Jesus Naipontîꞌsan Nîkupîꞌpîkon Yekare Atos 5:1-42
5 Mîrîrî tîpo tiaron warayoꞌ wanîꞌpî iteseꞌ Ananias. Mîîkîrî wanîꞌpî tînoꞌpî kenan. Inoꞌpî eseꞌ wanîꞌpî Safira. Mîîkîrî esenumenkaꞌpî tîweꞌrepa pîꞌ tînmîri ke, itepeꞌpî tîrîpa kaiꞌma Jesus naipontîꞌsan pia. Mîrîrî ke tîweꞌtarumaꞌtîsanon pîikaꞌtîtoꞌpe toꞌya.
2 Tîîse tamîꞌnawîrî itîrîiya pîn tamîꞌnawîrî tîrîuya taa tîpo. Itonpa yarakkîrî aweꞌnîmîꞌpî. Mîrîrî epuꞌtîꞌpî inoꞌpîya. Mîrîrî tîpo yapisîꞌpîiya itepeꞌpî. Mîrîrî tîrîꞌpîiya Pedro pia itonpa pe, tamîꞌnawîrî tîrîiya pîn.
3 Mîrîrî yeꞌnen taꞌpî Pedroya ipîꞌ:
—Îꞌ waniꞌ awanî yeꞌnen mîrîrî warantî Makui pataꞌseꞌ ton tîrîya ayewan ya? —taꞌpî Pedroya ipîꞌ. —Îꞌ ton pe mîrîrî warantî seruꞌyeꞌ pe awanî Morî Yekaton Wannî winîkîi —taꞌpîiya. —Îꞌ ton pe tamîꞌnawîrî itîrîya pra awanîꞌpî itîrîuya taa tîpo?
4 Maasa pra anmîri wanîꞌpî amîrî pe pena. Moropai aweꞌrepasaꞌ tîpo itepeꞌpî wanî nîrî amîrî pe. Tîîse îꞌ ton pe yenkuꞌtî yuꞌse eesenumenkasaꞌ anna winîkîi pra neken tîîse Paapa winîkîi?
5 Mîrîrî taa Pedroya, eta tîuya pe Ananias esenumîꞌpî, aasaꞌmantaꞌpî. Mîrîrî eꞌkuꞌsaꞌ eta tîuyaꞌnîkon pe arinîkon enaꞌpî eranneꞌ pe.
6 Mîîkîrî yapiꞌse warayoꞌkon erepamîꞌpî, kamisa ke yaꞌsantîꞌpî toꞌya. Moropai yenpaꞌkaꞌpî toꞌya poro pona. Mîîkîrî yuꞌnaꞌtîꞌpî toꞌya.
7 Mîrîrî tîpo, tîkoꞌman pe puꞌkuru pra inoꞌpîrîꞌpî erepamîꞌpî, îꞌ eꞌkuꞌsaꞌ epuꞌtîiya pra tînyo yarakkîrî.
8 Mîîkîrî ekaranmapoꞌpî Pedroya: —Kaꞌkî upîꞌ —taꞌpîiya. —Seeniꞌ neken wanî tamîꞌnawîrî anmîrikon ke aweꞌrepaꞌpîkon yepeꞌpî pe? —taꞌpîiya.
—Inna —taꞌpî Safiraya.
9 Tîîse taꞌpî Pedroya:
—Îꞌ ton pe see mîrîrî warantî Paapa epuꞌtoꞌ ton tîrîyaꞌnîkon sîrîrî? Atarumaꞌtîiyaꞌnîkon pepîn kaiꞌma? Seruꞌyeꞌ pe awanîkon Morî Yekaton Wannî winîkîi —taꞌpîiya. Moropai taꞌpî Pedroya: —Aꞌkî, mîrîrî warantî anyo seruꞌwasaꞌ wenai aasaꞌmantaꞌpî. Mîîkîrî yuꞌnaꞌtî warayoꞌkonya amenrî toꞌ ataretîꞌka —taꞌpîiya. —Moro toꞌ man inkamoro yuꞌnaꞌtîtîponkon —taꞌpîiya. —Inkamoroya ayarî nîrî sîrîrî ayuꞌnaꞌtîi —taꞌpî Pedroya ipîꞌ.
10 Mîrîrî eta tîuya pe, Safira esenumîꞌpî Pedro rawîrî aasaꞌmantaꞌpî. Mîîkîrî yenpaꞌkaꞌpî warayoꞌkonya moropai yuꞌnaꞌtîꞌpî toꞌya inyo yuꞌnaꞌtîꞌpî tîuyaꞌnîkon winîkîi.
11 Mîrîrî eta tîuyaꞌnîkonya yai, innape Jesus kuꞌnenan enaꞌpî eranneꞌ pe. Moropai tamîꞌnawîronkon mîrîrî yekare etanenan pemonkonyamîꞌ nîrî wanîꞌpî eranneꞌ pe.
Jesus Naipontîꞌsanya Priꞌyawonkon Pepîn Yepiꞌtî
12 Tuꞌke iteꞌka Jesus naipontîꞌsanya tuꞌke ikupî eserîkan pepîn kuꞌpîtîꞌpî. Moropai esenumenkantoꞌ kuꞌpîtîꞌpî toꞌya pemonkonyamîꞌ neraꞌmaton pe. Mîrîrî yai tamîꞌnawîronkon innape Jesus kuꞌnenan emurukunpîtîꞌpî epîremantoꞌ yewîꞌ waikatoi varanda ta iteseꞌ Salomão pataꞌseꞌ yaꞌ.
13 Tiaronkon emurukuntî pra awanîꞌpî toꞌ pokonpe maasa pra eranneꞌ pe tîwanîkon yeꞌnen. Tîîse toꞌ eseurîmapîtîꞌpî morî pe toꞌ pîꞌ.
14 Moropai arinîkon warayoꞌkon moropai wîriꞌsanyamîꞌya nîrî innape Uyepotorîkon kupîꞌpî tîwîrî. Mîrîrî wenai arinîke toꞌ enaꞌpî.
15 Mîrîrî Jesus naipontîꞌsan nîkupîꞌpî eraꞌma tîuyaꞌnîkon wenai, priꞌyawonkon pepîn enepîꞌpî toꞌya oꞌnon poro Pedro wîtîtoꞌ eꞌma ta. Tetteꞌ ta toꞌ tîîse inkamoro tîrîꞌpî toꞌya eꞌma ena pona, mîrîrî taawîrî Pedro wîtî yai, itekatonya mîîkîrî napontîsaꞌ yai eesepiꞌtîtoꞌpe kaiꞌma.
16 Moropai arinîkon pemonkonyamîꞌ Jerusalém woi tîîkoꞌmansenonya tiaronkon priꞌyawonkon pepîn nîrî enepîꞌpî. Moropai oꞌmaꞌkon yarakkîrî tîweꞌsanon enepîꞌpî toꞌya. Tamîꞌnawîrî inkamoro esepiꞌtîꞌpî mîrîrî warantî.
Jesus Naipontîꞌsan Tarumaꞌtî Toꞌya
17 Moropai teepîremasanon esanon yepotorî moropai mîîkîrî yarakkîronkon, Judeuyamîꞌ esanon saduceuyamîꞌ, inkamoro kinmuwaꞌpî Jesus naipontîꞌsan winîkîi.
18 Taꞌpî toꞌya: —Toꞌ arakkanpai awanî sîrîrî inîꞌrî toꞌ eseurîma namai —taꞌpî toꞌya. Moropai toꞌ yapisî meꞌpoꞌpî toꞌya moropai toꞌ arakkamo meꞌpoꞌpî toꞌya imakuiꞌpî kupîtîponkon koreꞌta.
19 Mîrîrî ewaron yaꞌ, Paapaya inserî yarimaꞌpî toꞌ pia. Mîîkîrîya manaꞌta arakkanmokaꞌpî. Moropai toꞌ yenpaꞌkaꞌpîiya mîrîrî atarakkannîtoꞌ yewîꞌ tapai.
20 Taꞌpî inserîya Jesus naipontîꞌsan pîꞌ:
—Atîtî, epîremantoꞌ yewîꞌ ta pemonkonyamîꞌ yenupatantî. Sîrîrî itekare ekaremeꞌtantî, tamîꞌnawîrî ipatîkarî enen koꞌmannîtoꞌ yekare —taꞌpî inserîya Jesus naipontîꞌsan pîꞌ.
21 Moropai inserî maimu yawîrî toꞌ wîtîꞌpî penane puꞌkuru toꞌ ewomîꞌpî epîremantoꞌ yewîꞌ ta. Inkamoroya toꞌ yenupaꞌpî miarî.
Mîrîrî tîpo mîrîrî wei yai, teepîremasanon esanon yepotorî moropai mîîkîrî yarakkîronkon Judeuyamîꞌ esanon emurukuntîꞌpî tamîꞌnawîrî pemonkonyamîꞌ esaꞌ pe tîweꞌsanon esetaꞌpî teeseurîmakonpa tekarekon pîꞌ, tonpakon saduceuyamîꞌ pokonpe. Inkamoro emurukuntîsaꞌya taꞌpî: —Toꞌ eraꞌmatantî, inkamoro arakkansaꞌkon —taꞌpî toꞌya.
22 5:22,23 Moropai surarayamîꞌ wîtîꞌpî atarakkannîtoꞌ yewîꞌ ta. Eporîꞌpî toꞌya atarakkannîtoꞌ yewîꞌ atarakkansaꞌ wanîꞌpî. Surarayamîꞌ eraꞌmanenanya eraꞌma koꞌmannîpî manaꞌta po siꞌma. Tîîse îꞌ eꞌkuꞌsaꞌ epuꞌtî toꞌya pra awanîꞌpî mîrîrî yai. Mîrîrî arakkanmokaꞌpî toꞌya tîîse Jesus naipontîꞌsan eporî toꞌya pîn. Anîꞌ ton pra awanîꞌpî. Tarîpai îꞌ kaiꞌma tîwanîkon epuꞌtî toꞌya pra toꞌ enaꞌpî. Toꞌ ennaꞌpoꞌpî tesaꞌkon pia. Ekaremekîꞌpî toꞌya, tamîꞌnawîrî.
—Îꞌ kaiꞌma toꞌ epaꞌkaꞌpî epuꞌtî annaya pra man. Manaꞌta man arakkansaꞌ pe —taꞌpî toꞌya.
23 Eraꞌmakî 5:22
24 Mîrîrî eta tîuyaꞌnîkon ya yai, toꞌ esanonya îꞌ kupî tîuya epuꞌtî pîn nîrî toꞌ warantî.
25 Tîîse mîrîrî pe rî warayoꞌ erepamîꞌpî. Taꞌpîiya: —Aꞌkî manniꞌkan atarakkannîtoꞌ yewîꞌ ta toꞌ wanî manniꞌkan man sinpata epîremantoꞌ yewîꞌ ta pemonkonyamîꞌ yenupa pîꞌ —taꞌpî warayoꞌya toꞌ pîꞌ.
26 5:26,27 Mîrîrî eta tîuyaꞌnîkon pe tiwinarî surarayamîꞌ esanonya taꞌpî surarayamîꞌ pîꞌ: —Kaꞌneꞌ pe toꞌ eraꞌmatantî. Toꞌ wîtîꞌpî. Toꞌ enepîꞌpî toꞌya. Îꞌ kupî toꞌya pîn toꞌ winîkîi maasa pra pemonkonyamîꞌya tîpaꞌtîpîtîkon namaꞌpî toꞌya tîꞌ ke. Moropai toꞌ eneꞌsaꞌ toꞌya yai, inkamoro pîꞌ taꞌpî Judeuyamîꞌ esanon pe tîweꞌsanonya: —Mîrîrî warantî “Inîꞌrî pemonkonyamîꞌ kîsenupatî mîîkîrî Jesus eseꞌ pîꞌ”, taꞌpî annaya apîꞌnîkon yuukuyaꞌnîkon pra awanîkon sîrîrî.
27 Eraꞌmakî 5:26
28 Ankupîꞌpîkon eraꞌmatî maasa îꞌ kuꞌsaꞌyaꞌnîkon mîîkîrî eseꞌ pîꞌ eeseurîmakon ke pemonkonyamîꞌ Jerusalém cidaderî ponkonya etasaꞌ eraꞌmatî. Mîrîrî warantî tîîse anna Judeuyamîꞌ esanonya Jesus wîꞌpî taa pîꞌ aakoꞌmamîkon mîrîrî.
29 Tîîse Pedroya moropai tiaronkon Jesus naipontîꞌsanya inkamoro maimu yuukuꞌpî. Taꞌpî toꞌya: —Paapa maimu yawîrî eꞌnîpai awanî sîrîrî warayoꞌkon maimu yawîrî eꞌnî yentai.
30 Mîîkîrî Paapa penaronkon utamokon napurîꞌpî mîîkîrî Paapaya Jesus pîmîꞌsaꞌkaꞌpî amîrîꞌnîkonya iwî meꞌposaꞌ tîpo, pakîꞌnan pona ipokapîtî meꞌposaꞌyaꞌnîkon tanne.
31 Mîîkîrî Jesus kupîꞌpî Paapaya tîmeruntîri winî eereutatoꞌpe, tamîꞌnawîronkon esaꞌ pe, moropai upîikaꞌtînenkon pe. Paapaya itîrîꞌpî manniꞌkan tîpemonkonoyamîꞌ Judeuyamîꞌya imakuiꞌpî pe tîweꞌtoꞌkon rumaka ya tîîwanmîra Paapaya ikuꞌtoꞌpe —taꞌpî toꞌya toꞌ pîꞌ.
32 —Mîrîrî ekaremekî annaya sîrîrî maasa pra eraꞌma pîꞌ anna man tamîꞌnawîrî. Moropai Morî Yekaton Wannîya nîrî yenpo pîꞌ man tamîꞌnawîrî. Mîîkîrî Morî Yekaton Wannî Paapa narimaꞌpî tîmaimu yawîrî tîîkoꞌmansenon pia —taꞌpî Pedroya toꞌ pîꞌ.
33 Mîrîrî eta tîuyaꞌnîkonya yai, inkamoro Judeuyamîꞌ esanon emurukuntîꞌsan ekoreꞌmaꞌpî inîꞌ panpîꞌ toꞌ winîkîi. Mîrîrî toꞌ tîꞌka tîuyaꞌnîkon pîꞌ toꞌ eseurîmaꞌpî.
34 Tîîse moro awanîꞌpî warayoꞌ toꞌ koreꞌta. Mîîkîrî fariseu iteseꞌ Gamaliel toꞌ yenupanen Judeuyamîꞌ yeseru pîꞌ. Mîrîrî yeꞌnen tamîꞌnawîronkon nînama pe awanîꞌpî. Mîîkîrî eꞌmîꞌsaꞌkaꞌpî. Taꞌpîiya toꞌ pîꞌ:
—Jesus naipontîꞌsan yenpaꞌkatî maasa poro pona kaꞌneꞌ perî —taꞌpîiya. Moropai toꞌ yenpaꞌkaꞌpî toꞌya.
35 Moropai eeseurîma piaꞌtîꞌpî arinîkon emurukuntîꞌsanya eta tanne.
—Aꞌkî, uyonpayamîꞌ —taꞌpîiya. —Aka, îꞌ kupîyaꞌnîkon kaiꞌma kîsenkuꞌtîtî insamoro Jesus naipontîꞌsan winîkîi. Maasa ekaremekîuya etatî —taꞌpîiya.
36 —Pena puꞌkuru pra warayoꞌ wanîꞌpî iteseꞌ Teudas. Mîîkîrî wanîꞌpî pemonkon esaꞌ pe arinîkon 400 kaisaronkon esaꞌ pe Teudas wanîꞌpî. Ipîkku pe tîweꞌtoꞌpe aweꞌkupîꞌpî. Tîîse iwîꞌpî toꞌya. Mîrîrî tîpo inenupakon rîꞌsan eꞌparaipîkaꞌpî. Inîꞌrî ipokonpe tîwanîꞌpîkon warantî pra toꞌ enaꞌpî. Mîrîrî warantî toꞌ ataretîꞌkaꞌpî —taꞌpîiya.
37 —Moropai inîꞌrî tiaron wanîꞌpî Judas iteseꞌ Galiléia pon —taꞌpîiya. —Manniꞌ yai tamîꞌnawîronkon pemonkonyamîꞌ kuꞌneꞌtî toꞌya yai, mîîkîrî wanîꞌpî mîrîrî warantî. Ipîkku pe tîweꞌtoꞌpe aweꞌkupîꞌpî. Ipemonkonoyamîꞌ wanîꞌpî tuꞌke inenupakon. Tîîse mîîkîrî wîꞌpî toꞌya. Moropai inkamoro inenupa rîꞌsan eꞌparaipîkaꞌpî —taꞌpîiya.
38 —Mîrîrî warantî naka inkamoro wanî. Mîrîrî yeꞌnen tîwî toꞌ kuꞌpaiꞌnîkon, maasa pra pemonkon yeseru pe awanî ya, îꞌ pe pra rî toꞌ nenupaꞌsan wanî —taꞌpî Gamalielya.
39 —Tîîse mîrîrî warantî pra Paapa meruntîri pe toꞌ wanî tanne, îꞌ kupîyaꞌnîkon kaiꞌma kîsenkuꞌtîtî. Mîrîrî warantî ikupî pîꞌ eesenumenkakon ya, Paapa winîkîi imakuiꞌpî kupîyaꞌnîkon mîrîrî —taꞌpîiya toꞌ pîꞌ.
40 Mîrîrî tîpo mîîkîrî Gamaliel eseurîmatoꞌ kupîꞌpî toꞌya innape. Mîrîrî yeꞌnen, —Jesus naipontîꞌsan yawonnîꞌtî —taꞌpî toꞌya. Toꞌ yawonnîpîꞌpî toꞌya. Toꞌ poꞌpîtîtîpoꞌnîkon inkamoro rumakaꞌpî toꞌya. Toꞌ rumaka pe taꞌpî toꞌya: —Atîtî, inîꞌrî eeseurîmakon yuꞌse anna wanî pra man mîîkîrî Jesus eseꞌ pîꞌ —taꞌpî toꞌya.
41 Moropai Pedro tiaronkon Jesus naipontîꞌsan epaꞌkaꞌpî arinîkon emurukuntîꞌsan koreꞌtapai taatausinpai maasa pra Jesus yekare pîꞌ ekaremekî tîuyaꞌnîkon wenai tîweꞌtarumaꞌtîkon epuꞌtî toꞌya eserîke awanî. Mîrîrî warantî siꞌma, toꞌ atausinpasaꞌ wanîꞌpî kureꞌne. Inkamoro wîtîꞌpî.
42 Inkamoroya wei kaisarî Paapa maimu ekaremeꞌpîtîꞌpî epîremantoꞌ yewîꞌ ta moropai tuutîkon pe wîttîkon kaisarî. Pîikaꞌtîton pe Jesus Paapa narimaꞌpî wanî ekaremeꞌpîtîꞌpî toꞌya tîwîrî, tîrumakai pra.
