Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 10:1-39
10 Pena Moisés nurîꞌtîya yenupatoꞌ wanî maasa Cristo nîkupî ekaremeꞌnen pe. Mîrîrî wanîꞌpî itekatonoꞌpî pe neken, morî pe tuiꞌsen yekatonoꞌpî pe awanîꞌpî, imaꞌre tîwanî yeꞌnen. Maasa pra konoꞌ kaisarî ikuꞌpîtî toꞌya eꞌpai awanîꞌpî. Mîrîrî yeꞌnen oꞌnon yeꞌka pe mîrîrî Moisés nurîꞌtî nîmenukaꞌpîya pemonkon kupî eꞌpainon morî pe eꞌtoꞌ yawîrî, Paapa pia erepannîtoꞌpe.
2 Sîrîrî Paapa yapurînenan eꞌsaꞌ ya, morî pe eꞌtoꞌ yawîrî ironasaꞌ pe imakuiꞌpî tînkupîꞌpîkon winîpai, mîrîrî tînkupîkon koꞌmannîpî mîꞌpannîpîꞌpî toꞌya eꞌpainon. Maasa pra morî pe toꞌ wanî eꞌpainon teuren.
3 Tîîse mîîwîni pra awanî konoꞌ kaisarî tîmakuyikon yepeꞌ ton tekînkon eneꞌpîtî pemonkonyamîꞌya. Mîrîrîya toꞌ yenpenatanîpîꞌpî tîmakuyikon rona pîꞌ.
4 Maasa pra paaka mînîya moropai bode mînîya anîꞌ nîkupîꞌpî imakuiꞌpî moꞌka eserîke pra awanî tiwin kin.
5 Mîrîrî yeꞌnen Cristoya taꞌpî Paapa pîꞌ tarî non pona teerepansaꞌ yai:—Paaka mînî moropai anîꞌrî mînî yarîuyayuꞌse pra awanî yeꞌnen,uyesaꞌ ton kupîꞌpîya, Paapa, untîrî tonpe aapia.
6 Maasa pra oꞌmaꞌkon toꞌ nîpoꞌtîkonitaponseꞌ poinkamoro yuꞌse pra awanî inîꞌrîtoꞌ nîkupîꞌpî imakuiꞌpî moꞌkanen pe.
7 Mîrîrî yeꞌnen tauya apîꞌ:Paapa, uurî tarî waiituꞌse aweꞌtoꞌ kuꞌtoꞌpeuya.Îꞌ kaiꞌma amaimu yaponseꞌ poupîꞌ teeseurîmasen eꞌmenukasaꞌmanniꞌya taasaꞌ yawîrî ikupîuya
—taꞌpîiya.
8 Mîrîrî pîꞌ esenumenkanpaiꞌnîkon. Eꞌmaiꞌ pe taꞌpîiya: —Paaka wîî toꞌya yuꞌse pra awanî. Anîꞌ enepî toꞌya yuꞌse awanî pepîn aapia tînpoꞌtîkon ton. (Mîrîrî taꞌpîiya mîrîrî kuꞌtoꞌpe toꞌya kaiꞌma Moisés nurîꞌtî nîmenukaꞌpîya taasaꞌ tanne.)
9 Moropai mîrîrî tîpo taꞌpîiya: —Uurî tarî wai Paapa, ituꞌse amîrî eꞌtoꞌ kuꞌtoꞌpeuya —taꞌpîiya. Mîrîrî warantî tamîꞌnawîrî toꞌ nîkupî koꞌmannîpî yaretîꞌkaꞌpî Paapaya. Moropai mîrîrî pataꞌpî yaꞌ Cristo saꞌmantatoꞌ tîrîꞌpîiya.
10 Ituꞌse Paapa wanî wenai Cristo saꞌmantaꞌpî. Mîrîrî aasaꞌmantatoꞌ wenai, uurîꞌnîkon nîkupîꞌpî imakuiꞌpî moꞌkaꞌpîiya. Moropai morî pe uurîꞌnîkon kupîꞌpîiya. Maasa pra eeturumakaꞌpî tîîsaꞌmantapa tiwin iteꞌka tamîꞌnawîronkon nîkupîꞌpî imakuiꞌpî tonpe.
11 Mîrîrî yeꞌka pe pra manniꞌkan teepîremasanon Judeuyamîꞌ nîpoꞌtî wanî. Ikoꞌnoro wei kaisarî teserukon yawîrî ikupî pîꞌ toꞌ eꞌpîtî. Tîîse mîrîrî toꞌ nîkupîya anîꞌ nîkupîꞌpî imakuiꞌpî moꞌka eserîke pra awanî tiwin kin.
12 Tîîse mîîkîrî teepîremasanon esanon yepotorî Jesus Cristo eturumakaꞌpî tiwin iteꞌka neken imakuiꞌpî tamîꞌnawîronkon nîkupîꞌpî moꞌkapa. Mîrîrî kuꞌsaꞌ tîuya tîpo eereutaꞌpî ipîkku pataꞌseꞌ yaꞌ, Paapa meruntîri winîkîi.
13 Miarî mîrîrî pata pai, mîîkîrî Jesus koꞌmamî. Îꞌ pensa Paapaya imaimu yawîrî iteyatonon kupî inîmîkî pîꞌ aakoꞌmamî, toꞌ yentai awanî yeꞌnen.
14 Maasa pra mîrîrî tiwin iteꞌka eeturumakaꞌpî wenai tîpemonkonoyamîꞌ kupîꞌpîiya morî pe eꞌtoꞌ yawîrî ipatîkarî imakuiꞌpî ton pra. Manniꞌkan innape ikuꞌnenan makuyikon moꞌkaiya.
15 Moropai Morî Yekaton Wannî eseurîmaꞌpî mîrîrî yekare pîꞌ. Eꞌmaiꞌ pe taꞌpîiya:
16 —Sîrîrî wanî esetatoꞌ ton pe toꞌ yarakkîrîmanniꞌ wei esuwaꞌkasaꞌ tîpo ikupîuya —taꞌpî Paapaya.—Umaimu yekaꞌmauya toꞌ yewan yaꞌ aakoꞌmantoꞌpe,moropai îꞌ pona imenukasaꞌ warantîtoꞌ esenumenkatoꞌ yaꞌ itîrîuyatîîwanmîraꞌnîkon ikupî toꞌya namai,
—taꞌpîiya.
17 Moropai inîꞌrî taꞌpîiya:—Îꞌ pensa imakuiꞌpî pe toꞌ eꞌtoꞌ pîꞌenpenata pepîn inîꞌrîmoropai toꞌ nîkupîꞌpî imakuiꞌpî pîꞌenpenata pepîn tiwin kin
—taꞌpîiya.
18 Mîrîrî warantî tîîwanmîra imakuiꞌpî unkupîꞌpîkon kuꞌsaiꞌya tîpo inîꞌrî tîmakuyikon yepeꞌ pe toꞌ nîpoꞌtî yuꞌse pra awanî tarîpai.
Paapa Pia Erepannîpaiꞌnîkon
19 Mîrîrî yeꞌnen uyonpayamîꞌ, Jesusya pakîꞌnan pona tîmînî kamoꞌpî pata pai, îꞌ rî umanenpanenkon ton pra man morî puꞌkuru Paapa pataꞌseꞌ yaꞌ ewonnîtoꞌpe.
20 Maasa pra mîîkîrîya amenan eꞌma arakkanmokaꞌpî ewonnîtoꞌ ton. Aasaꞌmantaꞌpî yai, tîpataꞌseꞌ yuwaꞌtoꞌ kamisa karakaꞌpî Paapaya. Mîrîrî yeꞌnen Paapa pia puꞌkuru ewonnî tarîpai. Maasa pra pemonkon pe Jesus saꞌmantatoꞌ wenai imakuiꞌpî unkupîꞌpîkon moꞌkaꞌpîiya. Moropai uupiaꞌnîkon morî pe tîweꞌtoꞌ tîîsaiꞌya yeꞌnen, ewonnî Paapa pia koꞌmanse.
21 Tarîpai moro man tiwin kureꞌnan teepîremasanon esanon yepotorî uurîꞌnîkon tonpe miarî Paapa yewîꞌ esaꞌ pe tîweꞌsen.
22 Mîrîrî yeꞌnen aminke pra erepannîpaiꞌnîkon man Paapa pia. Yairî uyewankon yaꞌ esenumenkan yeꞌka pe moropai innape ikupîiꞌma. Maasa pra morî pe esenumenkantoꞌ enasaꞌ man ironasaꞌ pe. Moropai morî puꞌkuru tuna ke ironasaꞌ pe uyesaꞌkon wanî warantî, ituꞌna, uyewankon yaꞌ morî pe koꞌmannî inîꞌrî imakuiꞌpî kupî pîꞌ koꞌmannî pepîn. Mîrîrî yeꞌnen iipia puꞌkuru erepannîpaiꞌnîkon man.
23 Moriya innape ikupî pîꞌ koꞌmannîpaiꞌnîkon man. Manniꞌ ipîꞌ eseurîman koꞌmannîpî manniꞌ maasa pra epuꞌtî man îꞌ kaiꞌma yairî îꞌ taꞌpî tîuya kupî Paapaya.
24 Moropai morî pe eꞌnî yuwapaiꞌnîkon tiaronkon yarakkîrî. Tiaronkon pîikaꞌtîpaiꞌnîkon tamîꞌnawîrî morî pe toꞌ saꞌnama wenai moropai tiaronkon nîrî saꞌnamatoꞌpe toꞌya. Moropai toꞌ pîikaꞌtî yuwatoꞌpe toꞌya.
25 Tiaronkon wîtî pra awanî wenai epereꞌpîꞌnîtoꞌ pataꞌseꞌ yaꞌ —Uurî nîrî uutî pepîn —tîkai pra eꞌnîpaiꞌnîkon man. Tîîse inkamoro yausinpapaiꞌnîkon man. Inîꞌ panpîꞌ itîîpai toꞌ eꞌtoꞌpe, toꞌ yausinpapaiꞌnîkon man. Maasa pra aminke pra Uyepotorîkon iiꞌtoꞌ weiyu eseponî pîꞌ man mîîtoꞌpe. Mîrîrî yeꞌnen toꞌ tarumakai pra toꞌ yausinpa yuwapaiꞌnîkon man.
26 Maasa pra yairon puꞌkuru Paapa maimu eta tîpo tîpuꞌse imakuiꞌpî kupî pîꞌ koꞌmannî ya, inîꞌrî mîrîrî moꞌkanen ton eporî eserîke pra man. Paapa maimu pîinama pra tanne tiaron untîrîkon ton pra man imakuiꞌpî yepeꞌ ton.
27 Mîrîrî yeꞌnen eranneꞌ pe eꞌnî kupî sîrîrî. Maasa pra apoꞌ yaꞌ teyatonon yenumî Paapaya nariꞌ yaꞌ, apoꞌ îꞌ pensa eesiꞌnîpî neporî ton pepîn yaꞌ.
28 Maasa eraꞌmakî. Pena Moisés nurîꞌtî nîmenukaꞌpî yawîrî pra tîweꞌsen wanî ya, mîîkîrî yeꞌka wîꞌpî toꞌya tîꞌnînmai pra. Tîîse mîrîrî kuꞌpîtîꞌpî toꞌya pena anîꞌya imakuiꞌpî kuꞌsaꞌ eraꞌma asakîꞌnankonya ya. Mîîwîni pra awanî ya, eseurîwîꞌnankonya eraꞌmasaꞌ ya.
29 Tarîpai oꞌnon yeꞌka pe awanî kupî sîrîrî Paapa munmu yewanmîrîtîpon yarakkîrî? Inkamoro yeꞌkaya imînî tîrona tonkon kupî îꞌ pe pra rî. Manniꞌ imînî wenai upîikaꞌtîiyaꞌnîkon yekare esepuꞌtî, amenan esetatoꞌ yawîrî. Moropai oꞌnon yeꞌka pe eꞌpai awanî Paapa Yekaton, isaꞌnamanen, winîkîi tîwoꞌmaꞌtasen yarakkîrî? Maasa esenumenkatî. Penaronkon Moisés nurîꞌtî maimu yawîrî pra esiꞌsan yentai tîweꞌtarumaꞌtîtoꞌ yapisîiya kupî sîrîrî.
30 Maasa pra Paapa manniꞌya epuꞌtî man. Taꞌpîiya:—Eseꞌma kupî sîrîrî inkamoro,umaimu yewanmîrîtîponkon, yarakkîrî
—taꞌpîiya. Moropai taꞌpîiya inîꞌrî:—Uyepotorîkonya tîpemonkonoyamîꞌ yeseru yenpo kupî sîrîrî.Moropai imakuiꞌpî toꞌ nîkupîꞌpîkon wenai,inkamoro yenumîiya kupî sîrîrî
—taꞌpîiya.
31 Akan neken taamî mannankan Paapa tîîkoꞌmansenya toꞌ yenumî kupî pe man.
32 Maasa enpenatatî. Pena Jesus yekare etayaꞌnîkon yai, innape ikupîꞌpîyaꞌnîkon, yairî awanî epuꞌtîꞌpîyaꞌnîkon. Mîrîrî wenai tuꞌke aweꞌtarumaꞌtîꞌpîkon. Tîîse mîrîrî rumakayaꞌnîkon pra awanîꞌpîkon. Yapîtanîpî pîꞌ aakoꞌmamîꞌpîkon.
33 Tiaron pensa amîrîꞌnîkon muꞌtunpaꞌpî toꞌya mararî pra. Moropai atarumaꞌtîꞌpîkon toꞌya tamîꞌnawîronkon rawîrî siꞌma. Moropai amîrîꞌnîkonya tiaronkon eꞌtarumaꞌtî eraꞌmaꞌpî aꞌnokoꞌpîkon pe. Mîrîrî yeꞌnen toꞌ wanîyakon pe toꞌ pîikaꞌtî yuwaꞌpîyaꞌnîkon. Mîrîrî wenai toꞌ kaisarî aweꞌtarumaꞌtîꞌpîkon.
34 Moropai amîrîꞌnîkonya atarakkamoꞌsan pîikaꞌtîꞌpî. Tamîꞌnawîrî itesaꞌ pe aweꞌtoꞌkon moꞌkaꞌpî toꞌya tanne, mîrîrî yapîtanîpîꞌpîyaꞌnîkon aatausinpakon yeꞌka pe. Aatausinpaꞌpîkon maasa pra mîrîrî yentainon morî panpîꞌ eporîyaꞌnîkon epuꞌtîꞌpîyaꞌnîkon, tîweꞌtîꞌkasen pepîn tîrî tîuya taasaꞌ Paapaya yawîrî.
35 Mîrîrî yeꞌnen meruntî ke eꞌtî aꞌtuꞌmîra teenai pra. Innape ikupî pîꞌ aakoꞌmamîkon ya, kureꞌne morî yapisîyaꞌnîkon kupî sîrîrî.
36 Mîrîrî yapisîyaꞌnîkon nîmîkî pîꞌ akoꞌmantî teesetaꞌkai pra. Ituꞌse Paapa eꞌtoꞌ kupî pîꞌ moropai îꞌ tîrîuya taꞌpî Paapaya yapisîyaꞌnîkon pîkîrî akoꞌmantî.
37 Maasa pra Paapa maimu eꞌmenukasaꞌya taasaꞌ man:Tîkoꞌman pe aakoꞌmamî pe pra man, tîîse mararî aakoꞌmamî.Moropai manniꞌ tuiꞌsen, mîîkîrî iipî.Mîîkîrî koꞌmamî pepîn tîîse aaipî.
38 Mîrîrî yai upemonkonoyamîꞌ morî pe puꞌkuru tîweꞌsanonkoꞌmamî pe man innape ukupî pîꞌ.Tîîse inkamoro ennaꞌpo ya teꞌmaꞌpîkon pîꞌ,inkamoro pîꞌ atausinpa pepîn
taꞌpîiya.
39 Tîîse uurîꞌnîkon wanî pepîn inkamoro yeꞌka tîwennaꞌposanon warantî. Inkamoro wanî aweꞌtîꞌkatonkon pe. Tîîse uurîꞌnîkon wanî innape ikuꞌnenan pe moropai innape ikuꞌsaꞌ wenai, uurîꞌnîkon wanî eꞌpîikaꞌtîꞌsan pe.
