Jesus Naipontîꞌsan Nîkupîꞌpîkon Yekare Atos 15:1-41
15 Antioquia po tîwanîkon yai tiaronkon Judeuyamîꞌya Judéia poi iipîꞌsanya innape Jesus kuꞌnenan yenupaꞌpî teserukon ta. Taꞌpî toꞌya toꞌ pîꞌ see warantî: —Anîꞌya tîmere piꞌpî pottî yaꞌtîsaꞌ pra awanî ya, aweꞌpîikaꞌtî eserîke pra awanî. Maasa pra Moisésya taꞌpî yawîrî ikupî anîꞌya pra awanî yeꞌnen aweꞌpîikaꞌtî eserîke pra awanî —taapîtîꞌpî toꞌya.
2 Mîrîrî eta tîuyaꞌnîkonya yai Paulo moropai Barnabéya inna taa pra awanîꞌpî. Mîrîrî yeꞌnen inkamoro toꞌ yenupatîponkon pokonpe toꞌ eseurîmaꞌpî. —Mîrîrî yeꞌka pepîn —taꞌpî toꞌya. Tîîse inkamoroya yuuku pra awanîꞌpî. Maasa pra teserukon yawîrî ikupî toꞌya yuꞌse tîwanîkon yeꞌnen. Mîrîrî yeseru koneka tîuyaꞌnîkon pra awanî yeꞌnen innape Jesus kuꞌnenanya Paulo moropai Barnabé moropai tiaronkon innape Jesus kuꞌnenan yarimaꞌpî Jerusalém pona toꞌ wîtîtoꞌpe inîꞌ panpîꞌ mîrîrî yekare epuꞌse toꞌ wîtîtoꞌpe kaiꞌma Jesus naipontîꞌsan pia, moropai soosi esanon pia.
3 Inkamoro eseꞌmaꞌtîꞌpî Antioquia poi. Tuutîkon pe toꞌ wîtîꞌpî Fenícia pata poro, moropai Samaria pata poro. Mîrîrî yai inkamoroya îꞌ kaiꞌma Judeuyamîꞌ pepînya innape Jesus kuꞌsaꞌ ekaremekîꞌpî miarî toꞌ pîꞌ. Mîrîrî yekare eta tîuyaꞌnîkon ya yai toꞌ enaꞌpî kureꞌne taatausinpai mîrîrî pîꞌ.
4 Mîrîrî yai Jerusalém pona toꞌ erepamî yai inkamoro pataꞌseꞌ ton tîrîꞌpî innape Jesus kuꞌnenanya, moropai inaipontîꞌsanya moropai soosi esanonya toꞌ pataꞌseꞌ ton tîrîꞌpî. Inkamoroya mîrîrî pe rî îꞌ kupîꞌpî Paapaya ekaremekîꞌpî tîwenaiꞌnîkon. Judeuyamîꞌ pepînya innape Jesus kupîꞌpî imaimu eta tîuyaꞌnîkon wenai. Mîrîrî ekaremekîꞌpî toꞌya toꞌ pîꞌ.
5 Mîrîrî tanne moro toꞌ wanîꞌpî fariseuyamîꞌ innape Jesus kupîtîponkon. Inkamoroya taꞌpî: —Judeuyamîꞌ pepînya tîmere piꞌpî pottî yaꞌtî toꞌya eꞌpai awanî mîrîrî. Îꞌ kaiꞌma Moisésya taasaꞌ yawîrî ikupî eꞌpai awanî mîrîrî —taꞌpî fariseuyamîꞌya. —Mîrîrî warantî pra toꞌ wanî ya, toꞌ eꞌpîikaꞌtî pepîn —taꞌpî toꞌya.
6 Mîrîrî yeꞌnen inkamoro Jesus naipontîꞌsan, moropai soosi esaꞌ pe tîweꞌsanon pokonpe toꞌ emurukuntîꞌpî, mîrîrî yeseru konekakonpa kaiꞌma.
7 Mîrîrî pîꞌ kureꞌne teeseurîmakon aretîꞌka pe, Pedro eꞌmîꞌsaꞌkaꞌpî moropai taꞌpîiya: —Uyonpayamîꞌ, epuꞌnenan amîrîꞌnîkon morî pe îꞌ kaiꞌma Paapaya umenkaꞌpî akoreꞌtapaiꞌnîkon pena puꞌkuru pra, sîrîrî tîmaimu ekaremeꞌtoꞌpeuya kaiꞌma Judeuyamîꞌ pepîn pîꞌ, mîrîrî Jesus yekare eta tîuyaꞌnîkon yai innape ikuꞌtoꞌpe toꞌya.
8 Aꞌkî, Paapaya tamîꞌnawîronkon yewan epuꞌnenya Morî Yekaton Wannî yarimaꞌpî toꞌ esaꞌ pe aakoꞌmantoꞌpe uurîꞌnîkon pia yarimaꞌpî tîuya warantî. Mîrîrî wenai epuꞌtî pîꞌ uurîꞌnîkon man innape toꞌ eꞌpîikaꞌtîsaꞌ man.
9 Maasa pra imakuiꞌpî toꞌ nîkupîꞌpî moꞌkaꞌpî Paapaya innape tîkupî toꞌya wenai. Mîrîrî warantî nîrî uurîꞌnîkonya innape ikupî yai unkupîꞌpîkon imakuiꞌpî moꞌkaꞌpîiya. Mîrîrî yeꞌnen Paapaya uurîꞌnîkon eraꞌma seꞌ kaisarî, eꞌsentai pra.
10 Tîîse îꞌ waniꞌ awanî yeꞌnen taayaꞌnîkon tiaronkon pîꞌ, “Moisésya taasaꞌ yawîrî eꞌpai awanîkon,” mîrîrî yawîrî pra eꞌnî tanne, mîrîrî yawîrî pra utamokon nurîꞌtîyamîꞌ eꞌsaꞌ tanne. Tîîse îꞌ waniꞌ awanî yeꞌnen tiaronkonya mîrîrî amîiꞌne yarî yuꞌse awanîkon yarî yentainon. Mîrîrî warantî taayaꞌnîkon wenai Paapa ekoreꞌma yuꞌse kaꞌrî awanîkon apîꞌnîkon.
11 Mîrîrî yeꞌka pe pra neken. Maasa pra eꞌpîikaꞌtînsaꞌ epuꞌtî tîꞌnokoꞌpî pe Jesusya uurîꞌnîkon kuꞌsaꞌ wenai. Mîrîrî morî pe Paapa eꞌtoꞌ wenai nîrî inkamoro Judeuyamîꞌ pepîn eꞌpîikaꞌtîsaꞌ man —taꞌpî Pedroya.
12 Tîîse mîrîrî tîpo Pedro eseurîma eta tîuyaꞌnîkon tîpo moo toꞌ wanîꞌpî, inîꞌrî Paulo moropai Barnabé eseurîma etakonpa. Inkamoroya îꞌ kaiꞌma ikupî eserîkan pepîn kupîꞌpî moropai kureꞌnan esenumenkantoꞌ kupîꞌpî Paapaya toꞌ wenai. Mîrîrî ekaremekîꞌpî toꞌya. Judeuyamîꞌ pepîn pîikaꞌtîsaꞌ Paapaya ekaremekîꞌpî toꞌya.
13 Paulo Barnabé eseurîma ataretîꞌka pe, Tiago eꞌmîꞌsaꞌkaꞌpî. Moropai taꞌpîiya: —Uyonpayamîꞌ, maasa eseurîma etatî —taꞌpîiya.
14 —Amenrî Simão eseurîma ataretîꞌka etaꞌnîkon man. Paapaya tiaronkon menkasaꞌ tîmîrî ton pe Judeuyamîꞌ pepîn koreꞌtapai tîpemonkono pe toꞌ eꞌtoꞌpe kaiꞌma. Mîrîrî yeꞌnen epuꞌtîꞌnîkon Judeuyamîꞌ pepîn saꞌnamanen pe Paapa wanî.
15 Pena sîrîrî pîꞌ Paapa maimu ekaremeꞌnenan profetayamîꞌ nurîꞌtî eseurîmaꞌpî. Imenukaꞌpî toꞌya see warantî:
16 Paapaya taꞌpî:“Maasa uuipî kupî sîrîrî Judeuyamîꞌ,Davi payanîꞌsan pîikaꞌtîi.Îꞌ pe pra rî inkamoro wanî,tîîse morî pe toꞌ konekauya kupî sîrîrî,pena toꞌ eꞌsaꞌ warantî.Maasa pra inkamoro esaꞌ tontîrîuya kupî sîrîrî toꞌ yonpa ke rî,inkamoro koꞌmantoꞌpe morî pe.
17 Mîrîrî unkupîꞌpî eraꞌma tîuyaꞌnîkon wenaiuyuwa Judeuyamîꞌ pepînya.Inkamoro wanî unmenkaꞌsan peuurî ton pe toꞌ eꞌtoꞌpe.”
Sîrîrî pîꞌ Paapa eseurîmaꞌpî ikonekatîpon.
18 Îꞌ kaiꞌma ikupî tîuya ekaremekîꞌpîiya pena tîmaimu ekaremeꞌnenan wenai —taꞌpî Tiagoya.
19 —Mîrîrî yeꞌnen uurî esenumenkatoꞌ wanî uurîꞌnîkonya taa eꞌpai pra awanî Moisés maimuya taasaꞌ yawîrî toꞌ koꞌmannîtoꞌpe. Mîrîrî warantî awanî ya, saꞌme awanî Judeuyamîꞌ pepîn pia, innape Jesus kuꞌnenan pia.
20 Uurî esenumenka kaareta anmenukapai awanî sîrîrî toꞌ pia. Taatoꞌ toꞌ pîꞌ, toꞌ yeseru penaroꞌ rumakatoꞌpe toꞌya, miaꞌ ke ikonekasaꞌ pia, toꞌ napurî ton pe toꞌ nîtîrîꞌpî sararu yanî toꞌya namai. Moropai taapai awanî nîrî toꞌ pîꞌ, seꞌ tapairî wîriꞌsanyamîꞌ yarakkîrî toꞌ wanî namai, moropai wîriꞌsanyamîꞌ wanî namai seꞌ tapairî warayoꞌkon yarakkîrî. Taapai awanî nîrî iꞌmî yeꞌpî waikîꞌsaꞌ yanî toꞌya namai mîn epaꞌkasaꞌ pra tîîse. Inîꞌrî imînî yarakkîrî yanî toꞌya namai.
21 Maasa pra mîrîrî warantî toꞌ wanî ya, inkamoro yewanmîrî toꞌ yeseru yairî pra toꞌ wanî yeꞌnen. Maasa pra mîrîrî yekare epuꞌtî Judeuyamîꞌya pena pata pai Moisés maimuya taasaꞌ eta pîꞌ toꞌ koꞌmanpîtî sábado kaisarî toꞌ epereꞌtoꞌ yewîꞌkon ta. Mîrîrî yeꞌnen mîrîrî teserukon rumakatoꞌpe toꞌya —taꞌpî Tiagoya.
Judeuyamîꞌ Pepîn Pia Kaareta Yarima Toꞌya
22 Tiago eseurîmasaꞌ tîpo, Jesus naipontîꞌsanya moropai soosi esanonya, tamîꞌnawîron innape Jesus kuꞌnenan pokonpe siꞌma Antioquia pona kaareta yarîtonkon warayoꞌkon menkaꞌpî, Paulo moropai Barnabé pokonpe attîtonkon. Judas iteseꞌ waikatoi Barsabás, moropai Silas asakîꞌne neken toꞌ menkaꞌpî toꞌya. Insamoro epuꞌtîꞌpî innape Jesus kuꞌnenanya yairî toꞌ yeseru wanî.
23 Inkamoro yaipontîꞌpî toꞌya mîrîrî kaareta yaatoꞌpe toꞌya kaiꞌma. Taꞌpî toꞌya:
Anna Jesus naipontîꞌsan moropai soosi esanonya taa anna wanî ayonpakon pe innape Jesus kupîꞌnîkon wenai. Mîrîrî yeꞌnen anna maimu man amîrîꞌnîkon Judeuyamîꞌ pepîn Antioquia ponkon moropai Síria ponkon moropai Cilícia ponkon pia.
24 Akoreꞌtaꞌnîkon anna yonpayamîꞌ wîtîsaꞌ yai kureꞌne ayewankonoꞌmaꞌpîkon toꞌya epuꞌtî pîꞌ anna man. Inkamoroya îꞌ kaiꞌma ayenupasaꞌkon ya anna maimu pe pra awanî mîrîrî.
25 Mîrîrî yeꞌnen annaya tamîꞌnawîrî siꞌma teesetai insamoro warayoꞌkon yarima sîrîrî aapiaꞌnîkon, uyonpayamîꞌ. Toꞌ wîtî sîrîrî uwakîrikon puꞌkuru uyonpayamîꞌ Paulo, Barnabé pokonpe.
26 Insamoro Paulo Barnabéya itekare ekaremekî pîꞌ toꞌ koꞌmamîꞌpî. Mîrîrî wenai toꞌ anwîpai tiaronkon wanîꞌpî Uyepotorîkon Jesus Cristo yekare ekaremekî toꞌya wenai.
27 Mîrîrî yeꞌnen Judas moropai Silas yarima annaya sîrîrî amîrîꞌnîkon pia ayarakkîrîꞌnîkon toꞌ eseurîmatoꞌpe morî pe sîrîrî kaareta anna nîmenukaꞌpî pîꞌ. Inkamoroya ekaremekî morî pe apîꞌnîkon.
28 Sîrîrî yekare konekaꞌpî Morî Yekaton Wannîya moropai annaya. Inîꞌrî Moisés maimuya taasaꞌ yawîrî awanîkon eꞌpai pra awanî. Maasa pra mîrîrî yawîrî awanîkon ya saꞌme awanî. Tîîse ankupîkon ton ekaremekî annaya epuꞌtîkonpa.
29 Mîrîrî yeꞌnen miaꞌ ke ikonekasaꞌ toꞌ napurî ton pe pia toꞌ nîtîrîꞌpî sararu yanîyaꞌnîkon namai. Moropai iꞌmî yeꞌpî tîwaikkîꞌse iwîsaꞌ yanîyaꞌnîkon namai, imînî yarakkîrî. Moropai imakuiꞌpî kupî pîꞌ eesenumenkakon namai, seꞌ tapairî wîriꞌsanyamîꞌ yarakkîrî awanîkon namai. Moropai wîriꞌsanyamîꞌ wanî namai seꞌ tapairî warayoꞌkon yarakkîrî. Mîrîrî warantî ikupîyaꞌnîkon ya, morî pe awanîkon.
Mîrîrî warantî kaareta menukaꞌpî toꞌya.
30 Mîrîrî tîpo inkamoro Paulo Barnabé moropai Judas Silas eseꞌmaꞌtîꞌpî Antioquia pona. Mîrîrî kaareta yarîꞌpî toꞌya. Miarî teerepansaꞌkon pe innape Jesus kuꞌnenan muurukuntîꞌpî toꞌya moropai mîrîrî kaareta rumakaꞌpî toꞌya toꞌ pia.
31 Moropai mîrîrî kaareta erenkasaꞌ tîuyaꞌnîkon tîpo taatausinpai toꞌ wanîꞌpî. Îꞌ taasaꞌ kaaretaya epuꞌtîꞌpî toꞌya mîrîrî yai. Mîrîrî yeꞌnen kureꞌne toꞌ atausinpaꞌpî.
32 Mîrîrî tîpo Paapa maimu ekaremeꞌnenan Judas, Silas eseurîmaꞌpî. Inkamoroya toꞌ meruntîtannîpîꞌpî inîꞌ panpîꞌ. Mîrîrî yeꞌnen taatausinpai toꞌ wanîꞌpî.
33 Mîrîrî tîpo toꞌ koꞌmamîꞌpî mararî wei kaisarî moropai toꞌ ennaꞌpoꞌpî Jerusalém pona taipontîꞌtîponkon pia. Mîrîrî yeꞌnen toꞌ esekaremekîꞌpî. Moropai inkamoroya taꞌpî: —Inna, morî pe atîtî —taꞌpî toꞌya toꞌ pîꞌ.
34 Tîîse teesekaremekî tîpo eꞌnîmîpai Silas wanîꞌpî. Mîrîrî yeꞌnen aweꞌnîmîꞌpî.
35 Moropai Paulo Barnabé eꞌnîmîꞌpî nîrî Antioquia po. Innape Jesus kuꞌnenan yenupaꞌpî toꞌya. Moropai tiaronkonya nîrî toꞌ yenupaꞌpî Paapa maimu pîꞌ.
Paulo Moropai Barnabé Epantaka
36 Mîrîrî tîpo Pauloya taꞌpî Barnabé pîꞌ: —Ennaꞌponpai awanî sîrîrî uyonpakon innape Jesus kupîtîponoꞌsan yekare etapîꞌse cidadekon poro —taꞌpîiya. —Manniꞌ oꞌnon poro uurîꞌnîkonya itekare ekaremekî neꞌtîkini mîrîrî poro wîtînpai awanî sîrîrî —taꞌpîiya. —Morî pe toꞌ koꞌmamî yekare etai —taꞌpîiya.
37 Mîrîrî yai Barnabéya taꞌpî: —João Marcos yaapai man —taꞌpîiya.
38 Tîîse Pauloya yuukuꞌpî: —Kaane, attî eꞌpai pra man. Maasa pra pena uupiapaiꞌnîkon Panfília pata poi awennaꞌpoꞌpî. Tamîꞌnawîrî uurîꞌnîkon asatoꞌ poro aasaꞌsaꞌ pra wanîꞌpî —taꞌpîiya. Tîîse, —Kaane —taꞌpî Barnabéya. —Attî eꞌpai man. Tîîse yuukuiya pra Paulo wanîꞌpî.
39 Mîrîrî pîꞌ toꞌ eseurîmaꞌpî mîrîrî wenai. Mîrîrî tîpo toꞌ epantakaꞌpî Paulo Barnabé yarakkîrî. Mîrîrî yeꞌnen Barnabéya João Marcos yarîꞌpî tarakkîrî. Toꞌ asaraꞌtîꞌpî apoꞌyen yaꞌ tuutîkonpa Chipre wono pona.
40 Tîîse Pauloya Silas menkaꞌpî tarakkîrî attîtoꞌpe kaiꞌma. Moropai inkamoro pona toꞌ epîremaꞌpî. Taꞌpî toꞌya: —Paapa, morî amîrî. Mîrîrî morî pe aweꞌtoꞌ wenai insanan pîikaꞌtîkî morî pe toꞌ wîtîtoꞌpe —taꞌpî toꞌya. Mîrîrî tîpo toꞌ eseꞌmaꞌtîꞌpî.
41 Mîrîrî yai Paulo Silas wîtîꞌpî toꞌsarî Síria pata poro moropai Celícia pata poro. Inkamoroya mîrîrî warantî innape Jesus kuꞌnenan yausinpaꞌpî mîrîrî yai tuutîsaꞌkon yai, taatausinpai toꞌ koꞌmantoꞌpe kaiꞌma.
