Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 12:1-29
12 Mîrîrî yeꞌnen uurîꞌnîkonya inkamoro mararonkon pepîn nîkupîꞌpî yekare etaꞌpî. Mîrîrî warantî uurîꞌnîkonya ikuꞌtoꞌpe ekaremeꞌnen pe awanî. Mîrîrî yeꞌnen tî tamîꞌnawîrî innape ikupî manenpanen rumakapaiꞌnîkon man. Moropai imakuiꞌpî unkupîkon kupî eꞌpai pra man atareꞌmon namai. Inîꞌ ipîꞌ enpenatanpai pra man. Tîîse meruntî ke eꞌnîpaiꞌnîkon man manniꞌkan teekaꞌtunsenon ekaꞌtumî warantî. Toꞌsarî uyeꞌmarîkon ta koꞌmannîpaiꞌnîkon yairî maꞌre teenai pra.
2 Innape ikupî pîꞌ koꞌmannîpaiꞌnîkon Jesus eraꞌmaiꞌma. Maasa pra innape Paapa kupî wenai, mîîkîrîya uurîꞌnîkon pîikaꞌtîꞌpî. Moropai upîikaꞌtîkon pîꞌ aakoꞌmamî tîîpia erepannî pîkîrî. Mîîkîrî yeseru pîꞌ esenumenkanpaiꞌnîkon. Îꞌ pensa mîîkîrîya pakîꞌnan pona tîîsaꞌmantatoꞌ yewanmîrîsaꞌ pra man. Tîîse aatausinpaꞌpî maasa pra îꞌ kaiꞌma tîîpia itîrîuya taꞌpî Paapaya yapisî tîuya kupî yeꞌnen. Mîrîrî yeꞌnen îꞌ kaiꞌma eesenumenka pra awanîꞌpî kureꞌnan tîweppeꞌtoꞌ pîꞌ, tîîsaꞌmantatoꞌ pîꞌ. Tarîpai mîîkîrî ereutasaꞌ sîrîrî, ipîkku pataꞌseꞌ yaꞌ, Paapa, tamîꞌnawîronkon esaꞌ pe tîweꞌsen, yaponseꞌ po imeruntîri winî.
3 Maasa esenumenkatî îꞌ kaiꞌma aweꞌtarumaꞌtîꞌpî pîꞌ. Îꞌ kaiꞌma imakuiꞌsan koreꞌta tîwanî yai tîpîꞌ toꞌ woꞌmaꞌtatoꞌ yapîtanîpîꞌpîiya. Mîrîrî warantî nîrî amîrîꞌnîkonya yapîtanîpî eꞌpai awanî, yairî maꞌre teenai pra, moropai tîrumakai pra.
4 Epuꞌtî pîꞌ wai seruꞌ pepîn. Imakuiꞌsanya atarumaꞌtîꞌpîtoꞌkon pîꞌ yapîtanîpî pîꞌ aakoꞌmamîkon. Tîîse ipîra amîrîꞌnîkon tîwîi amînîkon tiꞌkanse atarumaꞌtîsaꞌkon toꞌya pra man sîrîrî tîpose.
5 Îꞌ taꞌpî Paapaya kuꞌsaꞌyaꞌnîkon aawanmîraꞌnîkon. Meruntî ke awanîkonpa Paapaya tîmaimu ke taꞌpî yairî maꞌre eenakon namai, tînmukuyamîꞌ pe amîrîꞌnîkon tîkuꞌse. Taꞌpîiya see warantî:Maasa etakî unmu,îꞌ pensa Paapaya atarumaꞌtî wenaiîꞌ kaiꞌma ayenupaiya etatî.Ipîinamayaꞌnîkon pra kenantî.Moropai îꞌ pensa apîꞌ taiya ya:—Yairî pra nai —taiya ya apîꞌ,kîsewankonoꞌmai.
6 Maasa pra Paapa wanîtîsaꞌnamanenan yakoꞌmenkanen pe,morî pe toꞌ enatoꞌpe.Moropai tamîꞌnawîronkon tînmu petînapisîꞌsan panamaiya,yairî pra toꞌ yeseru wanî namai
taꞌpîiya.
7 Mîrîrî yeꞌnen eꞌtarumaꞌtîntoꞌ yapîtanîꞌtî, Paapaya apanamatoꞌkon eta yeꞌka pe. Maasa pra îꞌ kaiꞌma apîꞌnîkon Paapa esenyakaꞌma tînmukuyamîꞌ pe awanîkon yeꞌnen. Moro awanî sîrîrî more itun nakoꞌmenkaꞌpî pepîn iteseru? Kaane, iteseru yakoꞌmenkasaiꞌya mîrîrî, itun pe tîwanî yeꞌnen. Mîrîrî warantî tamîꞌnawîronkon tînmukuyamîꞌ yakoꞌmenka Paapaya.
8 Mîrîrî yeꞌnen yakoꞌmenkasaꞌ pe pra awanîkon ya, inmuku pe puꞌkuru awanîkon pepîn. Tîîse tiaron munkî pe awanîkon.
9 Uyunkon tarîronya uurîꞌnîkon yakoꞌmenkaꞌpî. Moropai mîîkîrî namaꞌpî. Mîrîrî yentai Paapa namaꞌnîkon eꞌpai man, manniꞌ uyunkon kaꞌ pon uyakoꞌmenkanenkon. Mîrîrî warantî ikupîyaꞌnîkon ya, moriya iipia koꞌmannîtoꞌ puꞌkuru eporî.
10 Uyunkon tarîronya uurîꞌnîkon yakoꞌmenkapîtîꞌpî more pe eꞌnîꞌnîkon tanne teesenumenkatoꞌ yawîrî. Morî pe uyeserukon yuꞌse tîwanî yeꞌnen yakoꞌmenkapîtîꞌpî toꞌya epuꞌtî tîuyaꞌnîkon pîkîrî. Tîîse Paapaya uurîꞌnîkon yakoꞌmenkatoꞌ wanî tîwîrî yairon pe. Morî pe tarakkîrî koꞌmannîtoꞌpe, tîwarantî ukupîiyaꞌnîkon.
11 Îꞌ pensa uurîꞌnîkon yakoꞌmenkanenya ya, uyakoꞌmenkatoꞌkon wanî uurîꞌnîkon yewankonoꞌmanen pe. Yai pra yairî maꞌre enan, atausinpantoꞌ ton pra. Tîîse maasa panpîꞌ uurîꞌnîkon yakoꞌmenkasaꞌkon yeseru ena morî pe. Moropai tîwanmîra eꞌnîtoꞌ eseraꞌma, maasa pra Paapaya uyakoꞌmenkasaꞌkon wenai.
Panamantoꞌ
12 Mîrîrî yeꞌnen tauya amîrîꞌnîkon wanî itenya ikeꞌnepamîꞌsan warantî ayenyakon pîmîꞌsaꞌkatî taatausinpai. Moropai eꞌmîꞌsaꞌkatî apîtatî ikeꞌne tîweꞌsen warantî pra. Tîîse meruntî ke enatî ayewankon yaꞌ.
13 Toꞌsarî ayeꞌmarîkon konekayaꞌnîkon warantî ayeserukon konekatî morî pe yawîrî aakoꞌmamîkonpa yairî maꞌre teenai pra.
Aakoꞌmamîkon yai ayeserukon eraꞌmanenan aꞌtuꞌmînan esenomî namai, tîîse morî pe taatausinpai toꞌ koꞌmantoꞌpe.
14 Tîîwanmîra awanîkon yuwatî tamîꞌnawîronkon pokonpe. Moropai morî pe puꞌkuru, ituꞌse Paapa eꞌtoꞌ yawîrî aakoꞌmamîkon yuwatî. Maasa pra mîrîrî kuꞌsaꞌ anîꞌya pra awanî ya, Uyepotorîkon eraꞌmaiya pepîn tiwin kin.
15 Aka tîwarî eꞌtî, anîꞌya tîîpîikaꞌtîtoꞌ Paapaya yewanmîrî namai, iipiapai aatarimakî namai. Aka mîîkîrî keꞌnen manniꞌ mîꞌnî yeꞌ aroꞌtasaꞌ manniꞌ warantî maasa pra mîrîrî mîꞌnî yeꞌ arentasaꞌ ya morî pe tîweꞌsen koreꞌta mîrîrîya toꞌ tarumaꞌtî. Mîrîrî warantî pra eꞌtî teekoreꞌmai pra tiaronkon winîkîi.
16 Moropai tauya aka seꞌ tapairî wîriꞌsanyamîꞌ yarakkîrî awanî tonpe anîꞌ keꞌnen. Moropai wîriꞌsanyamîꞌ keꞌnen seꞌ tapairî warayoꞌkon yarakkîrî. Moropai Paapa nîtîrî yewanmîrî anîꞌya keꞌnen. Maasa pra mîrîrî warantî Esaú nurîꞌtîya ikupîꞌpî. Tîîpia Paapa nîtîrîꞌpî yewanmîrîꞌpîiya. Eesenumenka pra awanîꞌpî eꞌmaiꞌnon pe tîwanî pîꞌ eꞌmaiꞌnon pia îꞌ tîrî tîuya taꞌpî Paapaya pîꞌ. Maasa pra tiwinan prato awentamoꞌkantoꞌ miakanmaꞌpîiya mîrîrî ke takon Jacó nurîꞌtî pia.
17 Mîrîrî tîpo îꞌ kupîꞌpîiya epuꞌnenan amîrîꞌnîkon. Mîrîrî entamoꞌkantoꞌ miakanmaꞌpî tîuya manaꞌpoka yuꞌse awanîꞌpî. Mîrîrî esatîꞌpîiya tun nurîꞌtî pîꞌ: “Inîꞌrî morî pe uukoꞌmantoꞌpe kaꞌkî Paapa pîꞌ”, taꞌpîiya tun pîꞌ. Tîîse yewanmîrî tîpo, îꞌ kaiꞌma innaꞌpokaiya eserîke pra awanîꞌpî. Teuren tuꞌke iteserukon yuwaꞌpîiya tîkauware esatîꞌpîiya. Tîîse yapisîiya pîn.
18 Îꞌ pensa amîrîꞌnîkon erepansaꞌ pra man Paapa pia manniꞌkan penaronkon Judeuyamîꞌ erepamîꞌpî warantî. Aminke pra inkamoro erepamîꞌpî mîrîrî wîꞌ pia. Tîîse mîrîrî yai eranneꞌ pe toꞌ wanîꞌpî. Mîrîrî apoꞌ eraꞌmaꞌpî toꞌya moropai katupuru îrikkutun wanîꞌpî nariꞌ pe. Moropai miarî ewaron pe awanîꞌpî mararî pra aꞌsitun wanîꞌpî.
19 Mîrîrîya etaꞌpî toꞌya trombeta eꞌnatoꞌ. Mîrîrî koreꞌta teeseurîmasen mai etaꞌpî toꞌya. Mîrîrî eta tîuyaꞌnîkon pe taꞌpî toꞌya eranneꞌ pe tîwanîkon wenai inîꞌrî eeseurîma namai.
20 Maasa pra yapîtanîpî toꞌya eserîke pra toꞌ wanîꞌpî îꞌ kaiꞌma eeseurîmatoꞌ.Taꞌpî Paapaya tiwin kin anîꞌya manniꞌ wîꞌ yapî namaimaasa pra wîꞌ yapîsaꞌ anîꞌya ya,iwî eꞌpai awanî tîpaꞌtîpîꞌse tîꞌ ke,pemonkonyamîꞌ neken pepîn tîîse toꞌ yekînnon nîrî taꞌpîiya.
21 Mîrîrî toꞌ neraꞌmaꞌpî wanîꞌpî nariꞌ pe. Mîrîrî pîꞌ taꞌpî Moisés nurîꞌtîya:—Mararî pra eꞌkîkîꞌma sîrîrî eranneꞌ pe wanî pîꞌ
—taꞌpîiya.
22 Tîîse mîrîrî yeꞌka pata amîrîꞌnîkon iiꞌsaꞌ pra man. Tîîse aaipîꞌpîkon morî puꞌkuru Paapa pata yaꞌ tiaron wîꞌ iteseꞌ Sião pona pena aweꞌkupîꞌpî warantî pra. Tîîse morî Paapa cidaderî pona, amenan Jerusalém kaꞌ pon pia aaipîꞌpîkon manniꞌkan mararonkon pepîn ikuꞌneꞌtî yentainokon inserîyamîꞌ koreꞌta.
23 Amîrîꞌnîkon iipîꞌpî manniꞌkan eꞌmaiꞌnokon Paapa munkîyamîꞌ epereꞌsaꞌ koreꞌta taatausinpai puꞌkuru manniꞌkan iteseꞌ eꞌmenukaꞌsan kaꞌ po. Aaipîꞌpîkon Paapa pia manniꞌ Paapa ipîkku tamîꞌnawîronkon yenunnen. Moropai oꞌnon pata Paapa nîkupîꞌsan yairî ipemonkonoyamîꞌ yekaton koꞌmamî morî pe aweꞌtoꞌ yawîrî. Mîrîrî pata pona aaipîꞌpîkon.
24 Amîrîꞌnîkon iipîꞌpî Jesus pia manniꞌ amîrîꞌnîkon yarakkîrî moropai Paapa arappanaꞌ tîweꞌsen. Manniꞌ Jesus nîkupîꞌpî amenan pe eseponîtoꞌpe Paapa yarakkîrî. Moropai manniꞌ tîmînî ke uurîꞌnîkon kuyu kuyu maꞌtîpon pia aaipîꞌpîkon. Manniꞌ imînî wanî morî pe manniꞌ Abel nurîꞌtî mînî tiꞌkamoꞌpî yentai. Maasa pra Abel mînî rîꞌpî eraꞌma tîuya yai Paapaya iwîtîpon tarumaꞌtîꞌpî. Tîîse Jesus mînî rîꞌpî eraꞌma tîuya yai imakuiꞌpî unkupîꞌpîkon kupîiya tîîwanmîra.
25 Mîrîrî yeꞌnen aka moropai anetapai pra keꞌtî teeseurîmasen eseurîmatoꞌ. Maasa pra manniꞌkan anetapai pra esiꞌsan wîꞌ poi teeseurîmasenya taasaꞌ tanne, inkamoro eꞌpîikaꞌtî pîn tîîse toꞌ eꞌtîꞌkaꞌpî. Mîrîrî yeꞌnen uurîꞌnîkon kanan, yewanmîrîsaꞌ ya kaꞌ pon eseurîmatoꞌ oꞌnon yeꞌka pe eꞌpîikaꞌtîn eꞌpainon? Eꞌpîikaꞌtîn pepîn.
26 Manniꞌ yai wîꞌ pia toꞌ wanî yai mîîkîrî teeseurîmasen maimuya non eserentîkîꞌma emapuꞌtîꞌpî. Tîîse tarîpai taꞌpîiya:—Inîꞌrî tiwinkanoꞌpî pe eeserentîkîꞌma emapuꞌtîuya kupî sîrîrî tîîse non neken pepîn tîîse kaꞌ nîrî
—taꞌpîiya.
27 Sîrîrî wanî Paapa maimu pe inîꞌrî eeseurîmaꞌpî tamîꞌnawîron inkonekaꞌpî eserentîkîꞌma yai aataretîꞌka kupî sîrîrî. Tîîse mîrîrî koreꞌta ipatîkarî tîîkoꞌmansen koꞌmamî kupî sîrîrî aataretîꞌka pepîn.
28 Mîrîrî yeꞌnen —Morî pe man, Paapa, anna pataꞌseꞌ ton tîrî pîꞌ nai anna pia —taa pîꞌ koꞌmannîpaiꞌnîkon. Maasa pra uyesaꞌkon taataretîꞌkasen pepîn yapiꞌsaꞌ yeꞌnen, ipatîkarî koꞌmannî yarakkîrî. —Morî pe man, Paapa —taa pîꞌ koꞌmannî wenai, yapurîpaiꞌnîkon man. Îꞌ kaiꞌma tîwakîri pe epuꞌtoꞌpe Paapaya inamaiꞌma yapurîpaiꞌnîkon man.
29 Maasa pra Paapa wanî nariꞌ pe,manniꞌ apoꞌ warantî.Manniꞌkan innape tapurînenan pepîn poꞌtîiya.
Mîrîrî yeꞌnen inamaiꞌma Paapa yapurîpaiꞌnîkon man.
