Jesus Naipontîꞌsan Nîkupîꞌpîkon Yekare Atos 21:1-40
21 Mîrîrî tîpo anna esekaremekîꞌpî toꞌ pîꞌ moropai anna asaraꞌtîꞌpî apoꞌyen yaꞌ anna wîtîtoꞌpe toꞌsarî Cós wono rî pîkîrî. Moropai anna erepamîꞌpî tiaron wei yai Rodes peyakî pona. Moropai miarî pai anna wîtîꞌpî Pátara cidaderî pona anna erepamîꞌpî.
2 Moropai anna epaꞌkaꞌpî apoꞌyen yapai. Tiaron apoꞌyen eporîꞌpî annaya tuutîsen Fenícia pona. Mîrîrî yaꞌ anna asaraꞌtîꞌpî. Anna wîtîꞌpî. Moropai anna erepamîꞌpî Chipre wono pia.
3 Tîwîrî anna wîtîꞌpî Chipre poi winî pîꞌ meruntî winî Síria winîkîi. Moropai anna erepansaꞌ pe Tiro cidaderî pona, moro anna autîꞌpî, maasa pra apoꞌyen yapai îꞌ kon rî moꞌkatoꞌ toꞌya wanîꞌpî mîîtoꞌpe.
4 Miarî tiaronkon innape Jesus kuꞌnenan eporîꞌpî annaya. Inkamoro pokonpe anna koꞌmamîꞌpî tiwin semana kaisarî. Inkamoroya taa koꞌmannîpîꞌpî Morî Yekaton Wannîya taasaꞌ wenai Paulo wîtî namai Jerusalém pona.
5 Tîîse anna wîtîtoꞌ weiyu eseposaꞌ yai anna eseꞌmaꞌtîꞌpî. Moropai inkamoro innape Jesus kuꞌnenan wîtîꞌpî tînoꞌpîkon yarakkîrî tînmukukon pokonpe anna pîkîrî. Aminke cidade poi inkamoro pokonpe anna wanîꞌpî. Miarî anna eꞌsekunkaꞌpî kasapan po moropai anna epîremaꞌpî.
6 Mîrîrî tîpo anna esekaremekîꞌpî toꞌ pîꞌ. Anna wîtîꞌpî apoꞌyen ya. Anna wîtî tanne inkamoro ennaꞌpoꞌpî tewîꞌkon ta.
7 Mîrîrî tîpo anna wîtîꞌpî Tiro cidaderî poi anna erepamîꞌpî Ptolemaida pona. Miarî innape Jesus kuꞌnenan eporîꞌpî annaya. Moropai toꞌ pîꞌ anna esekaremekîꞌpî. Inkamoro koreꞌta tiwin wei yuwaꞌkaꞌpî annaya.
8 Erenmaꞌsaꞌ pe anna eseꞌmaꞌtîꞌpî miarî pai moropai anna erepamîꞌpî Cesaréia pona. Miarî innape Jesus kuꞌnenan ton pe pemonkonyamîꞌ ena emapuꞌtînen wanîꞌpî iteseꞌ Filipe. Mîîkîrî yewîꞌ ta anna ewomîꞌpî. Moro anna koꞌmamîꞌpî. Mîîkîrî Filipe wanîꞌpî manniꞌkan asakîꞌne miaꞌ pona tîîmoꞌtaiꞌnîkon (7) inmenkasaꞌkon Jerusalém po yonpa pe.
9 Mîîkîrî munkîyamîꞌ wanîꞌpî saakîrîrî wîriꞌsanyamîꞌ inyo pînon. Inkamoroya Paapa maimu ekaremeꞌpîtîꞌpî. Îꞌ aweꞌkupî kupî pîꞌ ekaremeꞌnenan pe toꞌ wanîꞌpî.
10 Tiaron pensa anna erepansaꞌ tîpo Paapa maimu ekaremeꞌnen erepansaꞌ wanîꞌpî Judéia pata poi iteseꞌ Ágabo.
11 Mîîkîrî iipîꞌpî anna pia. Moropai Paulo woromî yapisîꞌpîiya. Mîîkîrîya tenya yewaꞌtîpîtîꞌpî moropai tîꞌpu. Moropai taꞌpîiya: —Sîrîrî wanî Morî Yekaton Wannî nekaremekîꞌpî pe. See warantî seeniꞌ woromî ton esaꞌ yewaꞌtî Judeuyamîꞌya kupî sîrîrî Jerusalém po. Mîîkîrî rumaka toꞌya kupî sîrîrî Judeuyamîꞌ pepîn yenya —taꞌpîiya.
12 Mîrîrî eta annaya yai tiaronkon innape Jesus kuꞌnenan pokonpe siꞌma Paulo yekaꞌnunkaꞌpî annaya attî namai Jerusalém pona.
13 Tîîse Pauloya yuukuꞌpî: —Îꞌ pîꞌ see akaraukon mîrîrî? Yairî maꞌre ukupî pîꞌ natîi —taꞌpîiya. Moropai taꞌpîiya: —Uurî wanî sîrîrî uyaironpîꞌtoꞌ pîꞌ neken eranneꞌ pe pra wai moropai Jerusalém po uwî toꞌya pîꞌ eranneꞌ pe wanî pepîn sîrîrî. Uyepotorî Jesus wenai eranneꞌ pe pra wai eturumakasaꞌ sîrîrî —taꞌpîiya.
14 Iwatî annaya eserîke pra awanîꞌpî. Mîrîrî yeꞌnen irumakaꞌpî annaya. Mîrîrî yeꞌnen taꞌpî annaya ipîꞌ: —Moriya ituꞌse Paapa eꞌtoꞌ kuꞌkî —taꞌpî annaya.
15 Mîrîrî tîpo anna yemanne konekaꞌpî annaya. Moropai anna wîtîꞌpî Jerusalém pona.
16 Anna wîtî yai Cesaréia poi tiaronkon innape Jesus kuꞌnenan wîtîꞌpî anna pokonpe. Inkamoroya anna yarîꞌpî wîttî ta anna eꞌtoꞌ ton ta. Mnasom yewîꞌ ta, Chipre wono poinon pe tîweꞌsen. Pena pata painon innape Jesus kuꞌnen pe awanîꞌpî. Mîîkîrî yewîꞌ ta anna koꞌmamîꞌpî.
Paulo Erepamî Jerusalém Pona
17 Jerusalém pona anna erepansaꞌ yai innape Jesus kuꞌnenanya anna yapisîꞌpî tîwakîrikon pe taatausinpai.
18 Erenmaꞌsaꞌ pe Paulo wîtîꞌpî anna pokonpe soosi esaꞌ Tiago yarakkîrî teeseporîpa kaiꞌma. Mîrîrî yai tamîꞌnawîronkon inkamoro soosi esanon emurukuntîsaꞌ wanîꞌpî miarî.
19 Moropai inkamoro pîꞌ Paulo esekaremekîꞌpî. Moropai tamîꞌnawîrî taasarîꞌpî pîꞌ Paulo eseurîmaꞌpî îꞌ kaiꞌma Paapaya Judeuyamîꞌ pepîn pîikaꞌtîꞌpî ekaremekîꞌpîiya toꞌ pîꞌ.
20 Mîrîrî yekare eta tîuyaꞌnîkon ya inkamoro emurukuntîꞌsan soosi esanonya taꞌpî: —Morî pe man, Paapa —taꞌpî toꞌya. Moropai taꞌpî toꞌya Paulo pîꞌ: —Morî pe eraꞌmakî maasa uyakon tarî tuꞌke ikuꞌneꞌtî yentai Judeuyamîꞌ man innape Jesus kuꞌnenan pe. Tîîse inkamoro wanî mîrîrî mîrîrî warantî siꞌma teserukon kupî toꞌya mîrîrî kureꞌne. Moisés kaaretarîya taasaꞌ yawîrî toꞌ koꞌmamî.
21 Inkamoroya etasaꞌ îꞌ kaiꞌma Judeuyamîꞌ yenupasaꞌya tiaron pata po tîweꞌsanon, teserukon rumakatoꞌpe toꞌya kaiꞌma. Moropai toꞌ yenupasaꞌya teserukon tînmukukon mere piꞌpî pottî yaꞌtî toꞌya namai, Judeuyamîꞌ yeserukon kupî toꞌya namai.
22 Inkamoroya innape amîrî erepansaꞌ epuꞌtî sîrîrî tarî. Mîrîrî yeꞌnen îꞌ see kupî eꞌpainon?
23 Morî pe awanî eꞌpainon amîrîya ikupîya see warantî maasa pra tarî toꞌ man uurîꞌnîkon koreꞌta asakîrîronkon warayoꞌkon. Inkamoroya îꞌ kupî Paapa ton pe taꞌpî tîuyaꞌnîkon kupî.
24 Mîrîrî yeꞌnen atîkî toꞌ pokonpe îꞌ taasaꞌ Moisés nurîꞌtîya yenupantoꞌ yawîrî kupîkonpa, yairî Paapa yapurîkonpa kaiꞌma. Moropai toꞌ nîtîrî ton pe carneiroyamîꞌ yeꞌmata Paapa yapurîtoꞌpe toꞌya, moropai tîpuꞌpaikon siꞌpo yaꞌtîtoꞌpe toꞌya nîrî. Mîrîrî warantî ikupîya ya, tamîꞌnawîronkonya epuꞌtî, awinîkîi toꞌ eseurîmatoꞌ wanî seruꞌyeꞌ pe kaiꞌma. Yairî aakoꞌmamî Moisés kaaretarîya taasaꞌ yawîrî epuꞌtî toꞌya.
25 Tîîse Judeuyamîꞌ pepîn pîꞌ innape Jesus kuꞌnenan pia kaareta yarimaꞌpî uurîꞌnîkonya. Toꞌ pîꞌ taatoꞌ see warantî: “Paaka sararuri kîsantî miaꞌ ke ikonekasaꞌ pia toꞌ nîtîrîꞌpî tînapurîkon pe. Moropai imînîrîꞌpî kîsantî. Moropai inîꞌrî iꞌmî yeꞌpî tîwaikkîꞌse iwîsaꞌ kîsantî. Moropai taꞌpî seꞌ tapairî warayoꞌkon wanî namai wîriꞌsanyamîꞌ yarakkîrî. Moropai wîriꞌsanyamîꞌ wanî namai seꞌ tapairî warayoꞌkon yarakkîrî” mîrîrî warantî Judeuyamîꞌ pepîn pîꞌ taꞌpî uurîꞌnîkonya —taꞌpî toꞌya.
26 Mîrîrî yeꞌnen eerenmaꞌsaꞌ pe inkamoro asakîrîronkon yarakkîrî Paulo wîtîꞌpî Moisés nurîꞌtîya yenupantoꞌ yawîrî kupîkonpa. Moropai teepîremasanon pia toꞌ wîtîꞌpî epîremantoꞌ yewîꞌ ta, ekaremeꞌse paaka toꞌ nîpoꞌtî ton yeꞌma tîuya taꞌpî Pauloya. Morî pe toꞌ enatoꞌpe Paapa winîkîi kaiꞌma. Moropai iweiyu ton moꞌkaꞌpî toꞌya tekînkon poꞌtî tîuyaꞌnîkon weiyu ton. Mîrîrî warantî ikupîꞌpî toꞌya Moisés kaaretarîya taasaꞌ yawîrî.
Paulo Yapisî Toꞌya
27 Asakîꞌne miaꞌ pona tîîmoꞌtaiꞌno wei ataretîꞌka koꞌmannîpî tanne tiaronkon Judeuyamîꞌ Ásia patapoinîkonya Paulo eraꞌmaꞌpî epîremantoꞌ yewîꞌ ta. Inkamoroya arinîkon Judeuyamîꞌ yausinpaꞌpî inîꞌ panpîꞌ Paulo winîkîi toꞌ ekoreꞌmaꞌtoꞌpe kaiꞌma.
28 Moropai Paulo yapisîꞌpî toꞌya. Moropai inkamoro entaimepîtî piaꞌtîꞌpî. —Judeuyamîꞌ anna pîikaꞌtîtî. Mîserî warayoꞌ pemonkonyamîꞌ yenupa pinunpanen. Eerepansaꞌ man tarî uurîꞌnîkon koreꞌta. Moisés kaaretarîya yenupantoꞌ winîkîi eeseurîma îri pe, moropai epîremantoꞌ yewîꞌ winîkîi. Moropai inkamoro yarakkîrî tîweꞌsanon Judeuyamîꞌ pepîn ewonsaꞌ man uyeserukon yawîrî pra.
29 Mîrîrî taꞌpî toꞌya maasa pra Trófimo Éfeso pon eraꞌmasaꞌ tîuyaꞌnîkon yeꞌnen Paulo yarakkîrî cidade po. Toꞌ esenumenkaꞌpî Pauloya yaasaꞌ kaiꞌma epîremantoꞌ yewîꞌ ta.
30 Mîrîrî yai toꞌ esiyuꞌpîꞌtoꞌ etaꞌpî cidade ponkonya. Mîrîrî yeꞌnen pemonkonyamîꞌ ekaꞌtunsaꞌ wanîꞌpî toꞌ pia. Inkamoroya Paulo yapisîꞌpî moropai iworokaꞌpî toꞌya epîremantoꞌ yewîꞌ tapai. Mîrîrî tîpo manaꞌta yarakkamoꞌpî toꞌya.
31 Inkamoroya Paulo wîî kupî tanne, Romanoyamîꞌ pe tîweꞌsanon surarayamîꞌ esaꞌya itekare etaꞌpî, Jerusalém po toꞌ ekoreꞌmasaꞌ yekare.
32 Moropai kaꞌneꞌ pe ipemonkonoyamîꞌ yannoꞌpîiya manniꞌkan ipîkkukon pokonpe. Moropai toꞌ ekaꞌtumîꞌpî toꞌ koreꞌta. Surarayamîꞌ esaꞌ eraꞌma tîuyaꞌnîkon yeꞌnen, arinîkon Paulo paꞌtîpîꞌnenanya ipaꞌtîpîꞌ tîuyaꞌnîkon emîꞌpannîpîꞌpî.
33 Mîrîrî yai surarayamîꞌ esaꞌ iipîꞌpî Paulo pia moropai yaironpîtî meꞌpoꞌpîiya asakîꞌne saꞌman ferro ke. Moropai ekaranmapoꞌpîiya: —Anîꞌ kin mîserî warayoꞌ? Îꞌ konekasaiꞌya nai mîîtoꞌpe? —taꞌpîiya.
34 Mîrîrî yai arinîkon entaimepîtîꞌpî tiaronkonya îꞌ taa tîuyaꞌnîkon epuꞌtî pra awanîꞌpî. Tiaron pe toꞌ maimu wanîꞌpî. Tiaron sinkaya inîꞌrî eesepuꞌtî pra. Mîrîrî yeꞌnen îꞌ epuꞌtî surarayamîꞌ esaꞌya eserîke pra awanîꞌpî. Mîrîrî yeꞌnen surarayamîꞌ yaipontîꞌpî toꞌ esaꞌya Paulo yaatoꞌpe toꞌya tewîꞌkon ta.
35 Aminke pra wîttî ta enuꞌnîtoꞌpe ikonekasaꞌ poro toꞌ wîtî yai Paulo yanumîꞌpî toꞌya kawîne yarîkonpa. Maasa pra iwenairî arinîkon iipîꞌpî teekoreꞌmai Paulo winîkîi tîwanîkon yeꞌnen.
36 Toꞌ entaimepîtîꞌpî inîꞌ panpîꞌ iwenairî siꞌma: —Iwîtî iwîtî —taꞌpî toꞌya.
Pemonkonyamîꞌ Yarakkîrî Paulo Eseurîma.
37 Mîrîrî tewîꞌkon ta tawonnîpî toꞌya tanne, Pauloya taꞌpî surarayamîꞌ esaꞌ pe tîweꞌsen pîꞌ: —Amîrî yarakkîrî eseurîma eꞌpainon? —taꞌpîiya.
Surarayamîꞌ esaꞌya yuukuꞌpî: —Oꞌnon yeꞌka pe see eeseurîma mîrîrî Grego pe?
38 Amîrî kaꞌrî wanî manniꞌ Egito pon pe. Manniꞌ 4.000 surarayamîꞌ kaisarî yaanen keren pona uyesaꞌkon yarakkîrî epîi? —taꞌpîiya.
39 Pauloya yuukuꞌpî. Taꞌpîiya: —Uurî wanî Judeu pe. Esenpoꞌpî Tarso cidaderî po. Ipîkku cidade Celícia pata po. Mîrîrî yeꞌnen maasa eseurîmapai wai pemonkonyamîꞌ yarakkîrî —taꞌpîiya.
40 Mîrîrî yeꞌnen surarayamîꞌ esaꞌya eeseurîmatoꞌpe ipataꞌseꞌ ton tîrîꞌpî. Moropai Paulo wanîꞌpî satippe mîrîrî wîttî ta enuꞌnîtoꞌpe ikonekasaꞌ po. Mîîkîrîya tenya ke moo eꞌtî taꞌpî pemonkonyamîꞌ pîꞌ. Moropai tamîꞌnawîronkon atîꞌnapansaꞌ tanne eeseurîmaꞌpî Judeuyamîꞌ maimu pe. Taꞌpîiya:
