Sîrîrî Kaareta Paulo Nîmenukaꞌpî Filípos Ponkon Pia 2:1-30
2 Innape awanî, ameruntîrikon ton tîrî Cristoya eesewankonoꞌmakon namai. Moropai kureꞌne asaꞌnamaiyaꞌnîkon. Moropai tiwin awanîkon emapuꞌtîsaꞌ Morî Yekaton Wannîya. Moropai aꞌnokoꞌpîkon pe tiaronkon eraꞌmayaꞌnîkon, ayewankon yaꞌ Morî Yekaton Wannî koꞌmamî yeꞌnen. Mîrîrî warantî Cristo wanî aapiaꞌnîkon.
2 Mîrîrî yeꞌnen tauya apîꞌnîkon, tîmurukun pe eꞌtî. Teesiyuꞌpîꞌse pra akoꞌmantî. Tiaron yuꞌse eꞌtî, amîrîꞌnîkon yuꞌse Cristo wanî warantî. Tiwin ayeserukon nîsi Cristo yeseru warantî. Mîrîrî warantî awanîkon ya, inîꞌ panpîꞌ atausinpa mîrîrî pîꞌ.
3 Moropai mîî pe pra eꞌtî, tiaronkon yentai awanîkon pîꞌ teesenumenkai pra eꞌtî.
4 Îꞌ ituꞌse aweꞌtoꞌ pîꞌ neken teesenumenkai pra eꞌtî tîîse ituꞌse tiaronkon eꞌtoꞌ pîꞌ nîrî esenumenkatî.
5 Jesus Cristo esenumenkaꞌpî warantî esenumenkatî.
6 Maasa pra mîîkîrî Jesus wanîꞌpî Paapa kaisarî pena.Tîîse, —Ipîkku pe uukoꞌmamî ipatîkarî —taiya pîn.
7 Mîrîrî yeꞌnen ipîkku pe tîweꞌtoꞌ kupîꞌpîiya tîwî.Tamîꞌnawîrî rumakaꞌpîiya,moropai ipîkku pe pra eenaꞌpî,Paapa poitîrî pe.Maasa pra pemonkon pe eenaꞌpî,uurîꞌnîkon warantî.
8 Pemonkon pe tîwanî yai,tiaronkon maꞌre eenaꞌpî, mîî pe pra.Aakoꞌmamîꞌpî Paapa maimu yawîrî tîîsaꞌmanta pîkîrî.Moropai pakîꞌnan pona aasaꞌmantaꞌpî,amaꞌyeꞌ saꞌmanta warantî.
9 Mîrîrî yeꞌnen Jesus pîmîꞌsaꞌka tîuya yai,ipîkku pe Paapaya ikupîꞌpî, tamîꞌnawîronkon yentai.Moropai tamîꞌnawîronkon ipîkkukon eseꞌ yentaiiteseꞌ ton tîrîꞌpî Paapaya, uyepotorîkon pe.
10 Mîrîrî ikupîꞌpîiyatamîꞌnawîronkonya Jesus yapurîtoꞌpe teesekunkaiꞌma.Kaꞌ ponkonya, non ponkonya, non yoꞌkonya,tamîꞌnawîronkonya taatoꞌpe:—Ipîkku pe Uyepotorî Jesus man,tamîꞌnawîronkon yentainon —taatoꞌpe toꞌya.
11 Moropai mîrîrî yai,tamîꞌnawîronkon pemonkonyamîꞌya taa Jesus Cristo pîꞌ:—Anna yepotorî amîrî, Jesus,anna yaipontînen —taa toꞌya.Mîrîrî warantî Paapa, uyunkon atausinpa kureꞌne mîrîrî pîꞌ,yapurî toꞌya yeꞌnen.Tîwakîri pe etaiya.
Morî Kupî pîꞌ Ikoꞌmanpaiꞌnîkon
12 Mîrîrî yeꞌnen uyonpayamîꞌ, akoreꞌtaꞌnîkon wanî yai, umaimu yawîrî aakoꞌmamîꞌpîkon. Mîrîrî warantî akoꞌmantî inîꞌ panpîꞌ, uurî ton pra tîîse. Aawarîrîꞌnîkon morî kuꞌtî, Paapa namaiꞌma. Imaimu yawîrî akoꞌmantî, Paapa wakîri pe pra awanîkon namai.
13 Maasa pra Paapa esenyakaꞌma koꞌmannîpî ayewankon yaꞌ, ituꞌse tîweꞌtoꞌ ankuꞌpai awanîkonpa. Mîrîrî warantî nîrî kupîiya, ituꞌse tîweꞌtoꞌ kupîkonpa.
14 Tamîꞌnawîrî îꞌ taasaꞌ Paapaya kuꞌtî teesiyuꞌpîꞌse pra, tîîwoꞌmaꞌtai pra moropai teekoreꞌmai pra ikuꞌtî.
15 Moropai mîrîrî warantî ikupîyaꞌnîkon ya, imakuiꞌpî pe tiaronkon eseurîma eserîke pra awanî apîꞌnîkon. Maasa pra Paapa munkîyamîꞌ pe awanîkon, imakuiꞌpî ton pra. Tarî aakoꞌmamîkon amaꞌyeꞌkon koreꞌta, imakuiꞌpî kuꞌnenan koreꞌta. Tîîse morî aakoꞌmantoꞌkon eraꞌma toꞌya. Mîrîrî yai kaꞌ pîꞌ siirikkîyamîꞌ eseraꞌma ewaron yaꞌ warantî, ayeserukon eraꞌma toꞌya morî pe, imakuiꞌpî kuꞌnenan koreꞌta.
16 Moropai inkamoro pîꞌ itekare ekaremekî pîꞌ aakoꞌmamîkon, koꞌmannîtoꞌ ton tîînen. Mîrîrî warantî aakoꞌmansaꞌkon ya, kureꞌne atausinpa apîꞌnîkon. Tarîpai Cristo iipî yai, kureꞌne atausinpa apîꞌnîkon. Maasa pra îꞌ pe pra rî esenyakaꞌmasaꞌ pra awanî yeꞌnen, maasa pra innape ikuꞌsaꞌyaꞌnîkon.
17 Penaronkonya Paapa repaꞌpî tekînon ke. Mîrîrî pîꞌ Paapa atausinpaꞌpî. Mîrîrî warantî aatausinpa nîrî, innape tîkuꞌtoꞌyaꞌnîkon pîꞌ. Moropai tîmîrî ton pe eesenyakaꞌmatoꞌ pîꞌ, innape Paapa kuꞌsaꞌyaꞌnîkon uurî wenai. Mîrîrî wenai uwî toꞌya yai pra. Tîîse atausinpa mîrîrî pîꞌ moropai amîrîꞌnîkon pîꞌ atausinpa.
18 Mîrîrî yeꞌnen aatausinpakon eꞌpai awanî uurî pokonpe.
Timóteo Moropai Epafrodito Yekare Pîꞌ
Paulo Eseurîma
19 Kaꞌneꞌ pe Timóteo anarimapai wai amîrîꞌnîkon pia, ayekarekon etai attîtoꞌpe. Mîrîrî yuꞌse Uyepotorî Jesus wanî ya, ikupîuya. Mîîkîrîya îꞌ kaiꞌma ayekarekon ekaremekî upîꞌ. Mîrîrî pîꞌ atausinpa.
20 Mîîkîrî, Timóteo warainon ton pra awanî. Mîîkîrîya neken kureꞌne tîꞌnokoꞌpî pe ayeraꞌmakon.
21 Maasa pra tamîꞌnawîronkon esenumenka ituꞌse tîweꞌtoꞌkon pîꞌ neken. Tîîse ituꞌse Jesus Cristo eꞌtoꞌ kupî toꞌya pepîn.
22 Mîrîrî warantî pra Timóteo wanî. Morî iteseru epuꞌtî pîꞌ naatîi. Timóteo esenyakaꞌmapîtîꞌpî uyarakkîrî, teesenyakaꞌmasen tun yarakkîron warantî. Morî pe mîîkîrî esenyakaꞌmapîtîꞌpî uyarakkîrî, Cristo yekare ekaremekî pîꞌ.
23 Tarîpai anarimapai wai kaꞌneꞌ pe aapiaꞌnîkon. Tîîse maasa îꞌ kupî toꞌya upîꞌ epuꞌsauꞌya yai, mîîkîrî yarimauya.
24 Moropai uutî nîrî aapiaꞌnîkon, ituꞌse Paapa wanî ya.
25 Tîîse eꞌmaiꞌ pe Epafrodito yarimapai wanî sîrîrî. Mîîkîrî wanî uyonpakon pe, teesenyakaꞌmasen uyarakkîrî, Paapa esenyakaꞌmatoꞌ kupî pîꞌ aatapiꞌsaꞌ. Mîîkîrî anarimaꞌpîkon uupia upîikaꞌtînen pe aweꞌtoꞌpe.
26 Mîîkîrî yarimauya sîrîrî maasa pra amîrîꞌnîkon aneraꞌmapai awanî. Mîîkîrî esewankonoꞌmaꞌpî priꞌya pra tîwanî yekare etasaꞌyaꞌnîkon pîꞌ. Mîrîrî yeꞌnen kureꞌne aneraꞌmapai awanî. Mîrîrî yeꞌnen yarimauya sîrîrî eraꞌmakonpa.
27 Inna priꞌya pra awanîꞌpî kureꞌne. Aasaꞌmanta yonpaꞌpî. Tîîse tîꞌnokoꞌpî pe eraꞌmaꞌpî Paapaya moropai yepiꞌtîꞌpîiya. Mîîkîrî neken pepîn tîîse uurî nîrî eraꞌmaꞌpîiya tîꞌnokoꞌpî pe, inîꞌ panpîꞌ esewankonoꞌma namai.
28 Mîrîrî yeꞌnen uwakîri mîîkîrî yarimauya sîrîrî taatausinpai eraꞌmakonpa, moropai ipîꞌ teesenumenkai pra uukoꞌmantoꞌpe.
29 Tarîpai mîîkîrî yapiꞌtî taatausinpai Cristo pemonkono pe awanî yeꞌnen amîrîꞌnîkon warantî. Mîîkîrî yapurîtî moropai tiaronkon iwarainokon nîrî yapurîtî.
30 Aaipîkon eserîke pra awanî yeꞌnen, mîîkîrî yarimaꞌpîyaꞌnîkon upîikaꞌtînen pe. Itekare ekaremekî pîꞌ eesenyakaꞌmaꞌpî tîwîrî, tîîsaꞌmanta epuꞌtîiꞌma. Mîrîrî yeꞌnen mîîkîrî yapurîtî.
