Jesus Naipontîꞌsan Nîkupîꞌpîkon Yekare Atos 17:1-34
17 Inkamoro wîtîꞌpî Anfípolis cidaderî poro moropai Apolônia cidaderî poro. Moropai toꞌ erepamîꞌpî Tessalônica cidaderî pona. Miarî Judeuyamîꞌ epereꞌtoꞌ yewîꞌkon ta toꞌ wîtîꞌpî teserukon ta.
2 Seurîwîꞌne sábado kaisarî toꞌ wîtîpîtîꞌpî. Mîrîrî ya Paapa maimu eꞌmenukasaꞌ pîꞌ pemonkonyamîꞌ yeurîmaꞌpî toꞌya miarî, teserukon yawîrî.
3 Pauloya ekaremeꞌpîtîꞌpî îꞌ kaiꞌma pîikaꞌtîton Paapa nîmenkaꞌpî eꞌtarumaꞌtîpai awanîꞌpî ekaremekîꞌpîiya. Mîrîrî tîpo aasaꞌmantasaꞌ tîpo, Paapaya iꞌmîꞌsaꞌka ekaremekîꞌpîiya nîrî. Mîîkîrî Jesus yekare pîꞌ eeseurîmaꞌpî: —Mîîkîrî Jesus pîikaꞌtîton Paapa narimaꞌpî tauya sîrîrî apîꞌnîkon —taꞌpîiya.
4 Mîrîrî yai Paulo, Silas teurîmakon yai, innape ikupîꞌpî arinîkon pemonkonyamîꞌya. Tiaronkon Judeuyamîꞌya moropai Paapa yapurînenan gregoyamîꞌya moropai arinîkon wîriꞌsanyamîꞌ ipîkkupaꞌ pe tîweꞌsanonya nîrî ikupîꞌpî innape.
5 Tîîse innape ikuꞌnenan pepîn Judeuyamîꞌ inkamoro kinmuwaꞌpî toꞌ winîkîi. Inkamoroya pemonkonyamîꞌ seꞌ tapaironkon rî eseporo rî tîweꞌsanon warayoꞌkon yannoꞌpî. Îꞌ rî see imakuiꞌpî kuꞌtoꞌpe toꞌya Paulo winîkîi. Inkamoroya mararî pra pemonkonyamîꞌ ekoreꞌma emapuꞌtîꞌpî Paulo, Silas winîkîi. Mîrîrî yai toꞌ ekatumîꞌpî Paulo, Silas yuwai Jasom yewîꞌ ta. Mîrîrî yai tîꞌ yenunpîtîꞌpî toꞌya mararî pra Jasom yewîꞌ pona innaꞌta yaꞌmorikkaꞌpî toꞌya tîîse Paulo eporî toꞌya pîn.
6 Mîrîrî yeꞌnen eporî tîuyaꞌnîkon warantî pra Jason worokaꞌpî toꞌya. Yarîꞌpî toꞌya ipîkku pe tîweꞌsen rawîrî, pemonkonyamîꞌ rawîrî. Moropai tiaronkon innape Jesus kuꞌnenan pokonpe toꞌ yarîꞌpî toꞌya. Taꞌpî toꞌya: —Insamoro warayoꞌkon imakuiꞌpî kupî pîꞌ toꞌ wanî sîrîrî cidade po. Ikupîꞌpî toꞌya sinporo tarîpai toꞌ erepansaꞌ tarîwaya imakuiꞌpî kuꞌse —kaiꞌma toꞌ eseurîmaꞌpî.
7 —Inkamoro wanîꞌpî Jasom yewîꞌ ta tîîse îꞌ kaiꞌma yairî ipîkkukon yeseru yawîrî ikupî toꞌya pepîn. Yairî pra toꞌ koꞌmamî —taꞌpî toꞌya. —Tiaron uyesaꞌkon moro man taa pîꞌ toꞌ koꞌmamî, iteseꞌ Jesus —taa toꞌya.
8 Mîrîrî eta tîuyaꞌnîkon ya arinîkon pemonkonyamîꞌ moropai toꞌ esanon wanîꞌpî inîꞌ panpîꞌ îri pe toꞌ winîkîi.
9 Mîrîrî yeꞌnen ipîkkukonya taꞌpî Jason moropai tiaronkon pîꞌ, tîniru yeꞌmatoꞌpe toꞌya kaiꞌma. Mîrîrî tîpo toꞌ rumakaꞌpî toꞌya.
Beréia Cidaderî Pona Paulo, Silas Wîtî
10 Mîrîrî tîpo eewaronpansaꞌ pe tiaronkon innape Jesus kuꞌnenanya Paulo, Silas yarîꞌpî Beréia cidaderî pona. Miarî eerepansaꞌkon yai toꞌ wîtîꞌpî Judeuyamîꞌ epereꞌtoꞌ yewîꞌkon ta.
11 Miarî pemonkonyamîꞌ wanîꞌpî morî pe panpîꞌ Paapa maimu anetapai toꞌ wanîꞌpî Tessalônica ponkon warantî pra. Paapa maimu etaꞌpî toꞌya tîwakîrikon pe. Mîrîrî yeꞌnen wei kaisarî toꞌ esenupaꞌpîtîꞌpî Paapa maimu eꞌmenukasaꞌ pîꞌ, anepuꞌpai tîwanîkon yeꞌnen. Innape Paulo nekaremekîꞌpî wanî anepuꞌpai toꞌ wanîꞌpî kureꞌne.
12 Mîrîrî warantî tuꞌkankon Judeuyamîꞌya innape Jesus kupîꞌpî. Moropai tuꞌke gregoyamîꞌ moropai wîriꞌsanyamîꞌ gregayamîꞌ ipîkkupaꞌkonya innape ikupîꞌpî nîrî.
13 Mîrîrî yai Beréia po Paulo, Silasya Paapa maimu ekaremekî etaꞌpî Tessalônica ponkon Judeuyamîꞌya. Mîrîrî yeꞌnen toꞌ wîtîꞌpî miarî ya toꞌ yekare pîꞌ. Inkamoroya pemonkonyamîꞌ pîꞌ taꞌpî imakuiꞌpî kuꞌtoꞌpe toꞌya toꞌ winîkîi.
14 Mîrîrî yekare eta tîuyaꞌnîkon yai, innape Jesus kuꞌnenanya Paulo yarîꞌpî tuna ena pona apoꞌyen yaꞌ aasaraꞌtoꞌpe tîîse Silas moropai Timóteo eꞌnîmîꞌpî Beréia po.
15 Inkamoro innape Jesus kuꞌnenan morî pe Paulo yarakkîrî tîweꞌsanonya yarîꞌpî Atenas pona. Mîrîrî tîpo inkamoro Paulo pokonpe itîꞌsan ennaꞌpoꞌpî Beréia pona. Inkamoroya Paulo maimu yarîꞌpî Silas moropai Timóteo pia toꞌ yannotoꞌ. Kaꞌneꞌ pe toꞌ wîtîtoꞌpe tepose Atenas pona taꞌpî Pauloya.
Atenas Cidaderî Po Itekare Ekaremekî Toꞌya
16 Silas, Timóteo pokon eerepamî nîmîkî pîꞌ Paulo koꞌmamîꞌpî Atenas po siꞌma. Mîrîrî yai toꞌ napurîkon miaꞌ ke ikonekasaꞌ eraꞌmaꞌpî Pauloya miarî. Mîrîrî pîꞌ eesewankonoꞌmaꞌpî kureꞌne Paapa yapurî toꞌya pra awanî yeꞌnen.
17 Mîrîrî yeꞌnen Judeuyamîꞌ epereꞌtoꞌ yewîꞌ ta eeseurîmaꞌpî Judeuyamîꞌ moropai Judeuyamîꞌ pepîn yarakkîrî, Paapa yapurînenan. Moropai wei kaisarî eeseurîmapîtîꞌpî tamîꞌnawîronkon epereꞌtoꞌ cidade arakkita tîweꞌsen toꞌ pataꞌseꞌ. Miarî arinîkon erepamî. Mîrîrî yeꞌnen Paulo eseurîmapîtîꞌpî toꞌ pokonpe morî pe. Ekaremeꞌpîtîꞌpîiya itekare.
18 Mîrîrî yai yenupatonkon wanîꞌpî tiaronkon pemonkonyamîꞌ, inkamoro wanîꞌpî Epicureuyamîꞌ moropai Estóicoyamîꞌ. Inkamoro eseurîmaꞌpî Paulo yarakkîrî nîrî. Mîrîrî Paulo eseurîmaꞌpî epuꞌtî toꞌya pîn. Mîrîrî yeꞌnen toꞌ esekaranmapoꞌpî. Taꞌpî toꞌya: —Îꞌ see taa yuꞌse mîserî wanî sîrîrî, epuꞌtî pra tîîse? —taꞌpî toꞌya. —Pakko pe kaꞌrî awanî —taꞌpî toꞌya ipîꞌ. Tiaronkonya yuukuꞌpî. Taꞌpî toꞌya: —Paapa anîꞌ nepuꞌtî pepîn pîꞌ eeseurîma mîrîrî —taꞌpî toꞌya. Maasa pra Paulo eseurîmaꞌpî Jesus pîikaꞌtîton pîꞌ. Jesus wanî pîikaꞌtîton pe ekaremekîꞌpîiya. Moropai mîrîrî tîpo Paapaya iꞌmîꞌsaꞌkaꞌpî pîꞌ eeseurîmaꞌpî.
19 Mîrîrî yeꞌnen Paulo yarîꞌpî toꞌya tiaron ipîkkukon eperepî pataꞌseꞌ yaꞌ. Mîrîrî wanîꞌpî Areópago ta. Moropai taꞌpî toꞌya Paulo pîꞌ: —Anepuꞌpai anna man mîrîrî anekaremekîꞌpî kaiꞌma amenan esenupantoꞌ ekaremekî manniꞌ —taꞌpî toꞌya.
20 —Mîrîrî amîrî eseurîma manniꞌ wanî mîrîrî epuꞌtî annaya pra man. Îꞌ pîꞌ eeseurîma? —taꞌpî toꞌya. —Mîrîrî yeꞌnen anetapai anna man —taꞌpî toꞌya.
21 Mîrîrî warantî taꞌpî toꞌya maasa pra tamîꞌnawîronkon wanîꞌpî amenan yekare anetapaino pe. Inkamoro wanîꞌpî Atenas ponkon moropai tiaronkon pata poinokon, moropai miarî tîîkoꞌmansenon pe. Inkamoroya îꞌ rî yekare ekaremeꞌpîtîꞌpî tîwakîrikon pe.
22 Mîrîrî yai Paulo eꞌmîꞌsaꞌkaꞌpî mîrîrî toꞌ pataꞌseꞌ Areópago ta tamîꞌnawîronkon pemonkonyamîꞌ rawîrî. Taꞌpîiya: —Warayoꞌkon, Atenas po tîîkoꞌmansenon, ayeraꞌmakon pîꞌ wai wei kaisarî tamîꞌnawîrî awanîkon miaꞌ ke ikonekasaꞌ yapurînenan pe, yapurîyaꞌnîkon eepîremakon yai.
23 Maasa pra cidade poro uuipî yai, eepereꞌtoꞌkon yewîꞌ pataꞌseꞌkon kaisarî eraꞌma pîꞌ wai tiwin ayekînkon wîîsaꞌyaꞌnîkon yai, poꞌtîꞌyaꞌnîkon yaponseꞌ pîꞌ. Mîrîrî pîꞌ aweꞌmenukasaꞌ eraꞌma pîꞌ wai —taꞌpî Pauloya. —PAAPA ANÎꞌ NEPUꞌTÎ PEPÎN taatoꞌ. Inna, seruꞌ pepîn anîꞌ nepuꞌtîkon pepîn pîꞌ yapurî pîꞌ koꞌmannî pîꞌ naatîi, epuꞌtîiꞌma pra. Mîrîrî yeꞌnen mîîkîrî ekaremekîuya manniꞌ epuꞌtîyaꞌnîkon yuꞌse wai —taꞌpîiya.
24 —Mîîkîrî Paapa wanî pata konekaꞌtîpon pe moropai tamîꞌnawîrî sîrîrî pata po tîîkoꞌmansen konekaꞌtîpon. Mîîkîrî wanî uyepotorîkon pe kaꞌ koꞌmannîꞌnen pe, pata koꞌmannîꞌnen pe. Mîîkîrî Paapa koꞌmamî pepîn warayoꞌkon nîkonekaꞌpî wîttî ta.
25 Mîrîrî yeꞌnen mîîkîrî Paapa wanî pepîn îꞌ koneka yuꞌse tîmîrî ton pe. Maasa pra mîîkîrî Paapaya uurîꞌnîkon koꞌmantoꞌ ton tîrî. Mîîkîrî Paapaya uyettapusinkon ton tîrî. Tamîꞌnawîron tîrîiya uupiaꞌnîkon.
26 Eꞌmaiꞌnon warayoꞌ konekaꞌpîiya mîîkîrî koꞌmantoꞌpe sîrîrî pata po. Mîîkîrî wenai tamîꞌnawîronkon pemonkonyamîꞌ koꞌmantoꞌpe. Maasa pra toꞌ weiyu kuꞌneꞌtîꞌpî Paapaya enen toꞌ koꞌmantoꞌ weiyu. Moropai toꞌ pata ton ekaremekîꞌpî Paapaya tiwin pîꞌ toꞌ koꞌmantoꞌpe tîpatakon ya. Tamîꞌnawîrî ikupîꞌpîiya.
27 Mîîkîrî Paapaya ikupîꞌpî tîwaꞌtoꞌpe kaiꞌma yuwa yai epotoꞌpeꞌnîkon. Maasa pra aminke pra mîîkîrî wanî uurîꞌnîkon pîꞌ tiwin pîꞌ eꞌnî tanne.
28 Îꞌ waniꞌ awanî yeꞌnen maasa pra ipîꞌ koꞌmannî yeꞌnen. Ipîkînsaꞌ koꞌmannî sîrîrî. Manniꞌkan ayonpakon epuꞌnenanya taa manniꞌ warantî. “Uurîꞌnîkon wanî inmukuyamîꞌ pe nîrî” taa toꞌya.
29 Inmuku pe eꞌnî yeꞌnen, îꞌ ton pe miaꞌ ke ikonekasaꞌ anapurîkon ton konekayaꞌnîkon? Mîrîrî warantî eesenumenkakon eꞌpai pra man. Maasa pra Paapa wanî pepîn mîrîrî ouro prata moropai tîꞌ konekasaꞌ warantî.
30 Pena Paapaya tîwî anapurîkon yapurîkonpa ikupîꞌpî, epuꞌtîyaꞌnîkon pra awanîkon yeꞌnen. Maasa pra tepuꞌtîyaꞌnîkon yuꞌse awanî tarîpai. Tîîse sîrîrî pata pai Paapaya tamîꞌnawîronkon pemonkonyamîꞌya imakuiꞌpî tînkupîꞌpîkon rumaka yuꞌse awanî.
31 Maasa pra wei kuꞌneꞌtîsaiꞌya îꞌ pensa pemonkonyamîꞌ imakuiꞌpî rumakaꞌtîponkon pepîn yenumî tîuya weiyu kuꞌneꞌtîꞌpîiya. Mîrîrî kupîiya mîîkîrî tiwin warayoꞌ tînmenkaꞌpî wenai. Mîrîrî epuꞌtî tamîꞌnawîronkonya maasa pra mîîkîrî warayoꞌ saꞌmantasaꞌ pîmîꞌsaꞌkaꞌpî Paapaya. Mîrîrî taꞌpî Pauloya toꞌ pîꞌ.
32 Mîrîrî eta tîuyaꞌnîkon yai Jesus eꞌmîꞌsaꞌkaꞌpî yekare tiaronkon siiraꞌpî ipîꞌ. Tîîse tiaronkonya taꞌpî: —Mîrîrî ekaremekîya eꞌpai man inîꞌ panpîꞌ maasa epuꞌtoꞌpe annaya —taꞌpî toꞌya.
33 Mîrîrî tîpo Paulo wîtîꞌpî miarî pai.
34 Mîrîrî yai tiaronkon warayoꞌkonya innape Jesus kupîꞌpî. Inkamoro koreꞌta warayoꞌ wanîꞌpî Dionísio iteseꞌ. Areópago ponkon koreꞌta tîweꞌsen. Moropai wîriꞌ nîrî iteseꞌ Dâmarisya innape ikupîꞌpî moropai tiaronkon.
