Sîrîrî Kaareta Paulo Nîmenukaꞌpî Colossos Ponkon Pia 4:1-18
4 Tarîpai manniꞌkan tîpoitîrî kenankon panamauya sîrîrî. Yairî eꞌtî apoitîrîkon pîꞌ, morî pe toꞌ konekayaꞌnîkon yuwatî. Maasa pra moro man ayepotorîkon ton kaꞌ po. Mîîkîrîya ayeraꞌmakon.
Panamantoꞌ
2 Akoꞌmantî tîwîrî eepîremakon pîꞌ. Moropai îꞌ kaiꞌma taayaꞌnîkon, manniꞌ amaimukon pîꞌ teesenumenkai epîrematî. Morî pe man Paapa, kaꞌtî eepîrematoꞌkon yaꞌ.
3 Moropai eepîremakon ya, anna pona epîrematî. Paapaya tîmaimu ekaremekî annaya pataꞌseꞌ ton tîîtoꞌpe. Moropai Cristo yekare, sîrîrî tîpose anîꞌ nepuꞌtî pepîn ekaremeꞌtoꞌpe annaya epîrematî. Mîrîrî wenai uurî wanî sîrîrî tarî atarakkannîtoꞌ ta.
4 Mîrîrî yeꞌnen epîrematî uurîya Cristo yekare ekaremeꞌtoꞌpe aronne panpîꞌ, morî pe epuꞌtoꞌpe toꞌya. Mîrîrî warantî ekaremekîuya eꞌpai awanî mîrîrî.
5 Amîrîꞌnîkon nîrî tepuꞌse awanîkon eꞌpai man manniꞌkan Paapa epuꞌnenan pepîn yarakkîrî eeseurîmakon ya. Moropai Cristo yekare ekaremekî yuwatî, toꞌ yarakkîrî eeseurîmakon kaisarî.
6 Tiaronkon yarakkîrî eeseurîmakon ya, morî pe eseurîmatî, inîꞌ panpîꞌ amaimukon anetapai toꞌ eꞌtoꞌpe. Moropai inkamoro eseurîma yai, yairî toꞌ maimu yuuku epuꞌtîyaꞌnîkon yuꞌse wai.
Tiwinkanoꞌpî Pe Paulo Esekaremeꞌtoꞌ
7 Uyonpakon, uwakîrikon puꞌkuru Tíquico, esenyakaꞌmaꞌpî yairî puꞌkuru uyarakkîrî, Uyepotorîkon esenyakaꞌmatoꞌ pîꞌ. Mîîkîrîya tamîꞌnawîrî amîrîꞌnîkon pîꞌ uyekare ekaremekî.
8 Mîîkîrî yarimauya sîrîrî akoreꞌtaꞌnîkon ayausinpaiꞌnîkon attîtoꞌpe. Moropai tamîꞌnawîrî tarî anna koꞌmamî ekaremeꞌtoꞌpeiya, aatausinpakonpa.
9 Mîîkîrî yarakkîrî Onésimo wîtî, manniꞌ uwakîri moropai yairî tîweꞌsen. Mîîkîrî wanî ayonpakon, akoreꞌtaꞌnîkon tîîkoꞌmansen pe. Inkamoroya tamîꞌnawîrî îꞌ kaiꞌma tarî tîweꞌkuꞌsen ekaremekî apîꞌnîkon.
10 Tarîpai Aristarco, uyarakkîrî tîweꞌsen atarakkannîtoꞌ ta, mîîkîrîya tîmaimu yarima sîrîrî aapiaꞌnîkon. Moropai Marcos, Barnabé yakon manen, mîîkîrîya nîrî tîmaimu yarima. Mîîkîrî yekare epuꞌtî pîꞌ naatîi akoreꞌtaꞌnîkon tuutî pîꞌ eeseurîmasaꞌ. Mîrîrî yeꞌnen aakoreꞌtaꞌnîkon eerepamî yai morî pe mapiꞌtîi.
11 Moropai Josué manniꞌ Justo kaiꞌma tesaꞌsen, mîîkîrîya nîrî tîmaimu yarima aapiaꞌnîkon. Uyarakkîrî teesenyakaꞌmasanon koreꞌta insamoro neken wanî Judeuyamîꞌ pe. Insamoroya kureꞌne upîikaꞌtîꞌpî, îꞌ kaiꞌma tesaꞌkon pe Paapa wanî epuꞌtoꞌpe pemonkonyamîꞌya ekaremekî pîꞌ.
12 Moropai Epafras, manniꞌ ayonpakon akoreꞌtaꞌnîkon tîweꞌsen, mîîkîrî wanî Jesus Cristo poitîrî pe. Mîîkîrîya nîrî tîmaimu yarima aapiaꞌnîkon. Mîîkîrî epîrema koꞌmannîpî. Paapa pîꞌ esatî pîꞌ aakoꞌmamî kureꞌne amîrîꞌnîkon ton pe. Esatîiya innape Paapa kupî pîꞌ aakoꞌmamîkonpa tîwîrî. Inîꞌ panpîꞌ epuꞌnen pe eenakonpa moropai îꞌ taasaꞌ Paapaya yawîrî ikupîkonpa kaiꞌma eepîrema koꞌmannîpî.
13 Epuꞌtî pîꞌ wai mîîkîrî esenyakaꞌmaꞌpî yeseru. Saꞌman kupîꞌpîiya amîrîꞌnîkon tonpe moropai Laodicéia ponkon moropai Hierápolis ponkon tonpe nîrî. Mîrîrî epuꞌtî pîꞌ wai.
14 Tarîpai uwakîrikon puꞌkuru Lucas, manniꞌ priꞌyawonkon pepîn pîꞌ teesenyakaꞌmasenya, moropai Demasya nîrî tîmaimu yarima pîꞌ man.
15 Moropai umaimu yarima pîꞌ wai uyonpakon Laodicéia ponkon pia, moropai Ninfa pia nîrî moropai manniꞌkan itewîꞌ ta teeperepîꞌsenon pia yarima pîꞌ wai.
16 Sîrîrî kaareta erenkasaꞌyaꞌnîkon tîpo, marimatîi Laodicéia ponkonya nîrî erenkatoꞌpe. Moropai Laodicéia pona nîrî unarimaꞌpî erenkayaꞌnîkon eꞌpai man.
17 Moropai kaꞌtî Arquipo pîꞌ: —Ankupî pe Paapa nîtîrîꞌpî, mîrîrî kupî pîꞌ akoꞌmankî morî pe, tamîꞌnawîrî yaretîꞌkaya pîkîrî —kaꞌtî ipîꞌ.
18 Tarîpai sîrîrî menukauya sîrîrî uyenya ke puꞌkuru. Umaimu man aapiaꞌnîkon. Aawanmîraꞌnîkon uurî kîꞌkuꞌtî tîîse atarakkannîtoꞌ ta wanî pîꞌ enpenatatî. Moropai tauya Paapa pîꞌ: —Morî pe toꞌ pîremakî, Paapa —tauya.
