Jesus Naipontîꞌsan Nîkupîꞌpîkon Yekare Atos 8:1-40
8 8:1,2 Estêvão wîî toꞌya tîpo tiaronkon innape Jesus kuꞌnenan Jerusalém ponkon karawaꞌpî mararî pra. Moropai inkamoroya Estêvão esaꞌrîꞌpî yuꞌnaꞌtîꞌpî. Mîrîrî weiyu yai innape Jesus kuꞌnenan manniꞌkan Jerusalém ponkon eꞌtarumaꞌtî piaꞌtîꞌpî innape Jesus kupî toꞌya wenai. Moropai kureꞌnan inkamoro ataimerunpaꞌpî moropai toꞌ wîtîpîtîꞌpî Judéia pata pona moropai tiaron Samaria pata pona. Tîîse Jesus naipontîꞌsan neken koꞌmamîꞌpî miarî Jerusalém po.
2 Eraꞌmakî 8:1
3 Mîrîrî yai Sauloya innape Jesus kuꞌnenan tarumaꞌtîpîtîꞌpî. Innape Jesus kuꞌtoꞌ toꞌya anaretîꞌkapai aweꞌpîtîꞌpî. Mîrîrî wenai toꞌ yuwapîtîꞌpîiya toꞌ yewîꞌkon ta pîꞌ tewonpîꞌse toꞌ yapiꞌpîtîꞌpîiya. Toꞌ tîworokaꞌpîꞌse toꞌ yenpaꞌkapîtîꞌpîiya toꞌ yewîꞌ tapai atarakkannîtoꞌ yewîꞌ ta toꞌ yarîpa.
4 Mîrîrî wenai innape Jesus kuꞌnenan pemonkonyamîꞌ ataimerunpaꞌpî moropai toꞌ eꞌparaipîkaꞌpî. Toꞌ wîtîpîtîꞌpî patakon kaisarî. Miarî tuutîsaꞌkon yai itekare ekaremekîꞌpî toꞌya, tîwî ikupî toꞌya pra.
Filipe Wîtî Samaria Pona Itekare Ekaremeꞌse
5 Inkamoro yonpa Filipe wîtîꞌpî Samaria pata pona. Miarî itekare pîꞌ eeseurîmaꞌpî nîrî. Jesus wanî Paapa nîmenkaꞌpî pe ekaremeꞌpîtîꞌpîiya.
6 Moropai miarîronkon pemonkonyamîꞌya imaimu etaꞌpî morî pe tîîtîꞌnapanse toꞌ wanîꞌpî. Moropai Paapa meruntîri ke îꞌ ikupî eserîkan pepîn kupî Filipeya eraꞌmaꞌpî toꞌya.
7 Imakuiꞌpî yekaton yarakkîrî tîweꞌsanon pemonkonyamîꞌ inkamoro yapai imariwaꞌyamîꞌ yenpaꞌkaiya eraꞌmaꞌpî toꞌya. Moropai tiaronkon priꞌyawonkon pepîn ekeꞌnankon moropai asakoiꞌkon pepîn inkamoro yepiꞌtî Filipeya eraꞌmaꞌpî toꞌya.
8 Mîrîrî yeꞌnen kureꞌne taatausinpai mîrîrî cidade ponkon pemonkonyamîꞌ wanîꞌpî.
Piaꞌsan Pe Tîweꞌsen Simão Yekare
9 Miarî mîrîrî cidade po tîîkoꞌmansen warayoꞌ wanîꞌpî iteseꞌ Simão. Mîîkîrî Simão eꞌpîtîꞌpî piaꞌsan pe tîweꞌsen. Miarî Samaria pata ponkonya Simão yeseru eraꞌmapîtîꞌpî. Îꞌ ikupî eserîkan pepîn kuꞌpîtîiya. Toꞌ esenumenkaꞌpî kureꞌne. Mîrîrî yeꞌnen ipîkku pe Simão atapurîꞌpî toꞌ rawîrî.
10 Mîrîrî yeꞌnen taapîtîꞌpî Samaria pata ponkonya, ipîkkukon moropai îꞌ ton pînon, tamîꞌnawîronkonya taapîtîꞌpî ipîꞌ: —Aꞌkî, mîserî warayoꞌ yeseru wanî mîrîrî. Paapa meruntîri ke ikupî eserîkan pepîn kuꞌpîtîiya kaiꞌma. Meruntî mîîkîrî anna napurîton taa pîꞌ toꞌ koꞌmamîꞌpî.
11 Kureꞌne toꞌ esenumenkaꞌpî ipîꞌ. Maasa pra pena pata pai îꞌ kupîiya eraꞌmapîtîꞌpî toꞌya Samaria pata po. Mîrîrî yeꞌnen iwenairî toꞌ wîtîpîtîꞌpî îꞌ ikupî eserîkan pepîn kuꞌpîtîiya yeꞌnen.
12 Mîrîrî koreꞌta Filipe maimu etaꞌpî toꞌya, Jesus yekare ekaremekîiya yeꞌnen. Paapa wanî tamîꞌnawîronkon esaꞌ pe taa Filipeya wenai innape ikupîꞌpî toꞌya. Mîrîrî eta tîuyaꞌnîkon wenai innape ikupîꞌpî toꞌya. Moropai warayoꞌkon pîꞌ moropai wîriꞌsanyamîꞌ pîꞌ nîrî, innape Jesus kupî toꞌya wenai toꞌ yenpatakonaꞌpîiya.
13 Inkamoro koreꞌta nîrî mîîkîrî Simão piaꞌsanya innape ikupîꞌpî. Mîrîrî yeꞌnen eesenpatakonaꞌpî nîrî. Mîrîrî tîpo Filipe yarakkîrî aasarîꞌpî itekare ekaremekî pîꞌ Filipe wanî tanne. Mîrîrî yai ikupî eserîkan pepîn kuꞌpîtî Filipeya eraꞌmaꞌpîiya. Moropai Simão esenumenkapîtîꞌpî ipîꞌ kureꞌne. —Filipe nîrî kaꞌrî ikupî eserîkan pepîn kuꞌnen —taapîtîꞌpîiya ipîꞌ.
14 Mîrîrî yai Jerusalém ponkon Jesus naipontîꞌsanya Samariaponkonya innape Jesus kuꞌsaꞌ yekare eta tîuyaꞌnîkon yeꞌnen, Pedro João yarimaꞌpî toꞌ yekare etai, innape toꞌ wanî etai.
15 8:15,16 Mîrîrî yai Pedro João yarakkîrî teerepamîkon yai inkamoro innape Jesus kupîtîponoꞌsan eporîꞌpî toꞌya. Toꞌ pona toꞌ epîremaꞌpî Morî Yekaton Wannî enasaꞌ pra awanî yeꞌnen toꞌ esaꞌ. Innape Jesus kuꞌsaꞌ toꞌya neken awanîꞌpî, mîrîrî wenai toꞌ esenpatakonasaꞌ wanîꞌpî.
16 Eraꞌmakî 8:15
17 Mîrîrî yeꞌnen toꞌ puꞌpai pona tenyakon tîrîꞌpî toꞌya. Moropai toꞌ epîremaꞌpî Morî Yekaton Wannî enatoꞌpe toꞌ esaꞌ pe.
18 Mîrîrî eraꞌmaꞌpî Simãoya. Warayoꞌ puꞌpai pona miaꞌ tîîsaꞌ yai Morî Yekaton Wannî iipî kaiꞌma eesenumenkaꞌpî.
19 Mîrîrî yeꞌnen taꞌpîiya Pedro pîꞌ: —Mîrîrî nîrî meruntî yuꞌse wai. Anîꞌ puꞌpai pona uyenya tîîsauꞌya ya, Morî Yekaton Wannî enatoꞌpe itesaꞌ pe —taꞌpîiya. Mîrîrî yeꞌnen tîniru kainumîꞌpîiya Pedro pia, mîrîrî yepeꞌ ton pe.
20 Tîîse imaimu yuukuꞌpî Pedroya: —Atîkî apoꞌ yaꞌ atînirurî yarakkîrî, maasa pra Paapa meruntîri anennapai wai kaiꞌma eesenumenka yairî pra —taꞌpîiya.
21 —Anna pokonpe Paapa esenyakaꞌmatoꞌ pîꞌ eesenyakaꞌma eserîke pra nai. Maasa pra yairî pra ayeseru awanî yeꞌnen, Paapa winîkîi seruꞌyeꞌ pe awanî yeꞌnen.
22 Esewankonoꞌmakî yairon pepîn eesenumenkatoꞌ winîpai irumakakî Paapa pîꞌ tîîwanmîra ikuꞌtoꞌpeiya —taꞌpîiya.
23 —Maasa pra anna pîꞌ kinmuwanî pîꞌ nai kureꞌne anna winîkîi, îꞌ kupî annaya eraꞌmaya yeꞌnen —taꞌpî Pedroya ipîꞌ. —Kureꞌne imakuiꞌpî pe ayeseru wanî, ayentai imakuiꞌpî enasaꞌ man, —taꞌpîiya. Tarîpai eesenumenkaꞌpî mîrîrî taꞌpî Pedroya pîꞌ, Paapaya ayenumî apoꞌ yaꞌ taꞌpîiya pîꞌ.
24 Mîrîrî yeꞌnen Simãoya taꞌpî: —Moriya esaꞌtî uurî ton pe Paapa pîꞌ —taꞌpîiya. —Esaꞌtî apoꞌ yaꞌ uyenumîiya namai, manniꞌ taayaꞌnîkon manniꞌ yaꞌ —taꞌpî Simãoya.
25 Mîrîrî tîpo, Paapa maimu ekaremekî tîpo Pedro João ennaꞌpoꞌpî Jerusalém pona Samaria poi. Mîrîrî pe, tuutîkon pe eꞌma taawîrî Samaria pata poronkon pîꞌ itekare ekaremekîꞌpî toꞌya.
Etiopia Pon Yarakkîrî Filipe Eseurîma
26 Samaria po Filipe wanî tanne, Uyepotorîkon narimaꞌpî inserî eseurîmaꞌpî Filipe yarakkîrî. —Ekonekakî moropai atîkî eꞌma taawîrî —taꞌpî inserîya. Filipe ekonekaꞌpî moropai attîꞌpî Jerusalém poi tuutîsen eꞌma Gaza pona taawîrî. Mîrîrî eꞌma wanîꞌpî tuꞌke pemonkonyamîꞌ wîtîtoꞌpe pra.
27 8:27,28 Moropai Filipe wîtîꞌpî miarî yaꞌ. Mîrîrî eꞌma ta warayoꞌ eporîꞌpî Filipeya. Paapa yapurîi wîtîꞌpî Jerusalém pona mîîkîrî eporîꞌpîiya, tîwennaꞌposen tîpata Etiopia pon. Rainha poitîrî pe tîweꞌsen, miarî tîniru konekanen pe awanîꞌpî, teesenyakaꞌmasanon pia itîînen pe. Mîrîrî yeꞌnen Rainha Candace poitîrî pe awanîꞌpî kureꞌne. Mîîkîrîya Paapa maimu ekaremeꞌnen profeta Isaías nurîꞌtî kaaretarî erenkaꞌpî tuutî pe tararan po siꞌma.
28 Eraꞌmakî 8:27
29 Mîrîrî yai Morî Yekaton Wannîya taꞌpî Filipe pîꞌ: —Kaꞌneꞌ pe eꞌrennuꞌkî iipia —taꞌpîiya. —Atîkî yarakkîrî —taꞌpî Morî Yekaton Wannîya.
30 Mîrîrî yeꞌnen Filipe ekaꞌtumîꞌpî kaꞌneꞌ pe. Moropai mîrîrî profeta Isaías kaaretarî erenka mîîkîrî warayoꞌya etaꞌpî Filipeya. Moropai ekaranmapoꞌpîiya. —Mîrîrî erenkaya manniꞌ epuꞌtî pîꞌ nan? —taꞌpî Filipeya ipîꞌ.
31 Tîîse mîrîrî yuukuꞌpî warayoꞌya: —Oꞌnon yeꞌka pe epuꞌtîuya eꞌpainon anîꞌya ekaremekî pra tîîse? —taꞌpîiya Filipe pîꞌ. —Enuꞌkî uupia eereutapa —taꞌpîiya.
32 Mîîkîrî warayoꞌ nîrenkaꞌpî profeta Isaías nurîꞌtî kaaretarî wanîꞌpî see warantî:Carneiro yapisî toꞌya moropai yarî toꞌya iwîtoꞌ pataꞌseꞌ yaꞌ.Mîîkîrî itekîn wanî moo,îꞌ kuꞌnenan tîsiꞌpo yaꞌtînenan winîkîi.Mîrîrî warantî nîrî mîîkîrî wanî,îꞌ taiya pepîn tîwinîkîi imakuiꞌpî kuꞌnenan pîꞌ.
33 Mîîkîrî wanî itarumaꞌtîsaꞌ petîîse anîꞌya taa pra awanî ipîꞌ.Morî mîîkîrî îꞌ imakuiꞌpî kupîtîpon pepîn,taa anîꞌya pra awanî.Tarî aakoꞌmantoꞌ ataretîꞌka inmuku ton pra tîîse.Mîrîrî yeꞌnen anîꞌ eseurîma eserîke pra awanîinmukuyamîꞌ rîꞌsan pîꞌ, moropai ipayanyamîꞌ rî san pîꞌ.
Mîrîrî warantî ekaremekîꞌpî Isaías nurîꞌtîya pena.
34 Mîrîrî yeꞌnen warayoꞌya taꞌpî Filipe pîꞌ: —Moriya, upîꞌ ekaremeꞌkî sîrîrî anîꞌ pîꞌ kin mîîkîrî profeta Isaías eseurîma mîrîrî? Tîpîꞌ rî kaꞌrî, tiaron pîꞌ kaꞌrî eeseurîma? —taꞌpî warayoꞌya Filipe pîꞌ.
35 Mîrîrî yeꞌnen Filipeya ekaremekî piaꞌtîꞌpî mîrîrî profeta Isaías kaaretarî eseurîma manniꞌ wanî mîrîrî. —Jesus yekare pîꞌ teeseurîmasen pe. Mîîkîrî tarumaꞌtîꞌpî toꞌya tîîse mîîkîrîya îꞌ taa pîn tîtarumaꞌtînan pîꞌ tîwînenan pîꞌ. Tamîꞌnawîrî mîîkîrîya apîꞌtanîpîꞌpî îꞌ tîkai pra —taꞌpî Filipeya. Mîrîrî warantî Jesus yekare ekaremekîꞌpî Filipeya.
36 Tuutîkon yeꞌka pe teeseurîmakon pe toꞌ erepamîꞌpî tuna ena pona. Mîrîrî yeꞌnen taꞌpî mîîkîrî warayoꞌya: —Aꞌkî tuna tarî man, —taꞌpî warayoꞌya. Mîrîrî yeꞌnen taꞌpîiya: —Esenpatakona ya, îꞌ waniꞌ awanî pepîn?
37 Taꞌpî Filipeya: —Tamîꞌnawîrî ayewan ke innape ikupî pîꞌ nan? —taꞌpî Filipeya. —Inna, innape Jesus Cristo kupî pîꞌ wai Paapa munmu pe awanî —taꞌpî warayoꞌya Filipe pîꞌ.
38 Moropai mîîkîrî warayoꞌya tararan emîꞌpannîpî meꞌpoꞌpî moropai toꞌ autîꞌpî saꞌnîrî. Toꞌ enaꞌpî tuna ka, moro yenpatakonaꞌpî Filipeya.
39 Mîrîrî tîpo tuna kapai toꞌ eseuꞌka pe, Morî Yekaton Wannîya Filipe yarîꞌpî. Inîꞌ eeseraꞌma pra eenaꞌpî. Warayoꞌya inîꞌ eraꞌma pra eenaꞌpî tîîse mîrîrî tîpo warayoꞌ wîtîꞌpî tîpata pona kureꞌne taatausinpai.
40 Mîrîrî tîpo tiwinarî Filipe esepuꞌtîꞌpî. Azoto cidaderî po tîwanî epuꞌtîꞌpîiya. Moropai mîîkîrîya tuutî pe itekare ekaremekî pinunpaꞌpî patakon poro Paapa wanî pîikaꞌtîton pe, Cesaréia cidaderî pona teerepamî tîpose.
