Jesus Naipontîꞌsan Nîkupîꞌpîkon Yekare Atos 14:1-28
14 Icônio cidaderî po tîwanîkon yai mîrîrî warantî rî Paulo Barnabé wanîꞌpî Judeuyamîꞌ epereꞌtoꞌ yewîꞌkon ta. Toꞌ ewomîꞌpî. Meruntî ke Paapa maimu ekaremekîꞌpî toꞌya. Mîrîrî yeꞌnen tuꞌke Judeuyamîꞌ pepîn moropai Judeuyamîꞌya innape Jesus kupîꞌpî.
2 Tîîse Judeuyamîꞌ innape ikuꞌnenan pepîn eseurîmaꞌpî Judeuyamîꞌ pepîn yarakkîrî innape Jesus kuꞌnenan tarumaꞌtîtoꞌpe toꞌya.
3 Mîrîrî yai Paulo Barnabé koꞌmamîꞌpî tuꞌke wei kaisarî miarî Paapa maimu ekaremekî pîꞌ meruntî ke. Îꞌ kaiꞌma morî pe tîweꞌtoꞌ wenai, unkupîꞌpîkon wenai pra Uyepotorîkonya upîikaꞌtîkon pîꞌ toꞌ eseurîmaꞌpî. Mîrîrî yeꞌnen Paapaya meruntî ke Jesus naipontîꞌsan eꞌtoꞌ ton tîrîꞌpî. Maasa pra eraꞌmatoꞌpe pemonkonyamîꞌya yairon pe eꞌpîikaꞌtîntoꞌ yekare wanî. Mîrîrî yeꞌnen tînaipontîꞌsan pia meruntî tîrîꞌpîiya. Îꞌ ikupî eserîkan pepîn moropai kureꞌnan esenumenkantoꞌ kuꞌtoꞌpe toꞌya kaiꞌma Paapaya itîrîꞌpî.
4 Mîrîrî yai toꞌ eꞌmenkasaꞌ wanîꞌpî. Tiaronkonya inna taꞌpî Judeuyamîꞌ maimu pîꞌ moropai tiaronkon wanîꞌpî Jesus naipontîꞌsan winîkîi tîweꞌsanon pe.
5 Mîrîrî yeꞌnen Jesus naipontîꞌsan winîkîi tiaronkon eseurîmaꞌpî Judeuyamîꞌ moropai Judeuyamîꞌ pepîn Paulo yuꞌse pra tîwanîkon yeꞌnen. Moropai inkamoro esanon pokonpe îꞌ ankuꞌpai tîweꞌtoꞌkon kupîꞌpî toꞌya. Mîrîrî yeꞌnen taꞌpî toꞌya: —Iwîpaiꞌnîkon awanî sîrîrî tîꞌkon ke —taꞌpî toꞌya.
6 Moropai mîrîrî yekare eta tîuyaꞌnîkon yai Paulo Barnabé epeꞌpî Listra cidaderî pona moropai Derbe cidaderî pona. Mîrîrî wanîꞌpî Licaônia pata po tîweꞌsen pe. Mîrîrî patakon poro toꞌ wîtîꞌpî.
7 Miarî mîrîrî warantî Paapa maimu ekaremekîꞌpî toꞌya.
Listra Cidaderî Po Moropai Derbe Cidaderî Po Itekare Ekaremekî Toꞌya
8 Miarî Listra cidaderî po teerepansaꞌkon yai warayoꞌ eporîꞌpî toꞌya. Maꞌtakî pe eesenpoꞌpî. Teesenpoꞌpî pata pai asakoi pe pra awanîꞌpî. Maasa pra ekeꞌnan pe awanîꞌpî.
9 Mîîkîrîya Paapa maimu ekaremekî Pauloya etaꞌpî. Moropai mîîkîrî eraꞌma tîuya pe Pauloya epuꞌtîꞌpî, innape Paapaya tepiꞌtî kupîꞌpîiya.
10 Mîrîrî yeꞌnen taꞌpîiya ipîꞌ, meruntî ke: —Eꞌmîꞌsaꞌkakî satippe. Asakî taiya pe mîîkîrî warayoꞌ arapumîꞌpî. Moropai aweꞌmîꞌsaꞌkaꞌpî satippe eenaꞌpî. Moropai aasarî piaꞌtîꞌpî.
11 Mîrîrî kupî Pauloya eraꞌma tîuyaꞌnîkon yai arinîkon pemonkonyamîꞌ insamoro entaimepîtîꞌpî tîmaimukon ta. Taꞌpî toꞌya: —Paapayamîꞌ erepansaꞌ man ukoreꞌtaꞌnîkon warayoꞌkon warantî —taꞌpî toꞌya.
12 Mîrîrî yeꞌnen inkamoro eseꞌ ton tîrîꞌpî toꞌya toꞌ kaisarî Júpiter kaiꞌma Barnabé esatîꞌpî toꞌya. Moropai Paulo esatîꞌpî toꞌya, Mercúrio kaiꞌma. Maasa pra teeseurîmasen pe awanîꞌpî.
13 Mîîkîrî Jupiter soosirî wanîꞌpî cidade poro po. Mîrîrî yeꞌnen Jupiter pîꞌ teepîremasenya tîntîrî ton yenepîꞌpî mîrîrî cidade ewontoꞌ pia toꞌ yapurîkonpa. Morî yenepîꞌpîiya yei yariꞌku moropai coroa toꞌ pia tîntîrî ton toꞌ yapurîpa kaiꞌma. Moropai tekînkon anwîpai toꞌ wanîꞌpî teserukon ta Paulo Barnabé yapurîkonpa.
14 Tîîse mîrîrî yekare etasaꞌ tîuyaꞌnîkon yai Paulo Barnabéya teesewankonoꞌmakon pe tîponkon karakapîtîꞌpî. Moropai toꞌ ekaꞌtumîꞌpî kaꞌneꞌ pe arinîkon koreꞌta. Toꞌ entaimeꞌpî meruntî ke.
15 Taꞌpî toꞌya: —Pemonkonyamîꞌ, îꞌ ton pe mîrîrî warantî ikupî yuꞌse awanîkon anna winîkîi. Anna wanî pepîn Paapa warantî, Paapa pe. Tîîse anna wanî amîrîꞌnîkon warantî warayoꞌkon pe —taꞌpî toꞌya. —Tîîse anna wanî sîrîrî tarî akoreꞌtaꞌnîkon Paapa maimu ekaremeꞌtoꞌpe annaya. Inîꞌrî mîrîrî yeꞌka yapurîyaꞌnîkon namai irumakakonpa sîrîrî Paapa maimu ekaremekî annaya apîꞌnîkon —taꞌpî toꞌya. —Tîîse Paapa pia neken ennaꞌpotî. Paapa yapurîtî ipatîkarî tîîkoꞌmansen. Manniꞌ kaꞌ konekaꞌtîpon moropai pata konekaꞌtîpon tuna konekaꞌtîpon tamîꞌnawîron sîrîrî pata po tîîkoꞌmansen Paapa nîkonekaꞌpî. Mîrîrî konekaꞌtîpon pia ennaꞌpotî —taꞌpî toꞌya toꞌ pîꞌ.
16 —Pena Paapaya ikupîꞌpî pemonkonyamîꞌ koꞌmantoꞌpe ituꞌse tîweꞌtoꞌkon yawîrî. Maasa pra tepuꞌtî toꞌya pra awanî yeꞌnen.
17 Mîrîrî tanne Paapaya anîꞌ pe tîwanî ekaremeꞌpîtîꞌpî tîwîrî morî kupî tîuya wenai epuꞌtoꞌpe toꞌya kaiꞌma. Mîîkîrî Paapaya konoꞌ yarima kaꞌ poi. Mîîkîrî Paapaya uyekkarikon emîsaꞌ moꞌka weiyu ton tîrî. Mîîkîrî Paapaya uyekkarikon ton tîrî. Mîîkîrî Paapaya atausinpantoꞌ tîrî uyewankon yaꞌ —taꞌpî toꞌya.
18 Mîrîrî taa tîpo tekînon anwîpai toꞌ koꞌmamîꞌpî inkamoro yapurîpa, mîrîrî namai toꞌ esekaꞌnunka tîîse.
19 Mîrîrî tîpo iipîꞌsan Antioquia cidaderî poi moropai Icônio cidaderî poi inkamoroya arinîkon meruntîtannîpîꞌpî Paulo tarumaꞌtîtoꞌpe toꞌya. Mîrîrî yeꞌnen Paulo paꞌtîpîtî piaꞌtîꞌpî toꞌya tîꞌkon ke. Iworokaꞌpî toꞌya moropai poro pona cidade poi aasaꞌmantasaꞌ kaiꞌma.
20 Tîîse mîîkîrî pia innape Jesus kuꞌnenan emurukuntîꞌpî iwoi. Moropai mîîkîrî eꞌmîꞌsaꞌkaꞌpî inîꞌrî. Inîꞌrî eewomîꞌpî mîrîrî cidade ta. Moropai tiaron wei yai Paulo Barnabé wîtîꞌpî Derbe cidaderî pona.
Antioquia Pona Paulo Barnabé Ennaꞌpo
21 Miarî Derbe cidaderî pona teerepansaꞌkon pe Paapa maimu ekaremekîꞌpî Paulo Barnabéya. Mîrîrî yai tuꞌke innape Jesus kupîꞌpî toꞌya. Mîrîrî tîpo toꞌ ennaꞌpoꞌpî Listra cidaderî pona Icônio cidaderî pona moropai Antioquia Pisídia pata po tîweꞌsen pona.
22 Miarî innape Jesus kuꞌnenan panamaꞌpî toꞌya inîꞌ panpîꞌ meruntî ke innape ikuꞌtoꞌ toꞌya eꞌtoꞌpe toꞌ pîikaꞌtîꞌpî toꞌya. Maasa pra uyesaꞌkon pe Paapa yuꞌse eꞌnî ya, mararî pra eꞌtarumaꞌtîntoꞌ yapîtanîpî eꞌpai awanî kaiꞌma toꞌ yeurîmaꞌpî toꞌya.
23 Mîrîrî tîpo soosi esanon ton menkaꞌpî Jesus naipontîꞌsanya soosikon kaisarî. Inkamoro pona toꞌ epîrema koꞌmannîpîꞌpî tekkarikon tonpai pra esatîꞌpî toꞌya Paapa pîꞌ. Manniꞌ innape toꞌ nîkupîꞌpî pîꞌ esatîꞌpî toꞌya, toꞌ pîikaꞌtîtoꞌpeiya toꞌ meruntîri ton tîîtoꞌpeiya kaiꞌma.
24 Mîrîrî tîpo Paulo Barnabé ennaꞌpoꞌpî Pisídia pata poro toꞌsarî toꞌ wîtîꞌpî Panfília pata pona teerepamîkon pîkîrî.
25 Miarî inkamoroya Paapa maimu ekaremekîꞌpî nîrî Perge po. Mîrîrî tîpo toꞌ wîtîꞌpî Atália peyakî pona toꞌ erepamîꞌpî.
26 Tarîpai inkamoro asaraꞌtîꞌpî mîrîrî Atália peyakî po apoꞌyen yaꞌ tuutîkonpa Antioquia cidaderî pona Síria pata po tîweꞌsen pona. Mîrîrî pata wanîꞌpî pena inkamoro Paulo Barnabé rumaka toꞌya Paapa esenyakaꞌmatoꞌ kuꞌtoꞌpe toꞌya pataꞌpî pe. Morî pe Paapa eꞌtoꞌ wenai mîrîrî teesenyakaꞌmatoꞌkon aretîꞌkasaꞌ toꞌya wanîꞌpî.
27 Mîrîrî yeꞌnen miarî teerepanse tamîꞌnawîronkon pemonkonyamîꞌ muurunkuntîꞌpî toꞌya innape Jesus kuꞌnenan moropai inkamoro pîꞌ îꞌ kupîꞌpî Paapaya ekaremekîꞌpî toꞌya. Inkamoro eseurîmaꞌpî ekaremekîꞌpî toꞌya îꞌ kuꞌsaꞌ Paapaya tîwenaiꞌnîkon. Mîrîrî ekaremekîꞌpî toꞌya. Moropai îꞌ kaiꞌma Paapaya Judeuyamîꞌ pepîn pîikaꞌtîꞌpî, mîrîrî ekaremekîꞌpî toꞌya toꞌ pîꞌ.
28 Mîrîrî tîpo inkamoro Paulo Barnabé koꞌmamîꞌpî kureꞌne miarî innape Jesus kuꞌnenan koreꞌta.
