Sîrîrî Kaareta Paulo Nîmenukaꞌpî Colossos Ponkon Pia 2:1-23
2 Teesekaꞌnunkai uurî esenyakaꞌma amîrîꞌnîkon ton pe epuꞌtîyaꞌnîkon yuꞌse wai. Paapa maimu ekaremekî pîꞌ uukoꞌmamî tîweꞌtarumaꞌtîi. Moropai manniꞌkan Laodicéia ponkon tonpe, moropai tamîꞌnawîronkon tiaronkon uyeraꞌmatîponkon pepîn tonpe esenyakaꞌma.
2 Epîrema koꞌmannîpî inkamoro koꞌmantoꞌpe meruntî ke taatausinpai moropai inkamoro koꞌmantoꞌpe tîweꞌsaꞌnamai tonpakon yarakkîrî. Moropai Cristo yekare, pena anîꞌ nepuꞌtî pepîn, Paapa winîpainon tepuꞌse toꞌ koꞌmantoꞌpe innape, mîîkîrî epuꞌtoꞌpe toꞌya yairî. Mîîkîrî, Paapa winîpainon wanî Cristo pe. Mîrîrî warantî Paapa pîꞌ esatî pîꞌ uukoꞌmamî aponaꞌnîkon.
3 Maasa pra mîîkîrî Cristo neken wanî Paapa winîpainon, anîꞌ nepuꞌtî pepîn epuꞌtîyaꞌnîkon emapuꞌtînen pe. Paapa nepuꞌtî epuꞌtîyaꞌnîkon emapuꞌtîiya. Maasa pra mîîkîrî ton pra siꞌma mîrîrî epuꞌtîyaꞌnîkon eserîke pra awanî.
4 Mîrîrî yeꞌnen tauya sîrîrî amîrîꞌnîkon pîꞌ, tiaron seruꞌyeꞌ erepansaꞌ pîꞌ akoreꞌtaꞌnîkon, mîîkîrî eseurîma, morî pe mîîkîrî maimu pîꞌ eesenkuꞌtîkon namai.
5 Maasa pra uurî wanî sîrîrî aminke apîꞌnîkon. Tîîse esenumenkatoꞌ yaꞌ amîrîꞌnîkon pokonpe eseporî. Moropai kureꞌne atausinpan pîꞌ wai morî pe aakoꞌmamîkon pîꞌ, moropai innape Cristo kupî pîꞌ aakoꞌmamîkon yekare etauya pîꞌ.
Cristo Yarakkîrî Koꞌmannîtoꞌ
6 Îꞌ kaiꞌma Jesus yapisîꞌpîyaꞌnîkon ayepotorîkon pe? Innape ikupîꞌpîyaꞌnîkon. Mîrîrî warantî yarakkîrî akoꞌmantî.
7 Ipona apîtatî manniꞌ yei apîtasaꞌ warantî manniꞌ tîkara ke tîwanî yeꞌnen. Aakoꞌmantoꞌkon rumakatî iipia inîꞌ panpîꞌ meruntî ke awanîkonpa, innape ikupî pîꞌ îꞌ kaiꞌma eesenupaꞌpîkon yawîrî. Moropai —morî pe puꞌkuru man, Paapa —taa pîꞌ akoꞌmantî tîwîrîrî.
8 Aka, epuꞌnenan pe tîweꞌkuꞌsanon pemonkonyamîꞌ maimu pîꞌ, teesenkuꞌtîi pra eꞌtî. Maasa pra mîrîrî wanî îꞌ pe pra rî epuꞌnen pe toꞌ eꞌtoꞌ. Pemonkonyamîꞌya neken tenupatoꞌkon pîꞌ ayenupakon yuꞌse toꞌ wanî. Moropai sîrîrî pata po tîîkoꞌmansenon esenumenkatoꞌ ke ayenupakon toꞌya. Tîîse mîrîrî wanî pepîn Cristoya yenupantoꞌpe. Inkamoroya ayenupakon pîꞌ teesenkuꞌtîi pra eꞌtî.
9 Maasa pra tamîꞌnawîrî îꞌ kaiꞌma Paapa wanî manniꞌ warantî Cristo wanî mîrîrî. Awanî Paapa pe tîîse pemonkon pe eenaꞌpî tîpun ke.
10 Moropai amîrîꞌnîkonya aakoꞌmantoꞌkon yapisîꞌpî Paapa winîpai, Cristo pemonkono pe awanîkon yeꞌnen. Îꞌ ton pra awanîkon pepîn, maasa pra mîîkîrî, ayesaꞌkon wanî tamîꞌnawîronkon inserîyamîꞌ, oꞌmaꞌkon, meruntîkon, nariꞌkon yentai. Moropai tamîꞌnawîronkon kaꞌ po tîweꞌsanon yentai awanî.
11 Pena amîrîꞌnîkon Judeuyamîꞌ esenposaꞌ yai, amerekon piꞌpî pottî yaꞌtîꞌpî toꞌya Paapa pemonkono pe awanîkonpa kaiꞌma. Mîrîrî warantî nîrî tîpemonkono pe Cristoya amoꞌkaꞌpîkon yai, imakuiꞌpî ankuꞌpai aweꞌtoꞌkon moꞌkaꞌpîiya imakuiꞌpî kupîyaꞌnîkon namai. Mîîkîrî Cristoya ikupîꞌpî, pemonkonya pra.
12 Amîrîꞌnîkon esenpatakona yai, penaron imakuiꞌpî ayeserukon yaretîꞌkaꞌpîyaꞌnîkon. Maasa pra Cristo saꞌmantasaꞌ ya, moropai eesuꞌnaꞌtîꞌpî ya, amîrîꞌnîkon esuꞌnaꞌtîꞌpî. Moropai Paapaya Cristo pîmîꞌsaꞌkasaꞌ yai, amîrîꞌnîkon pîmîꞌsaꞌkaꞌpîiya aakoꞌmamîkonpa, innape meruntî ke Paapa wanî kupîꞌpîyaꞌnîkon yeꞌnen.
13 Amîrîꞌnîkon wanîꞌpî pena isaꞌmantaꞌsan warantî ituꞌse apunkon eꞌtoꞌ yawîrî ikupî pîꞌ aakoꞌmamîkon yeꞌnen. Mîrîrî imakuiꞌpî kupîꞌpîyaꞌnîkon wenai isaꞌmantaꞌsan warantî awanîꞌpîkon Paapa pemonkono pe pra. Tîîse Paapaya Cristo pîmîꞌsaꞌkasaꞌ yai, amîrîꞌnîkon nîrî pîmîꞌsaꞌkaꞌpîiya. Moropai ankupîꞌpîkon imakuiꞌpî kupîꞌpîiya tamîꞌnawîrî tîîwanmîra.
14 Moropai uurîꞌnîkon saꞌmantatoꞌ yentai awanîꞌpî. Maasa pra Moisés nurîꞌtîya yenupantoꞌya taasaꞌ see warantî: —Anîꞌya imakuiꞌpî kuꞌsaꞌ ya, mîîkîrî saꞌmanta eꞌpai man —taꞌpîiya. Imakuiꞌpî unkupîꞌpîkon wenai saꞌmantan eꞌpai tîîse yaretîꞌkaꞌpî Cristoya, inîꞌ saꞌmantan namai. Pakîꞌnan pona tîîsaꞌmanta yai, imakuiꞌpî unkupîꞌpîkon yeꞌmaꞌpîiya tamîꞌnawîrî.
15 Moropai pakîꞌnan pona tîîsaꞌmanta yai, Cristoya teeyatonon yuwaꞌkaꞌpî. Manniꞌkan oꞌmaꞌkon, uyaipontîkon pîꞌ tîîkoꞌmansenon, meruntîkon, nariꞌkon, tamîꞌnawîrî inkamoro meruntîri yuwaꞌkaꞌpîiya. Inkamoro kupîꞌpîiya tamîꞌnawîronkonya eraꞌma tanne, îꞌ pe pra rî toꞌ enatoꞌpe. Mîrîrî warantî toꞌ yentai Cristo enaꞌpî tîîsaꞌmantaꞌpî wenai.
16 Mîrîrî yeꞌnen anîꞌya taa ya apîꞌnîkon, sararu yanîyaꞌnîkon ya, imakuiꞌpî kupîyaꞌnîkon mîrîrî, taa toꞌya. Moropai awukukon enîrîyaꞌnîkon ya, imakuiꞌpî pe nîrî awanî. Moropai eesenyakaꞌmakon ya, Paapa ton pe tîkuꞌneꞌtîtoꞌ weiyu yai pra, moropai teeraꞌtîsen pe kapoi wanî yai eesenyakaꞌmakon ya, moropai erîꞌkannîtoꞌ weiyu yai eesenyakaꞌmakon ya, imakuiꞌpî pe awanî, taa toꞌya. Inkamoro yeꞌkakon pîinamayaꞌnîkon eꞌpai pra man.
17 Maasa pra pena, sîrîrî pîꞌ Paapa eseurîmaꞌpî seruꞌ pepîn, îꞌ kaiꞌma Cristo iipî ekaremeꞌtoꞌpeiya. Tarîpai Cristo iipîꞌpî. Mîrîrî yeꞌnen mîîkîrî neken yapurîpaiꞌnîkon, manniꞌ aaipî ekaremeꞌnenan tapurîi pra.
18 Tiaronkonya ayenupakon yairî pra kîꞌtîîtî. Tîweꞌneꞌ tîneraꞌmaꞌpîkon pîꞌ ayenupakon toꞌya ya, tîpîinamai pra eꞌtî. Taa toꞌya apîꞌnîkon amîrîꞌnîkon tekaꞌnunkai amîrîꞌnîkon anenupapai toꞌ wanî inserîyamîꞌ yapurîkonpa kaiꞌma. Moropai tepuꞌse aweꞌtarumaꞌtîkon yuꞌse toꞌ wanî. Teesenupaꞌpîkon pîꞌ mîî pe toꞌ wanî teuren. Tîîse inkamoro yeꞌkakonya ayenupatoꞌkon tîpîinamai pra eꞌtî. Maasa pra pemonkon esenumenkatoꞌ wanî warantî toꞌ esenumenka.
19 Inkamoro yeꞌkakon wanî pepîn Cristo pemonkono pe. Maasa pra Cristo wanî pepîn toꞌ puꞌpai pe. Upuꞌpaikon winîpai tamîꞌnawîrî uyesaꞌkon wanî eꞌwaikkatoi pe, tîpun ke. Mîrîrî warantî nîrî Cristo meruntîri winîpai uurîꞌnîkon ipemonkonoyamîꞌ wanî tiwin. Moropai uurîꞌnîkon koꞌmannîpî Cristoya inîꞌ panpîꞌ epannîtoꞌpe moropai epuꞌtoꞌpe ituꞌse Paapa eꞌtoꞌ yawîrî. Tîîse inkamoro seruꞌyeꞌkon atarima Cristo piapai.
Saꞌmantan Tîpo Cristo Yarakkîrî Koꞌmannî
20 Cristo pemonkono pe awanîkon yeꞌnen aasaꞌmantasaꞌ yai, amîrîꞌnîkon saꞌmantaꞌpî ayeserukon winîpai. Mîrîrî yeꞌnen inîꞌrî inkamoro sîrîrî pata po tîîkoꞌmansenon meruntîkon amîrîꞌnîkon yaipontî pîꞌ tîîkoꞌmansenonya ayaipontîkon eserîke pra awanî. Tîîse îꞌ ton pe mîrîrî yeꞌka warayoꞌkon maimu yawîrî ikoꞌmanpai awanîkon? Inkamoro pemonkono pe awanîkon pepîn.
21 Taa toꞌya apîꞌnîkon mîrîrî yeꞌka kîsapiꞌtî. Moropai mîrîrî yeꞌka kîsenaꞌtî, mîrîrî yeꞌka tappîi pra eꞌtî, taa toꞌya apîꞌnîkon.
22 Tîîse mîrîrî yeꞌkakon wanî ipatîkarî tîîkoꞌmansenon pepîn. Taataretîꞌkasen pe mîrîrîkon wanî. Mîrîrî yeꞌnen —Mîrîrî yeꞌka kîsapîꞌtî, mîrîrî yeꞌka kîsenaꞌtî —taa toꞌya ya, îꞌ pe pra rî awanî. Maasa pra mai pe neken awanî yeꞌnen, warayoꞌkonya yenupantoꞌpe neken awanî yeꞌnen.
23 Mîrîrî yeꞌnen yai pra mîrîrî taa toꞌya wanî, mîrîrî kîsapiꞌtî, moropai mîrîrî kîsenaꞌtî, moropai mîrîrî kîsapîꞌtî, moropai inserîyamîꞌ yapurî eꞌpai man, moropai tepuꞌse amoronkon epuꞌtîyaꞌnîkon eꞌpai man, taa toꞌya wanî epuꞌnen pe kaiꞌma. Tîîse mîrîrî yeꞌkaya imakuiꞌpî ankuꞌpai esenumenkantoꞌ yuwatî eserîke pra awanî.
