Jesus Naipontîꞌsan Nîkupîꞌpîkon Yekare Atos 4:1-37
4 Pedro moropai João wanîꞌpî pemonkonyamîꞌ yenupa pîꞌ. Mîrîrî tanne, Judeuyamîꞌ esanon teepîremasanon esanon erepamîꞌpî toꞌ koreꞌta. Moropai tiaronkon saduceuyamîꞌ moropai epîremantoꞌ yewîꞌ eraꞌmanenan esaꞌ.
2 Inkamoroya pemonkonyamîꞌ yenupa toꞌya etaꞌpî, toꞌ eseurîma. Pedro eseurîmaꞌpî Jesus Cristo pîmîꞌsaꞌkaꞌpî Paapaya pîꞌ. —Mîrîrî yeꞌnen Jesus Cristo eꞌmîꞌsaꞌkasaꞌ wenai isaꞌmantaꞌsan eꞌmîꞌsaꞌka nîrî —taꞌpîiya. Mîrîrî eta tîuyaꞌnîkon pîꞌ toꞌ esetaꞌkaꞌpî, toꞌ maimu pîꞌ. Toꞌ ekoreꞌmaꞌpî toꞌ winîkîi.
3 Mîrîrî yeꞌnen toꞌ yapisî meꞌpoꞌpî toꞌya. Moropai toꞌ yarakkamoꞌpî toꞌya mîrîrî ewaron neken yuwaꞌkatoꞌpe toꞌya, maasa pra koꞌmamîiya pata wanîꞌpî mîîtoꞌpe.
4 Tîîse mîrîrî yai toꞌ nekaremekîꞌpî itekare etatîponoꞌsanya innape Jesus kupîꞌpî arinîke. Mîrîrî yeꞌnen inkamoro innape Jesus kuꞌnenan enaꞌpî inîꞌ panpîꞌ. Tarîpai 5.000 kaisarî toꞌ wanîꞌpî.
5 Mîrîrî erenmaꞌsaꞌ pe miarî Jerusalém po toꞌ emurukuntîꞌpî, inkamoro ipîkkukon pe tîweꞌsanon, yenupatonkon moropai tiaronkon pemonkonyamîꞌ esaꞌ pe tîweꞌsanon emurukuntîꞌpî.
6 Inkamoro koreꞌta toꞌ wanîꞌpî teepîremasanon esanon yepotorî Anás iteseꞌ moropai Caifás, João, Alexandre moropai tiaronkon Anás yonpayamîꞌ.
7 Mîrîrî yai inkamoro Jesus naipontîꞌsan arakkansaꞌ tîuyaꞌnîkon enepîꞌpî toꞌya inkamoro ipîkkukon rawîrî. Mîrîrî yeꞌnen toꞌ ekaranmapoꞌpî toꞌya. —Oꞌnon yeꞌka pe see mîrîrî kupîyaꞌnîkon mîrîrî? Anîꞌ meruntîri ke ikupîyaꞌnîkon mîrîrî? Anîꞌ maimu pe mîrîrî kupîyaꞌnîkon? —taꞌpî toꞌya toꞌ pîꞌ. Anepuꞌpai toꞌ wanîꞌpî maasa pra warayoꞌ esepiꞌtîsaꞌ eraꞌmasaꞌ tîuyaꞌnîkon yeꞌnen.
8 Morî Yekaton Wannî wanîꞌpî Pedro yarakkîrî. Mîrîrî yeꞌnen Pedro eseurîmaꞌpî eranneꞌ pe pra. Taꞌpîiya toꞌ pîꞌ: —Amîrîꞌnîkon ipîkkukon pemonkonyamîꞌ esanon, epuꞌnenan, mîserî warayoꞌ yepiꞌtîsaꞌ annaya wenai anna yekaranmapoyaꞌnîkon. Mîrîrî anepuꞌpai awanîkon. Tarîpai etatî, —taꞌpî Pedroya toꞌ pîꞌ.
9 4:9,10 Moropai taꞌpîiya: —Mîîkîrî manniꞌ Jesus Nazaré poinon, manniꞌ anwîꞌpîkon anpokapîtîꞌpîkon pakîꞌnan pona, mîîkîrî pîmîꞌsaꞌkasaꞌ Paapaya. Mîîkîrî meruntîri wenai, mîîkîrî maimu pe eesepiꞌtîsaꞌ mîrîrî —taꞌpî Pedroya toꞌ pîꞌ.
10 Eraꞌmakî 4:9
11 Taꞌpî Pedroya inîꞌrî toꞌ pîꞌ: —Manniꞌ mîîkîrî Paapaya taasaꞌ:“manniꞌ wîttî konekanenya imakuiꞌpî pe tîꞌ wanî kaiꞌma yenunsaꞌ,ipîinamaya pra awanîkon, iwanmîrîyaꞌnîkon.Mîîkîrî kupîꞌpî Paapaya ipîkku pe,”
mîîkîrî Jesus.
12 Mîîkîrî pia neken eꞌpîikaꞌtîntoꞌ eseporî mîrîrî. Inîꞌrî tiaron iwarainon ton pra man sîrîrî pata po upîikaꞌtînenkon ton. Mîîkîrî, Paapa nîtîrîꞌpî neken wanî uurîꞌnîkon pîikaꞌtîton pe, —taꞌpî Pedroya.
13 Pedro eseurîma eta tîuyaꞌnîkon yai inkamoro emurukuntîꞌsan esenumenkaꞌpî kureꞌne toꞌ pîꞌ. Taꞌpî toꞌya: —Îꞌ kaiꞌma see toꞌ eseurîma mîrîrî pîꞌ esenupaꞌsanon pepîn teuren tîîse eranneꞌ pe pra toꞌ wanî. Moriya insamoro wanî sîrîrî Jesus yarakkîrî asarîꞌsan pe kaiꞌma —taꞌpî toꞌya.
14 Mîrîrî yeꞌnen moo toꞌ wanîꞌpî. Îꞌ taa toꞌya pîn Jesus naipontîꞌsan pîꞌ. Maasa pra mîîkîrî warayoꞌ ekeꞌnan toꞌ nepiꞌtîꞌpî wanîꞌpî toꞌ pia.
15 Mîrîrî tîpo toꞌ yenpaꞌkaꞌpî toꞌya poro pona. Moropai tîîwarîrîꞌnîkon toꞌ esiyuꞌpîtîꞌpî toꞌ eseurîmatoꞌ pîꞌ.
16 —Îꞌ kupî eꞌpainon toꞌ yarakkîrî. Ikupî eserîke pra awanî toꞌ winîkîi maasa pra tamîꞌnawîrî Jerusalém po anîꞌ nîkupî eserîkan pepîn kuꞌsaꞌ toꞌya epuꞌsaꞌ tamîꞌnawîronkonya man. Yenomî eserîke pra man, toꞌ nîkupîꞌpî —taꞌpî toꞌya.
17 —Tîîse taapai awanî sîrîrî toꞌ pîꞌ inîꞌrî Jesus pîꞌ toꞌ eseurîma namai tiaronkon pemonkonyamîꞌya eta namai, toꞌ eseurîmatoꞌ Jesus pîꞌ emîꞌpannîꞌpai awanî sîrîrî —taꞌpî toꞌya.
18 Moropai toꞌ yawonnîpîꞌpî toꞌya inîꞌrî. Moropai taꞌpî toꞌya: —Inîꞌrî pemonkonyamîꞌ yenupayaꞌnîkon yuꞌse pra anna wanî sîrîrî. Inîꞌrî mîîkîrî warayoꞌ pîꞌ Jesus pîꞌ eeseurîmakon yuꞌse pra anna man. Atîꞌnapantî mîrîrî pîkîrî tîîse —taꞌpî toꞌya toꞌ pîꞌ.
19 4:19,20 Tîîse îꞌ kupî toꞌya yentai awanîꞌpî. Mîrîrî pîꞌ Pedroya taꞌpî: —Inna, annaya tîwî ikupî eserîke pra man. Anna eseurîma tîrumakai pra maasa pra anna neraꞌmaꞌpî, anna netaꞌpî mîrîrî ekaremekî annaya, —taꞌpî toꞌya. Moropai taꞌpî toꞌya: —Amîrîꞌnîkonya taa aawarîrîꞌnîkon rî eesenumenkakon mîrîrî îꞌ wanî yairî Paapa ton pe. Amaimukon yawîrî anna wanî kaiꞌma. Amîrîꞌnîkon nama annaya Paapa kaꞌrî nama annaya. Mîrîrî epuꞌtîyaꞌnîkon eꞌpai awanî —taꞌpî Pedroya.
20 Eraꞌmakî 4:19
21 Mîrîrî tîpo inîꞌ îꞌ kupî toꞌya eserîke pra toꞌ wanîꞌpî. Maasa pra pemonkonyamîꞌya Paapa yapurîꞌpî warayoꞌ toꞌ napiꞌtîꞌpî eraꞌma tîuyaꞌnîkon yeꞌnen. Mîrîrî yeꞌnen toꞌ eseurîmaꞌpî neken toꞌ yarakkîrî. —Inîꞌrî kîseurîmatî mîîkîrî Jesus pîꞌ. Eeseurîmakon yuꞌse anna wanî pra man —taꞌpî toꞌya toꞌ pîꞌ. Moropai toꞌ epaꞌkaꞌpî, îꞌ kupî toꞌya yentai awanîꞌpî mîîtoꞌpe.
22 Mîîkîrî warayoꞌ esepiꞌtîꞌpî kono po awanîꞌpî 40 konoꞌ yentai.
Innape Jesus Kuꞌnenan Epîrema
23 Atarakkannîtoꞌ yewîꞌ tapai teepaꞌka tîpoꞌnîkon Pedro, João wîtîꞌpî tonpayamîꞌ pia, innape Jesus kuꞌnenan pia. Inkamoroya ekaremekîꞌpî toꞌ pîꞌ, îꞌ taasaꞌ aꞌyekeꞌtonon Judeuyamîꞌ yenupanenanya moropai teepîremasanon esanonya.
24 Mîrîrî eta tîuyaꞌnîkonya yai tamîꞌnawîrî siꞌma toꞌ epîrema piaꞌtîꞌpî Paapa pîꞌ. Taꞌpî toꞌya: —Anna yunkon, Paapa, amîrî pata konekaꞌtîpon, moropai kaꞌ konekaꞌtîpon. Moropai tuna konekaꞌtîpon. Moropai tamîꞌnawîron sîrîrî pata po tîîkoꞌmansen konekaꞌpîya.
25 Moropai pena eeseurîmaꞌpî Morî Yekaton Wannî yai anna tamokon Davi nurîꞌtî apoitîrî eseurîma wenai. Taꞌpîya:“Îꞌ waniꞌ awanî yeꞌnen pemonkonyamîꞌ, Judeuyamîꞌ pepîn ekoreꞌma uwinîkîi.
26 Îꞌ waniꞌ awanî yeꞌnen Uwinîkîi imakuiꞌpî kupî tîuyaꞌnîkon pîꞌ toꞌ esenumenka.Tîîse îꞌ kupî toꞌya eserîke pra awanî.Ipîkkukon reiyamîꞌ pata esanon pokonpe toꞌ emurukuntîꞌpîteepîkonpa Uyarakkîrî moropai pîikaꞌtîton unarimaꞌpî yarakkîrî.Tîîse mîrîrî wanî îꞌ pe pra rî”,
taꞌpîya, pena Davi nurîꞌtî eseurîmatoꞌ wenai.
27 Aꞌkî, pena Davi nurîꞌtî yai eeseurîmaꞌpî, Paapa. Mîrîrî warantî aweꞌkupîꞌpî sîrîrî amen. Toꞌ esetaꞌpî îꞌ rî kupîkonpa pemonkonyamîꞌ esaꞌ pe tîweꞌsen Herodes pokonpe moropai pata esanon Pôncio Pilatos pokonpe. Toꞌ esetaꞌpî anna yonpayamîꞌ moropai anna yonpayamîꞌ pepîn pokonpe teserukon konekakonpa kaiꞌma. Mîîkîrî anarimaꞌpî pîikaꞌtîton imakuiꞌpî ton pîn Jesus winîkîi, teepîtoꞌkon yeseru konekakonpa toꞌ eperepîꞌpî. Mîrîrî esetaꞌpî pena innape rî aweꞌkupî sîrîrîpe eesepuꞌtîtoꞌpe kaiꞌma.
28 Mîrîrî warantî pena eeseurîmaꞌpî manniꞌ yawîrî sîrîrî aweꞌkupî eseraꞌma sîrîrî, Paapa. Sîrîrî warantî ikupîꞌpî toꞌya maasa pra aweꞌkuꞌtoꞌpe taꞌpîya. Mîrîrî warantî taꞌpîya ituꞌse awanî yeꞌnen, meruntî ke awanî yeꞌnen.
29 Anna yunkon, Paapa, tamîꞌnawîrî epuꞌtî pîꞌ nai îꞌ kaiꞌma anna winîkîi toꞌ eseurîmasaꞌ epuꞌtî pîꞌ nai, anna tarumaꞌtî tîuyaꞌnîkon pîꞌ toꞌ eseurîmasaꞌ. Tîîse Paapa, apoitîrîtonon anna pia meruntî tîîkî, meruntî ke amaimu pîꞌ anna eseurîmatoꞌpe inîꞌ panpîꞌ.
30 Moropai Paapa, anna pia itîîkî apoitîrî imakuiꞌpî ton pîn Jesus wenai anîꞌ nîkupî eserîkan pepîn kuꞌtoꞌpe annaya, priꞌyawonkon pepîn yepiꞌtîtoꞌpe annaya ameruntîri ke. Mîrîrî eraꞌma tîuyaꞌnîkonya yai pemonkonyamîꞌ esenumenkatoꞌpe kureꞌne ameruntîri pîꞌ, —kaiꞌma toꞌ epîremaꞌpî Paapa pîꞌ.
31 Toꞌ epîrema ataretîꞌka pe, tîwakîri pe Paapaya etaꞌpî. Mîrîrî yeꞌnen ita toꞌ eꞌtoꞌ wîttî eserentîkîꞌmaꞌpî. Moropai Morî Yekaton Wannî enaꞌpî toꞌ esaꞌ pe inîꞌ panpîꞌ meruntî ke toꞌ eꞌtoꞌpe. Mîrîrî tîpo inîꞌ panpîꞌ itekare ekaremekîꞌpî toꞌya meruntî ke.
Tamîꞌnawîrî Itesaꞌ Pe Tîweꞌtoꞌkon Kupî Toꞌya Tiwinan Yemanne Warantî
32 Mîrîrî yai tamîꞌnawîronkon innape Jesus kuꞌnenan esenumenkapîtîꞌpî seꞌ kaisarî. Toꞌ esenumenkatoꞌ eꞌpîtîꞌpî tiwin. Moropai toꞌ yeseru eꞌpîtîꞌpî îꞌ kaiꞌma toꞌ koꞌmantoꞌ wanîꞌpî. Mîrîrî yeꞌnen anîꞌya taa pra awanîꞌpî toꞌ koreꞌta: —Uyemanne sîrîrî uurî sîrîrî —kaiꞌma toꞌ esenumenka pîn. Tîîse tamîꞌnawîrî itesaꞌ pe tîweꞌtoꞌkon kupîꞌpî toꞌya tiwinan yemanne warantî.
33 Mîrîrî yai Jesus pîmîꞌsaꞌkaꞌpî Paapaya ekaremeꞌpîtîꞌpî toꞌya meruntî ke. Mîrîrî yeꞌnen kureꞌne morî pe toꞌ eꞌtoꞌ ton tîrîꞌpî Paapaya toꞌ pia.
34 4:34,35 Moropai temannekon ke toꞌ eꞌrepa yai, tewîꞌkon ke, tînmîrikon ke, itepeꞌpî yapisî toꞌya, moropai mîrîrî enepî toꞌya tamîꞌnawîrî Jesus naipontîꞌsan yenya itîrî toꞌya. Moropai mîrîrî yonpa tîrî Jesus naipontîꞌsanya toꞌ pia, ituꞌse toꞌ eꞌtoꞌ kaisarî. Mîrîrî yeꞌnen anîꞌ eꞌtarumaꞌtî pra awanîꞌpî toꞌ koreꞌta. Mîrîrî kupîꞌpî toꞌya tamîꞌnawîrî teesenumenkatoꞌkon ke.
35 Eraꞌmakî 4:34
36 4:36,37 Inkamoro koreꞌta tiwin warayoꞌ wanîꞌpî iteseꞌ José. Mîîkîrî eꞌrepaꞌpî tînmîri ke. Itepeꞌpî yapisîꞌpîiya moropai enepîꞌpîiya tamîꞌnawîrî Jesus naipontîꞌsan yenya tîweꞌtarumaꞌtîsanon pîikaꞌtîtoꞌpe Jesus naipontîꞌsanya kaiꞌma. Mîîkîrî warayoꞌ wanîꞌpî Levi nurîꞌtî paarîꞌpî pe. Ipata eseꞌ wanîꞌpî eesenpoꞌpî pata Chipre wono po. Mîîkîrî eꞌpîtîꞌpî toꞌ pîikaꞌtînen pe. Mîrîrî yeꞌnen esatîꞌpî Jesus naipontîꞌsanya Barnabé kaiꞌma, tiaron meruntîri ton tîînen taatoꞌ mîrîrî.
37 Eraꞌmakî 4:36
