Jesus Naipontîꞌsan Nîkupîꞌpîkon Yekare Atos 7:1-60
7 Mîrîrî tîpo teepîremasanon esanon yepotorîya Estêvão ekaranmapoꞌpî: —Inna pîꞌ rî toꞌ eseurîma mîrîrî? —taꞌpîiya.
2 Yuukuꞌpî Estêvãoya: —Uyonpayamîꞌ uyuntonon, eseurîma etatî —taꞌpîiya. —Pena morî puꞌkuru aꞌka pe tîweꞌsen Paapa esenpoꞌpî utamokon Abraão nurîꞌtî pia, maasa Mesopotâmia pata po aakoꞌmamî tanne, Harã pona ikoꞌmanse attî pra tîîse.
3 Mîîkîrîya taꞌpî Abraão pîꞌ:“Apata yapai epaꞌkakî.Apemonkonoyamîꞌ koreꞌtapai atîkî,oꞌnon pata apataꞌseꞌ ton ekaremekîuya manniꞌ pata yaꞌ”,
taꞌpîiya.
4 Mîrîrî yeꞌnen Abraão wîtîꞌpî Caldéia poi ikoꞌmanse Harã pata pona. Mîrîrî tîpo, itun saꞌmantasaꞌ tîpo, Paapaya mîîkîrî enepîꞌpî sîrîrî pata pona oꞌnon pata uurîꞌnîkon koꞌmamî manniꞌ pata yaꞌ.
5 Mîîkîrî pia Paapaya iwaikkatoi pe sîrîrî pata tîîsaꞌ pra man mîrîrî yai. Tîîse tamîꞌnawîrî itîrî tîuya taasaiꞌya wanîꞌpî. Moropai apayanrîꞌsan pataꞌseꞌ pe awanî kupî sîrîrî, taasaiꞌya wanîꞌpî inmuku ton pra tîîse.
6 Mîrîrî tîpo Paapaya taꞌpî Abraão pîꞌ:“Inkamoro apayanyamîꞌ rîꞌsan koꞌmamî pe man tiaron pata po kaꞌran pe.Mîrîrî pata ponkon poitîrî pe toꞌ koꞌmamî pe man 400 konoꞌ kaisarî.Inkamoro eꞌtarumaꞌtî pe man mararî pra tiaronkon poitîrî pe mîrîrî toꞌ pata yaꞌ siꞌma”,
taꞌpîiya.
7 Moropai Paapaya taꞌpî Abraão pîꞌ:“Inkamoro amîrîꞌnîkon tarumaꞌtîponkon tarumaꞌtîuya pe wai”,
taꞌpîiya.“Upemonkonoyamîꞌ moꞌkauya pe wai sîrîrî pata po siꞌma upoitîrî pe toꞌ eꞌtoꞌpe”,
taꞌpîiya Abraão pîꞌ.
8 Mîrîrî yeꞌnen Paapa esetaꞌpî Abraão yarakkîrî. Moropai Abraão nîkupî ton tîrîꞌpîiya, tînmukukon esenposaꞌ yai tiwin semana kaisarî aakoꞌmansaꞌ tîpo Abraãoya Isaque mere piꞌpî pottî yaꞌtîtoꞌpe. Mîrîrî yawîrî Abraãoya ikupîꞌpî. Mîrîrî warantî Isaqueya nîrî ikupîꞌpî tînmu Jacó yarakkîrî. Moropai Jacóya manniꞌkan tînmukuyamîꞌ pîꞌ ikupîꞌpî mîrîrî warantî —taꞌpî Estêvãoya.
9 Inkamoro pîꞌ Estêvão eseurîma koꞌmannîpîꞌpî. Taꞌpîiya: —Manniꞌkan penaronkon utamokon rîꞌsan Jacó munkîyamîꞌ nurîꞌtîya tonpakon José yewanmîrîꞌpî maasa pra tentaiꞌnîkon tîyunkonya yapurî yeꞌnen. Mîrîrî yeꞌnen ike toꞌ eꞌrepaꞌpî Egito ponkon pia toꞌ poitîrî pe aweꞌtoꞌpe kaiꞌma. Tîîse mîîkîrî yarakkîrî Paapa wanîꞌpî.
10 Mîrîrî yeꞌnen Paapaya ipîikaꞌtîꞌpî aweꞌtarumaꞌtîtoꞌ yapai. Egito pata esaꞌ rei Faraó pia José wanî yai Paapaya mîîkîrî kupîꞌpî tîwakîri pe eraꞌmatoꞌpe Faraóya. Mîrîrî yeꞌnen Faraóya taꞌpî ipîꞌ: “Epuꞌnen pe awanî wenai, tarîpai pata esaꞌ pe eena pe nai kaiꞌma. Pata esaꞌ pe eena pe nai moropai uyewîꞌ tawonkon esaꞌ pe nîrî eena pe nai”, taꞌpîiya José pîꞌ.
11 Mîrîrî tîpo kureꞌne iwan wanîꞌpî Egito pata po moropai Canaã pata po. Mîrîrî yai utamokon nurîꞌtîya kureꞌne iwan epuꞌtîꞌpî.
12 Mîrîrî yai Jacó nurîꞌtîya yekkari wanî yekare etaꞌpî Egito po trigo wanî. Mîrîrî yeꞌnen tînmukuyamîꞌ yarimaꞌpîiya tekkarikon ton yennai.
13 Itakon teꞌka pe toꞌ wîtîsaꞌ yai José esekaremekîꞌpî anîꞌ pe tîwanî tonpayamîꞌ pîꞌ. Mîrîrî warantî José yonpayamîꞌ epuꞌtîꞌpî Faraóya.
14 Moropai taꞌpî Joséya Jacó nurîꞌtî wîtîtoꞌpe Egito pona. Mîrîrî yeꞌnen Jacó wîtîꞌpî 75 kaisarî tîpemonkonoyamîꞌ pokonpe.
15 Miarî Egito po mîîkîrî utamokon Jacó koꞌmamîꞌpî tîîsaꞌmanta pîkîrî.
16 Mîrîrî tîpo inmukuyamîꞌ rîꞌsan utamokon eꞌtîꞌkaꞌpî. Mîrîrî tîpo toꞌ esaꞌrîꞌpî mennaꞌpoꞌpî toꞌya Siquém pata pona toꞌ yuꞌnaꞌtîi. Maasa pra miarî utamokon Abraão nurîꞌtî nennaꞌpî pe awanîꞌpî. Hamor payanyamîꞌ rîꞌsan pîꞌ mîrîrî pata yennaꞌpîiya moropai yeꞌmaꞌpîiya tîniru ke tîpata pe aweꞌtoꞌpe.
17 Abraão pîꞌ îꞌ kupî tîuya taꞌpî tîuya kupî Paapaya pra tîîse mîrîrî weiyu eseporî tanne, utamokon epansaꞌ wanîꞌpî mararî pra Egito pata po.
18 Mîrîrî yai tiaron Faraó enaꞌpî pata esaꞌ pe José epuꞌnen pepîn.
19 Mîîkîrîya utamokon nurîꞌtî yenkuꞌtîꞌpî moropai toꞌ tarumaꞌtîꞌpîiya kureꞌne. Mîrîrî yai toꞌ munkîyamîꞌ teesenposanon yenpaꞌka meꞌpoꞌpîiya toꞌ eꞌtîꞌkatoꞌpe.
20 Mîrîrî koreꞌta Moisés esenpoꞌpî morî more. Mîîkîrî tîwarîkkaꞌpî isanya itunya eseurîwîꞌne kapoi kaisarî.
21 Mîrîrî tîpo mîîkîrî yenpaꞌkasaꞌ toꞌya tanne Moisés eporîꞌpî pata esaꞌ Faraó yensiya. Mîîkîrî tîwarîkkaꞌpîiya tînre pe.
22 Mîrîrî yeꞌnen mîîkîrî esenupaꞌpî tamîꞌnawîrî Egito ponkon esenupatoꞌ pîꞌ. Epuꞌnen pe awanîꞌpî. Ipîkku pe awanîꞌpî. Moropai teeseurîma epuꞌnen pe awanîꞌpî. Îꞌ rî kupîiya yai morî pe awanîꞌpî —taꞌpî Estêvãoya.
23 —Mîrîrî tîpo aꞌyekeꞌton pe teenai asakîꞌne pemonkon konoꞌ kaisarî tîwanî yeꞌka pe Moisés esenumenkaꞌpî ipemonkonoyamîꞌ aneraꞌmapai tîwanî pîꞌ.
24 Mîrîrî yai teepîsanon eraꞌmaꞌpîiya, Egito pon moropai tonpa Judeu yarakkîrî. Mîîkîrî tarumaꞌtînen pîꞌ eeseꞌmaꞌpî, moropai iwîꞌpîiya.
25 Mîrîrî pîꞌ Moisés esenumenkaꞌpî, uurî wenai upemonkonoyamîꞌya epuꞌtî tîpîikaꞌtîkon Paapaya kaiꞌma, tîîse epuꞌtî toꞌya pîn.
26 Mîrîrî tîpo erenmaꞌsaꞌ pe inîꞌrî tiaronkon teepîsanon eraꞌmaꞌpîiya. Inkamoro pia attîꞌpî. Inkamoro wanîꞌpî itonpayamîꞌ Judeuyamîꞌ pe. Inkamoro pîikaꞌtî kaiꞌma eesenumenkaꞌpî. Toꞌ rataikai attîꞌpî. Mîrîrî yeꞌnen taꞌpîiya: “Warayoꞌkon, amîrîꞌnîkon uyonpayamîꞌ, ayakon yarakkîrî eekoreꞌma mîrîrî îꞌ waniꞌ awanî yeꞌnen?” taꞌpîiya toꞌ pîꞌ.
27 Tîîse manniꞌ tîwanîyakon tarumaꞌtînenya Moisés tukkaꞌpî. Taꞌpîiya: “Amîrî eꞌkupî mîrîrî anna yepuru pe. Oꞌnon yeꞌka pe anna esaꞌ pe akupî annaya kaiꞌma awanî mîrîrî?” taꞌpîiya ipîꞌ.
28 “Uurî anwîpai awanî mîrîrî, koꞌmanpara Egito pon warayoꞌ wîꞌpîya warantî?”
taꞌpîiya ipîꞌ.
29 Mîrîrî eta tîuya pe Moisés epeꞌpî. Attîꞌpî Egito pata poi Midiã pata pona koꞌmanse. Miarî Moisés munkîyamîꞌ ton esenpoꞌpî asakîꞌne —taꞌpî Estêvãoya.
30 —Asakîꞌne pemonkon konoꞌ (40) kaisarî Moisés koꞌmansaꞌ tanne, inserî esenpoꞌpî iipia. Mîîkîrî esenpoꞌpî keren po apoꞌ mîꞌnî yeꞌ taransen yaꞌ, manniꞌ wîꞌ iteseꞌ Sinai mîrîrî pia.
31 Mîrîrî yeꞌnen Moisésya eraꞌmaꞌpî mîrîrî apoꞌ teesewankonoꞌmai kureꞌne teesenumenkai. Mîrîrî eraꞌmai aweꞌrennukuꞌpî inîꞌ panpîꞌ morî pe eraꞌmapa kaiꞌma. Mîrîrî yai Paapa maimu etaꞌpîiya.
32 “Uurî atamokon nurîꞌtî yepotorî, Abraão nurîꞌtî napurîꞌpî,moropai Isaque nurîꞌtî napurîꞌpî, moropai Jacó nurîꞌtî napurîꞌpî”,
taꞌpîiya. Mîrîrî taiya eta tîuya yai, Moisés esiꞌnîpîꞌpî aweꞌtîtîkaꞌpî kureꞌne. Eranneꞌ pe tîwanî yeꞌnen eraꞌmaiya pîn.
33 Moropai Paapa eseurîmaꞌpî. Taꞌpîiya ipîꞌ:“Aꞌsaꞌsaꞌ moꞌkakî, maasa pra sîrîrî pata wanî morî pe maasa pra uurî wanî yeꞌnen tarî”,
taꞌpîiya.
34 “Upemonkonoyamîꞌ eꞌtarumaꞌtîeraꞌma pîꞌ wai kureꞌne Egito po.Toꞌ karau eta pîꞌ wai.Mîrîrî yeꞌnen inkamoro pîikaꞌtîiawennaꞌpopa Egito pona.Ayarimauya sîrîrî”,
taꞌpîiya. Mîrîrî warantî Paapa eseurîmaꞌpî Moisés yarakkîrî —taꞌpî Estêvãoya.
35 —Mîîkîrî Moisés manniꞌ innape ikupî toꞌya pra awanîꞌpî. Taꞌpî toꞌya ipîꞌ: “Anna yepotorî pe kaiꞌma awanî? Anna yepotorî pe akupî annaya pra man tiwin kin”, taꞌpî toꞌya ipîꞌ. Tîîse Paapaya ikuꞌsaꞌ wanîꞌpî toꞌ pîikaꞌtîtoꞌpeiya kaiꞌma. Manniꞌ mîꞌnî yeꞌ taransen yawon esenpoꞌpî winîpai Paapaya taasaꞌ epuꞌtîꞌpîiya.
36 Mîîkîrî Moisésya tîpemonkonoyamîꞌ Judeuyamîꞌ moꞌkaꞌpî Egito poi. Mîrîrî yai ikupî eserîkan pepîn kupîꞌpîiya, kureꞌnan esenumenkantoꞌ kupîꞌpîiya, manniꞌ tuna Suuyu tuna kureꞌnan nuurukkutî toꞌya yai. Moropai asakîꞌne pemonkon konoꞌ tîîkoꞌmamî yai, keren po Moisésya ikupîꞌpî toꞌ neraꞌmaton pe —taꞌpî Estêvãoya.
37 —Mîîkîrî Moisésya taꞌpî tîpemonkonoyamîꞌ pîꞌ:“Apîikaꞌtînenkon ton yarima Paapaya pe man,tîmaimu ekaremeꞌnen uyarimaꞌpî tîuya warantî”,
taꞌpîiya toꞌ pîꞌ.“Ayonpakon perî tîweꞌsen iipî pe man”,
taꞌpîiya toꞌ pîꞌ.
38 Mîîkîrî Moisés koꞌmamîꞌpî keren po inkamoro tîpemonkonoyamîꞌ pokonpe. Miarî mîîkîrî wanîꞌpî utamokon nurîꞌtî pokonpe, moropai manniꞌ inserî warainon ponkon pe awanîꞌpî wîꞌ iteseꞌ Sinai pia yarakkîrî eeseurîmaꞌpî. Mîrîrî yai mîîkîrî Moisésya Paapa winîpainon itekare ipatîkarî enen koꞌmannîtoꞌ pîꞌ teeseurîmasen yapisîꞌpî. Mîrîrî ekaremekîꞌpîiya uurîꞌnîkon pîꞌ.
39 Miarî keren po tîwanîkon yai, innape Moisés kupî utamokon rîꞌsanya pra awanîꞌpî tesaꞌkon pe awanî. Mîrîrî yeꞌnen itentai toꞌ enaꞌpî. Mîrîrî yeꞌnen ennaꞌpopai toꞌ wanîꞌpî Egito pona.
40 Taꞌpî toꞌya Arão pîꞌ:“Unapurîkon ton konekakî eꞌmaiꞌ pe tuutîsanonya yaatoꞌpe,toꞌ wenairî wîtîntoꞌpe. Maasa pra Moisés oꞌnon poro renamo attîꞌpî mîrîrî,uurîꞌnîkon moꞌkaꞌtîpon Egito pata poi.Oꞌnon pata awanî esepuꞌtî pra awanî sîrîrî”,
taꞌpî toꞌya.
41 Mîrîrî yeꞌnen Arãoya ikonekaꞌpî toꞌ napurî ton. Paaka more warantî ikonekaꞌpîiya. Moropai mîîkîrî paaka more yapurîꞌpî toꞌya. Yapurî tîuyaꞌnîkon wenai tekînkon wîꞌpî toꞌya yapurîkonpa kaiꞌma. Festa pîꞌ toꞌ wanîꞌpî moropai kureꞌne toꞌ atausinpaꞌpî mîîkîrî tîkonekaꞌpîkon yapurî tîuyaꞌnîkon pîꞌ.
42 Mîrîrî yeꞌnen Paapa atarimaꞌpî toꞌ pia pai moropai toꞌ rumakaꞌpîiya sirikkîyamîꞌ yapurîtoꞌpe toꞌya. Mîrîrî kupîꞌpî toꞌya Paapa maimu ekaremeꞌnenanya taasaꞌ yawîrî. See warantî imenukaꞌpî toꞌya pena. Paapaya taꞌpî inkamoro Judeuyamîꞌ pîꞌ:“Uyapurîkonpa ayekînkon wîîsaꞌyaꞌnîkon pepîn mîrîrîasakîꞌne pemonkon konoꞌ kaisarî (40) keren po awanîkon yai?
43 Amîrîꞌnîkonya anapurîkon pe ankonekaꞌpîkoniteseꞌ Moloque yarîꞌpî itewîꞌ ton tappîi tîkonekai.Mîrîrî warantî rî nîrî anapurîkon Renfã yarîꞌpîyaꞌnîkon.Mîrîrî ankupîꞌpîkon kaiwanoꞌ warainon awanîꞌpî yapurîkonpa.Mîrîrî wenai apatakon yapai amîrîꞌnîkon yarî meꞌpouya kupî sîrîrî aminke, Babilônia mîî winîkîi”,
taꞌpî Paapaya. Mîrîrî warantî penaron Paapa maimu ekaremeꞌnenanya imenukaꞌpî —taꞌpî Estêvãoya.
44 —Pena utamokon nurîꞌsanya tappîi konekaꞌpî mîrîrî ta siꞌma Paapa yapurîkonpa. Mîrîrî tappîi ta Paapa wanîꞌpî toꞌ yarakkîrî keren po. Mîrîrî tappîi konekaꞌpî toꞌya ikuꞌtoꞌpe Moisésya taꞌpî Paapaya yawîrî. Moisés pia Paapa nenpoꞌpî manniꞌ warantî ikonekaꞌpî toꞌya.
45 Mîrîrî tappîi yapiꞌsaꞌ toꞌya wanîꞌpî. Moropai tîtamokon nurîꞌtî saꞌmanta yai ipayanyamîꞌ rîꞌsan pia aweꞌnîmîꞌpî. Tuutîkon yai mîrîrî tappîi yarîꞌpî toꞌya Josué pîkîrî sîrîrî pata pona. Mîrîrî yai toꞌ eseyaꞌnamaꞌpî sîrîrî pata ya tîîkoꞌmansenon yarakkîrî. Inkamoro moꞌkaꞌpî toꞌya maasa pra Paapaya toꞌ yenpaꞌkaꞌpî inkamoro pataꞌpî yaꞌ tîpemonkonoyamîꞌ koꞌmantoꞌpe. Mîrîrî tîpo mîrîrî tappîi eꞌnîmîꞌpî tarî toꞌ koreꞌta tesaꞌkon pe Davi wanî pîkîrî.
46 Mîîkîrî Davi eraꞌmaꞌpî Paapaya tîwakîri pe. Mîrîrî yeꞌnen Daviya Paapa pîꞌ esatîꞌpî epîremantoꞌ yewîꞌ ton konekapa kaiꞌma, utamokon Jacó nurîꞌtî napurîꞌpî yapurîpa kaiꞌma.
47 Tîîse ikonekaiya pîn. Inmurîꞌpî Salomãoya neken Paapa yapurîtoꞌ yewîꞌ ton konekaꞌpî —taꞌpî Estêvãoya.
48 —Tîîse mîrîrî wîttî itenya ke warayoꞌ nîkonekaꞌpî ta pîꞌ Paapa koꞌmamî eserîke pra awanî. Maasa pra kureꞌnan mîîkîrî tamîꞌnawîronkon yentainon.
49 Mîrîrî pîꞌ Paapa maimu ekaremeꞌnen eseurîmaꞌpî. Taꞌpîiya pena see warantî:“Uukoꞌmantoꞌ wanî kaꞌ po,miarî siꞌma tamîꞌnawîron koꞌmannîpîuya.Mîrîrî yeꞌnen sîrîrî pata wanî siꞌmîrikkî pe.Ipona uꞌpu tîrîuya eserîke awanî.
50 Kureꞌne itentai wanî yeꞌnenîꞌ yeꞌka see wîttî konekayaꞌnîkon ita uukoꞌmantoꞌ ton?Oꞌnon pata pata nai uurî erîꞌkaꞌtoꞌ ton?Tamîꞌnawîrî unkonekaꞌpî pe awanîepuꞌtîyaꞌnîkon pra naatî?”
taꞌpî Paapaya taꞌpî Profetaya.
51 Moropai Estêvão eseurîma koꞌmannîpîꞌpî. Taꞌpîiya: —Îꞌ waniꞌ awanî yeꞌnen yuukuyaꞌnîkon pra awanîkon mîrîrî? Paapa epuꞌnenan pepîn warantî awanîkon. Îꞌ waniꞌ awanî yeꞌnen saꞌme puꞌkuru ayewankon kupîyaꞌnîkon? Îꞌ waniꞌ awanî yeꞌnen Paapa maimu anetapai pra awanîkon? Atamokon nurîꞌtî warantî awanîkon. Inkamoroya Morî Yekaton Wannî yewanmîrîꞌpî warantî yewanmîrîyaꞌnîkon.
52 Inkamoroya pena Paapa maimu ekaremeꞌnenan tarumaꞌtîꞌpî. Morî Paapa poitîrî iipî pîꞌ teeseurîmasanon tîꞌkaꞌpî toꞌya nîrî. Mîrîrî warantî nîrî amîrîꞌnîkonya mîîkîrî rumakaꞌpî iwîtoꞌpe toꞌya.
53 Paapa winîpainon ankupîkon ton yapisîꞌpîyaꞌnîkon inserîyamîꞌ wenai tîîse mîrîrî yawîrî pra aakoꞌmamîkon mîrîrî —taꞌpî Estêvãoya.
Estêvão Wîî Toꞌya Tîꞌ Ke Tîpaꞌtîpîꞌse
54 Eta tîuyaꞌnîkon ya teepîremasanon wanîꞌpî teekoreꞌmai kureꞌne Estêvão winîkîi.
55 Mîrîrî yai Morî Yekaton Wannî wanîꞌpî Estêvão esaꞌ pe. Mîrîrî yai kaꞌ yekaya eraꞌmaꞌpîiya. Paapa eraꞌmaꞌpîiya aꞌka pe awanî. Moropai Jesus eraꞌmaꞌpîiya Paapa meruntîri winî aapîtaꞌpîꞌsaꞌ satippe.
56 Mîrîrî yeꞌnen taꞌpîiya: —Aꞌkî, kaꞌ esettapurukasaꞌ eraꞌma pîꞌ wai. Moropai Paapa narimaꞌpî manniꞌ pemonkon pe eraꞌma pîꞌ wai imeruntîri winî —taꞌpîiya.
57 Tîîse anetapai pra tîwanîkon wenai tîpanakon yettapurîꞌpî toꞌya. Moropai meruntî ke tîwentaimepîtîkon yeꞌka pe Estêvão winîkîi toꞌ iipîꞌpî.
58 Moropai inkamoroya yapisîꞌpî yenpaꞌkaꞌpî toꞌya cidade poi. Mîîkîrî paꞌtîꞌpî piaꞌtîꞌpî toꞌya tîꞌkon ke. Mîrîrî yai tîponkon moꞌkaꞌpî toꞌya mîîkîrî warayoꞌ maasaron Saulo pia irumakaꞌpî toꞌya eraꞌmatoꞌpeiya kaiꞌma Estêvão paꞌtî tîuyaꞌnîkon tanne.
59 Mîrîrî yai tîpaꞌtîpîtî toꞌya tanne Estêvãoya Jesus yannoꞌpî. Taꞌpîiya: —Uyepotorî Jesus, uyekaton yapiꞌkî aapia uukoꞌmantoꞌpe —taꞌpîiya.
60 Mîrîrî tîpo aweꞌsekunkaꞌpî moropai mîîkîrî entaimeꞌpî meruntî ke. Taꞌpîiya: —Uyepotorî, insamoro kîtarumaꞌtîi imakuiꞌpî toꞌ nîkupî wenai. Mîrîrî taa tîpo Estêvão saꞌmantaꞌpî. Mîrîrî eraꞌmaꞌpî manniꞌ maasaron Sauloya. Estêvão wîî taa toꞌya pîꞌ inna taasaiꞌya wanîꞌpî.
