Sîrîrî Kaareta Paulo Nîmenukaꞌpî Colossos Ponkon Pia 1:1-29
1 Uurî Paulo, Jesus Cristo naipontîꞌpî pe wanî, ituꞌse Paapa wanî yeꞌnen. Uyonpakon Timóteo yarakkîrî wanî sîrîrî.
2 Sîrîrî kaareta menukauya sîrîrî aapiaꞌnîkon, Paapa nîmoꞌkaꞌsan tîmîrî ton pe, Colossos cidaderî ponkon pia. Amîrîꞌnîkon innape Jesus Cristo kupî pîꞌ tîîkoꞌmansenon pia yarimauya sîrîrî.
Manniꞌ epeꞌmîra Paapa Uyunkon nîtîrî morî aapiaꞌnîkon, moropai tîwanmîra aweꞌtoꞌkon ton tîrîiya yuꞌse wai aapiaꞌnîkon.
Paulo Epîrematoꞌ
3 Aponaꞌnîkon anna epîrema kaisarî, Paapa, Uyepotorîkon Jesus Cristo yun, yapurî pîꞌ anna man tîwîrî,
4 maasa pra innape Jesus Cristo kuꞌsaꞌyaꞌnîkon wenai moropai tamîꞌnawîronkon Paapa pemonkonoyamîꞌ saꞌnamayaꞌnîkon yeꞌnen.
5 Sîrîrî kupîyaꞌnîkon maasa pra epuꞌtîyaꞌnîkon, tîntîrî pe, Paapa nîkonekaꞌpî kaꞌ po yapisîyaꞌnîkon kupî sîrîrî. Mîrîrî nîmîkî pîꞌ aakoꞌmamîkon, sîrîrî eꞌpîikaꞌtîntoꞌ yekare, yairon puꞌkuru etaꞌpîyaꞌnîkon pata pai.
6 Itekare etayaꞌnîkon yai, mîrîrî yapisîꞌpîyaꞌnîkon moropai innape awanî epuꞌtîꞌpîyaꞌnîkon. Mîrîrî warantî nîrî ekaremekî toꞌya tiaronkon pîꞌ tamîꞌnawîrî pata po. Moropai innape ikupî toꞌya. Mîrîrî warantî inîꞌ panpîꞌ pemonkonyamîꞌ eꞌpîikaꞌtîꞌpî, amîrîꞌnîkon eꞌpîikaꞌtîꞌpî warantî, epeꞌmîra Paapa nîtîrîꞌpî yapisîyaꞌnîkon yai.
7 Sîrîrî itekare etaꞌpîyaꞌnîkon uyonpakon Epafras winîpai. Mîîkîrî wanî teesenyakaꞌmasen pe anna pokonpe Cristo ton pe. Mîrîrî pîꞌ teesenyakaꞌma pîꞌ aakoꞌmamî amîrîꞌnîkon ton pe.
8 Mîîkîrîya, îꞌ kaiꞌma amîrîꞌnîkon eꞌsaꞌnamatoꞌ ton tîîsaꞌ Morî Yekaton Wannîya aapiaꞌnîkon, ekaremekîꞌpî anna pîꞌ.
9 Mîrîrî yeꞌnen tîwîrî esatî pîꞌ anna koꞌmamî Paapa pîꞌ amîrîꞌnîkon ton pe. Ayekarekon etaꞌpî annaya pata pai, esatî annaya Paapa pîꞌ, aapiaꞌnîkon epuꞌnen tîîtoꞌpeiya, ituꞌse tîweꞌtoꞌ epuꞌtîkonpa. Moropai tamîꞌnawîrî Morî Yekaton Wannîya itîrî epuꞌtîkonpa.
10 Mîrîrî wenai amîrîꞌnîkonya epuꞌtî, îꞌ kaiꞌma Uyepotorîkon eꞌtoꞌ ituꞌse yawîrî aakoꞌmamîkon, moropai tîwîrî ikupî pîꞌ aakoꞌmamîkonpa. Mîrîrî warantî ikupî pîꞌ aakoꞌmamîkon ya, tamîꞌnawîrî morî pe ayeserukon eseraꞌma moropai Paapa yeseru yai epuꞌnen pe panpîꞌ awanîkon.
11 Moropai Paapa pîꞌ esatî annaya, tamîꞌnawîrî meruntî ke awanîkonpa imeruntîri yaꞌ. Mîrîrî Paapa meruntîri wanî tamîꞌnawîronkon meruntîri yentai. Mîrîrî wenai tamîꞌnawîrî aponaꞌnîkon tuiꞌsen yapîtanîpîkonpa teekoreꞌmai pra,
12 moropai “Morî pe man” taakonpa taatausinpai, mîrîrî esatî pîꞌ anna man Paapa pîꞌ. Maasa pra amîrîꞌnîkon kuꞌsaiꞌya tarîpai tîpemonkono pe, tîîpia aakoꞌmamîkonpa aꞌka yaꞌ.
13 Mîîkîrîya uurîꞌnîkon moꞌkaꞌpî Makui winîpai, ewaron ta koꞌmannî tanne. Moropai uurîꞌnîkon enepîꞌpîiya tînmu, tînapurîꞌpî pia, uyesaꞌkon pe aweꞌtoꞌpe.
14 Mîîkîrî tînmu saꞌmantasaꞌ ke, imakuiꞌpî unkupîꞌpîkon yeꞌmaꞌpîiya moropai tîîwanmîra ikupîꞌpîiya.
Paapa Yenponen Pe Cristo Wanî
15 Cristo wanî îꞌ kaiꞌma Paapa wanî yenponen pe,manniꞌ Paapa, teeseraꞌmasen pepîn, yenponen pe.Ipîkku pe puꞌkuru mîîkîrî wanî inmu pe,tamîꞌnawîronkon inkonekaꞌpî yentai.
16 Maasa pra mîîkîrîya tamîꞌnawîron konekaꞌpîkaꞌ po moropai sîrîrî non po.Teeseraꞌmasen konekaꞌpîiya,moropai teeseraꞌmasen pepîn konekaꞌpîiya.Inkamoro koreꞌta tamîꞌnawîronkon inserîyamîꞌ konekaꞌpîiya,moropai manniꞌkan ipîkkukon yepuru toninserîyamîꞌ konekaꞌpîiya.Mîîkîrîya ikupîꞌpî tîmîrî ton pe,kureꞌne tamîꞌnawîronkonya tapurîtoꞌpe.
17 Tamîꞌnawîron kupî tîuya rawîrî Cristo wanîꞌpî.Moropai tamîꞌnawîron koꞌmannîpî pîꞌ aakoꞌmamî sîrîrîituꞌse tîwanî yawîrî tîmaꞌtanîꞌse pra.
18 Pemonkon esaꞌ yaipontî pîꞌ ipuꞌpai koꞌmamî manniꞌ warantî,mîîkîrîya innape tîkuꞌnenan yaipontî koꞌmannîpî sîrîrî.Mîîkîrî wanî koꞌmannîtoꞌ esaꞌ pe tîweꞌsen pe.
Mîîkîrî eꞌmîꞌsaꞌkaꞌpî eꞌmaiꞌ pe isaꞌmantaꞌsan rawîrî, ipîkku pe tîwanîpa tamîꞌnawîronkon yentai.
19 Îꞌ kaiꞌma Paapa wanî yenponen pe awanî, maasa pra Paapa pe puꞌkuru awanî mîîtoꞌpe, ituꞌse Paapa eꞌtoꞌ yawîrî.
20 Mîrîrî yeꞌnen mîîkîrî tînmu wenai Paapaya tamîꞌnawîron tînkonekaꞌsan manaꞌpo yuꞌse awanîꞌpî tîîpia. Tarîpai mîîkîrî Paapa enasaꞌ man morî pe pemonkonyamîꞌ yarakkîrî. Maasa pra tînmu mînî etiꞌkamoꞌpî pakîꞌnan po aasaꞌmanta yai. Mîrîrî wenai tamîꞌnawîronkon tînkonekaꞌsan manaꞌpoꞌpîiya tîîpia sîrîrî non po tîweꞌsanon moropai kaꞌ po tîweꞌsanon manaꞌpoꞌpîiya.
21 Pena amîrîꞌnîkon koꞌmamîꞌpî aminke Paapa pîꞌ. Paapa yeyaton pe awanîꞌpîkon. Maasa pra imakuiꞌpî ankupîkon koꞌmannîpî wenai moropai imakuiꞌpî eesenumenkatoꞌkon wenai.
22 Tîîse tînmu saꞌmantatoꞌ wenai amîrîꞌnîkon kupîꞌpî Paapaya tîwakîri pe, amîrîꞌnîkon yarîpa tîîpia, morî pe imakuiꞌpî ton pra. Mîrîrî yai anîꞌya taa eserîke pra awanî: —Imakuiꞌpî mîîkîrî —taiya pepîn.
23 Mîrîrî kupîiya, tîîse innape ikupî pîꞌ aakoꞌmamîkon eꞌpai awanî, teesetaꞌkai pra. Mîîkîrî nîmîkî pîꞌ aakoꞌmamîkon, manniꞌ itekare anetaꞌpîkon wenai. Manniꞌ eta pîꞌ tamîꞌnawîronkon koꞌmamî, mîrîrî itekare ekaremeꞌnen pe uurî Paulo enasaꞌ sîrîrî.
Paulo Esenyakaꞌmatoꞌ
Innape Jesus Kuꞌnenan Ton Pe
24 Atausinpan pîꞌ wai eꞌtarumaꞌtîtoꞌ pîꞌ amîrîꞌnîkon wenai. Maasa pra Cristo eꞌtarumaꞌtîꞌpî warantî, eꞌtarumaꞌtî koꞌmannîpî, unkupî ton pe inekaremekîꞌpî yawîrî. Ipemonkonoyamîꞌ ton pe, inmoꞌkaꞌsan ton pe eꞌtarumaꞌtî sîrîrî. Inkamoro, inmoꞌkaꞌsan wanî itesaꞌ warantî, iwaikkatoi pe toꞌ wanî.
25 Moropai mîrîrî warantî eꞌtarumaꞌtî, maasa pra Paapaya ukuꞌsaꞌ sîrîrî Jesus nîmoꞌkaꞌsan poitîrî pe. Mîrîrî tîrîꞌpîiya unkonekaton pe amîrîꞌnîkon pîikaꞌtîton pe,
26 mîrîrî tamîꞌnawîrî tîmaimu ekaremekî pîꞌ uukoꞌmantoꞌpe. Sîrîrî itekare inonomîꞌpî, tamîꞌnawîronkon nepuꞌtîꞌpî pepîn. Mîrîrî yenposaiꞌya sîrîrî tîpemonkonoyamîꞌ pia.
27 Mîrîrî yenpo tîuya taꞌpîiya, see warantî ipemonkonoyamîꞌya mîrîrî esenomîꞌpî epuꞌtoꞌpe kaiꞌma. Mîrîrî tîrîꞌpîiya tamîꞌnawîronkon pemonkonyamîꞌ pia, Judeuyamîꞌ pia neken pra. Pena anîꞌ nepuꞌtî pepîn mîrîrî Cristo koꞌmamî tamîꞌnawîronkon tîpemonkonoyamîꞌ yaꞌ. Mîrîrî wenai morî puꞌkuru yapisîyaꞌnîkon Paapa winîpai epuꞌtîyaꞌnîkon.
28 Sîrîrî warantî Cristo yekare ekaremekîuya tamîꞌnawîronkon pîꞌ. Tamîꞌnawîrî epuꞌnen pe eꞌtoꞌ ke apanamauyaꞌnîkon, moropai ayenupauyaꞌnîkon tiwin pîꞌ awanîkon tanne, Cristo piawonkon pe awanîkonpa, tamîꞌnawîrî morî pe awanîkonpa eꞌtoꞌ yawîrî, Paapa pia amîrîꞌnîkon yenpouya yai.
29 Mîrîrî yaino ton pe esenyakaꞌma koꞌmannîpî sîrîrî. Umoron epuꞌtîuya koꞌmannîpî sîrîrî tîîse Cristo nîtîrîꞌpî umeruntîri pe, mîrîrî ke esenyakaꞌma sîrîrî.
