Sîrîrî Kaareta Paulo Nîmenukaꞌpî Filípos Ponkon Pia 4:1-23
4 Mîrîrî yeꞌnen morî pe yapîtanîꞌtî, Paapa maimu yawîrî akoꞌmantî tîwî tîkai pra. Apîꞌnîkon kureꞌne atausinpasaꞌ wanî, uyonpayamîꞌ. Tîwîrî ayapurîuyaꞌnîkon, unsaꞌnamakon. Kureꞌne amîrîꞌnîkon aneraꞌmapai wanî.
2 Evódia, apanamauya sîrîrî. Moropai Síntique, amîrî nîrî panamauya sîrîrî. Saꞌnîrî amîrîꞌnîkon wanî Cristo yonpa pe. Mîrîrî yeꞌnen teekoreꞌmai pra eꞌtî, tîîse morî pe ekonekatî.
3 Inna, uyakon, tauya nîrî apîꞌ, inkamoro Evódia moropai Síntique pîikaꞌtîkî, toꞌ panamakî morî pe toꞌ koꞌmantoꞌpe tîmurukun pe. Maasa pra inkamoro wîriꞌsanyamîꞌ esenyakaꞌmapîtîꞌpî uyarakkîrî Paapa maimu ekaremekî pîꞌ. Clemente yarakkîrî nîrî toꞌ esenyakaꞌmapîtîꞌpî. Moropai tiaronkon yarakkîrî nîrî. Inkamoro eseꞌ menukaꞌpî Paapaya, mîrîrî kaareta ipatîkarî enen koꞌmannîtoꞌ pona.
4 Paapa pemonkono pe awanîkon yeꞌnen atausinpatî. Inîꞌrî tauya apîꞌnîkon, taatausinpai akoꞌmantî teesetaꞌkai pra.
5 Cristo iipî kupî sîrîrî. Mîrîrî yeꞌnen morî kuꞌtî tamîꞌnawîronkon pîꞌ eranmîra awanîkon epuꞌtoꞌpe toꞌya.
6 Tamîꞌnawîron yuꞌse awanîkon pîꞌ teesewankonoꞌmai pra eꞌtî. Tîîse Paapa yarakkîrî eseurîmatî. Îꞌ ituꞌse aweꞌtoꞌkon esaꞌtî Paapa pîꞌ. Mîrîrî esatîyaꞌnîkon ya: —Morî pe man, Paapa —kaꞌtî ipîꞌ.
7 Mîrîrî warantî eepîremakon ya, ayewankon ereutanîpîiya. Moropai morî pe eesenumenkatoꞌkon konekaiya eranneꞌ pe awanîkon namai. Mîrîrî tîîwanmîra eꞌnîtoꞌ, intîrî wanî kureꞌne, esenumenkan yentai. Mîrîrî warantî uyewankon, esenumenkantoꞌ koꞌmannîpîiya morî pe.
8 Uyonpayamîꞌ, sîrîrî eseurîma mîrîrî epuꞌtîkonpa. Tamîꞌnawîron morî tekenan pîꞌ esenumenkatî. Îꞌ wanî seruꞌyeꞌ pe pra, moropai îꞌ wanî morî pe tiaronkon napurî ton, moropai îꞌ wanî yairî, moropai îꞌ wanî nura pe pra, moropai îꞌ wanî tiaron atausinpatoꞌpe, îꞌ wanî morî pe tiaronkon neraꞌma ton, moropai îꞌ wanî imakuiꞌpî pe pra, tamîꞌnawîrî mîrîrî morî tekenan pîꞌ esenumenkatî.
9 Îꞌ eesenupaꞌpîkon moropai anapisîꞌpîkon moropai anetaꞌpîkon, moropai aneraꞌmaꞌpîkon uurî winîpai, mîrîrî warantî ikuꞌtî. Maasa pra Paapa, uupiaꞌnîkon tîwanmîn tîînen koꞌmamî aapiaꞌnîkon.
—Morî Pe Man —Taa Pauloya
10 Uyepotorîkon pîꞌ atausinpan pîꞌ wai, maasa pra urepaꞌpîyaꞌnîkon inîꞌrî Paapa yapurîyaꞌnîkon yeꞌnen. Pena pata pai uurî anrepapai aakoꞌmamîꞌpîkon îꞌ ton pra siꞌma. Tarîpai sîrîrî urepaꞌpîyaꞌnîkon usaꞌnamayaꞌnîkon yeꞌnen.
11 Awinîpaiꞌnîkon îꞌ rî esaꞌsauꞌya pra wai, îꞌ ton pra siꞌma. Maasa pra îꞌ awanî ya mararî, kureꞌne mîrîrî pîꞌ atausinpa. Mîrîrî mîîrî esenupaꞌpî.
12 Îꞌ ton pra uukoꞌmanpîtîꞌpî. Moropai tuꞌke temanne ke nîrî uukoꞌmanpîtîꞌpî îꞌ tuiꞌsen pîꞌ. Teesewankonoꞌmai pra uukoꞌmamî. Emiꞌne, asareꞌtîsaꞌ wanî ya, taatausinpai uukoꞌmamî. Mîrîrî kureꞌne, mararî wanî ya, taatausinpai uukoꞌmamî. Mîrîrî esenupaꞌpî.
13 Tamîꞌnawîron upona tuiꞌsen yapîtanîpîuya, maasa pra tîmeruntîri tîrî Cristoya uupia.
14 Tîîse eꞌtarumaꞌtî tanne, upîikaꞌtîꞌpîyaꞌnîkon. Mîrîrî eraꞌmauya uwakîri.
15 Uyonpayamîꞌ, Filípos ponkon, pena Paapa maimu ekaremekî piaꞌtîuya yai amîrîꞌnîkonya yapisîꞌpî. Mîrîrî yeꞌnen upîikaꞌtîꞌpîyaꞌnîkon. Macedônia poi eseꞌmaꞌtîꞌpî pata pai Paapa pemonkonoyamîꞌya upîikaꞌtî pîn, tîîse amîrîꞌnîkon neken. Mîrîrî epuꞌtî pîꞌ naatîi.
16 Tessalônica po wanî yai, antîrîkon yarimaꞌpîyaꞌnîkon tiwin iteꞌka pra, îꞌ ton pra wanî namai.
17 Mîrîrî antîrîꞌpî pîꞌ neken esenumenka pepîn. Tîîse aapiaꞌnîkon inîꞌ panpîꞌ morî tîrî Paapaya yuꞌse wai morî pe upîikaꞌtîsaꞌyaꞌnîkon yeꞌnen. Mîrîrî pîꞌ esenumenka.
18 Mîrîrî antîrîꞌpîkon enepîꞌpî Epafroditoya moropai yapisîꞌpîuya. Kureꞌne ituꞌse uurî eꞌtoꞌ yentai anarimaꞌpîkon wanî. Uwakîri pe yapisîꞌpîuya. Pena tîpemonkonoyamîꞌ nîtîrîkon aꞌpusin yapisîꞌpî Paapaya warantî, mîrîrî antîrîꞌpîkon nîrî yapisîiya tîwakîri pe.
19 Moropai Uyun, Paapa mîîkîrî tamîꞌnawîron esaꞌ pe tîweꞌsen. Mîrîrî yeꞌnen tamîꞌnawîrî ituꞌse aweꞌtoꞌkon tîrîiya aapiaꞌnîkon, Cristo Jesus nîkupîꞌpî wenai.
20 Uyunkon Paapa pîꞌ, —Morî puꞌkuru amîrî —taa eꞌpai awanî wei kaisarî. Ipatîkarî Paapa yapurî eꞌpai awanî. Innape puꞌkuru awanî.
Paulo Esekaremekî
21 Tamîꞌnawîrî amîrîꞌnîkon Jesus pemonkonoyamîꞌ pia umaimu man. Moropai tîmaimukon nîrî yarima uyonpayamîꞌya, uupiawonkonya.
22 Tîmaimukon yarima tamîꞌnawîronkon Jesus pemonkonoyamîꞌya, moropai inkamoro koreꞌta César poitîrîtononya yarima nîrî.
23 Moropai ayewankon yaꞌ morî tîrî Uyepotorîkon Jesus Cristoya yuꞌse wai. Mîrîrî neken.
