Jesus Naipontîꞌsan Nîkupîꞌpîkon Yekare Atos 13:1-52
13 Miarî innape Jesus kuꞌnenan koreꞌta Antioquia po Paapa maimu ekaremeꞌnenan profetayamîꞌ moropai yenupatonkon wanîꞌpî. Barnabé, Simão meekoro kaiꞌma tesaꞌsen moropai Lúcio Cirene pon, Manaém manniꞌ pata esaꞌ Herodes yarakkîrî arentaꞌpî moropai Saulo. Inkamoro wanîꞌpî innape Jesus kuꞌnenan koreꞌta Antioquia po.
2 Tiwin wei inkamoroya Paapa yapurî tanne tekkarikon tonpai pra, Morî Yekaton Wannîya taꞌpî toꞌ pîꞌ: —Barnabé Saulo nîkupî ton kuꞌsauꞌya wai. Mîrîrî yeꞌnen inkamoro moꞌkatî akoreꞌtapaiꞌnîkon mîrîrî kuꞌtoꞌpe toꞌya —taꞌpîiya toꞌ pîꞌ.
3 Mîrîrî yeꞌnen toꞌ epîremaꞌpî tekkarikon tonpai pra. Barnabé Saulo puꞌpai pona tenyakon tîrîꞌpî toꞌya toꞌ yarimakonpa kaiꞌma. Mîrîrî tîpo toꞌ esekaremekîꞌpî.
Chipre Wono Po Itekare Ekaremekî Toꞌya
4 Morî Yekaton Wannîya Saulo Barnabé yarima yai, inkamoro wîtîꞌpî Selêucia cidaderî pona. Miarî teerepansaꞌkon tîpo inkamoro asaraꞌtîꞌpî apoꞌyen yaꞌ tuutîkonpa Chipre wono pona. Toꞌ asaraꞌtîꞌpî toꞌ wîtîꞌpî Salamina cidaderî pona.
5 Miarî teerepansaꞌkon yai inkamoro eseurîma piaꞌtîꞌpî Paapa maimu ekaremekî pîꞌ. Judeuyamîꞌ epereꞌpîꞌtoꞌkon kaisarî toꞌ eseurîma piaꞌtîꞌpî Paapa maimu ekaremekî pîꞌ. Mîrîrî yai João Marcos wanîꞌpî toꞌ pokonpe.
6 Mîrîrî tîpo inîꞌrî toꞌ eseꞌmaꞌtîꞌpî. Inkamoro wîtîꞌpî mîrîrî iwono kîꞌpîya tîweꞌsen Pafos cidaderî pona.
Miarî teerepansaꞌkon yai piaꞌsan eporîꞌpî toꞌya, îꞌ eꞌkupî kupî sîrîrî ekaremeꞌnen pe, tîîse seruꞌyeꞌ Judeu iteseꞌ Barjesus.
7 13:7,8 Tîîse grego maimu ta Elimas kaiꞌma esatî toꞌya. Mîîkîrî Barjesus wanîꞌpî miarîron pata esaꞌ pe tîweꞌsen wanîyakon pe awanîꞌpî. Mîîkîrî pata esaꞌ eseꞌ wanîꞌpî Sérgio Paulo. Mîîkîrî wanîꞌpî epuꞌnen pe. Mîrîrî wenai Saulo Barnabé yanno meꞌpoꞌpîiya Paapa maimu anetapai tîwanî yeꞌnen toꞌ winîpai. Inkamoroya itekare ekaremekîꞌpî. Tîîse mîrîrî pîꞌ inna taiya yuꞌse pra mîîkîrî piaꞌsan wanîꞌpî. Mîrîrî warantî Jesus naipontîꞌsan maimu waꞌtîꞌpîiya.
8 Eraꞌmakî 13:7
9 Tîîse Saulo, tiaron iteseꞌ Paulo wanîꞌpî Morî Yekaton Wannî yarakkîrî tîweꞌsen pe. Mîrîrî yeꞌnen mîîkîrî piaꞌsan yenu pîkîrî Paulo wanîꞌpî.
10 Taꞌpîiya ipîꞌ: —Amîrî wanî Makui munmu pe —taꞌpîiya. —Amîrî wanî seruꞌyeꞌ pe tiaronkon yenkuꞌtî pîꞌ tîîkoꞌmansen pe. Amîrî wanî tamîꞌnawîron morî yewanmîrînen pe. Îꞌ ton pe see yairon Uyepotorîkonya uyenupatoꞌkon miakanmaya seruꞌyeꞌ pe —taꞌpî Pauloya.
11 —Tarîpai Paapaya atarumaꞌtî sîrîrî —taꞌpî Pauloya ipîꞌ. —Îꞌ warapo wei kaisarî îꞌ eraꞌmaya pepîn aꞌka eraꞌmaya pepîn. Enkaruꞌne eena sîrîrî tarîpai —taꞌpî Pauloya ipîꞌ.
Mîrîrî taiya pe mîîkîrî yenu ewaronpamîꞌpî îꞌ eraꞌmaiya pra eenaꞌpî. Mîîkîrî atakaꞌma piaꞌtîꞌpî. Mîrîrî yeꞌnen itenya pîꞌ taanen ton yuwaꞌpî mîîkîrîya.
12 Mîrîrî eraꞌma tîuya yai mîîkîrî pata esaꞌ Sérgio Paulo mîîkîrîya Paapa maimu kupîꞌpî innape. Kureꞌne eesenumenkaꞌpî îꞌ kaiꞌma uyenupatoꞌkon Uyepotorîkonya pîꞌ.
Antioquia Cidaderî Pona Toꞌ Wîtî, Pisídia Pata Pona
13 Paulo moropai itonpayamîꞌ inkamoro asaraꞌtîꞌpî apoꞌyen yaꞌ, Pafos cidaderî poi. Toꞌ erepamîꞌpî Perge pona. Mîrîrî Perge wanîꞌpî Panfília pata po tîweꞌsen pe. Miarî pai João Marcos ennaꞌpoꞌpî Jerusalém pona.
14 Tîîse tiaronkon wîtîꞌpî Perge poi Antioquia cidaderî pona. Mîrîrî Antioquia wanîꞌpî Pisídia pata po tîweꞌsen pe. Miarî Antioquia po Sábado yai Judeuyamîꞌ epereꞌtoꞌkon yewîꞌ ta toꞌ wîtîꞌpî. Moropai toꞌ ereutaꞌpî.
15 Miarî inkamoroya Moisés nurîꞌtî kaaretarî erenkaꞌpî moropai Paapa maimu ekaremeꞌnenan profetayamîꞌ nurîꞌtî kaaretarî nîrî erenkaꞌpî toꞌya. Mîrîrî tîpo mîrîrî Judeuyamîꞌ epereꞌnîtoꞌ yewîꞌkon esaꞌ pe tîweꞌsenya pemonkonyamîꞌ eseurîmatoꞌpe toꞌ yarakkîrî taꞌpî. Mîrîrî yeꞌnen taꞌpî toꞌya toꞌ pîꞌ: —Uyonpayamîꞌ, amîrîꞌnîkon pîꞌ tauya îꞌ rî ankapai awanîkon ya eseurîmapai awanîkon ya, eseurîmatî pemonkonyamîꞌ yausinpatoꞌ ton ekaremeꞌtî —taꞌpî toꞌya toꞌ pîꞌ.
16 Mîrîrî yeꞌnen Paulo eꞌmîꞌsaꞌkaꞌpî. Tîweꞌmîꞌsaꞌka pe tenya ke taꞌpîiya. Maasa moo eꞌtî. Moropai taꞌpîiya: —Uyonpayamîꞌ, eseurîma etatî maasa amîrîꞌnîkon tarî awanîkon Judeuyamîꞌ moropai Judeuyamîꞌ pepîn Paapa yapurî pîꞌ awanîkon —taꞌpîiya.
17 Moropai Paulo eseurîma piaꞌtîꞌpî: —Pena Paapaya utamokon menkaꞌpî Egito pata po toꞌ wanî yai. Miarî arinîke toꞌ epantoꞌpe toꞌ menkaꞌpî Paapaya. Moropai mîîkîrî Paapaya yarî toꞌ moꞌkaꞌpî Egito poi tîpemonkonoyamîꞌ kureꞌnan tîmeruntîri ke.
18 Inkamoro yarîꞌpîiya toꞌ pata yaꞌ toꞌ ennaꞌpo yai. Tîîse toꞌ yapîtanîpîꞌpî mîîkîrî Paapaya keren po asakîꞌne pemonkon (40) konoꞌ kaisarî.
19 Mîrîrî tîpo tîpemonkono pata ton tîrîꞌpîiya. Mîîkîrîya Canaã po tîîkoꞌmansenon asakîꞌne miaꞌ pona tîîmoꞌtai pata ponkon tîꞌkaꞌpî. Mîrîrî wenai mîrîrî pata esaꞌ pe inkamoro ipemonkonoyamîꞌ enatoꞌpe kaiꞌma Canaã pata po.
20 Toꞌ koꞌmamîꞌpî 450 konoꞌ kaisarî sîrîrî tîpatakon esaꞌ pe teenakon pîkîrî.
Miarî pemonkon nîrî menkaꞌpî Paapaya îꞌ pensa tiaronkonya toꞌ tarumaꞌtî yai toꞌ pîikaꞌtînen ton. Mîrîrî warantî pemonkon menka pîꞌ Paapa koꞌmamîꞌpî Samuel esenpotoꞌ weiyu erepamî pîkîrî.
21 Ipemonkonoyamîꞌya tesaꞌkon ton esatî yai Paapaya imenkaꞌpî Saul iteseꞌ. Quis munmu pe awanîꞌpî. Benjamim payannîꞌsan yonpa pe awanîꞌpî. Mîîkîrî Saul koꞌmamîꞌpî pata esaꞌ pe asakîꞌne pemonkon (40) konoꞌ kaisarî.
22 Mîrîrî tîpo Paapaya imoꞌkaꞌpî. Moropai tiaron pata esaꞌ ton menkaꞌpîiya, Davi. Mîîkîrî pîꞌ Paapa eseurîmaꞌpî. “Mîîkîrî Davi wanî Jessé munmu pe. Mîîkîrî wanî uwakîri pe puꞌkuru maasa pra tamîꞌnawîrî ikuꞌkî tauya ikupîiya” taꞌpîiya.
23 Mîîkîrî payannîꞌsan koreꞌta Paapaya Jesus tîrîꞌpî Judeuyamîꞌ pîikaꞌtînen ton pe taasaꞌ tîuya yawîrî.
24 Tîîse mîîkîrî iipî rawîrî eꞌmaiꞌ pe Paapaya João Batista nurîꞌtî yarimaꞌpî. Mîîkîrîya Paapa maimu ekaremekîꞌpî Judeuyamîꞌ pîꞌ. Taꞌpîiya: “Amakuyikon rumakatî moropai esenpatakonaꞌtî”, taapîtîꞌpîiya.
25 Mîrîrî teesenyakaꞌmatoꞌ yaretîꞌka tîuya kupî yai João Batistaya taꞌpî pemonkonyamîꞌ pîꞌ: “Anîꞌ kaiꞌma uurî pîꞌ eesenumenkakon? Manniꞌ annîmîkîkon kaiꞌma upîꞌ awanîkon, Paapa naipontî ton kaiꞌma”, taꞌpîiya. “Tîîse mîîkîrî pepîn uurî. Maasa pra mîîkîrî wanî kureꞌne uyentai ipîkku pe tîweꞌsen pe. Mîrîrî yeꞌnen iꞌsaꞌsaꞌ yewa yeukauya eserîke pra wanî îꞌ pe pra rî wanî yeꞌnen”, taꞌpî João Batistaya.
26 Uyonpayamîꞌ, Abraão payannîꞌsan —taꞌpî Pauloya. —Amîrîꞌnîkon Judeuyamîꞌ moropai Judeuyamîꞌ pepîn, Paapa yapurînenan. Eꞌpîikaꞌtîntoꞌ yekare ekaremekîuya etatî —taꞌpîiya. —Sîrîrî itekare wanî tamîꞌnawîronkon ton pe. Sîrîrî itekare esekaremekî Jerusalém po tamîꞌnawîrî Judeuyamîꞌ pîꞌ moropai toꞌ esanon pîꞌ.
27 13:27,28 Tîîse mîrîrî epuꞌtî toꞌya pra toꞌ wanî. Pîikaꞌtîton pe Jesus wanî epuꞌtî toꞌya pra wanî. Teuren sábado kaisarî eta toꞌya Paapa maimu ekaremeꞌnenan profetayamîꞌ kaaretarî erenka toꞌya epuꞌtî toꞌya teuren. Mîrîrî warantî tîîse ikupîꞌpî toꞌya tepuꞌse pra. Mîîwîni tîîse Jesus yewanmîrî toꞌya ituꞌse pra toꞌ wanî. Îꞌ rî see imakuiꞌpî inkupîꞌpî ton pra tîîse, mîîkîrî rumakaꞌpî toꞌya Pôncio Pilatosya iwî meꞌpotoꞌpe kaiꞌma. Tamîꞌnawîrî aweꞌmenukasaꞌ Paapa kaaretarîya taasaꞌ yawîrî ikupîꞌpî toꞌya tepuꞌse pra.
28 Eraꞌmakî 13:27
29 Mîrîrî tîpo mîîkîrî esaꞌrîꞌpî moꞌkaꞌpî toꞌya pakîꞌnan poi. Mîrîrî yuꞌnaꞌtîꞌpî toꞌya.
30 Tîîse mîîkîrî pîmîꞌsaꞌkaꞌpî Paapaya. Mîrîrî tîpo tuꞌke wei tîîkoꞌmamî yai, eesenpopîtîꞌpî tînaipontîꞌsan pia. Galiléia poi tuutîsanon Jerusalém pona tîpokon pe pia eesenpoꞌpî.
31 Mîrîrî yeꞌnen inkamoroya ekaremekî sîrîrî Judeuyamîꞌ pîꞌ tamîꞌnawîrî Jesus eꞌmîꞌsaꞌkasaꞌ.
32 Anna wanî sîrîrî tarî akoreꞌtaꞌnîkon —taꞌpî Pauloya. —Mîrîrî morî yekare pîꞌ anna eseurîmatoꞌpe apîꞌnîkon ekaremeꞌtoꞌpe annaya —taꞌpîiya.
33 —Pena utamokon pîꞌ îꞌ taꞌpî tîuya kupîꞌpî Paapaya amen uurîꞌnîkon ton pe. Jesus pîmîꞌsaꞌkaꞌpîiya. Pena mîrîrî eꞌmenukasaꞌ Salmo kaaretarî yaꞌ capítulo 2. Taꞌpî Paapaya:“Unmu amîrî.Sîrîrîpe ayun pe wanîekaremekîuya sîrîrî tamîꞌnawîronkon pîꞌ.”
taꞌpî Paapaya. Jesus pîꞌ Paapa eseurîmaꞌpî mîrîrî —taꞌpî Pauloya.
34 Sîrîrî Paapa eseurîmaꞌpî Jesus eꞌmîꞌsaꞌka pîꞌ itesaꞌrîꞌpî kata pepîn kaiꞌma eeseurîmaꞌpî. Taꞌpîiya see warantî:“Îꞌ taꞌpîuya yawîrî Davi pîꞌ, mîrîrî kupîuya”,
taꞌpîiya.
35 Moropai inîꞌrî Paapa maimu eꞌmenukasaꞌ ya eeseporî mîrîrî, Salmo kaaretarî yaꞌ. Taꞌpî Paapa maimu ekaremeꞌnenya, see warantî:“Apoitîrî saꞌmantatîîse mîîkîrî esaꞌrîꞌpîkupîya pepîn tîwî aakatatoꞌpe”,
taꞌpîiya. Tîîse Davi pîꞌ eeseurîmasaꞌ pra awanîꞌpî.
36 —Maasa pra tîîkoꞌmamî yai Daviya ikupîꞌpî îꞌ kupîiya yuꞌse Paapa wanîꞌpî. Mîrîrî tîpo Davi saꞌmantaꞌpî moropai yuꞌnaꞌtîꞌpî toꞌya itesaꞌrîꞌpî itamorîꞌsan nurîꞌtî uruwasi pia. Moropai itesaꞌrîꞌpî kataꞌpî.
37 Tîîse Paapa nîmîꞌsaꞌkaꞌpî mîîkîrî esaꞌrîꞌpî kata pra awanîꞌpî. Aakoꞌmamî ipatîkarî —taꞌpî Pauloya.
38 Uyonpayamîꞌ, tamîꞌnawîrî amîrîꞌnîkonya sîrîrî epuꞌtî eꞌpai man, Jesus wenai imakuiꞌpî ankupîꞌpîkon kupîiya tîîwanmîra. Epuꞌtîyaꞌnîkon eꞌpai man Jesus wenai imakuiꞌpî ton pra enan innape ikupî ya.
39 Moisés yeserurîꞌpî kupî pîꞌ aakoꞌmamîkon ya apîikaꞌtîkon pepîn amakuyikon moꞌka pepîn tîîse tauya manniꞌ apîꞌnîkon.
40 Paapa maimu ekaremeꞌnen profeta nekaremekîꞌpî epuꞌtîyaꞌnîkon eꞌpai man, mîrîrî warantî awanîkon namai.
41 Mîrîrî ekaremekîuya apîꞌnîkon. Taꞌpî Paapaya:“Aka, upîꞌ tîîwoꞌmaꞌtasanon eranneꞌ pe eꞌtî.Esenumenkatî, tîwarî eꞌtî.Maasa pra aneraꞌmakon ton kupîuya kupî sîrîrî,innape ikupîyaꞌnîkon yentai,mîrîrî etayaꞌnîkon tîîse”.
taꞌpî Paapaya. Mîrîrî warantî Paulo eseurîmaꞌpî.
42 Paulo Barnabé epaꞌka yai mîrîrî Judeuyamîꞌ epereꞌtoꞌ yewîꞌ tapai toꞌ epaꞌka yai inkamoro pemonkonyamîꞌya toꞌ etaꞌpî inîꞌrî toꞌ iiꞌtoꞌpe tiaron sábado yai inîꞌ panpîꞌ itekare ekaremeꞌse.
43 Mîrîrî tîpo Judeuyamîꞌ moropai Judeuyamîꞌ pepîn Judeuyamîꞌ yeseru yawîrî enaꞌsan, inkamoro wîtîꞌpî toꞌ pîkîrî. Inkamoro yeurîmaꞌpî toꞌya îꞌ kaiꞌma toꞌ koꞌmantoꞌpe innape Paapa kupîꞌpî tîrumakai pra toꞌ koꞌmantoꞌpe maasa pra morî pe tîweꞌtoꞌ ke toꞌ pîikaꞌtîsaꞌ Paapaya yeꞌnen. Mîrîrî warantî toꞌ yeurîmaꞌpî toꞌya.
44 Mîrîrî tîpo tiaron sábado yai toꞌ wîtîꞌpî Saulo Barnabé. Mîrîrî yai arinîke toꞌ wanîꞌpî tamîꞌnawîrî yonpa cidade ponkonya Paapa maimu etatoꞌpe.
45 Mîrîrî yai toꞌ eraꞌma tîuyaꞌnîkon yai Judeuyamîꞌ esenumenkaꞌpî imakuiꞌpî pe. Toꞌ kinmuwaꞌpî. Mîrîrî yeꞌnen imakuiꞌpî pe Paulo winîkîi toꞌ eseurîmaꞌpî îꞌ kaiꞌma eeseurîmatoꞌ wenai.
46 Imakuiꞌpî pe tîwinîkîiꞌnîkon Judeuyamîꞌ eseurîma epuꞌtî tîuyaꞌnîkon yeꞌnen Paulo Barnabé eseurîmaꞌpî inîꞌ panpîꞌ meruntî ke. Taꞌpî toꞌya toꞌ pîꞌ: —Aꞌkî, sîrîrî Paapa maimu ekaremekî annaya eꞌpai awanî eꞌmaiꞌ pe amîrîꞌnîkon Judeuyamîꞌ pîꞌ. Tîîse îꞌ waniꞌ awanî yeꞌnen mîrîrî yuꞌse pra awanîkon sîrîrî. Innape ikupîyaꞌnîkon pra awanîkon. Mîrîrî yeꞌnen ipatîkarî enen koꞌmannîtoꞌ iwanmîrîyaꞌnîkon mîrîrî. Mîrîrî yeꞌnen anna wîtî manniꞌkan Judeuyamîꞌ pepîn pîꞌ ekaremeꞌse.
47 Maasa pra sîrîrî ekaremeꞌtoꞌpe annaya taꞌpî Paapaya pena. Paapaya itîrîꞌpî. Taꞌpîiya:“Amîrî kupîuya sîrîrî aꞌka warantîmanniꞌkan Judeuyamîꞌ pepîn koreꞌta.Itekare pîꞌ eeseurîma wenaiPaapa maimu eta tamîꞌnawîronkonya.Mîrîrî warantî tîweꞌpîikaꞌtîtoꞌkon eporî toꞌya”,
taꞌpî Paapaya pena.
48 Mîrîrî yeꞌnen mîrîrî eta tîuyaꞌnîkon yai Judeuyamîꞌ pepîn atausinpasaꞌ wanîꞌpî maasa pra innape Jesus kuꞌsaꞌ tîuyaꞌnîkon yeꞌnen. Morî pe eraꞌmaꞌpî toꞌya mîrîrî Paapa maimu Paulo nekaremekîꞌpî yapurîꞌpî toꞌya. Inkamoro menkasaꞌ Paapaya wanîꞌpî ipatîkarî toꞌ komantoꞌpe. Mîrîrî yeꞌnen innape ikupîꞌpî toꞌya.
49 Mîrîrî warantî Paapa maimu esekaremekîꞌpî tamîꞌnawîrî mîrîrî pata po.
50 Tîîse Judeuyamîꞌya tesaꞌkon pe tîweꞌsen pîꞌ taꞌpî imakuiꞌpî kuꞌtoꞌpe toꞌya Paulo winîkîi. Mîrîrî yeꞌnen wîriꞌsanyamîꞌ ipîkkukon Judeuyamîꞌ yeseru yaꞌ enaꞌsan meruntîtannîpîꞌpî toꞌya imakuiꞌpî kuꞌtoꞌpe toꞌya Paulo Barnabé winîkîi. Mîrîrî yeꞌnen Paulo Barnabé tarumaꞌtî piaꞌtîꞌpî toꞌya. Moropai toꞌ yenpaꞌkaꞌpî toꞌya mîrîrî pata yapai.
51 Moropai inkamoro Jesus naipontîꞌsanya non atapiꞌsaꞌ tîꞌsaꞌsaꞌkon pîꞌ sorokaꞌpî teserukon ta Paapa yenyaꞌ toꞌ rumaka tîuya taatoꞌ, maasa pra itekare anetapai pra toꞌ wanîꞌpî. Mîrîrî yeꞌnen inkamoro wîtîꞌpî Icônio cidaderî pona.
52 Tîîse innape Jesus kuꞌnenan Antioquia ponkon wanîꞌpî taatausinpai kureꞌne maasa pra Morî Yekaton Wannî wanîꞌpî toꞌ esaꞌ pe.
