pra uurîya toꞌ yarimasaꞌ sîrîrî, toꞌ iiꞌtoꞌpe tarîwaya aapia —taꞌpî Morî Yekaton Wannîya.
21 Mîrîrî yeꞌnen Pedro autîꞌpî toꞌ pia. Moropai taꞌpîiya warayoꞌkon pîꞌ: —Uurî Pedro, tarî wai. Mîîkîrî yuwayaꞌnîkon manniꞌ uurî —taꞌpîiya. —Îꞌ kai aaiꞌsaꞌkon sîrîrî? —taꞌpîiya toꞌ pîꞌ.
22 Inkamoroya yuukuꞌpî: —Surarayamîꞌ esaꞌ Cornélioya anna yarimasaꞌ sîrîrî —taꞌpî toꞌya. —Mîîkîrî warayoꞌ wanî morî pe puꞌkuru maasa pra Paapa yapurîiya yeꞌnen. Mîrîrî yeꞌnen kureꞌne tînamasen pe awanî Judeuyamîꞌ rawîrî. Mîîkîrî wenai Paapa narimaꞌpî inserîya taasaꞌ ipîꞌ ayanno meꞌpotoꞌpeiya tewîꞌ ta attîpa kaiꞌma. Moropai îꞌ kaiꞌma amîrî eseurîma anetapai awanî —taꞌpî toꞌya ipîꞌ.
23 Moropai Pedroya taꞌpî toꞌ pîꞌ: —Ewontî —taꞌpîiya warayoꞌkon pîꞌ. Moropai toꞌ ewomîꞌpî. Tiwin ewaron yuwaꞌkaꞌpî toꞌya miarî yarakkîrî.
Eerenmaꞌsaꞌ pe Pedro ekonekaꞌpî. Moropai toꞌ pîkîrî attîꞌpî. Moropai tiaronkon Jope ponkon innape Jesus kuꞌnenan Judeuyamîꞌ wîtîꞌpî nîrî toꞌ pokonpe.
24 Moropai tiaron wei yai toꞌ erepamîꞌpî Cesaréia cidaderî pona. Mîrîrî yai Cornélio moropai itonpayamîꞌ nepuꞌtîkon emurukuntîsaꞌ wanîꞌpî miarî itewîꞌ ta. Maasa pra toꞌ etasaiꞌya wanîꞌpî Pedro erepamî nîmîkîkonpa kaiꞌma.
25 Mîrîrî yai Pedro erepamîꞌpî. Eewomî tanne Cornélio iipîꞌpî iponaya. Mîîkîrî eꞌsekunkaꞌpî Pedro eporî tîuya pe yapurîpa kaiꞌma.
26 Tîîse Pedroya taꞌpî ipîꞌ: —Eꞌmîꞌsaꞌkakî. Maasa pra uurî awarainon warayoꞌ, Paapa warainon pepîn uurî —taꞌpî Pedroya ipîꞌ.
27 Moropai teeseurîmakon yeꞌka pe, Pedro ewomîꞌpî Cornélio yewîꞌ ta. Miarî arinîke pemonkonyamîꞌ emurukuntîsaꞌ wanîꞌpî itewîꞌ ta. Moropai Pedro eseurîma piaꞌtîꞌpî toꞌ pîꞌ. Taꞌpîiya: —Epuꞌnenan amîrîꞌnîkon anna Judeuyamîꞌ yeseru. Anna emurukuntî eserîke pra awanî amîrîꞌnîkon Judeuyamîꞌ pepîn pokonpe —taꞌpî Pedroya toꞌ pîꞌ.
28 —Tîîse Paapaya ekaremeꞌsaꞌ sîrîrî upîꞌ, anîꞌ kupîuya namai tiaronkon yentai. Anîꞌ menkauya namai tamîꞌnawîrî seꞌ kaisarî toꞌ konekatoꞌpeuya, morî pe toꞌ kuꞌtoꞌpeuya taꞌpîiya upîꞌ —taꞌpî Pedroya.
29 —Mîrîrî yeꞌnen uyannosaꞌyaꞌnîkon yeꞌnen uuiꞌsaꞌ sîrîrî uwakîri pe puꞌkuru —taꞌpîiya. —Mîrîrî yeꞌnen anepuꞌpai wanî sîrîrî kureꞌne îꞌ ton pe uyannosaꞌyaꞌnîkon —taꞌpîiya toꞌ pîꞌ.
30 Mîrîrî yuukuꞌpî Cornélioya: —Eseurîwîꞌne wei esuwaꞌkasaꞌ man. Mîrîrî rawîrî epîrema tanne, uyewîꞌ ta koꞌmamîiya tiwinarî warayoꞌ esenpoꞌpî aimutun ipon uupia —taꞌpîiya.
31 —Mîîkîrîya taꞌpî upîꞌ: “Cornélio, Paapaya eepîrematoꞌ etasaꞌ man tîwakîri pe maasa pra tîîpakkoriꞌtîsanon pîikaꞌtîsaꞌya wanî morî pe”, taꞌpîiya upîꞌ.
32 Moropai taꞌpîiya: “Pemonkonyamîꞌ yarimakî Jope cidaderî pona toꞌ wîtîtoꞌpe warayoꞌ iteseꞌ Pedro yannoi. Mîîkîrî wanî paaka piꞌpî sakariꞌmanen Simão yewîꞌ ta, tuna ena po tîîkoꞌmansen”, taꞌpî inserîya upîꞌ —taꞌpî Cornélioya.
33 —Mîrîrî yeꞌnen ayanno meꞌpoꞌpîuya. Morî pe puꞌkuru awanî sîrîrî aaiꞌsaꞌ yeꞌnen anna koreꞌta. Anna epereꞌsaꞌ sîrîrî tarî Paapa pia puꞌkuru. Mîrîrî yeꞌnen îꞌ kaiꞌma Uyepotorîkonya îꞌ taasaꞌ apîꞌ ekaremekîya etatoꞌpe annaya kaiꞌma —taꞌpî Cornélioya Pedro pîꞌ.
Pedro Eseurîmatoꞌ Toꞌ Pokonpe
34 Mîrîrî yeꞌnen Pedro eseurîma piaꞌtîꞌpî. —Uyonpayamîꞌ —taꞌpîiya. —Eseurîma sîrîrî îꞌ kaiꞌma uyarakkîrî esekaremekîꞌpî uneꞌtaꞌpî ekaremekîuya sîrîrî. Anna Judeuyamîꞌ pîikaꞌtî Paapaya epuꞌnenan uurîꞌnîkon. Amîrîꞌnîkon Judeuyamîꞌ pepîn pîikaꞌtîiya pepîn kaiꞌma esenumenkakoiꞌkon anna. Tîîse sîrîrî pata pai epuꞌtî pîꞌ wai tarîpai Paapa wanî tamîꞌnawîronkon pîikaꞌtînen pe.
35 Tamîꞌnawîronkon wakîmanen pe seꞌ kaisarî, eꞌsentai pra. Mîrîrî yeꞌnen tauya sîrîrî amîrîꞌnîkon pîꞌ. Tamîꞌnawîronkon innape tîkuꞌnenan, yairî tîîkoꞌmansenon wakîma Paapaya pata kaisaronkon.
36 Sîrîrî itekare ekaremekîꞌpî Paapaya anna pîꞌ, tîpemonkonoyamîꞌ Judeuyamîꞌ pîꞌ. Ekaremekîꞌpîiya îꞌ kaiꞌma tîpemonkono pe uurîꞌnîkon kupîiya innape Jesus Cristo kuꞌsaꞌ uurîꞌnîkonya wenai. Mîîkîrî wanî tamîꞌnawîrî eꞌnî tanne uyesaꞌkon pe.
37 10:37,38 Epuꞌtîyaꞌnîkon îꞌ eꞌkuꞌsaꞌ tarî Israel pata poro. Eꞌmaiꞌ pe Judéia pata po João Batistaya ekaremekîꞌpî sîrîrî itekare. Taapîtîꞌpîiya: “Imakuiꞌpî pe aweꞌtoꞌkon rumakatî moropai esenpatakonatî”, taapîtîꞌpîiya. Mîrîrî tîpo tamîꞌnawîrî Israel pata poro itekare esekaremekîꞌpî. Mîrîrî yai Paapaya tîmeruntîri tîrîꞌpî Jesus Nazaré poinon pia. Morî Yekaton Wannî wenai itîrîꞌpîiya. Mîrîrî meruntî yarakkîrî Jesus esenyakaꞌma piaꞌtîꞌpî Galiléia pata po. Mîrîrî yai morî kuꞌpîtîꞌpî Jesusya pemonkonyamîꞌ pîꞌ. Makui nîtarumaꞌtîꞌsan pîikaꞌtîꞌpîiya maasa pra Paapa wanî yeꞌnen tîîpia. Mîrîrî kuꞌpîtîꞌpî Jesusya tarî tîwanî yai.
38 Eraꞌmakî 10:37
39 Mîrîrî eraꞌmaꞌpî annaya. Tamîꞌnawîrî inkupîꞌpî tarî anna pata po, Jerusalém po eraꞌmaꞌpî annaya. Mîrîrî tîpo Judeuyamîꞌ, ipemonkonoyamîꞌya iwîꞌpî, ipokapîtîꞌpî toꞌya pakîꞌnan pona.
40 Mîrîrî tîpo, eseurîwîꞌne wei tîîkoꞌmanse Paapaya iꞌmîꞌsaꞌkaꞌpî. Paapa meruntîri yai aweꞌmîꞌsaꞌkasaꞌ eesenpoꞌpî anna koreꞌta.
41 Mîîkîrî eraꞌmasaꞌ tamîꞌnawîronkon pemonkonyamîꞌya pra man, tîîse Paapa nîmenkaꞌsan annaya neken eraꞌmaꞌpî. Anna yekkari yonpaꞌpî annaya. Anna wuku enîrîꞌpî annaya ipokonpe siꞌma aweꞌmîꞌsaꞌkasaꞌ tîpo.
42 Mîîkîrîya anna menkaꞌpî moropai anna yaipontîꞌpî itekare ekaremeꞌtoꞌpe annaya. Mîrîrî yai itekare ekaremekî annaya yai taatoꞌpe annaya pemonkonyamîꞌ pîꞌ. Paapaya Jesus kuꞌsaꞌ ipîkku pe tamîꞌnawîronkon esaꞌ pe. Mîîkîrîya taa kupî sîrîrî anîꞌ wîtî kaꞌ pona, anîꞌ wîtî apoꞌ yaꞌ. Mîrîrî warantî ikupîꞌpî Paapaya.
43 Sîrîrî ekaremekîꞌpî penaronkon, Paapa maimu ekaremeꞌnenan profetayamîꞌ nurîꞌsanya. Mîrîrî eseposaꞌ sîrîrî. Mîrîrî yeꞌnen anîꞌya innape Jesus kupî ya tamîꞌnawîrî imakuiꞌpî inkupîꞌpî kupî Paapaya tîîwanmîra tînmu Jesus Cristo wenai. Mîrîrî warantî ekaremekîꞌpî toꞌya pena —taꞌpî Pedroya toꞌ pîꞌ.
Judeuyamîꞌ Pepîn Esaꞌ Pe Morî Yekaton Wannî Ena
44 Mîrîrî yai Pedro eseurîma tanne, itekare pîꞌ etanenan pemonkonyamîꞌ Judeuyamîꞌ pepîn Cornélio yewîꞌ ta tîweꞌsanon esaꞌ Morî Yekaton Wannî enaꞌpî.
45 10:45,46 Mîrîrî yeꞌnen Judeuyamîꞌ pepîn eseurîma tiaron mai ta, etaꞌpî Judeuyamîꞌ Pedro yarakkîrî iipîꞌsanya Paapa yapurîꞌpî toꞌya. Morî pe anna pîikaꞌtîsaꞌ Paapaya sîrîrî taa toꞌya etaꞌpî Judeuyamîꞌya. Mîrîrî pîꞌ innape Jesus kuꞌnenan Judeuyamîꞌ Jope poi iipîꞌsan Pedro yarakkîrî esewankonoꞌmaꞌpî kureꞌne toꞌ pîꞌ. Taꞌpî toꞌya: —Aꞌkî, Paapaya Judeuyamîꞌ pepîn pia nîrî Morî Yekaton Wannî tîrî kaꞌrî uurîꞌnîkon warantî —taꞌpî toꞌya. Mîrîrî yeꞌnen Pedroya taꞌpî toꞌ pîꞌ:
46 Eraꞌmakî 10:45
47 —Insamoro Judeuyamîꞌ pepîn esaꞌ pe Morî Yekaton Wannî enan pîꞌ man uurîꞌnîkon esaꞌ pe tîwanî manniꞌ warantî. Mîrîrî yeꞌnen anîꞌya taa eserîke pra awanî toꞌ esenpatakona pepîn taa eserîke pra awanî —taꞌpî Pedroya.
48 Moropai toꞌ esenpatakonaꞌpî innape Jesus Cristo kuꞌsaꞌ toꞌya yeꞌnen. Mîrîrî tîpo taꞌpî toꞌya Pedro pîꞌ: —Anna koreꞌta akoꞌmankî îꞌ warapo rî wei kaisarî —taꞌpî toꞌya Pedro pîꞌ.
