Sîrîrî Kaareta Paulo Nîmenukaꞌpî Filípos Ponkon Pia 1:1-30
1 Uyonpayamîꞌ, Filípos ponkon, uurî Pauloya kaareta menuka sîrîrî Timóteo yarakkîrî siꞌma. Cristo Jesus poitîrî pe anna wanî. Amîrîꞌnîkon, Jesus Cristo nîmoꞌkaꞌsan pia yarima annaya sîrîrî. Moropai yarima annaya nîrî Paapa munkîyamîꞌ koꞌmannîꞌnenan pia moropai toꞌ pîikaꞌtînenan pia nîrî.
2 Uyonpayamîꞌ, Paapa, Uyunkonya tamîꞌnawîron morî tîrî yuꞌse wai aapiaꞌnîkon. Moropai tîwanmîra eꞌnîtoꞌ tîrîiya yuꞌse wai. Mîrîrî warantî itîrî Uyepotorîkon Jesus Cristoya yuꞌse wai aapiaꞌnîkon.
Paulo Epîrematoꞌ
3 Amîrîꞌnîkon pîꞌ enpenata kaisarî tauya Paapa pîꞌ: —Morî pe toꞌ pîikaꞌtîsaꞌya, Paapa —tauya ipîꞌ.
4 Moropai aponaꞌnîkon epîrema kaisarî, atausinpasaꞌ wanî amîrîꞌnîkon pîꞌ.
5 Maasa pra upîikaꞌtîpîtîꞌpîyaꞌnîkon Cristo yekare ekaremekî pîꞌ. Pena upîikaꞌtîpîtîꞌpîyaꞌnîkon Cristo yapisîꞌpîyaꞌnîkon pata pai sîrîrî tîpose.
6 Morî pe Paapa esenyakaꞌma piaꞌtîꞌpî ayewankon yaꞌ. Mîrîrî warantî eesenyakaꞌma koꞌmannîpî yaretîꞌka tîuya pîkîrî, Jesus Cristo iipî pîkîrî. Mîrîrî epuꞌtî pîꞌ wai.
7 Ayapurîuyaꞌnîkon maasa pra upîikaꞌtîꞌpîyaꞌnîkon Jesus yekare ekaremekî pîꞌ, anetapaiꞌnîkon pîꞌ moropai anetapaiꞌnîkon pepîn pîꞌ nîrî. Mîrîrî rî kupîꞌpîyaꞌnîkon moro akoreꞌtakon wanî tanne. Moropai tarî, atarakkannîtoꞌ yewîꞌ ta wanî tanne, ikupî pîꞌ aakoꞌmamîkon. Mîrîrî yeꞌnen kureꞌne ayapurîuyaꞌnîkon.
8 Cristo Jesusya asaꞌnamakon warantî asaꞌnamauyaꞌnîkon. Innape man, useruku pepîn, mîrîrî epuꞌtî Paapaya.
9 Epîrema sîrîrî aponaꞌnîkon. Tauya Paapa pîꞌ: —Inîꞌ panpîꞌ tonpakon saꞌnamatoꞌpe toꞌya. Moropai inîꞌ panpîꞌ yairî epuꞌtoꞌpe toꞌya, pakko pe pra toꞌ eꞌtoꞌpe —tauya Paapa pîꞌ.
10 Mîrîrî warantî amîrîꞌnîkon yenupasaꞌ Paapaya ya, morî kupîyaꞌnîkon tiwin. Mîrîrî yeꞌnen Cristo ennaꞌpo yai, nura pe pra awanîkon. Aweppepîkon pepîn Cristo eporîyaꞌnîkon yai.
11 Mîrîrî warantî morî pe aakoꞌmansaꞌkon imakuiꞌpî tîkuꞌse pra, maasa pra ameruntîrikon ton tîîsaꞌ Jesus Cristoya. Mîrîrî pîꞌ taa toꞌya: —Morî amîrî, Paapa, apemonkonoyamîꞌ pîꞌ. Inkamoro yairî toꞌ koꞌmamî mîrîrî. Tamîꞌnawîronkon yentainon amîrî, Paapa —taa toꞌya.
Paulo Eseurîma Tîweꞌtarumaꞌtîtoꞌ Pîꞌ
12 Aꞌkî, uyonpayamîꞌ, utarumaꞌtîꞌpî toꞌya Paapa maimu ekaremekîuya wenai, moropai uyarakkamoꞌpî toꞌya. Mîîwîni tîîse tuꞌke pemonkonyamîꞌya Paapa maimu eta koꞌmannîpî moropai yapisî toꞌya.
13 Mîrîrî warantî îꞌ waniꞌ awanî yeꞌnen tarî wanî atarakkannîtoꞌ yewîꞌ ta, epuꞌtî tamîꞌnawîronkon surarayamîꞌya. Moropai tiaronkonya epuꞌtî nîrî.
14 Tîîse eranneꞌ pe arinîkon uyonpayamîꞌ wanî pepîn mîrîrî pîꞌ. Tîîse meruntî ke toꞌ enaꞌpî. Uyarakkansaꞌ toꞌya yekare etasaꞌ tîuyaꞌnîkon yeꞌnen, inîꞌ panpîꞌ Paapa maimu ekaremekî toꞌya teweppeꞌse pra.
15 Tîîse tîkinmukon pe ekaremekî tiaronkonya. Upîꞌ tîwoꞌmaꞌtakon pe, Cristo yekare ekaremekî pîꞌ toꞌ wanî. Tîîse mîrîrî warantî pra tiaronkon wanî.
16 Morî pe ekaremekî toꞌya, tîwakîri pe. Inkamoroya usaꞌnama maasa pra Cristoya uyarimaꞌpî tîmaimu ekaremeꞌse epuꞌtî toꞌya. Moropai epuꞌtî toꞌya nîrî, mîrîrî wenai uyarakkamoꞌpî toꞌya.
17 Tîîse tiaronkonya usaꞌnama pepîn. Uyentai toꞌ eꞌkupî Cristo yekare ekaremekî toꞌya. Mîrîrî pîꞌ yairî maꞌre Paulo ena kaiꞌma toꞌ esenumenka.
18 Tîîse esewankonoꞌma pra wai mîrîrî pîꞌ. Îꞌ waniꞌ pra man uupia. Morî pe, imakuiꞌpî pe ekaremekî toꞌya ya, atausinpa sîrîrî. Maasa pra Cristo yekare ekaremekî toꞌya. Inna, mîrîrî pîꞌ atausinpa koꞌmannîpî.
19 Maasa pra epaꞌka kupî sîrîrî. Eepîremasaꞌkon yeꞌnen, moropai Morî Yekaton Wannîya upîikaꞌtîsaꞌ yeꞌnen, epaꞌka kupî sîrîrî.
20 See warantî ikoꞌmanpai wai. Îꞌ rî kupîuya ya, morî pe kuꞌtoꞌpeuya eppepî namai. Moropai imakuiꞌpî pe tiaronkon eseurîma namai Cristo pîꞌ. Tîîse eranneꞌ pe pra ikoꞌmanpai wai, uusaꞌmanta ya, enen wanî ya, Paapa yapurîtoꞌpe tiaronkonya mîrîrî wenai.
21 Maasa pra uurî pia, morî pe awanî Cristo yapurî pîꞌ uukoꞌmamî ya. Mîrîrî warantî uusaꞌmanta ya, itentai panpîꞌ morî pe awanî uupia, maasa pra Cristo pia puꞌkuru uukoꞌmamî.
22 Tîîse uusaꞌmanta pra wanî ya, esenyakaꞌma koꞌmannîpî Cristo ton pe, mîîkîrî yapiꞌtoꞌpe tiaronkonya. Mîrîrî yeꞌnen îꞌ kupîuya epuꞌtîuya pra wai.
23 Maasa pra uurî esiwaꞌsaꞌ sîrîrî uwoi. Mîrîrî yeꞌnen îꞌ koneka epuꞌtîuya pra wai, uukoꞌmamî kaꞌrî tarî, uusaꞌmanta kaꞌrî. Tîîse tauya apîꞌnîkon, tarîpai itîîpai wai kureꞌne maasa pra ikoꞌmanpai wai Cristo yarakkîrî. Mîrîrî wanî morî pe, tarî uukoꞌmamî yentai.
24 Mîîwîni tîîse amîrîꞌnîkon pîꞌ esenumenka ya, inîꞌrî tarî ikoꞌmanpai wai, inîꞌ panpîꞌ amîrîꞌnîkon yenupatoꞌpeuya.
25 Mîrîrî yeꞌnen amîrîꞌnîkon koreꞌta uukoꞌmamî sîrîrî amîrîꞌnîkon pîikaꞌtîtoꞌpeuya, inîꞌ panpîꞌ Cristo epuꞌtîkonpa. Innape awanî epuꞌtî pîꞌ wai.
26 Moriya mîrîrî pîꞌ aatausinpatoꞌkon eporîyaꞌnîkon Cristo Jesus piawon pe awanîkon yeꞌnen. Aatausinpakon uurî erepamî akoreꞌtaꞌnîkon pîꞌ.
27 Mîrîrî yeꞌnen îꞌ taasaꞌ Cristoya, yawîrî akoꞌmantî. Mîrîrî warantî amîrîꞌnîkon pia uutîsaꞌ pra awanî ya, mîrîrî epuꞌtîuya morî pe, yairî aakoꞌmamîkon. Moropai epuꞌtîuya amîrîꞌnîkon esenyakaꞌma kureꞌne Cristo yekare ekaremekî pîꞌ, tiwin eesenumenkatoꞌkon innape ikuꞌtoꞌyakon tîîse.
28 Mîrîrî yeꞌnen eranneꞌ pe pra eꞌtî ayeyatonkon pîꞌ. Eranneꞌ pe pra awanîkon ya, amîrîꞌnîkon pîikaꞌtîsaꞌ Paapaya epuꞌtî toꞌya. Moropai tîtarumaꞌtîkon Paapaya epuꞌtî toꞌya nîrî.
29 Maasa pra Paapaya amîrîꞌnîkon moꞌkaꞌpî innape tîkupîkonpa neken pra, tîîse mîîkîrî wenai aweꞌtarumaꞌtîkonpa nîrî amoꞌkaꞌpîiyaꞌnîkon.
30 Mîrîrî wenai aweꞌtarumaꞌtîkon sîrîrî, pena uurî eꞌtarumaꞌtîꞌpî, manniꞌ aneraꞌmaꞌpîkon warantî. Moropai mîrîrî pîꞌ uukoꞌmamî sîrîrî epuꞌtî pîꞌ naatîi.
