Jesus Naipontîꞌsan Nîkupîꞌpîkon Yekare Atos 19:1-41
19 Coríntio cidaderî po Apolo wanî tanne Paulo wîtîꞌpî aꞌmun poro. Mîîkîrî erepamîꞌpî Éfeso cidaderî pona. Miarî innape Jesus kuꞌnenan eporîꞌpîiya. Moropai inkamoro ekaranmapoꞌpî Pauloya.
2 Taꞌpîiya toꞌ pîꞌ: —Morî Yekaton Wannî enaꞌpî ayesaꞌkon pe innape ikupîyaꞌnîkon yai? —taꞌpîiya toꞌ pîꞌ.
Inkamoroya yuukuꞌpî: —Mîîkîrî Morî Yekaton Wannî moro awanî epuꞌtî annaya pra man —taꞌpî toꞌya ipîꞌ.
3 Mîrîrî pîꞌ taꞌpî Pauloya: —Îꞌ yeꞌka kin itekare pîꞌ eesenupaꞌpîkon? Îꞌ yeꞌka itekare pîꞌ inna taꞌpîyaꞌnîkon? —taꞌpîiya. Yuukuꞌpî toꞌya: —João Batista nekaremekîꞌpî, itekare pîꞌ inna taꞌpî annaya. Mîrîrî wenai anna esenpatakonaꞌpî —taꞌpî toꞌya ipîꞌ.
4 Pauloya taꞌpî toꞌ pîꞌ: —Joãoya itekare ekaremeꞌpîtîꞌpî manniꞌkan imakuiꞌpî pe tîweꞌtoꞌkon rumakanenanya irumakatoꞌpe kaiꞌma. Irumakasaꞌ toꞌya tîpo toꞌ esenpatakonatoꞌpe taapîtîꞌpîiya —taꞌpî Pauloya. —Moropai Joãoya nîrî taapîtîꞌpî Judeuyamîꞌ pîꞌ innape ikupî toꞌya eꞌpai awanî. “Manniꞌ uyeꞌmaꞌpî pîꞌ tuiꞌsen tauya manniꞌ”, mîîkîrî epuꞌtî toꞌya yuꞌse awanîꞌpî. Mîîkîrî João yeꞌmaꞌpî pîꞌ tuiꞌsen wanî Jesus pe —taꞌpîiya.
5 Mîrîrî taiya eta tîuyaꞌnîkon yai, inkamoro esenpatakonaꞌpî innape Uyepotorîkon Jesus Cristo kupî tîuyaꞌnîkon wenai.
6 Mîrîrî tîpo Pauloya tenya tîrîꞌpî toꞌ puꞌpai pona moropai eepîremaꞌpî. Mîrîrî pe rî Morî Yekaton Wannî enaꞌpî toꞌ esaꞌ pe. Mîrîrî yeꞌnen inkamoroya tiaronkon maikon kupî piaꞌtîꞌpî. Moropai inkamoroya Paapa maimu ekaremekî piaꞌtîꞌpî.
7 Inkamoro wanîꞌpî asakîꞌne puꞌ pona tîîmoꞌtai yonpa warayoꞌkon.
8 Mîrîrî yai eseurîwîꞌne kapoi kaisarî Paulo wîtîpîtîꞌpî Judeuyamîꞌ epereꞌtoꞌ yewîꞌ ta. Mîîkîrî eseurîmapîtîꞌpî meruntî ke pemonkonyamîꞌ pîꞌ. Eeseurîmapîtîꞌpî Paapa maimu pîꞌ maasa pra tamîꞌnawîronkon esaꞌ pe Paapa wanî epuꞌtî toꞌya yuꞌse tîwanî yeꞌnen.
9 Tîîse tiaronkonya innape ikupî pra awanîꞌpî. Mîrîrî yeꞌnen imakuiꞌpî pe toꞌ eseurîmapîtîꞌpî Uyepotorîkonya uyenupatoꞌkon winîkîi, tamîꞌnawîronkon rawîrî siꞌma. Mîrîrî tîpo Paulo epaꞌkaꞌpî moropai attîꞌpî innape Jesus kuꞌnenan pokonpe. Moropai mîîkîrî eseurîmapîtîꞌpî wei kaisarî pemonkonyamîꞌ yenupanen Tiranoya pemonkonyamîꞌ yenupatoꞌ yewîꞌ ta siꞌma.
10 Mîrîrî kupîꞌpîiya asakîꞌne konoꞌ kaisarî mîrîrî Ásia pata ponkon Judeuyamîꞌ moropai Judeuyamîꞌ pepînya Paapa maimu eta pîkîrî.
Ceva Munkîyamîꞌ Yekare
11 Moropai ikupî eserîkan pepîn kureꞌnan esenumenkantoꞌ kuꞌpîtîꞌpî Paapaya Paulo winîpai.
12 Moropai Paulo puꞌpai yaꞌsan kamisa yaapîtîꞌpî toꞌya priꞌyawonkon pepîn pia. Mîrîrî tappîi toꞌ esepiꞌtîtoꞌpe kaiꞌma. Mîrîrî tîpo oꞌmaꞌkon yarakkîrî tîweꞌsanon pia yarîꞌpî toꞌya nîrî. Inkamoro yapai oꞌmaꞌkon yenpaꞌkaꞌpîiya. Mîrîrî warantî Paapaya Paulo yapurîꞌpî tîmeruntîri ke.
13 19:13,14 Miarî awanîꞌpî teepîremasanon esaꞌ Judeu iteseꞌ Ceva. Mîîkîrî munkîyamîꞌ wanîꞌpî asakîꞌne miaꞌ pona tîîmoꞌtaiꞌnîkon. Inkamoro eꞌpîtîꞌpî piaꞌsanyamîꞌ pe. Inkamoroya pemonkonyamîꞌ yapai oꞌmaꞌkon yenpaꞌka Pauloya Jesus meruntîri ke eraꞌmaꞌpî. Moropai mîrîrî warantî ankuꞌpai toꞌ wanîꞌpî. Inkamoro wîtîꞌpî pemonkonyamîꞌ oꞌmaꞌkon yarakkîronkon koreꞌta. Moropai taꞌpî toꞌya mîîkîrî oꞌmaꞌ pîꞌ: —Pauloya taꞌpî warantî taa annaya. Jesus eseꞌ pîꞌ epaꞌkatî —taꞌpî Ceva munkîyamîꞌya.
14 Eraꞌmakî 19:13
15 Mîrîrî yai yuukuꞌpî tiwinan oꞌmaꞌya. Taꞌpîiya toꞌ pîꞌ: —Jesus epuꞌnen uurî, moropai Paulo epuꞌnen uurî. Tîîse anîꞌkan amîrîꞌnîkon? Amîrîꞌnîkon wanî pepîn Jesus pemonkonoyamîꞌ pe —taꞌpîiya toꞌ pîꞌ.
16 Moropai oꞌmaꞌ yarakkîronya Ceva munkîyamîꞌ paꞌtîpîtîꞌpî. Mîîkîrî wanîꞌpî meruntî ke toꞌ yentai. Moropai toꞌ epeꞌpî wîttî tapai. Toꞌ wanîꞌpî neꞌneꞌ pe puꞌkuru moropai toꞌ pon karakapîꞌsaiꞌya wanîꞌpî.
17 Mîrîrî etaꞌpî tamîꞌnawîronkon Éfeso ponkon pemonkonyamîꞌya, Judeuyamîꞌya moropai Judeuyamîꞌ pepînya. Toꞌ wanîꞌpî eranneꞌ pe kureꞌne. Mîrîrî yeꞌnen taꞌpî toꞌya: —Morî pe Uyepotorîkon Jesus man. Tamîꞌnawîron yentainon pe awanî —taꞌpî tamîꞌnawîronkon pemonkonyamîꞌya.
18 Moropai innape Jesus kupîtîponkon iipî koꞌmannîpîꞌpî Paulo pia. Inkamoro erepamîꞌpî tamîꞌnawîronkon rawîrî. Inkamoroya taꞌpî: —Anna wanîꞌpî piaꞌsanyamîꞌ pe. Tîîse mîrîrî rumaka annaya sîrîrî —taꞌpî toꞌya.
19 Mîrîrî yai yawaꞌwîkon moropai kaaretakon, tarenkon yaponseꞌ enepîꞌpî toꞌya. Moropai mîrîrî arannîpîꞌpî toꞌya tamîꞌnawîronkonya eraꞌma tanne. Epeꞌkeꞌkon pe puꞌkuru kaaretakon taren yaponseꞌ wanîꞌpî, 50.000 prata pun kaisarî.
20 Mîrîrî warantî Paapa meruntîri eraꞌmaꞌpî pemonkonyamîꞌya. Arinîkon enapîtîꞌpî Jesus pemonkono pe. Innape Jesus kupîꞌpî arinîkonya.
Toꞌ Esiyuꞌpîtî Éfeso Po
21 Mîrîrî tîpo Paulo esenumenkaꞌpî tuutî pîꞌ Macedônia pata poro moropai Acaia pata poro moropai Jerusalém pona. Moropai taꞌpîiya: —Jerusalém poi itîîpai wanî Roma pona.
22 Mîrîrî yai Pauloya asakîꞌnankon warayoꞌkon tîpîikaꞌtînenan yarimaꞌpî Macedônia pata pona, Timóteo moropai Erasto. Maasa pra inîꞌ panpîꞌ wei ikoꞌmanpai Paulo wanîꞌpî Ásia pata po.
23 Mîrîrî yai kureꞌnan esiyuꞌpîꞌnîtoꞌ wanîꞌpî Éfeso cidaderî po Uyepotorîkonya uyenupatoꞌkon wenai.
24 Mîrîrî ya warayoꞌ wanîꞌpî Demétrio iteseꞌ. Mîîkîrî wanîꞌpî teesenyakaꞌmasen pe inkeꞌkon prata konekapîtî pîꞌ. Mîrîrî konekapîtîꞌpîiya tînapurîkon wîriꞌ iteseꞌ Diana soosirîkon warantî tîîse simonkokon pe mîrikkî tîweꞌrepapa kaiꞌma. Mîrîrî ke aweꞌrepapîtîꞌpî. Mîrîrî yepeꞌpî yapiꞌpîtîꞌpîiya mararî pra. Moropai yarakkîrî teesenyakaꞌmasanon yeꞌmapîtîꞌpîiya mîrîrî yepeꞌpî ke.
25 Mîîkîrîya inkamoro tîpokon pe teesenyakaꞌmasanon yannoꞌpî. Moropai tiaronkon prata pîꞌ teesenyakaꞌmasanon yannoꞌpîiya. Taꞌpîiya toꞌ pîꞌ: —Uyonpayamîꞌ, epuꞌnenan amîrîꞌnîkon uurîꞌnîkonya kureꞌne esenyakaꞌmannîꞌpî yepeꞌpî yapiꞌse.
26 Tîîse sîrîrî pata pai inîꞌrî yapisî eserîke pra awanî epuꞌtî pîꞌ wai —taꞌpîiya. —Tarîpai sîrîrî pata pai eraꞌmayaꞌnîkon sîrîrî. Moropai etayaꞌnîkon îꞌ kaiꞌma mîserî Paulo eseurîma moropai ikupîiya. Taapîtîiya unapurîkon Diana winîkîi, mîîkîrî warayoꞌkon nîkonekaꞌpî wanî pepîn Paapa pe. Paapa warantî awanî pepîn. Yairon pe awanî pepîn taapîtîiya. Mîrîrî taa tîuya ke pemonkonyamîꞌ raꞌtîsaiꞌya man mararî pra, tarîronkon moropai tamîꞌnawîrî yonpa Ásia pata poronkon. Mîrîrî yeꞌnen inîꞌrî unapurîkon yapurî toꞌya eserîke pra eena pe man. Îꞌ pe pra rî eena pe man —taꞌpîiya.
27 —Mîrîrî warantî awanî ya, uurîꞌnîkon esenyakaꞌmatoꞌ pîinama pemonkonyamîꞌya pepîn. Inîꞌrî yenna toꞌya eserîke pra awanî. Mîrîrî eraꞌma pîꞌ wai —taꞌpîiya. —Mîrîrî neken pepîn tîîse unapurîkon Diana yapurî pemonkonyamîꞌya pepîn inîꞌrî Îꞌ pe pra rî eenasaꞌ yeꞌnen Paulo maimu wenai. Mîrîrî warantî awanî ya, tamîꞌnawîronkon tarîronkonya mîîkîrî yapurî pepîn moropai tiaron pataponkonya yapurî pepîn.
28 Mîrîrî eta tîuyaꞌnîkon yai arinîkon enaꞌpî teekoreꞌmai mararî pra. Inkamoro entaimepîtî piaꞌtîꞌpî. Taꞌpî toꞌya: —Ipîkku pe Diana unapurîkon wanî tiaronkon yentainon kaiꞌma —taꞌpî toꞌya.
29 Mîrîrî toꞌ entaimepîꞌtoꞌ etaꞌpî tamîꞌnawîronkon cidadeponkonya. Inkamoro arinîkonya mîîkîrî Aristarco moropai Gaio, Paulo ponkon pe asarîꞌsan Macedônia ponkon yapisîꞌpî moropai toꞌ worokaꞌpî toꞌya, arinîkon emurukuntîtoꞌ pataꞌseꞌ yaꞌ.
30 Mîrîrî yai arinîkon yarakkîrî eseurîmapai Paulo wanîꞌpî tîîse innape Jesus kuꞌnenanya irumaka pra awanîꞌpî iwî toꞌya namai.
31 Tiaron ipîkku pe tîweꞌsenya Paulo yonpayamîꞌya tîmaimukon yarimaꞌpî Paulo wîtî namai miarî ya arinîkon emurukuntîtoꞌ pataꞌseꞌ yaꞌ.
32 Mîrîrî yai arinîkon wanîꞌpî îꞌ taa tîuyaꞌnîkon epuꞌtî toꞌya pra. Mararî pra toꞌ eseurîmaꞌpî. Tiaronkon eseurîmaꞌpî tiaron pe. Tiaronkonya taꞌpî tiaron pe tîmaimukon epuꞌtî toꞌya pra. Mîrîrî yeꞌnen îꞌ waniꞌ toꞌ wanî epuꞌtî arinîkonya pra awanîꞌpî.
33 Tiaronkon esenumenkaꞌpî: —Yai pra Alexandre wenai kaꞌrî mîrîrî kupî toꞌya kaiꞌma. Maasa pra Alexandre yaasaꞌ toꞌya wanîꞌpî arinîkon rawîrî. Mîîkîrîya tenya ke moo eꞌtî taꞌpî. Maasa pra eseurîmapai awanîꞌpî tîwinîpaino pe pra awanî anekaremeꞌpai awanîꞌpî. Tîîse yuuku toꞌya pra awanîꞌpî.
34 Tîîse Judeu pe awanî epuꞌsaꞌ tîuyaꞌnîkon yai inîꞌ panpîꞌ toꞌ entaimepîtîꞌpî tamîꞌnawîrî. Asakîꞌne hora kaisarî toꞌ entaimepîtîꞌpî. Taꞌpî toꞌya: —Ipîkku pe Diana man, unapurîkon anna Éfesoponkon yepotorî pe kaiꞌma toꞌ entaimepîtîꞌpî.
35 Mîrîrî yai mîrîrî cidade ponkon esaꞌ pe tîweꞌsen wîtîꞌpî toꞌ koreꞌta. Mîîkîrîya toꞌ atîꞌnapannîpî tîuya yuwaꞌpî. Taꞌpîiya: —Warayoꞌkon, Éfesoponkon tamîꞌnawîronkonya epuꞌtî maasa pra mîîkîrî unapurîkon kureꞌnan Diana wanî tarî cidade po uurîꞌnîkon koreꞌta. Mîîkîrî moropai iwarainon ikonekasaꞌ kaꞌ poi enaꞌpî, mîrîrî wanî usoosirîkon ta. Inkamoro koꞌmannîꞌnenan pe eꞌnî.
36 Innape awanî epuꞌtî tamîꞌnawîronkonya. Mîrîrî yeꞌnen moo atîꞌnapanîꞌtî Îꞌ epuꞌtî yeꞌka pe pra teesenumenkai pra morî pe epuꞌtîyaꞌnîkon yuwatî —taꞌpîiya.
37 —Inkamoro warayoꞌkon eneꞌsaꞌyaꞌnîkon. Tîîse îꞌ kuꞌsaꞌ toꞌya pra man soosirîkon winîkîi moropai îꞌ kuꞌsaꞌ toꞌya pra man unapurîkon Diana winîkîi.
38 Tîîse Demétrio moropai ipokonpe teesenyakaꞌmasanon winîkîi îꞌ rî kuꞌsaꞌ toꞌya ya, iweiyu ton imoꞌka eꞌpai man ipîkkukon rawîrî toꞌ yaatoꞌpe. Mîrîrî toꞌpe inkamoro wanî mîrîrî ipîkkukon. Inkamoroya neken ikoneka eꞌpainon.
39 Tîîse anîꞌ moro awanî ya, awinîkîiꞌnîkon mîrîrî koneka eꞌpai man arinîkon pokonpe teepereꞌse uyeserukonya taasaꞌ yawîrî.
40 Mîrîrî warantî eꞌnî ya, uurîꞌnîkon pîꞌ taa Roma esaꞌ pe tîweꞌsenya, îꞌ epuꞌnenan pepîn amîrîꞌnîkon, apemonkonoyamîꞌ koꞌmannîpîyaꞌnîkon pepîn taiya eserîke awanî uurîꞌnîkon pîꞌ. Mîrîrî yeꞌnen îꞌ kaiꞌma ekaremekî eserîke pra awanî ipîꞌ.
41 Mîrîrî taa tîpo mîîkîrîya tamîꞌnawîronkon yaipontîꞌpî toꞌ wîtîtoꞌpe.
