Jesus Naipontîꞌsan Nîkupîꞌpîkon Yekare Atos 3:1-26
3 Tiwin wei Pedro wîtîꞌpî João yarakkîrî Judeuyamîꞌ epîrematoꞌ yewîꞌ ta epîremai. Koꞌmamîiya toꞌ wîtîꞌpî teeserukon ta, Judeuyamîꞌ eperepîtîꞌpî koꞌmamî kaisarî epîremai.
2 Moro warayoꞌ maꞌtakî pe tîweꞌsen eꞌpîtîꞌpî mîrîrî toꞌ epîrematoꞌ manaꞌta po. Morî iteseꞌ manniꞌ manaꞌta pia itonpayamîꞌya yaapîtîꞌpî wei kaisarî teewonsenon nîtîrî tîniru yapiꞌtoꞌpeiya kaiꞌma. Mîîkîrî awanîꞌpî asakoi pepîn teesenpoꞌpî pata painon.
3 Mîrîrî yai mîîkîrî priꞌyawon pepîn maꞌtakîꞌpan warayoꞌ saꞌneya Pedro, João eraꞌmaꞌpî, manaꞌta po tîweꞌsenya. Mîîkîrîya toꞌ eraꞌmasaꞌ tîuya pe tenya kainumîꞌpî toꞌ nîtîrî tîniru yapisîpa kaiꞌma.
4 3:4,5 Mîrîrîya Pedro João koꞌmamîꞌpî mîîkîrî yenu pîkîrî. Moropai taꞌpî Pedroya ipîꞌ: —Anna eraꞌmakî —taꞌpîiya. Mîîkîrîya toꞌ eraꞌmaꞌpî îꞌ toꞌ nîtîrî yapisîpa kaiꞌma eesenumenkaꞌpî teuren.
5 Eraꞌmakî 3:4
6 Tîîse taꞌpî Pedroya see warantî: —Aꞌkî, îꞌ rî ton pra man tîniru ton pra man aapia untîrî ton. Tîîse Cristo nîtîrîꞌpî Paapa meruntîri upîikaꞌtîtoꞌ Jesusya manniꞌ Nazaréponya, tarî man uupia. Mîrîrî ke apîikaꞌtîuya. Mîrîrî yeꞌnen Jesus maimu pe tauya apîꞌ, asakî —taꞌpîiya.
7 Moropai meruntî winon itenya pîꞌ yapisîꞌpî Pedroya. Iꞌmîꞌsaꞌkaꞌpîiya, mîîkîrî priꞌyawon pepîn saꞌne. Mîrîrî pe rî mîîkîrî eꞌmîꞌsaꞌkaꞌpî, morî pe satippe aapîtaꞌpî inîꞌ ikeꞌne awanî pra.
8 Mîrîrî tîpo mîîkîrî atausinpasaꞌ arapunpîtîꞌpî kureꞌne. Mîrîrî yeꞌnen mîîkîrîya Paapa yapurîꞌpî tîwakîri pe taatausinpai moropai toꞌ pîkîrî eewomîꞌpî Judeuyamîꞌ epîrematoꞌ yewîꞌ ta.
9 Mîrîrî yai eraꞌmaꞌpî arinîkonya. Mîîkîrî priꞌya pra tîweꞌsen eꞌmîꞌsaꞌkasaꞌya Paapa yapurî eraꞌmaꞌpî toꞌya.
10 Mîrîrî yeꞌnen toꞌ esenumenkaꞌpî kureꞌne ipîꞌ. —Manniꞌ mîîkîrî, priꞌya pra tîweꞌsen manaꞌta po eꞌmîꞌsaꞌkakoi pepîn. Îꞌ kaiꞌma see aweꞌmîꞌsaꞌkasaꞌ mîrîrî? —Kaiꞌma toꞌ esenumenkaꞌpî teesewankonoꞌmai ipîꞌ.
Arinîkon Pemonkonyamîꞌ Yeurîma Pedroya
11 Mîrîrî tîpo mîîkîrî warayoꞌ Pedro João nepiꞌtîꞌpî wanîꞌpî toꞌ raꞌ pîkîrî. Mîîkîrî eraꞌma tîuyaꞌnîkon wenai, pemonkonyamîꞌ esenumenkaꞌpî kureꞌne. Moropai toꞌ ekaꞌtumîꞌpî epîremantoꞌ yewîꞌ waikatoi varanda ta iteseꞌ Salomão pataꞌseꞌ yaꞌ, oꞌnon pata Pedro João moropai warayoꞌ ikeꞌnan esepiꞌtîsaꞌ wanî manniꞌ pata.
12 Mîrîrî yai arinîkon erepamî eraꞌma tîuya pe taꞌpî Pedroya toꞌ pîꞌ: —Uyonpayamîꞌ, îꞌ waniꞌ awanî yeꞌnen eesewankonoꞌmakon mîrîrî? Îꞌ kaiꞌma eesenumenkakon mîrîrî anna pîꞌ? Îꞌ waniꞌ awanî yeꞌnen anna yenu pîkîrî aakoꞌmamîkon? Mîserî warayoꞌ esepiꞌtîsaꞌ wenai anna meruntîri ke yepiꞌtîsaꞌ annaya kaiꞌma awanîkon? Morî anna yeseru wenai tîmeruntîri tîîsaꞌ Paapaya kaiꞌma awanîkon kaꞌrî?
13 Mîîkîrî esepiꞌtîsaꞌ mîrîrî anna meruntîri wenai pra tîîse manniꞌ Paapa poitîrî Jesus meruntîri wenai. Manniꞌ anna tamokon Abraão nurîꞌtî napurîꞌpî, moropai Isaque nurîꞌtî napurîꞌpî moropai Jacó nurîꞌtî napurîꞌpî. Mîîkîrî Paapaya Jesus kupîꞌpî kureꞌne. Tîîse amîrîꞌnîkonya irumakaꞌpî ipîkku pe tîweꞌsanon ayesaꞌkon pia. Mîîkîrî rumakaꞌpîyaꞌnîkon Pilatos yenyaꞌ mîîkîrî anrumakapai awanî tanne tîîse “kaane” taꞌpîyaꞌnîkon ituꞌse pra awanîꞌpîkon.
14 Mîîkîrî wanîꞌpî morî pe tîweꞌsen pe imakuiꞌpî ton pra tîweꞌsen pe, tîîse mîîwîni tîîse iwanmîrîꞌpîyaꞌnîkon. —Mîîkîrî rumakakî —taayaꞌnîkon pra awanîkon Pilatos pîꞌ. Tîîse tiaron warayoꞌ pemonkon wîîtîpon rumakatoꞌpeiya taꞌpîyaꞌnîkon.
15 Mîrîrî warantî amîrîꞌnîkonya uurîꞌnîkon koꞌmantoꞌ esaꞌ pe tîweꞌsen wîî meꞌpoꞌpî. Tîîse mîîkîrî pîmîꞌsaꞌkaꞌpî Paapaya. Mîrîrî epuꞌtî pîꞌ anna man maasa pra eraꞌmaꞌpî annaya.
16 Mîrîrî yeꞌnen mîîkîrî Jesus meruntîri wenai mîserî warayoꞌ esepiꞌtîsaꞌ sîrîrî. Maasa pra innape ikupîꞌpîiya. Mîrîrî yeꞌnen Jesusya yepiꞌtîꞌpî tamîꞌnawîronkon amîrîꞌnîkonya eraꞌma tîmapuꞌtîi.
17 —Uyonpayamîꞌ, amîrîꞌnîkonya iwî meꞌpoꞌpî pakko pe awanîkon yeꞌnen, tamîꞌnawîrî ayesaꞌkon pokonpe siꞌma. Mîrîrî epuꞌtî pîꞌ wai.
18 Tîîse mîrîrî kupîꞌpî Paapaya. Pena penaronkon profetayamîꞌ nurîꞌtîya ekaremekîꞌpî, îꞌ kaiꞌma Paapa narimaꞌpî pîikaꞌtîton pe eꞌtarumaꞌtî kupî. Mîrîrî yawîrî ikupîꞌpî Paapaya taꞌpî tîuya yawîrî.
19 Mîrîrî yeꞌnen enpenatatî imakuiꞌpî ankupîꞌpîkon pîꞌ, irumakatî, ayeserukon moꞌtanîꞌtî. Moropai Paapa pia eturumakatî tîîwanmîra imakuiꞌpî ankupîꞌpîkon kuꞌtoꞌpeiya. Iipia eturumakatî ayekatonkon meruntîri ton tîîtoꞌpeiya.
20 Iipia eturumakatî aapiaꞌnîkon manniꞌ Jesus tînmenkaꞌpî pîikaꞌtîton yarimatoꞌpeiya.
21 Tîîse mîîkîrî wanî sîrîrî kaꞌ po aaipî pra. Tamîꞌnawîron miakanma tîuya weiyu pîkîrî aakoꞌmamî, mîrîrî weiyu pîꞌ Paapa eseurîmaꞌpî penaronkon tîmaimu ekaremeꞌnenan profetayamîꞌ wenai.
22 Moisés nurîꞌtîya taꞌpî:“Paapaya tîmaimu ekaremeꞌnen yarima kupî sîrîrî,amîrîꞌnîkon koreꞌta uurî yarimasaꞌ tîuya warantî.Mîîkîrî maimu ekaremeꞌnen wanî kupî sîrîrî akoreꞌtaꞌnîkon ayonpakon pe.Maasa etatî morî pe îꞌ taiya apîꞌnîkon.
23 Anîꞌya imaimu eta pra awanî ya,mîîkîrî moꞌkaiya kupî sîrîrî tîpemonkonoyamîꞌ koreꞌta pai.Inîꞌrî tîpemonkono pe pra ikupîiya.Mîîkîrî wîiya kupî sîrîrî,”
taꞌpî Moisés nurîꞌtîya —taꞌpî Pedroya.
24 —Tamîꞌnawîronkon Paapa maimu ekaremeꞌnenan profetayamîꞌ nurîꞌtîya sîrîrî ekaremekîꞌpî. Eꞌmaiꞌne Samuelya ekaremekîꞌpî. Moropai mîrîrî tîpo iteꞌmaꞌpî pîꞌ tiaronkonya ekaremekîꞌpî. Sîrîrî yai eeseraꞌma manniꞌ ekaremekîꞌpî toꞌya.
25 Îꞌ etantoꞌ Paapaya pena inkamoro wenai, mîrîrî wanî sîrîrî amîrîꞌnîkon ton pe. See warantî ekaremekîꞌpî Paapaya Abraão pîꞌ pena. Taꞌpîiya:“Apayanrîꞌsan wenai tamîꞌnawîronkonsîrîrî pata po tîîkoꞌmansenon pia morîtîrîuya kupî,”
taꞌpîiya Abraão pîꞌ. Mîrîrî wanî sîrîrî amîrîꞌnîkon ton pe maasa pra amîrîꞌnîkon wanî ipayanyamîꞌ rîꞌsan pe.
26 Mîrîrî yeꞌnen Paapaya tîpoitîrî menkaꞌpî moropai yarimaꞌpîiya eꞌmaiꞌ pe amîrîꞌnîkon pîikaꞌtîton pe, morî kuꞌtoꞌpeiya amîrîꞌnîkon ton pe, moropai imakuiꞌpî ankupîꞌpîkon rumakakonpa akaisarîꞌnîkon tiwin pîꞌ siꞌma.
Mîrîrî warantî Pedro eseurîmaꞌpî toꞌ pîꞌ.
