Jesus Naipontîꞌsan Nîkupîꞌpîkon Yekare Atos 2:1-47
2 Judeuyamîꞌ festarî weiyu eseporî yai, iteseꞌ Pentecoste, tamîꞌnawîronkon innape Jesus kuꞌnenan emurukuntîꞌpî tiwinan wîttî ta.
2 Mîrîrî yai toꞌ emurukuntîsaꞌ tanne, kaꞌneꞌ pe kaꞌ winîpainon kureꞌnan aꞌsitun ataꞌseꞌmasaꞌ iipî warainon etaꞌpî innape Jesus kuꞌnenanya. Kureꞌne awanî yeꞌnen mîrîrî wîttî tawonkonya etaꞌpî.
3 Moropai mîrîrî eraꞌmaꞌpî wîttî tawonkonya. Apoꞌ awittasaꞌ yaꞌseꞌmasaꞌ aꞌsitunya warantî innape Jesus kuꞌnenan ekaya. Eesekainunpîtîꞌpî toꞌ kaisarî tiwin pîꞌ toꞌ tîîse, eraꞌmaꞌpî toꞌya.
4 Mîrîrî yai tamîꞌnawîronkon esaꞌ pe Morî Yekaton Wannî enaꞌpî. Moropai toꞌ eseurîma emapuꞌtîꞌpîiya tiaronkon maimukon ta.
5 Inkamoro koreꞌta Jerusalém po Judeuyamîꞌ Paapa yapurînenan wanîꞌpî aminke pai festa pona iipîꞌsan. Tamîꞌnawîrî patakon poinokon wanîꞌpî.
6 Mîrîrî aꞌsitun warainon eta tîuyaꞌnîkon yai, toꞌ emurukuntîꞌpî. Mîrîrî yai innape Jesus kuꞌnenan eseurîma tiaronkon maimukon ta etaꞌpî toꞌya. Tîîse etaꞌpî inkamoro aminke pai iipîꞌsanya tîmaimukon pe awanî. Mîrîrî pîꞌ toꞌ esenumenkaꞌpî kureꞌne.
7 Taꞌpî toꞌya: —Insamoro warayoꞌkon Galiléiaponkon. Aꞌkî umaimukon ta toꞌ eseurîma.
8 Tîîse îꞌ kaiꞌma mîrîrî warantî umaimukon ta toꞌ eseurîma mîrîrî? —taꞌpî toꞌya.
9 2:9-11 —Maasa pra uurîꞌnîkon wanî aminke pai iipîꞌsan pe. Pártia patapaiꞌnîkon pe, Média pata paiꞌnîkon pe, Elão pata paiꞌnîkon pe, Mesopotâmia pata paiꞌnîkon pe, Judéia pata paiꞌnîkon pe, Capadócia pata paiꞌnîkon pe, Ponto pata paiꞌnîkon pe, Ásia pata paiꞌnîkon pe, Frígia pata paiꞌnîkon pe, Panfília pata paiꞌnîkon pe, Egito pata paiꞌnîkon pe, Líbia pata woinîkon nîrî wanî, aminke pra awanî Cirene pîꞌ, Roma poinokon pe, Creta pata paiꞌnîkon pe moropai Arábia pata paiꞌnîkon pe. Judeuyamîꞌ moropai Judeuyamîꞌ pepîn Paapa yapurînenan, tamîꞌnawîrî aminke paiꞌnîkon pe eꞌnî tanne tiwin pîꞌ siꞌma umaimukon eta sîrîrî ukaisarîꞌnîkon. Paapa nîkupîꞌpîkon kureꞌnan pîꞌ umaimukon eta sîrîrî ukaisarîꞌnîkon. Paapa nîkupîꞌpîkon kureꞌnan pîꞌ toꞌ eseurîma mîrîrî umaimukon ta eta sîrîrî —taꞌpî toꞌya.
10 Eraꞌmakî 2:9
11 Eraꞌmakî 2:9
12 Mîrîrî warantî tamîꞌnawîronkon wanîꞌpî kureꞌne teesenumenkai toꞌ winîkîi. Îꞌ eꞌkuꞌsaꞌ epuꞌtî toꞌya pra awanîꞌpî. Toꞌ esekaranmapopîtîꞌpî. —Îꞌ taatoꞌpe see sîrîrî wanî sîrîrî? —kaiꞌma taꞌpî toꞌya.
13 Tîîse moro toꞌ koreꞌta tiaronkon wanîꞌpî toꞌ patakapîtî pîꞌ tîweꞌsanon. Inkamoroya taꞌpî toꞌ pîꞌ: —Aꞌkî, insamoro warayoꞌkon etînsaꞌ mîrîrî. Eꞌtari pe toꞌ wanî mîrîrî —kaiꞌma taꞌpî toꞌya toꞌ winîkîi.
Pedro Eseurîmatoꞌ Toꞌ Pîꞌ
14 Tîîse Pedro eꞌmîꞌsaꞌkaꞌpî tiwin puꞌ pona tîîmoꞌtaiꞌnîkon Jesus naipontîꞌsan pokonpe. Mîîkîrî eseurîmaꞌpî meruntî ke arinîkonya eta tanne. —Uyonpayamîꞌ, Judeuyamîꞌ Jerusalém ponkon moropai tamîꞌnawîronkon amîrîꞌnîkon tarîwaya iipîꞌsan. Maasa eseurîma etatî îꞌ taatoꞌpe mîrîrî wanî ekaremekîuya sîrîrî etatî —taꞌpîiya.
15 —Insamoro warayoꞌkon etînsaꞌ kaiꞌma eesenumenkakon mîrîrî toꞌ pîꞌ —taꞌpîiya. —Tîîse kaane, insamoro wanî maasa îꞌ enîrîtîponkon pepîn insamoro. Penane puꞌkuru anna wanî sîrîrî îꞌ yonpa annaya pra man —taꞌpîiya.
16 —Aꞌkî, pena Paapa maimu ekaremeꞌnen profeta Joel nurîꞌtî nekaremekîꞌpî eraꞌmayaꞌnîkon sîrîrî —taꞌpî Pedroya toꞌ pîꞌ.
17 —Taꞌpî Paapaya: “See warantî ikupîuya kupî sîrîrîtamîꞌnawîron ataretîꞌka rawîrî,” taꞌpî Paapaya.“Morî Yekaton Wannî yarimauya kupî sîrîrîtamîꞌnawîronkon esaꞌ pe, aakoꞌmantoꞌ pe.Mîîkîrî Morî Yekaton Wannî wenai,toꞌ eseurîma kupî sîrîrî uyekare pîꞌ.Moropai anmukukon pia nîrî yarimauyamoropai ayensitonon pia nîrî yarimauya.Inkamoro eseurîma kupî sîrîrî mîîkîrî wenai umaimu pîꞌ”, taꞌpî Paapaya.“Maasaronkon weꞌneꞌpîtî warantîyairon epuꞌtî toꞌya kupî sîrîrîtîneraꞌmaꞌpîkon pepîn.Aꞌyekeꞌtonon weꞌneꞌpîtî tîwetun yaꞌmîrîrî epuꞌtî toꞌya kupî sîrîrî.Mîrîrî wenai toꞌ eseurîma kupî sîrîrî.
18 Moropai manniꞌkan upoitîrî pe tîweꞌsanon,inkamoro pia nîrî Morî Yekaton Wannî yarimauya kupî nîrî sîrîrî.Inkamoro eseurîma kupî nîrî sîrîrî uyekare pîꞌ,tamîꞌnawîronkon pîꞌ ekaremekî toꞌya.
19 Moropai teeseraꞌmasen kupîuya kupî sîrîrîaneraꞌmakon ton kaꞌ pîꞌ.Moropai teeseraꞌmasen kupîuya kupî sîrîrî non po,Mîrîrî wanî kupî sîrîrî mîn warantî.Moropai apoꞌ warantîmoropai wereꞌtî warantî kureꞌne eraꞌmayaꞌnîkon,
20 Moropai teeseraꞌmasen kupîuya inîꞌrî kaꞌ pîꞌwei ena kupî sîrîrî ewaron pe,moropai kapoi ena kupî sîrîrî mîn warantî,Mîrîrî eꞌkupî kupî sîrîrîmanniꞌ ipîkku weiyu eseporî rawîrî,uuipî rawîrî tamîꞌnawîron yaretîꞌkai.
21 Mîrîrî yai tîwenpenatasen awanî ya,taawon wanî ya,Paapa, upîikaꞌtîkî.Paapa, aapia ikoꞌmanpai waitaawon wanî ya, mîîkîrî pîikaꞌtîuya”, taꞌpî Paapaya
taꞌpî mîîkîrî profeta Joel nurîꞌtîya pena —taꞌpî Pedroya.
22 Mîrîrî pîꞌ Pedro eseurîma koꞌmannîpîꞌpî. Taꞌpîiya: —Warayoꞌkon, amîrîꞌnîkon Israel pemonkonoyamîꞌ, eseurîma Jesus Nazaré poinon yekare pîꞌ etatî —taꞌpîiya. —Mîîkîrî Paapa naipontîꞌpî eraꞌmaꞌpîyaꞌnîkon. Îꞌ ikupî eserîkan pepîn kupîiya wenai, kureꞌnan teeseraꞌmasen pepîn kupîiya wenai, Paapa winîpaino pe awanî epuꞌtîꞌpîyaꞌnîkon ukoreꞌtaꞌnîkon tîwanî yai.
23 Mîîkîrî rumakaꞌpîyaꞌnîkon imakuiꞌsan warayoꞌkon yenyaꞌ. Inkamoroya ipokapîtîꞌpî pakîꞌnan pona. Mîrîrî warantî amîrîꞌnîkonya iwîꞌpî ituꞌse Paapa eꞌtoꞌ yawîrî. Pena mîrîrî kupîyaꞌnîkon rawîrî Paapaya epuꞌtîꞌpî.
24 Moropai Paapaya mîîkîrî Jesus pîmîꞌsaꞌkaꞌpî. Aweꞌtarumaꞌtîtoꞌ yapai imoꞌkaꞌpîiya. Saꞌmantantoꞌ yentai ikupîꞌpîiya, maasa pra isaꞌmantaꞌsan koreꞌta aakoꞌmamî eserîke pra awanîꞌpî.
25 Mîrîrî pîꞌ utamokon Davi nurîꞌtî eseurîmaꞌpî pena. Mîîkîrî Jesus pîꞌ taꞌpîiya:Uyepotorî eraꞌma pîꞌ uukoꞌmamî aminke pra uupia,maasa pra mîîkîrî wanî umeruntîri winî.Mîrîrî yeꞌnen uurî wanî pepîn eranneꞌ pemaasa pra uupia aakoꞌmamî yeꞌnen.
26 Mîrîrî yeꞌnen taatausinpaiuyewan wanî sîrîrî,umaimu wanî kureꞌne atausinpaꞌpî maimu pe.Tîîse uurî wanî tîîsaꞌmantasen petîîse eranneꞌ pe pra uukoꞌmamî uusaꞌmantatoꞌ pîꞌ,
27 Maasa pra uurî saꞌmanta yaiuukoꞌmamî pepîn non yoꞌkoi isaꞌmantaꞌsan koreꞌta.Urumakaya pepîn.Moropai apoitîrî imakuiꞌpî ton pînsaꞌmantasaꞌ koꞌmamî pepîn,itesaꞌrîꞌpî kata pepîn,iꞌmîꞌsaꞌkaya kupî yeꞌnen.Mîrîrî nîmîkî pîꞌ uukoꞌmamî,
28 Uyepotorî, mîrîrî yairon epuꞌtouꞌya ton keuyenupaꞌpîya ipatîkaron uukoꞌmantoꞌ ton epotoꞌpe.Mîrîrî yeꞌnen taatausinpai puꞌkuru uurî wanî sîrîrî.Maasa pra uupia aakoꞌmamî yeꞌnen,
taꞌpî Davi nurîꞌtîya —taꞌpî Pedroya.
29 Moropai Pedro eseurîma koꞌmannîpî. Taꞌpîiya: —Uyonpayamîꞌ, maasa eseurîma etapaiꞌnîkon, penaron manniꞌ utamokon Davi nurîꞌtî yekare pîꞌ. Mîîkîrî koꞌmanpîtîꞌpî tamîꞌnawîronkon esaꞌ pe pena. Tîîse aasaꞌmantaꞌpî. Mîrîrî tîpo yuꞌnaꞌtîꞌpî toꞌya, mîîkîrî uruwasi man uurîꞌnîkon koreꞌta.
30 Mîîkîrî eꞌpîtîꞌpî Paapa maimu ekaremeꞌnen pe. Mîrîrî yeꞌnen epuꞌtîꞌpîiya, îꞌ taasaꞌ Paapaya innaꞌpoka tîuya pata pe pra. Mîîkîrî payanyamîꞌ rîꞌsan koreꞌta Paapaya ipîkku pata esaꞌ ton yarima tîuya, ekaremekîꞌpî Davi nurîꞌtî wanîꞌpî warantî aweꞌtoꞌpe.
31 2:31,32 —Moropai epuꞌtîꞌpîiya îꞌ kupî Paapaya. Mîrîrî yeꞌnen eeseurîmaꞌpî Cristo pîmîꞌsaꞌkatoꞌ Paapaya pîꞌ. Taꞌpîiya see warantî: “Mîîkîrî saꞌmanta tîpo isaꞌmantaꞌsan koreꞌta aakoꞌmamî pepîn Mîrîrî yeꞌnen itesaꞌrîꞌpî kata pepîn”, taa Davi nurîꞌtîya manniꞌ Jesus pîmîꞌsaꞌkatoꞌ Paapaya pîꞌ.
32 Eraꞌmakî 2:31
33 Mîrîrî kupîꞌpîiya. Mîîkîrî eꞌmîꞌsaꞌkasaꞌ eraꞌmaꞌpî annaya. Iꞌmîꞌsaꞌkasaiꞌya tîpo, Paapaya yarîꞌpî kaꞌ pona. Taꞌpîiya ipîꞌ: “Umeruntîri winîkîi ereutakî,” taꞌpîiya. Moropai Morî Yekaton Wannî yarima pîꞌ man, yarima tîuya taꞌpî tîuya yawîrî. Mîîkîrî erepansaꞌ sîrîrî anna esaꞌ pe. Mîîkîrî wenai eseurîma sîrîrî amîrîꞌnîkon maimu ta. Mîrîrî eraꞌmayaꞌnîkon sîrîrî, etayaꞌnîkon sîrîrî.
34 2:34,35 Davi eseurîmasaꞌ pra man tîpîꞌ maasa pra mîîkîrî enuꞌsaꞌ pra man kaꞌ pona tesaꞌ yarakkîrî. Tîîse eeseurîmaꞌpî Cristo enukuꞌpî pîꞌ. Taꞌpîiya see warantî:“Paapaya taꞌpî Uyepotorî pîꞌ:‘Umeruntîri winîkîi ereutakîmaasa ayeyatonon yentai akupîuya pîkîrî,’ taꞌpîiya”
taꞌpî Davi nurîꞌtîya.
35 Eraꞌmakî 2:34
36 Mîîkîrî manniꞌ anwîꞌpîkon antarumaꞌtîꞌpîkon pîmîꞌsaꞌka Paapaya yai ikupîꞌpîiya kureꞌne Uyepotorîkon pe, tînmenkaꞌpî pe. Tamîꞌnawîronkon Judeuyamîꞌ, mîrîrî epuꞌtîyaꞌnîkon eꞌpai awanî —taꞌpî Pedroya toꞌ pîꞌ.
37 Mîrîrî eta tîuyaꞌnîkon pîꞌ yairî maꞌre toꞌ enaꞌpî kureꞌne toꞌ esewankonoꞌmaꞌpî. Moropai taꞌpî toꞌya Pedro pîꞌ moropai tiaronkon Jesus naipontîꞌsan pîꞌ: —Uyonpayamîꞌ, îꞌ kupî annaya eꞌpainon? Mîrîrî warantî Paapaya anna tarumaꞌtî namai kaiꞌma.
38 Mîrîrî yuukuꞌpî Pedroya: —Enpenatatî imakuiꞌpî ankupîꞌpîkon pîꞌ moropai irumakatî tamîꞌnawîrî Paapaya tîwanmîra ikuꞌtoꞌpe. Mîrîrî tîpo esenpatakonatî innape Jesus kupîyaꞌnîkon wenai. Tamîꞌnawîrî tîwanmîra ikuꞌsaꞌ tîuya tîpo Paapaya Morî Yekaton Wannî yarima ayesaꞌkon pe —taꞌpî Pedroya toꞌ pîꞌ.
39 —Maasa pra mîrîrî pîꞌ Paapa eseurîmaꞌpî pena Morî Yekaton Wannî yarima tîuya pîꞌ, amîrîꞌnîkon pia moropai anmukukon pia yarima tîuya moropai tamîꞌnawîronkon aminkankon pia yarima tîuya manniꞌkan tînmenkakon pia yarima tîuya —taꞌpîiya.
40 Mîrîrî warantî Pedroya toꞌ panamaꞌpî, toꞌ tekaꞌnunkai. Taꞌpîiya toꞌ pîꞌ: —Epaꞌkatî imakuiꞌpî kupî pîꞌ tîweꞌsanon koreꞌta pai. Maasa pra inkamoro tarumaꞌtî Paapaya yai, atarumaꞌtîiyaꞌnîkon namai aweꞌpîikaꞌtîtoꞌkon yuwatî —taꞌpî Pedroya.
41 Mîrîrî tîpo innape Pedro maimu kupî tîuyaꞌnîkon yeꞌnen toꞌ esenpatakonaꞌpî. Toꞌ wanîꞌpî 3.000 kaisarî yonpa. Mîrîrî tîpo innape Jesus kuꞌnenan pokonpe toꞌ emurukuntîpîtîꞌpî.
42 Mîrîrî yai Paapa maimu ke toꞌ yenupaꞌpî Jesus naipontîꞌsanya. Tekkarikon yonpa tîuyaꞌnîkon yai tîmurukun pe toꞌ eꞌpîtîꞌpî. Moropai teepîremakon yai tîmurukun pe toꞌ eꞌpîtîꞌpî. Mîrîrî warantî toꞌ koꞌmamîꞌpî innape Jesus kupî tîuyaꞌnîkon yeꞌnen.
Innape Jesus Kuꞌnenan Yeseru
43 Mîrîrî yai Jesus naipontîꞌsanya îꞌ ikupî eserîkan pepîn kuꞌpîtîꞌpî. Esenumenkantoꞌ kureꞌnan kuꞌpîtîꞌpî toꞌya. Mîrîrî kuꞌpîtî toꞌya wenai, tuꞌkankon pemonkonyamîꞌ esenumenkaꞌpî. Mîrîrî eraꞌma tîuyaꞌnîkon wenai tamîꞌnawîronkonya toꞌ namaꞌpî.
44 Moropai tamîꞌnawîronkon innape Jesus kuꞌnenan koꞌmamîꞌpî tîmurukun pe. Moropai îꞌ itesaꞌ pe tîweꞌtoꞌkon mîrîrî tîrataikai toꞌ wanîꞌpî seꞌ kaisarî.
45 Inkamoro eꞌrepaꞌpî temannekon ke, tînmîrikon ke. Mîrîrî yepeꞌpî yapiꞌsaꞌ tîuyaꞌnîkon yai, mîrîrî yarataikaꞌpî toꞌya ituꞌse tiaronkon eꞌtoꞌ kaisarî. Mîrîrî kupîꞌpî toꞌya tîwakîrikon pe, mîî pe pra.
46 Moropai wei kaisarî toꞌ emurukuntîpîtîꞌpî Judeuyamîꞌ epîrematoꞌ yewîꞌ ta. Moropai tewîꞌkon kaisarî tekkarikon yonpapîtîꞌpî toꞌya tîwakîrikon pe, taatausinpai, eꞌsentai pra.
47 Inkamoroya Paapa yapurîpîtîꞌpî tamîꞌnawîron pîꞌ. Mîrîrî toꞌ yeseru wenai, tiaronkon pemonkonyamîꞌya tîwakîrikon pe toꞌ eraꞌmaꞌpî. Mîrîrî yeꞌnen wei kaisarî Paapa yapurînenan epamîꞌpî. Maasa pra Uyepotorîkonya mîrîrî warantî ikupîꞌpî, mîrîrî warantî innape tîkuꞌnenan eꞌpîikaꞌtîtoꞌpe kaiꞌma. Mîrîrî warantî arinîke toꞌ enaꞌpî.
