Jesus Naipontîꞌsan Nîkupîꞌpîkon Yekare Atos 18:1-28
18 Mîrîrî tîpo Paulo wîtîꞌpî Atenas cidaderî poi Coríntio cidaderî pona.
2 Miarî Coríntio cidaderî po Judeu wanîꞌpî iteseꞌ Áquila. Mîîkîrî wanîꞌpî Ponto pata po esenpoꞌpî pe. Pena puꞌkuru pra rî erepamîꞌpî pe toꞌ awanîꞌpî Itália poi tînoꞌpî Priscila yarakkîrî. Inkamoro iiꞌsaꞌ wanîꞌpî maasa pra reiyamîꞌ esaꞌ pe tîweꞌsen Cláudioya tamîꞌnawîronkon Judeuyamîꞌ yenpaꞌka yeꞌnen. Epaꞌkaꞌpî pe awanîꞌpî Roma poi.
3 Mîîkîrî eraꞌmapîꞌse Paulo wîtîꞌpî eesenyakaꞌmatoꞌ yaꞌ. Mîrîrî yai Pauloya eraꞌmaꞌpî teesenyakaꞌmatoꞌ kupîiya. Mîrîrî yeꞌnen miarî iipia Paulo esenyakaꞌmaꞌpî tappîikon ton konekapîtî pîꞌ toꞌ esenyakaꞌmaꞌpî.
4 Tîîse sábadokon kaisarî attîpîtîꞌpî Judeuyamîꞌ epereꞌtoꞌ yewîꞌkon ta Paapa maimu ekaremeꞌpîtîꞌpîiya meruntî ke. Maasa pra innape Jesus kupî Judeuyamîꞌya moropai Gregoyamîꞌya yuꞌse Paulo wanîꞌpî.
5 Moropai Silas, Timóteo pokon erepansaꞌ yai Macedônia pata poi mîrîrî yeꞌnen Paulo esenyakaꞌma pra eenaꞌpî inîꞌrî. Tîîse Paapa maimu ekaremekî pîꞌ neken eesenyakaꞌmaꞌpî wei kaisarî. Taapîtîꞌpîiya: —Jesus wanî Paapa nîmenkaꞌpî pe upîikaꞌtînenkon pe —taapîtîꞌpîiya.
6 Tîîse miarîronkon wanîꞌpî ituꞌse pra. Toꞌ ekoreꞌmaꞌpî Paulo pîꞌ ituꞌse pra tîwanîkon yeꞌnen. Mîrîrî yeꞌnen tîpon pîꞌ atapisîꞌpî kutupan tuꞌmaꞌpîiya, moropai taꞌpîiya toꞌ pîꞌ: —Aatakaꞌmasaꞌkon ya aawarîrîꞌnîkon awanîkon wenai. Innape ikupîyaꞌnîkon pra awanîkon wenai aatakaꞌmasaꞌkon. Tîîse uwenai pra —taꞌpîiya toꞌ pîꞌ. —Tarîpai ituꞌse pra awanîkon yeꞌnen uutî sîrîrî Judeuyamîꞌ pepîn pîꞌ Paapa maimu ekaremeꞌse —taꞌpîiya.
7 Mîrîrî warantî toꞌ nîmîꞌpîiya. Paulo wîtîꞌpî Tício yewîꞌ ta. Mîîkîrî koꞌmamîꞌpî miarî. Tício wanîꞌpî tiaron iteseꞌ wanîꞌpî Justo kaiꞌma esatî toꞌya. Mîîkîrî wanîꞌpî Judeu pe pra tîîse Paapa yapurînen pe awanîꞌpî. Mîîkîrî yewîꞌ ta aakoꞌmamîꞌpî. Mîîkîrî yewîꞌ wanîꞌpî Judeuyamîꞌ epereꞌtoꞌ yewîꞌ pia aminke pra tîweꞌsen pe.
8 Miarî Crispo iteseꞌ wanîꞌpî Judeuyamîꞌ epereꞌtoꞌ yewîꞌ esaꞌ pe tîweꞌsen. Mîîkîrîya innape Jesus kupîꞌpî tamîꞌnawîrî tîpemonkonoyamîꞌ pokonpe siꞌma. Moropai tuꞌkankon Coríntio cidaderî ponkonya Paapa maimu etaꞌpî moropai innape ikupîꞌpî toꞌya. Mîrîrî wenai toꞌ esenpatakonaꞌpî.
9 Mîrîrî tîpo tiwinan ewaronoꞌ yaꞌ Paulo weꞌneꞌpîtî warantî Paapa eseurîma etaꞌpîiya. Taꞌpî Paapaya: —Eranneꞌ pe pra eꞌkî. Tîîse itekare ekaremekî pîꞌ akoꞌmankî pemonkonyamîꞌ pîꞌ maasa pra tuꞌke upemonkonoyamîꞌ man tarî sîrîrî cidaderî po —taꞌpî Paapaya.
10 —Maasa pra uurî koꞌmamî aapia. Anîꞌya îꞌ rî imakuiꞌpî kupî eserîke pra awanî aapia wanî tanne —taꞌpîiya. —Eseurîmakî teesetaꞌkai pra.
11 Mîrîrî yeꞌnen Paulo koꞌmamîꞌpî tiwin konoꞌ arakkita pairî kaisarî miarî Paapa maimu ekaremekî pîꞌ toꞌ koreꞌta.
12 Mîrîrî yai pata esaꞌ Cláudioya Gálio tîrîꞌpî pata esaꞌ pe aweꞌtoꞌpe Grécia pata po. Mîrîrî yai Judeuyamîꞌ emurukuntîꞌpî iipia. Inkamoroya Paulo yapisîꞌpî. Mîîkîrî yarîꞌpî toꞌya pata esaꞌ Gálio pia.
13 Taꞌpî toꞌya ipîꞌ: —Aꞌkî mîserî warayoꞌ man pemonkonyamîꞌya Paapa yapurî yuꞌse tîîse uyeserukon yawîrî pra —taꞌpî toꞌya.
14 Mîrîrî yai Paulo eseurîma piaꞌtî tanne, Gálioya taꞌpî Judeuyamîꞌ pîꞌ: —Sîrîrî mîserî warayoꞌya îꞌ kupî epuꞌtîuya pra wai. Pemonkon wîîsaiꞌya pra man tîîse eeseurîma neken wenai enesaꞌyaꞌnîkon uupia.
15 Mîrîrî yeꞌka pîꞌ apîikaꞌtî tîuyaꞌnîkon îꞌ tauya eserîke pra wai. Aawarîrîꞌnîkon ayeserukon ta ikonekayaꞌnîkon mîrîrî —taꞌpîiya toꞌ pîꞌ.
16 Moropai toꞌ yenpaꞌkaꞌpîiya.
17 Tarîpai mîîkîrî Judeuyamîꞌ epereꞌtoꞌ yewîꞌ esaꞌ pe tîweꞌsen mîîkîrî Sóstenes yapisîꞌpî toꞌya moropai iꞌpoꞌpîtîꞌpî toꞌya, mîîkîrî pata esaꞌ Gálio rawîrî siꞌma. Mîîkîrî pîꞌ —Aka saꞌne —taiya pra Gálio wanîꞌpî, eraꞌmapîtîꞌpîiya ipîikaꞌtîiya pra.
Áquila Wîtî Éfeso Cidaderî Pona Tînoꞌpî Yarakkîrî.
18 Mîrîrî yai Paulo koꞌmamîꞌpî tuꞌke wei kaisarî innape Jesus kuꞌnenan pokonpe Coríntio cidaderî po. Mîrîrî tîpo eesekaremekîꞌpî toꞌ pîꞌ. Moropai aasaraꞌtîꞌpî apoꞌyen yaꞌ Síria pona tuutîpa, Áquila moropai Priscila pokonpe. Moropai apoꞌyen yaꞌ taasaraꞌtî rawîrî Cencréia po tîwanî yeꞌka pe Paulo epîremaꞌpî. Eesekaremekîꞌpî Paapa esenyakaꞌmatoꞌ koneka tîuya ekaremekîꞌpîiya. Eeturumakaꞌpî itenyaꞌ. Mîrîrî yeꞌnen tîpuꞌpai siꞌpo yaꞌtîꞌpîiya, mîrîrî ekaremeꞌtoꞌ tîuya.
19 Moropai toꞌ asaraꞌtîꞌpî apoꞌyen yaꞌ. Moropai inkamoro erepamîꞌpî Éfeso cidaderî pona. Moro Áquila Priscila eꞌnîmîꞌpî. Mîrîrî yai Paulo ewomîꞌpî Judeuyamîꞌ epereꞌtoꞌ yewîꞌkon ta. Mîrîrî yai Judeuyamîꞌ yarakkîrî eeseurîmaꞌpî Paapa maimu pîꞌ.
20 Mîrîrî yeꞌnen Paulo koꞌmantoꞌpe taꞌpî toꞌya tîkoreꞌtaꞌnîkon tuꞌke wei kaisarî. Tîîse aakoꞌmamî pra awanîꞌpî. Inna taiya pra awanîꞌpî.
21 Mîîkîrîya taꞌpî tuutî pe: —Ennaꞌpo yuꞌse Paapa wanî ya, ennaꞌpo akoreꞌtaꞌnîkon —taꞌpîiya. Mîrîrî tîpo Paulo asaraꞌtîꞌpî apoꞌyen yaꞌ. Attîꞌpî Éfeso poi.
22 Mîîkîrî wîtîꞌpî Cesaréia pona. Mîîkîrî koꞌmamî pîn apoꞌyen yapai teepaꞌka pe rî attîꞌpî Jerusalém pona. Miarî Jerusalém po innape Jesus kuꞌnenan pîꞌ eesekaremekîꞌpî kaꞌneꞌ pe puꞌkuru moropai attîꞌpî Antioquia Síria pata pon pona.
23 Tîkoꞌman pe puꞌkuru pra tîîkoꞌmamî tîpo miarî, attîꞌpî. Mîîkîrî wîtîꞌpî Galácia pata poro moropai Frígia pata poro. Mîrîrî yai tuutî pe innape Jesus kuꞌnenan meruntîtannîpîꞌpîiya inîꞌ panpîꞌ.
Apoloya Itekare Ekaremekî
24 Éfeso po pra Paulo tîîse tiaron pata poro aasarî tanne Judeu erepamîꞌpî Éfeso cidaderî pona iteseꞌ Apolo. Mîîkîrî wanîꞌpî Alexandria cidaderî po esenpoꞌpî pe. Mîîkîrî wanîꞌpî morî pe itekare ekaremeꞌnen pe. Morî pe Paapa maimu eꞌmenukasaꞌ epuꞌnen pe awanîꞌpî. Mîîkîrî wanî mararî pra Paapa maimu yeseru pîꞌ esenupaꞌpî pe.
25 Mîrîrî yeꞌnen eeseurîmatoꞌ eꞌpîtîꞌpî morî pe taatausinpai yenupaton pe Jesus Cristo yekare pîꞌ. Yairî aweꞌpîtîꞌpî. Tîîse mîîkîrî wanîꞌpî João Batista nekaremekîꞌpî itekare epuꞌnen pe neken awanîꞌpî.
26 Mîîkîrî eseurîma piaꞌtîꞌpî Judeuyamîꞌ epereꞌtoꞌ yewîꞌkon ta meruntî ke. Mîîkîrî eseurîma etaꞌpî Áquila moropai Priscilaya. Mîrîrî yeꞌnen yarîꞌpî toꞌya tewîꞌkon ta. Inîꞌ panpîꞌ Paapa maimu pîꞌ yeurîmakonpa kaiꞌma. Îꞌ kaiꞌma pemonkonyamîꞌ pîikaꞌtî Paapaya pîꞌ yeurîmakonpa kaiꞌma yairî panpîꞌ epuꞌtoꞌpeiya.
27 Mîrîrî tîpo Apolo esenumenka yai tuutî pîꞌ Grécia pata pona. Inarî ton kaareta menukaꞌpî innape Jesus kuꞌnenanya miarîronkon innape Jesus kuꞌnenan pia. Esatîꞌpî toꞌya toꞌ pîꞌ morî pe yapiꞌtoꞌpe toꞌya kaiꞌma tewîꞌkon ta. Mîrîrî kaareta ke toꞌ eseurîmaꞌpî mîrîrî warantî. Miarî teerepansaꞌ yai mararî pra inkamoro innape Jesus kuꞌnenan pîikaꞌtîꞌpîiya, manniꞌkan morî pe tîweꞌtoꞌ wenai Paapa nîpîikaꞌtîꞌsan.
28 Miarî Judeuyamîꞌ eseurîmapîtî yai Apolo wanîꞌpî toꞌ maimu yentai imaimu. Eeseurîmapîtîꞌpî toꞌ yentai, tamîꞌnawîronkon pemonkonyamîꞌya eraꞌma tanne. Mîrîrî yeꞌnen îꞌ taa Judeuyamîꞌya eserîke pra awanîꞌpî maasa pra toꞌ yentai imaimu wanîꞌpî. Eeseurîmapîtîꞌpî Paapa nîmenkaꞌpî wanî pîikaꞌtîton pe ekaremeꞌpîtîꞌpîiya. Jesus wanî Paapa nîmenkaꞌpî pe upîikaꞌtînenkon pe taasaꞌ imaimu eꞌmenukasaꞌya yawîrî ekaremeꞌpîtîꞌpîiya Judeuyamîꞌ pîꞌ miarî.
