Sîrîrî Kaareta Paulo Nîmenukaꞌpî Filípos Ponkon Pia 3:1-21
3 Sîrîrî panpîꞌ neken eseurîmatoꞌ sîrîrî, uyonpayamîꞌ. Kureꞌne atausinpatî, uyepotorîkon piawon pe awanîkon yeꞌnen. Îꞌ menukaꞌpîuya pena, inîꞌrî imenukauya sîrîrî. Mîrîrî pîꞌ esetaꞌka pepîn, maasa pra inîꞌ panpîꞌ yairî epuꞌtîkonpa, eesenkuꞌtîkon namai.
2 Aka, uyonpayamîꞌ, tîwarî eꞌtî warayoꞌkon arinmaraka warainokon pîꞌ amîrîꞌnîkon yenkuꞌtî toꞌya namai. Inkamoro yeseru wanî imakuiꞌpî pe. Inkamoroya taapîtî: —Amere piꞌpîkon yaꞌtîtî Paapa munkî pe awanîkonpa. Mîrîrî apiꞌpîkon yaꞌtîsaꞌyaꞌnîkon pra awanî ya, Paapa munmu pe pra awanîkon —taa toꞌya.
3 Tîîse uurîꞌnîkon wanî Paapa munkîyamîꞌ pe puꞌkuru. Maasa pra Paapa yapurî uurîꞌnîkonya, Morî Yekaton Wannî meruntîri wenai. Mîrîrî yeꞌnen taatausinpai uurîꞌnîkon koꞌmamî Jesus Cristo nîkupî pîꞌ, ipîkku pe awanî yeꞌnen. Tîîse unkupîkon pîꞌ, upiꞌpîkon yaꞌtîsaꞌ wanî ipîkku pe pra, îꞌ pe pra rî awanî.
4 Tînkupîꞌpîkon wenai Paapa munkî pe tîwanîkon pîꞌ toꞌ esenumenka kaiꞌma.
Tîîse mîrîrî warantî uurî nîrî esenumenka eꞌpainon, morî pe eꞌtoꞌ wenai.
5 Maasa pra uurî esenposaꞌ tîpo, umere piꞌpî yaꞌtîꞌpî toꞌya Moisés nurîꞌtî taasaꞌ yawîrî eseurîwîꞌne miaꞌ pona tîîmoꞌtai wei tîîse. Uyun, usan wanî Israel paꞌri rîꞌsan pe. Uurî wanî Benjamim nurîꞌtî paarîꞌpî pe. Tamîꞌnawîronkon utamokon wanîꞌpî Abraão paꞌrirîꞌsan pe, tiaronkon pepîn. Moropai fariseu pe wanîꞌpî, Moisés nurîꞌtîya yenupantoꞌ yawîron.
6 Kureꞌne esenyakaꞌmapîtîꞌpî Paapa ton pe, Moisés nurîꞌtîya yenupantoꞌ yawîrî. Jesus yapurînenan tarumaꞌtîpîtîꞌpîuya. Tamîꞌnawîrî îꞌ taasaꞌ Moisés kaaretarîya, mîrîrî kuꞌpîtîꞌpîuya yairî. Morî pe Paapa pemonkono pe wanî kaiꞌma esenumenkapîtîꞌpî, imakuiꞌpî ton pra.
7 Tîîse Cristo eporîꞌpîuya pata pai, epuꞌtîꞌpîuya manniꞌ uyeserurîꞌpî wanî îꞌ pe pra rî. Morî pe Cristo wanî epuꞌtîꞌpîuya, maasa pra imîrî pe enasaꞌ yeꞌnen. Tamîꞌnawîrî uyeserurîꞌpî yentai awanîꞌpî.
8 Tarîpai tiaron morî panpîꞌ eporîꞌpîuya. Uyepotorî pe Jesus enaꞌpî. Imaimu yawîrî ikoꞌmanpai wai tarîpai. Tamîꞌnawîrî morî unkupîꞌpîkon yentai Jesus wanî. Mîrîrî yeꞌnen uyeserurîꞌpî unkupîꞌpî, tamîꞌnawîrî irumakaꞌpîuya. Îꞌ rî nura sorokauya warantî uyeserurîꞌpî yenumîꞌpîuya Cristo neken anepuꞌpai wanî.
9 Moropai Jesus pemonkono pe eꞌpai wanî. Maasa pra, Jesus rawîrî erepansaꞌ yai, —Moisés nurîꞌtîya yenupantoꞌ yawîrî awanî yeꞌnen, upemonkono pe awanî —taiya pepîn upîꞌ. Tîîse taiya: —Innape ukuꞌsaꞌya wenai, upemonkono pe awanî —taiya. Yairî uyeseru eporîꞌpîuya Paapa winîpai. Mîrîrî tîrîꞌpîiya uupia innape tîkupîuya yai.
10 Moropai Cristo neken anepuꞌpai wai kureꞌne. Moropai Paapaya tînmu pîmîꞌsaꞌkaꞌpî meruntîri nîrî yuꞌse wai. Cristo eꞌtarumaꞌtîꞌpî uurî ton pe. Mîrîrî warantî eꞌtarumaꞌtîpai wai mîîkîrî wenai. Mîîkîrî saꞌmantaꞌpî uurî tonpe, mîrîrî warantî saꞌmantapai wanî mîîkîrî wenai.
11 Mîrîrî warantî eꞌpai wai, uusaꞌmanta yai uꞌmîꞌsaꞌkatoꞌpe Paapaya. Mîrîrî yuꞌse wanî kureꞌne.
Ikîꞌpî Pîkîrî Paulo Koꞌmamî Paapa Nîtîrî Yapisîpa
12 Tamîꞌnawîrî ituꞌse Paapa eꞌtoꞌ pepîn uurî. Tîîse mîrîrî pîꞌ uukoꞌmamî sîrîrî. Jesus Cristoya ukupîꞌpî tîpemonkono pe, morî pe puꞌkuru eꞌtoꞌpe. Mîrîrî yeꞌnen pemonkon teekaꞌtunsen eꞌma taawîrî ikîꞌpî tîpose warantî uurî ekaꞌtumî toꞌsarî Jesus pîkîrî, iwarantî eꞌtoꞌpe.
13 Uyonpayamîꞌ, tamîꞌnawîrî ituꞌse Paapa eꞌtoꞌ kuꞌsauꞌya pepîn sîrîrî. Mîrîrî yeꞌnen mîrîrî pîꞌ uukoꞌmamî sîrîrî, pena esuwaꞌkaꞌpî pîꞌ tîwenpenatai pra. Tîîse maasa tuiꞌsen pîꞌ esenumenka koꞌmannîpî.
14 Teekaꞌtunsen ekaꞌtumî ekaꞌtunnîtoꞌ ikîꞌpî pîkîrî, epeꞌmîra toꞌ nîtîrî yapisîpa kaiꞌma, uurî wanî mîrîrî warantî. Epeꞌmîra Paapa nîtîrî yapiꞌtoꞌpeuya, imaimu yawîrî uukoꞌmamî. Maasa pra pena Paapaya uyannoꞌpî uukoꞌmantoꞌpe tîîpia. Mîrîrî kupîꞌpîiya Jesus Cristo nîkupîꞌpî wenai. Mîrîrî yeꞌnen ipatîkarî enen koꞌmannîtoꞌ tîrîiya uupia.
15 Mîrîrî yeꞌnen, mîrîrî warantî esenumenkanpaiꞌnîkon. Uurîꞌnîkon yairon epuꞌnenan, Jesus pemonkono pe eꞌnî yeꞌnen. Tîîse mîrîrî warantî eesenumenkakon pra awanîkon ya, mîrîrî ekaremekî Paapaya apîꞌnîkon.
16 Tîîse unepuꞌtîkon yawîrî koꞌmannîpaiꞌnîkon.
17 Uyonpayamîꞌ, uukoꞌmamî warantî akoꞌmantî. Moropai uwarainokon yeseru eraꞌmatî, tenupaꞌpîuyakon yawîrî toꞌ koꞌmamî.
18 Tîîse uurî warantî pra tiaronkon wanî, taꞌpîuya saꞌrî. Inîꞌrî tauya apîꞌnîkon, manniꞌkan pîꞌ kureꞌne esewankonoꞌmasaꞌ sîrîrî. Maasa pra Cristo yeyatonon inkamoro, Jesus saꞌmantaꞌpî yekare anetapainokon pepîn.
19 Apoꞌ yaꞌ toꞌ wîtî kupî sîrîrî. Ituꞌse tîweꞌtoꞌkon pîꞌ neken toꞌ esenumenka taatausinpai. Nurakon pîꞌ, imakuiꞌpî tînkupîkon pîꞌ toꞌ atausinpa. Mîî pe ikupî toꞌya, toꞌ eppepî eꞌpai tîîse. Tarî sîrîrî non ponkon yeseru pîꞌ toꞌ esenumenka.
20 Tîîse uurîꞌnîkon wanî kaꞌ ponkon pemonkonoyamîꞌ pe tarî non po. Mîrîrî yeꞌnen Upîikaꞌtînenkon Jesus Cristo iipî nîmîkî pîꞌ koꞌmannî. Mîîkîrî, uyepotorîkon aneraꞌmapai uurîꞌnîkon wanî kureꞌne.
21 Mîîkîrî meruntî. Tamîꞌnawîrî tîmaꞌre kupîiya eꞌpainon. Mîrîrî tîmeruntîri ke uurîꞌnîkon miakanmaiya morî pe, tîwarantî. Aꞌtuꞌmînan, tîîsaꞌmantasanon upiꞌpîkon tîîse upiꞌpîkon miakanmaiya tîpiꞌpî warantî.
