Sîrîrî Kaareta Paulo Nîmenukaꞌpî Colossos Ponkon Pia 3:1-25
3 Amîrîꞌnîkon eꞌmîꞌsaꞌkaꞌsan Cristo yarakkîrî, penaron ayeserukon rîꞌpî winîpai. Mîrîrî yeꞌnen kaꞌ pon yuꞌse eꞌtî, oꞌnon pata Cristo ereutasaꞌ manniꞌ Paapa meruntîri winî.
2 Cristo winîpainon pîꞌ neken esenumenkatî, inîꞌrî tarîron yeseru pîꞌ teesenumenkai pra.
3 Maasa pra tarîron yeseru pîꞌ isaꞌmantaꞌsan warantî awanîkon. Tarîpai aakoꞌmantoꞌkon wanî Cristo yarakkîrî. Moropai Cristo koꞌmamî Paapa yarakkîrî. Mîrîrî yeꞌnen aakoꞌmantoꞌkon eraꞌma anîꞌya pepîn.
4 Tîîse îꞌ pensa Cristo iipî yai, tamîꞌnawîronkonya eraꞌma. Morî pe puꞌkuru aaipî eraꞌma toꞌya. Mîrîrî yai Cristo yarakkîrî amîrîꞌnîkon nîrî eraꞌma toꞌya morî pe puꞌkuru, Cristo wanî manniꞌ warantî.
Uyeserukon Penaroꞌ Moropai Amenan
5 Imakuiꞌpî kîꞌkuꞌtî, isaꞌmantaꞌpî warantî eꞌtî, maasa pra imakuiꞌpî kupî pîꞌ isaꞌmantaꞌpî koꞌmamî pepîn. Mîrîrî warantî eꞌtî. Pena awanîꞌpîkon see warantî: Seꞌ tapairî wîriꞌsanyamîꞌ yarakkîrî warayoꞌkon wanî, tînoꞌpîkon pepîn yarakkîrî. Moropai wîriꞌsanyamîꞌ nîrî wanî warayoꞌkon yarakkîrî, tînyokon pepîn. Moropai tiaron nura kupî pîꞌ warayoꞌkon koꞌmamî imakuiꞌpî pe teesenumenkatoꞌkon yawîrî. Moropai kureꞌne îꞌ yuꞌse eesenumenkakon koꞌmannîpî ayemannekon ton. Mîrîrî ayemannekon neken anapurîpai awanîkon Paapa tapurîi pra, manniꞌkan miaꞌ ke ikonekasaꞌ yapurînenan warantî. Mîrîrî yeꞌnen isaꞌmantaꞌpî warantî eꞌtî, mîrîrî yeꞌkakon yapurîyaꞌnîkon namai, imakuiꞌpî ankuꞌpai awanîkon namai.
6 Maasa pra mîrîrî yeꞌka kupî pîꞌ tîîkoꞌmansenon tarumaꞌtî Paapaya kupî sîrîrî.
7 Pena amîrîꞌnîkon koꞌmanpîtîꞌpî mîrîrî imakuiꞌpî kupî pîꞌ. Maasa pra penaron ayeserukon pîꞌ aakoꞌmanpîtîꞌpîkon.
8 Tarîpai tamîꞌnawîrî mîrîrîkon rumakatî. Eekoreꞌmatoꞌkon mararî pra teekoreꞌmai aweꞌtoꞌkon tiaronkon yarakkîrî rumakatî. Ayewanmakon pe tiaronkon kuꞌtoꞌyaꞌnîkon rumakatî. Moropai anîꞌrî eseurîma eꞌpai pra man tiaron winîkîi imakuiꞌpî pe. Mîrîrî yeꞌka nura pîꞌ teeseurîmai pra eꞌtî.
9 Seruꞌyeꞌ tiaronkon pîꞌ tîweꞌse pra eꞌtî. Maasa pra amîrîꞌnîkonya penaron ayeserukon rîꞌpî rumakaꞌpî. Tamîꞌnawîrî imakuiꞌpî ankupîꞌpîkon rumakaꞌpîyaꞌnîkon.
10 Moropai amenan ayeserukon ton yapisîꞌpîyaꞌnîkon ayewankon yaꞌ. Moropai morî pe amîrîꞌnîkon kupî pîꞌ Paapa koꞌmamî sîrîrî, tîwarantî amîrîꞌnîkon eꞌtoꞌpe kaiꞌma, moropai tamîꞌnawîrî tepuꞌtîkonpa.
11 Mîrîrî warantî amenan pe awanîkon yeꞌnen Judeu pe awanîkon ya, moropai Judeu pe pra awanîkon ya îꞌ waniꞌ awanî pepîn Paapa pia. Moropai amerekon piꞌpîkon yaꞌtîsaꞌ toꞌya ya, yaꞌtîsaꞌ toꞌya pra awanî ya, îꞌ waniꞌ awanî pepîn Paapa pia. Moropai pakko pe awanîkon ya, moropai eranneꞌ pe awanîkon ya, moropai toꞌ poitîrîtonon pe awanîkon ya, moropai toꞌ poitîrî pe pra awanîkon ya, îꞌ waniꞌ awanî pepîn Paapa pia. Tîîse Cristo koꞌmamî ya, ayewankon yaꞌ mîrîrî neken wanî ipîkku pe. Maasa pra tamîꞌnawîronkon uurîꞌnîkon yewan yaꞌ Cristo koꞌmamî.
12 Paapa nîmenkaꞌsan pe awanîkon tîpemonkono pe. Morî pe tîweꞌsanon pe awanîkon, insaꞌnamaꞌsan kureꞌne. Mîrîrî yeꞌnen tiaronkon saꞌnamatî. Tiaronkon winîkîi morî kuꞌtî, moropai tiaronkon winîkîi mîî pe tîweꞌse pra eꞌtî. Tîîse eranmîra eꞌtî, moropai teekoreꞌmasen pe pra eꞌtî, îꞌ rî etayaꞌnîkon pîꞌ.
13 Îꞌ rî tiaronkon nîkupî awinîkîiꞌnîkon yapîtanîꞌtî, moropai îꞌ taꞌpî toꞌya kuꞌtî aawanmîraꞌnîkon. Tîwanmîra Uyepotorîkonya ankupîꞌpîkon imakuiꞌpî kupîꞌpî warantî ikuꞌtî.
14 Moropai mîrîrîkon tamîꞌnawîrî tauya manniꞌ yentai tîweꞌsaꞌmamai akoꞌmantî tiaronkon pokonpe. Maasa pra mîrîrî eꞌsaꞌnamatoꞌ wenai, tamîꞌnawîrî morî pe aakoꞌmamîkon tîmurukun pe.
15 Tamîꞌnawîrî amîrîꞌnîkon wanî Cristo pemonkono pe, tiwin pîꞌ awanîkon tîîse. Paapaya amoꞌkaꞌpîkon morî pe aakoꞌmamîkonpa tîmurukun pe. Mîrîrî yeꞌnen tîwanmîn Cristo winîpainon koꞌmantoꞌpe ayewankon yaꞌ eturumakatî, ayeserukon epuꞌtîkonpa. Moropai —Morî pe man, Paapa —taa pîꞌ akoꞌmantî Paapa pîꞌ.
16 Moropai Cristo yekare epuꞌtî pîꞌ aakoꞌmamîkon yuꞌse wai inîꞌ panpîꞌ epuꞌnen pe awanîkonpa. Moropai tamîꞌnawîrî mîrîrî anepuꞌtîkon ke tiaronkon yenupa pîꞌ moropai toꞌ panama pîꞌ aakoꞌmamîkon yuꞌse wai. Eserenkatî Paapa maimu eꞌmenukasaꞌ erenkatoꞌ pîꞌ moropai Paapa yapurîtoꞌ pîꞌ. Moropai Jesus yeseru pîꞌ teeseurîmasen eren pîꞌ eserenkatî, Paapa yapurî pe. —Morî pe puꞌkuru man Paapa —kaiꞌma eserenkatî.
17 Mîrîrî tamîꞌnawîrî ikupîyaꞌnîkon manniꞌ moropai îꞌ taayaꞌnîkon manniꞌ warantî, ikuꞌtî Uyepotorîkon Jesus maimu pe. Moropai kaꞌtî Paapa pîꞌ: —Jesus Cristo wenai anna pîikaꞌtîsaꞌya nai morî pe —kaꞌtî Paapa pîꞌ.
Îꞌ Kaiꞌma Koꞌmannî Amenan Uyeserukon Yarakkîrî
18 Tarîpai wîriꞌsanyamîꞌ tînyo kenankon panamauya sîrîrî. Anyokon maimu yawîrî tîweꞌsen pe eꞌtî, wîriꞌsanyamîꞌ. Mîrîrî warantî ikupîyaꞌnîkon eꞌpai awanî, maasa pra mîrîrî yuꞌse Uyepotorîkon wanî yeꞌnen.
19 Moropai warayoꞌkon tînoꞌpî kenankon panamauya sîrîrî. Anoꞌpîkon saꞌnamatî. Toꞌ ekoreꞌmatoꞌ ton tepose pra morî pe eꞌtî toꞌ yarakkîrî.
20 Tarîpai moreyamîꞌ panamauya sîrîrî Cristo pemonkono pe siꞌma ankupîkon ton pîꞌ. Ayunkon moropai asankon maimu yawîrî ikuꞌtî. Îꞌ taasaꞌ toꞌya ya, toꞌ maimu yawîrî ikuꞌtî. Maasa pra mîrîrî warantî ikupîyaꞌnîkon ya, Paapa kaꞌ pon wakîri pe awanî.
21 Tarîpai amîrîꞌnîkon toꞌ yunkonyamîꞌ panamauya sîrîrî. Imakuiꞌpî anmukukon nîkupî yakoꞌmenkayaꞌnîkon yai, inkamoro tekatonkai pra eꞌtî, tîîse toꞌ pîikaꞌtîyaꞌnîkon yuwatî, toꞌ esewankonoꞌma namai.
22 Tarîpai amîrîꞌnîkon tîkaraiwarî kenankon panamauya sîrîrî. Akaraiwarîkon maimu yawîrî eꞌtî tamîꞌnawîron ankupîkon pîꞌ. —Uyeraꞌmaiya yeꞌnen ikupîuya aatausinpatoꞌpe —kaiꞌma, teesenumenkai pra. Tîîse imaimu yawîrî ikuꞌtî ayeraꞌmaiyaꞌnîkon pra tîîse. Cristo pemonkono pe awanîkon yeꞌnen, yairî ikuꞌtî. Maasa pra mîîkîrî namayaꞌnîkon yeꞌnen.
23 Tamîꞌnawîron îꞌ rî ankupîkon kupîyaꞌnîkon ya, ikuꞌtî taatausinpai puꞌkuru. Morî pe esenyakaꞌmatî Uyepotorîkon ton pe, warayoꞌkon ton pe pra neken.
24 Maasa pra Uyepotorîkonya arepakon kupî epuꞌtîyaꞌnîkon. Tîpemonkonoyamîꞌ pia itîrî tîuya taꞌpî tîuya pantakaiya yai yapisîyaꞌnîkon kupî sîrîrî. Maasa pra Uyepotorîkon pe Cristo wanî yeꞌnen, mîîkîrî ton pe eesenyakaꞌmakon mîrîrî.
25 Moropai manniꞌkan imakuiꞌpî kupîtîponkon pemonkonyamîꞌ tepuꞌse pra, inkamoro repaiya kupî sîrîrî eꞌtarumaꞌtîtoꞌ ke, toꞌ nîkupîꞌpî wenai. Maasa pra Paapaya tiaronkon yuwaꞌka pepîn, tîîse tamîꞌnawîrî toꞌ tarumaꞌtîiya.
