Jesus Naipontîꞌsan Nîkupîꞌpîkon Yekare Atos 9:1-43
9 Jerusalém po tîwanî yai Sauloya innape Jesus kuꞌnenan tarumaꞌtîpîtîꞌpî. Taapîtîꞌpîiya toꞌ pîꞌ: —Innape Jesus kuꞌtoꞌyakon rumakayaꞌnîkon pra awanîkon ya, atîꞌkauyaꞌnîkon —taꞌpîiya. Moropai attîꞌpî teepîremasanon esanon yepotorî pia.
2 Mîîkîrî wîtîꞌpî kaareta esaꞌse imaimu yaponseꞌ tiaronkon innape Jesus kuꞌnenan tarumaꞌtîi Damasco po Judeuyamîꞌ epereꞌtoꞌ yewîꞌ ta tuutîpa kaiꞌma. Maasa pra mîrîrî kaareta wenai Jesusya tenupatoꞌkon yawîrî tîîkoꞌmansenon ekaremekî Judeuyamîꞌ esanonya ya, toꞌ yarîpa Jerusalém pona, warayoꞌkon moropai wîriꞌsanyamîꞌ atarakkannîtoꞌ yewîꞌ ta.
3 Mîrîrî tîpo attîꞌpî. Aminke pra eerepamî winîkîi Damasco pona eꞌma ta aꞌka enaꞌpî Saulo pona.
4 Mîîkîrî esenumîꞌpî non pona. Moropai mai teeseurîmasen etaꞌpîiya.
—Saulo, îꞌ waniꞌ yeꞌnen utarumaꞌtîya mîrîrî? —taꞌpî maiya.
5 Moropai Sauloya taꞌpî: —Anîꞌ kin amîrî, uyepotorî? —taꞌpî Sauloya. Moropai Maiya taꞌpî: —Uurî Jesus. Itarumaꞌtî pîꞌ aakoꞌmamî manniꞌ —taꞌpî maiya.
6 Moropai taꞌpîiya: —Eꞌmîꞌsaꞌkakî, erepankî Damasco pona. Miarî îꞌ ankupî ton ekaremekî toꞌya.
7 Moropai warayoꞌkon yarakkîrî tuutîsanon emîꞌpamîꞌpî tîîse îꞌ taa toꞌya pra awanîꞌpî. Mai teeseurîmasen etaꞌpî toꞌya tîîse anîꞌ eraꞌma toꞌya pîn.
8 Moropai Saulo eꞌmîꞌsaꞌkaꞌpî non poi moropai tenu yenponkaꞌpîiya tîîse anîꞌ eraꞌmaiya pra awanîꞌpî. Enkaruꞌne eenasaꞌ wanîꞌpî. Mîrîrî yeꞌnen itonpayamîꞌ yarakkîronkonya itenya pîꞌ yarîꞌpî Damasco pona.
9 Mîîkîrî koꞌmamîꞌpî eseurîwîꞌne wei kaisarî îꞌ teraꞌmai pra. Mîrîrî yai taꞌreꞌ yonpaiya pîn moropai îꞌ enîrîiya pîn.
10 Miarî wanîꞌpî Damasco po warayoꞌ Jesus nenupaꞌpî iteseꞌ Ananias. Mîîkîrîya Uyepotorîkonya tannotoꞌ etaꞌpî tîîweꞌneꞌpîtî warantî maasa pra iweꞌnasaꞌ pra tîîse. Taꞌpî Uyepotorîkonya ipîꞌ: —Ananias —taꞌpîiya. Yuukuꞌpîiya: —Tarî wai —taꞌpî Ananiasya.
11 —Ekonekakî moropai atîkî mîrîrî itoꞌsaron eꞌma taawîrî Judas yewîꞌ ta. Miarî warayoꞌ yuwata Tarso pon iteseꞌ Saulo. Mîîkîrî man teepîrema pîꞌ —taꞌpîiya.
12 —Teepîrema koreꞌta tîweꞌneꞌpîtî warantî warayoꞌ esenpo eraꞌmaꞌpîiya. Amîrî eraꞌmaꞌpîiya mîrîrî. Tenya tîrîiya ipuꞌpai pona inîꞌrî eraꞌmatoꞌpeiya kaiꞌma —taꞌpî Uyepotorîkonya Ananias pîꞌ.
13 Tîîse Ananiasya Uyepotorîkon maimu yuukuꞌpî see warantî: —Mîîkîrî warayoꞌ yekare pîꞌ tuꞌkankon eseurîma etasauꞌya wai. Innape amîrî kuꞌnenan winîkîi, Jerusalém ponkon innape tepotorîkon kuꞌnenan tarumaꞌtîiya etasauꞌya wai.
14 Mîîkîrî erepansaꞌ sîrîrî Damasco pona kaareta yarakkîrî. Tarîronkon innape Jesus kuꞌnenan ekaremeꞌsaꞌ Judeuyamîꞌ, teepîremasanon esanonya ya, toꞌ yarîiya Jerusalém pona. Inkamoro apîꞌ esaꞌnenan yarîiya atarakkannîtoꞌ yewîꞌ ta —taꞌpîiya.
15 Tîîse Uyepotorîkonya taꞌpî Ananias pîꞌ: —Atîkî maasa pra mîîkîrî warayoꞌ menkasauꞌya sîrîrî uurî ton pe, eesenyakaꞌmatoꞌpe uurî ekaremekî pîꞌ manniꞌkan Judeuyamîꞌ pepîn pîꞌ moropai toꞌ esaꞌkon pîꞌ moropai Judeuyamîꞌ pîꞌ nîrî.
16 Uurîya ekaremekî sîrîrî mîîkîrî Sauloya tîmoron epuꞌtoꞌpe uwenai, tamîꞌnawîrî umaimu ekaremekî tîuya wenai —taꞌpîiya.
17 Mîrîrî yeꞌnen Ananias wîtîꞌpî itoꞌsaron eꞌma taawîrî Judas yewîꞌ ta. Miarî mîîkîrî warayoꞌ eporîꞌpîiya. Saulo puꞌpai pona tenya tîrîꞌpîiya moropai taꞌpîiya: —Uyakon Saulo, Uyepotorîkonya uyarima pîꞌ man aapia. Manniꞌ Jesus Damasco yeꞌmarî ta eraꞌmaya neꞌtîkiniya uyarima pîꞌ man inîꞌrî eraꞌmapa kaiꞌma, moropai Morî Yekaton Wannî enatoꞌpe ayesaꞌ pe —taꞌpîiya.
18 Mîrîrî taiya pe itenu yapai moroꞌ piꞌpî warainon eꞌsorokaꞌpî. Moropai Sauloya eraꞌma piaꞌtîꞌpî inîꞌrî. Mîrîrî pe rî aweꞌmîꞌsaꞌkaꞌpî moropai eesenpatakonaꞌpî.
19 Mîrîrî tîpo tekkari yonpaꞌpîiya moropai pena tîwanîꞌpî warantî meruntî ke eenaꞌpî. Moropai mîîkîrî koꞌmamîꞌpî tuꞌke puꞌkuru pra wei kaisarî innape Jesus kuꞌnenan koreꞌta Damasco po.
Sauloya Itekare Ekaremekî Piaꞌtî Damasco po
20 Mîrîrî pe rî Damasco po mîîkîrî Sauloya itekare ekaremekî piaꞌtîꞌpî Judeuyamîꞌ epereꞌtoꞌ yewîꞌkon ta pîꞌ. Mîîkîrîya ekaremekî eꞌpîtîꞌpî: —Jesus wanî Paapa munmu pe —taapîtîꞌpîiya.
21 Mîrîrî eta tîuyaꞌnîkon wenai toꞌ wanîꞌpî teesenumenkai ipîꞌ. Taꞌpî toꞌya: —Aꞌkî, manniꞌ mîîkîrî Saulo Jesus yapurînenan inkamoro tarumaꞌtîpîtîtîpon. Mîîkîrîya toꞌ tarumaꞌtîpîtîꞌpî. Tarîpai mîîkîrî iipîꞌpî tarîwaya innape Jesus kuꞌnenan tarumaꞌtîpa kaiꞌma toꞌ yapiꞌse, inkamoro yarîpa teepîremasanon esanon pia toꞌ rumakapa kaiꞌma —taꞌpî toꞌya ipîꞌ.
22 Tîîse ekaremekîꞌpîiya inîꞌ panpîꞌ meruntî ke: —Mîîkîrî Jesus Paapa nîmenkaꞌpî pîikaꞌtîton pe wanî yairon pe. Meruntî ke ekaremekîꞌpîiya. Mîrîrî yeꞌnen Judeuyamîꞌ Damasco ponkonya imaimu waꞌtî eserîke pra awanîꞌpî. Kureꞌne toꞌ esenumenkaꞌpî ipîꞌ.
23 Mîrîrî tîpo tîkoꞌman pe wei tîîkoꞌmamî tîpo, inkamoro Judeuyamîꞌ emurukuntîꞌpî teeseurîmakonpa. Inkamoroya teeserukon konekaꞌpî îꞌ kupîkonpa iwinîkîi. Taꞌpî toꞌya: —Iwîpai awanî sîrîrî —taꞌpî toꞌya.
24 Tîîse mîrîrî yekare etaꞌpî Sauloya. Mîrîrî yeꞌnen îꞌ kupî toꞌya kupî tîwinîkîi epuꞌtîꞌpîiya. Inkamoro koꞌmamîꞌpî mîrîrî cidade yewaꞌtoꞌ woi manaꞌta eraꞌma pîꞌ Saulo epaꞌka ya yapisîkonpa, iwîkonpa kaiꞌma. Mîîkîrî nîmîkî pîꞌ toꞌ koꞌmamîꞌpî ewaron wei iwîkonpa kaiꞌma.
25 Tîîse ewaron ya innape Jesus kuꞌnenan Saulo nenupaꞌsanya Saulo yekaꞌmaꞌpî kureꞌnan waikaraꞌpî yaꞌ. Mîrîrî yaꞌ tîîse yenuꞌtîꞌpî toꞌya cidade iwaꞌtoꞌ poi winîkîi poro pona. Mîrîrî warantî Saulo wîîtoꞌ toꞌya esuwaꞌkaꞌpî.
Jerusalém Po Saulo Wanî
26 Moropai mîîkîrî wîtîꞌpî Jerusalém pona. Miarî innape Jesus kuꞌnenan anepuꞌpai awanîꞌpî toꞌ pokonpe tîwanîpa maasa pra innape Jesus kuꞌsaꞌ tîuya yeꞌnen. Tîîse eranneꞌ pe toꞌ wanîꞌpî ipîꞌ maasa pra tenkuꞌtîiyaꞌnîkon nama tîuyaꞌnîkon yeꞌnen.
27 Tîîse Barnabé erepamîꞌpî. Saulo yarîꞌpîiya Jesus naipontîꞌsan pia moropai eerepamîꞌpî. Ekaremekîꞌpîiya toꞌ pîꞌ: —Sauloya Jesus eraꞌmaꞌpî eꞌma ta. Moropai yarakkîrî eeseurîmaꞌpî. Mîrîrî yeꞌnen Saulo wanî tarîpai Jesus maimu pe teesenyakaꞌmasen pe. Damasco po meruntî ke itekare ekaremeꞌpîtîꞌpîiya —taꞌpî Barnabéya toꞌ pîꞌ.
28 Mîrîrî pata pai Sauloya Uyepotorîkon maimu ekaremekî piaꞌtîꞌpî Jerusalém poro meruntî ke.
29 Moropai grego maimu ta teeseurîmasanon yarakkîrî eeseurîmapîtîꞌpî. Tîîse toꞌ wakîri pe pra eeseurîmaꞌpî. Mîrîrî yeꞌnen iwî tîuyaꞌnîkon pîꞌ toꞌ esenumenkaꞌpî.
30 Mîrîrî yekare etasaꞌ tîuyaꞌnîkon yeꞌnen innape Jesus kuꞌnenanya Saulo yarîꞌpî Cesaréia cidaderî pona. Mîrîrî pata pai yarimakonpa kaiꞌma Tarso cidaderî pona attîtoꞌpe toꞌsarî.
31 Mîrîrî tîpo innape Jesus kuꞌnenan eꞌtarumaꞌtîtoꞌ tîꞌnapansaꞌ wanîꞌpî Judéia pata po moropai Galiléia pata po moropai Samaria pata po. Mîrîrî yeꞌnen inîꞌ panpîꞌ arinîke innape Jesus kuꞌnenan ena koꞌmannîpîꞌpî, maasa pra Morî Yekaton Wannîya tîpîikaꞌtîkon wenai. Mîrîrî warantî kureꞌne Uyepotorîkon namapîtîꞌpî toꞌya.
Enéias Yekare
32 Pedroya innape Jesus kuꞌnenan eraꞌmapîtîꞌpî patakon kaisarî. Mîrîrî yai attîꞌpî Lida cidaderî pona toꞌ eraꞌmapîꞌse.
33 Miarî warayoꞌ eporîꞌpîiya ekeꞌnepamîꞌpî iteseꞌ Enéias. Aakoꞌmansaꞌ wanîꞌpî eseurîwîꞌne miaꞌ pona tîîmoꞌtai konoꞌ kaisarî tîweꞌmîꞌsaꞌkai pra.
34 Mîîkîrî pîꞌ taꞌpî Pedroya: —Enéias, Jesus Cristoya ayepiꞌtî. Mîrîrî yeꞌnen eꞌmîꞌsaꞌkakî. Ayetteꞌ yanmakoꞌmakî —taꞌpîiya. Mîrîrî eta tîuya pe Enéias eꞌmîꞌsaꞌkaꞌpî. Moropai eesepiꞌtîsaꞌ wanîꞌpî.
35 Mîrîrî yai mîîkîrî eꞌmîꞌsaꞌkasaꞌ eraꞌma tîuyaꞌnîkonya yai Lida ponkonya innape Jesus kupîꞌpî. Moropai Sarona ponkonya nîrî innape ikupîꞌpî.
Dorcas Yekare
36 Jope cidaderî po awanîꞌpî wîriꞌ innape Jesus kuꞌnen. Mîîkîrî eseꞌ wanîꞌpî Tabita, Grega maimu ta Dorcas. Mîîkîrî eꞌpîtîꞌpî morî kuꞌpîtîꞌpîiya. Tîweꞌtarumaꞌtîsanon pîikaꞌtîpîtîꞌpîiya.
37 Mîrîrî koreꞌta, tiwin wei priꞌya pra Dorcas enaꞌpî. Moropai aasaꞌmantaꞌpî. Mîîkîrî esaꞌrîꞌpî ronaꞌpî toꞌya. Mîrîrî tîpo yarîꞌpî toꞌya kawînpan wîttî ta.
38 Tîîse Pedro yekare etaꞌpî innape Jesus kuꞌnenanya Lida cidaderî po, aminke pra Jope pîꞌ. Mîrîrî yeꞌnen asakîꞌne warayoꞌkon yaipontîꞌpî toꞌya ekaremeꞌse Pedro pîꞌ. Toꞌ wîtîꞌpî. Moropai Pedro eporîꞌpî toꞌya miarî. Taꞌpî toꞌya ipîꞌ:
—Pedro, aase kaꞌneꞌ pe Jope pona —taꞌpî toꞌya.
39 Moropai Pedro ekonekaꞌpî. Attîꞌpî toꞌ pîkîrî. Eerepamîꞌpî miarî, mîrîrî ita toꞌ eꞌtoꞌ wîttî ta. Tîîse kawînpan pe wîttî wanîꞌpî. Mîrîrî yeꞌnen oꞌnon pata mîîkîrî isaꞌmantaꞌpî yaasaꞌ toꞌya pataꞌ Pedro yawonnîpîꞌpî toꞌya. Miarî wîriꞌsanyamîꞌ wanîꞌpî, inyo isaꞌmantaꞌsan. Inkamoro karawaꞌpî kureꞌne. Taꞌpî toꞌya Pedro pîꞌ: —Aꞌkî Tabita nîsiꞌpîmîꞌpî upon seeniꞌ pena enen tîwanî yai —taꞌpî toꞌya ipîꞌ. Maasa pra inyo isaꞌmantaꞌsan pon ton siꞌpînpîtîꞌpîiya mîîtoꞌpe.
40 Moriya taꞌpî Pedroya toꞌ pîꞌ: —Epaꞌkatî poro pona. Mîrîrî tîpo toꞌ epaꞌkaꞌpî tanne, Pedro eꞌsekunkaꞌpî moropai eepîremaꞌpî. Mîrîrî tîpo teepîrema ataretîꞌka pe, eeraꞌtîꞌpî isaꞌmantaꞌpî winîkîi. Moropai taꞌpîiya ipîꞌ: —Tabita, eꞌmîꞌsaꞌkakî —taꞌpîiya. Moropai tenu yarakkamoꞌpî Tabitaya moropai Pedro eraꞌma tîuya pe aweꞌmîꞌsaꞌkaꞌpî tîmaikko pona. Pedro eraꞌmaꞌpîiya.
41 Moropai Pedroya itenya pîꞌ yapisîꞌpî. Ipîikaꞌtîꞌpîiya iꞌmîꞌsaꞌka pîꞌ. Mîrîrî tîpo pemonkonyamîꞌ innape Jesus kuꞌnenan yannoꞌpî Pedroya, inyo isaꞌmantaꞌsan pokonpe. Moropai Dorcas yenpoꞌpîiya toꞌ yenu yaꞌ enen.
42 Mîrîrî yekare eta tîuyaꞌnîkon wenai innape Uyepotorîkon kupîꞌpî tuꞌkankon Jope cidaderî ponkonya.
43 Mîrîrî tîpo Pedro koꞌmamîꞌpî paaka piꞌpî sakariꞌmanen Simão yewîꞌ ta. Tuꞌke wei kaisarî aakoꞌmamîꞌpî Jope po.
