Jesus Naipontîꞌsan Nîkupîꞌpîkon Yekare Atos 11:1-30
11 Cesaréia po Pedro wanî tanne, Judéia pata ponkon Jesus naipontîꞌsan moropai tiaronkon innape Jesus kuꞌnenanya Judeuyamîꞌ pepîn yekare etaꞌpî. Îꞌ kaiꞌma Paapaya toꞌ pîikaꞌtîꞌpî etaꞌpî toꞌya. Mîrîrî koreꞌta Pedro erepamîꞌpî.
2 Mîrîrî yai Jerusalém pona Pedro erepamî pe, Pedro pîꞌ toꞌ oꞌmaꞌta piaꞌtîꞌpî. Taꞌpî toꞌya ipîꞌ:
3 —Inkamoro uurîꞌnîkon yeseru warainonkon pepîn koreꞌta aakoꞌmansaꞌ mîrîrî. Îꞌ ton pe inkamoro yekkari enasaꞌ ya yairî pra toꞌ yeseru eraꞌmaiꞌma —taꞌpî toꞌya. —Yairî pra aweꞌsaꞌ mîrîrî uyeserukon yawîrî pra kaiꞌma toꞌ oꞌmaꞌtaꞌpî Pedro pîꞌ.
4 Mîrîrî tîpo Pedroya tamîꞌnawîrî tarakkîrî eꞌkupîꞌpî, tîneraꞌmaꞌpî ekaremekîꞌpî eta toꞌya tanne, ikîꞌpî pata pai. Mîrîrî etaꞌpî toꞌya tamîꞌnawîrî îꞌ kaiꞌma Pedro eseurîma. Taꞌpîiya:
5 —Aꞌkî Jope cidaderî po siꞌma uurî weꞌneꞌpîtî warantî wanîꞌpî, uurî epîrema tanne eraꞌmaꞌpîuya kaꞌ esettapuruka moropai kamisa waraino kureꞌnan autîꞌpî kaꞌ poi asakîrîrî yaretî pîꞌ ewaꞌtîsaꞌ pe. Mîrîrî autîꞌpî non pona uupia —taꞌpî Pedroya toꞌ pîꞌ.
6 —Moropai eraꞌmaꞌpîuya. Mîrîrî yaꞌ tuꞌke kamoyamîꞌ wanîꞌpî moropai oꞌmaꞌkon, non poro tîroꞌtakon po taasaꞌsenan wanîꞌpî, moropai toronyamîꞌ wanîꞌpî —taꞌpîiya.
7 —Mîrîrî yai mai, Paapa maimu etaꞌpîuya. Taꞌpîiya upîꞌ: “Pedro, eꞌmîꞌsaꞌkakî kaꞌneꞌ pe ayoꞌ ton wîîkî moropai entamoꞌkakî”, taꞌpî Paapaya upîꞌ etaꞌpîuya —taꞌpî Pedroya.
8 —Tîîse yuukuꞌpîuya: “Kaane, Uyepotorî, inkamoro yeꞌkakon yanîuya eserîke pra wai, anna Judeuyamîꞌ nanîkon pepîn, nura pe toꞌ wanî yeꞌnen”, taꞌpîuya —taꞌpîiya.
9 —Tîîse inîꞌrî Paapa maimu etaꞌpîuya. See warantî: “Inkamoro yeꞌkakon pîꞌ nurakon yanîuya pepîn tîkai pra eꞌkî. Uurî nîkupîꞌsan inkamoro tansenonkon pe”, taꞌpî Paapaya upîꞌ —taꞌpî Pedroya.
10 —Eseurîwîꞌne iteꞌka Paapa eseurîmaꞌpî upîꞌ. Taꞌpîiya: “Eꞌmîꞌsaꞌkakî, ayoꞌ ton wîîkî, entamoꞌkakî unkupîꞌsan pîꞌ nura tîkai pra”, taꞌpîiya. Mîrîrî tîpo mîrîrî kamisa yanuꞌnîpîꞌpî Paapaya kaꞌ pona —taꞌpî Pedroya.
11 —Mîrîrî tanne eseurîwîꞌnankon warayoꞌkon uyannoi itîꞌsan erepamîꞌpî Cesaréia poi. Mîrîrî ita uurî eꞌtoꞌ wîttî Simão yewîꞌ ta toꞌ erepamîꞌpî —taꞌpî Pedroya.
12 —Mîrîrî yeꞌnen upîꞌ taꞌpî Morî Yekaton Wannîya. Toꞌ pîkîrî uutîtoꞌpe teesewankonoꞌmai pra, tîîwanmîra uutîtoꞌpe, taꞌpîiya. Moropai toꞌ pîkîrî uutî yai insamoro tiwin miaꞌ pona tîîmoꞌtai kaisarî innape Jesus kuꞌnenan wîtîꞌpî nîrî uyarakkîrî Jope poi. Mîrîrî yai tamîꞌnawîrî anna erepamîꞌpî. Moropai anna ewomîꞌpî Cornélio yewîꞌ ta.
13 —Mîîkîrîya ekaremekîꞌpî anna pîꞌ îꞌ kaiꞌma tiwinarî inserî esenpoꞌpî tewîꞌ ta eepîrema tanne Taꞌpîiya ipîꞌ: “Pemonkonyamîꞌ anarimakî toꞌ wîtîtoꞌpe Jope cidaderî pona warayoꞌ yannoi iteseꞌ Pedro”, taꞌpî inserîya ipîꞌ —taꞌpî Pedroya.
14 —“Mîîkîrîya îꞌ kaiꞌma Paapaya taasaꞌ ekaremekî yai innape Jesus kupîyaꞌnîkon moropai Paapaya apîikaꞌtîkon tamîꞌnawîrî apemonkonoyamîꞌ pokonpe”, taꞌpî inserîya ipîꞌ —taꞌpî Pedroya.
15 —Moropai eseurîma piaꞌtîꞌpî toꞌ koreꞌta siꞌma, mîrîrî pe rî Morî Yekaton Wannî enaꞌpî toꞌ esaꞌ pe tamîꞌnawîrî eꞌmaiꞌ pe uurîꞌnîkon Judeuyamîꞌ esaꞌ pe tîwanî warantî —taꞌpî Pedroya.
16 —Mîrîrî yai enpenataꞌpî pena Joãoya taꞌpî pîꞌ. “Uurîya amîrîꞌnîkon yenpatakona tuna ke, tîîse uyeꞌmaꞌpî pîꞌ aaipî manniꞌya Morî Yekaton Wannî ke yenpatakona, mîrîrî warantî Morî Yekaton Wannî ena ayesaꞌkon pe”, taꞌpî Joãoya wanî yairî —taꞌpî Pedroya.
17 —Pena taꞌpî Joãoya yawîrî innape Judeuyamîꞌ pepînya Paapa winîpainon Morî Yekaton Wannî koꞌmamî toꞌ esaꞌ pe. Mîîkîrî uurîꞌnîkon esaꞌ pe awanî manniꞌ innape Uyepotorîkon pe Jesus Cristo kupî yai uyesaꞌkon pe eenaꞌpî. Mîrîrî yeꞌnen anîꞌ kin uurî Paapa yentai eꞌkuꞌtoꞌpe? —taꞌpî Pedroya.
18 Mîrîrî eta tîuyaꞌnîkon pe Pedro pîꞌ tîwoꞌmaꞌtatoꞌkon tîꞌnapannîpîꞌpî toꞌya. Tarîpai Paapa yapurîꞌpî toꞌya. Taꞌpî toꞌya: —Paapaya Judeuyamîꞌ pepînya innape tîkuꞌtoꞌ weiyu ton tîîsaꞌ, imakuiꞌpî toꞌ nîkupîꞌpî kuꞌsaiꞌya tîîwanmîra. Mîrîrî yeꞌnen ipatîkarî enen koꞌmannîtoꞌ eposaꞌ toꞌya, kaiꞌma Paapa yapurîꞌpî toꞌya.
Innape Jesus Kuꞌnenan Antioquia Ponkon Yekare
19 Innape Jesus kuꞌnenan eꞌparaipîkasaꞌ wanîꞌpî tîtarumaꞌtîkon toꞌya wenai, Estêvão saꞌmantaꞌpî pataꞌpî ya. Tiaronkon wîtîꞌpî Fenícia pona moropai Chipre pona, moropai Antioquia pona. Mîrîrî warantî Paapa maimu ekaremekîꞌpî toꞌya Judeuyamîꞌ pîꞌ neken.
20 Tîîse tiaronkon Judeuyamîꞌ Chipre po tîweꞌsanon moropai Cirene ponkon wîtîꞌpî Antioquia pona. Miarî itekare ekaremekî piaꞌtîꞌpî toꞌya Judeuyamîꞌ pepîn pîꞌ. Inkamoroya Uyepotorîkon pe Jesus wanî ekaremekîꞌpî Judeuyamîꞌ pepîn pîꞌ.
21 Inkamoro yarakkîrî Uyepotorîkon meruntîri wanîꞌpî. Mîrîrî itekare eta tîuyaꞌnîkon yai tuꞌke pemonkonyamîꞌya innape Jesus kupîꞌpî. Mîrîrî yeꞌnen Uyepotorîkon pia toꞌ eturumakaꞌpî.
22 Mîrîrî tîpo sîrîrî itekare Judeuyamîꞌ pepîn yekare, etaꞌpî innape Jesus kuꞌnenan Jerusalém ponkonya. Mîrîrî yeꞌnen Barnabé yarimaꞌpî toꞌya, toꞌ yekare etai Antioquia pona.
23 Miarî Antioquia pona teerepansaꞌ pe Barnabéya îꞌ kaiꞌma Judeuyamîꞌ pepîn pîikaꞌtîsaꞌ Paapaya eraꞌmaꞌpî. Kureꞌne morî pe Paapa eꞌtoꞌ pîꞌ aatausinpaꞌpî. Mîrîrî yeꞌnen inîꞌ panpîꞌ toꞌ panamaꞌpîiya yairî tewankon ke Uyepotorîkon yapurî pîꞌ toꞌ koꞌmantoꞌpe kaiꞌma.
24 Mîîkîrî Barnabé esaꞌ pe Morî Yekaton Wannî wanîꞌpî. Innape Jesus kuꞌnen pe awanîꞌpî. Mîrîrî yeꞌnen morî pe awanîꞌpî innape iteseru wanîꞌpî. Mîrîrî wenai tuꞌkankon eturumakaꞌpî Uyepotorîkon pia innape yapurîkonpa.
25 Moropai mîrîrî tîpo Barnabé wîtîꞌpî Tarso cidaderî pona Saulo yuwai.
26 Mîîkîrîya Saulo eposaꞌ tîuya yai enepîꞌpî Antioquia pona. Inkamoro Saulo Barnabéya innape Jesus kuꞌnenan muurukuntîpîtîꞌpî tiwin konoꞌ toꞌ koreꞌta tîwanîkon yai. Miarî arinîkon pemonkonyamîꞌ yenupapîtîꞌpî toꞌya. Miarî Antioquia po innape Jesus kuꞌnenan esatî piaꞌtîꞌpî pemonkonyamîꞌya eꞌmaiꞌ pe crente kaiꞌma.
27 Mîrîrî yai tiaronkon profetayamîꞌ Paapa maimu ekaremeꞌnen wîtîsaꞌ wanîꞌpî Jerusalém poi Antioquia pona.
28 Tiwin wanîꞌpî iteseꞌ Ágabo. Mîîkîrî eꞌmîꞌsaꞌkaꞌpî eseurîmai Morî Yekaton Wannî meruntîri yai. Taꞌpîiya: —Awanî pe man kureꞌnan iwan tamîꞌnawîrî pata po —taꞌpîiya. Mîîkîrîya taasaꞌ yawîrî aweꞌkupîꞌpî pena pata esanon reiyamîꞌ esaꞌ pe Cláudio wanî yai.
29 Mîrîrî yeꞌnen innape Jesus kuꞌnenan esenumenka tiaronkon innape Jesus kuꞌnenan Judéia ponkon pîikaꞌtî tîuyaꞌnîkon pîꞌ. Mîrîrî itîrî tîuyaꞌnîkon pîkîrî itîrîꞌpî toꞌya.
30 Moropai mîrîrî tîniru yarimaꞌpî toꞌya Barnabé moropai Saulo pîꞌ, mîrîrî tîîtoꞌpe toꞌya soosi esanon pia Jerusalém po.
