Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 13:1-25
13 Uyonpakon saꞌnama pîꞌ koꞌmannî eꞌpai awanî Cristo pemonkono pe eꞌnîꞌnîkon yeꞌnen.
2 Moropai tiaronkon teerepansenon ayewîꞌkon ta yapiꞌtoꞌyaꞌnîkon tîrumakai pra toꞌ yapisî pîꞌ akoꞌmantî. Maasa pra penaronkon tiaronkon nurîꞌtîya tewîꞌkon ta teerepansenon teraꞌmapîꞌseꞌnîkon yapisîꞌpî. Toꞌ yapisîꞌpî toꞌya anîꞌkan pe toꞌ wanî tepuꞌtîi pra ese yeꞌkakon pemonkonyamîꞌ kaiꞌma tîîse inserîyamîꞌ kinî.
3 Moropai enpenatatî nîrî mannankan atarakkannîtoꞌ ta atarakkamoꞌsan pîꞌ. Toꞌ koreꞌta siꞌma amoronkon epuꞌtîyaꞌnîkon warantî toꞌ pîꞌ enpenatatî. Moropai enpenatatî nîrî mannankan saꞌne tîweꞌtarumaꞌtîsanon pîꞌ. Inkamoro eꞌtarumaꞌtîtoꞌ kuꞌtî amîrîꞌnîkon eꞌtarumaꞌtî toꞌ yarakkîrî warantî.
4 Tarîpai tauya sîrîrî manniꞌkan tînoꞌpîtasenon pîꞌ moropai teetinyomasenon pîꞌ, tînoꞌpîtasen noꞌpîta wanî morî pe tînoꞌpî yarakkîrî tîwanîpa. Moropai wîriꞌ eꞌtoꞌpe tînyo yarakkîrî nîrî. Maasa pra imakuiꞌpî pe awanî tînoꞌpî pepîn wîriꞌ yarakkîrî warayoꞌ wanî ya. Moropai wîriꞌ wanî ya tînyo pepîn yarakkîrî, inkamoro tarumaꞌtî Paapaya mîrîrî imakuiꞌpî kupî toꞌya yeꞌnen.
5 Tarîpai eseurîma sîrîrî yemanne awanî pîꞌ. Kureꞌne ayemannekon pînînmayaꞌnîkon pîꞌ kîsenumenkatî atînirurîkon yapisîkon pîꞌ. Tîîse morî pe man kaꞌtî mîrîrî itesaꞌ pe aweꞌtoꞌkon pîꞌ itentai puꞌkuru ituꞌse teesekaꞌnunkai pra. Maasa pra Paapaya taꞌpî:Îꞌ pensa tiwin kin arumakauya pepînmoropai apîinamauya pra wanî pepîn
taꞌpîiya.
6 Mîrîrî yeꞌnen meruntî ke saꞌman pe apîꞌtan yuwapaiꞌnîkon eseurîmantoꞌ ke. Taapaiꞌnîkon tiaronkon pîꞌ:Paapa wanî sîrîrî upîikaꞌtînen pe.Mîrîrî yeꞌnen eranneꞌ pe eꞌtoꞌ ton pra man.Mîrîrî yeꞌnen îꞌ kupî pemonkonyaeꞌpainon uyarakkîrî?Ikupîiya pepîn
taapaiꞌnîkon.
7 Maasa enpenatatî. Manniꞌkan eꞌmaiꞌ pe erepamîꞌsan itekare ekaremekîtîponkon amîrîꞌnîkon pîꞌ. Inkamoro koꞌmamîꞌpî pîꞌ enpenatatî. Toꞌ koꞌmamîꞌpî moropai inkamoro saꞌmantaꞌpî innape ikupîiꞌma. Mîrîrî yeꞌnen inkamoroya innape ikupîꞌpî warantî innape ikupîyaꞌnîkon yuwatî.
8 Maasa pra Jesus Cristo wanî sîrîrî pena tîwanîꞌpî warantî. Mîîkîrî rî koꞌmamî sîrîrîpe mîrîrî warantî. Moropai mîrîrî warantî rî nîrî aakoꞌmamî ipatîkarî eetinyakaꞌmaꞌpî pra.
9 Mîrîrî yeꞌnen tiaronkonya ayenupatoꞌkon tuꞌkan yeseru pîꞌ kîsetatî. Maasa pra mîrîrî etayaꞌnîkon ya, yairî aweꞌtoꞌkon winîpai apantakaiyaꞌnîkon. Tîîse morî pe awanî Paapa nîtîrî winîpai meruntî ke ayekatonkon ena ya. Tîîse ankupîkon winîpai aaipî pepîn. Maasa pra mîrîrî yeꞌka panamantoꞌ yekkari awanî enaꞌtoꞌ pîꞌ seeniꞌ wanî morî pe, seeniꞌ wanî imakuiꞌpî pe taatoꞌ yawîrî awanîkon ya, mîrîrîya amîrîꞌnîkon pîikaꞌtî pepîn.
10 Uurîꞌnîkon wanî eꞌpîikaꞌtîꞌsan pe Jesus Cristo saꞌmantatoꞌ wenai. Tîîse tîweꞌpîikaꞌtîkonpa tekînkon poꞌtînenan eꞌpîikaꞌtî pepîn, innape Jesus kupî tîuyaꞌnîkon pra awanî yeꞌnen.
11 Teepîremasanon esanon yepotorîya Judeuyamîꞌ tonpe paaka mînî yarî yai Paapa pataꞌseꞌ morî puꞌkuru ta imakuiꞌpî toꞌ nîkupîꞌpî yepeꞌ pe, inkamoro oꞌmaꞌkon esaꞌrîꞌpî poꞌtîpîtîꞌpî toꞌya poro po, cidade ta pra.
12 Mîrîrî yeꞌnen mîrîrî warantî nîrî Jesus saꞌmantaꞌpî cidade po pra tîîse poro po. Manniꞌkan imakuiꞌpî kupîtîponkon tonpe tîmînî kamoꞌpîiya toꞌ nîkupîꞌpî ronapa kaiꞌma.
13 Mîrîrî yeꞌnen wîtînpaiꞌnîkon man Jesus wenairî. Inkamoro tîwoꞌmaꞌtasanon woꞌmaꞌtatoꞌ yapîtanîꞌpaiꞌnîkon man, penaronkonya mîrîrî kupî yapîtanîpîꞌpî Jesusya warantî.
14 Maasa pra sîrîrî pata po koꞌmannîtoꞌ ipatîkaron ton pra man. Tîîse sîrîrî tîpo ipatîkaron koꞌmannîtoꞌ nîmîkî pîꞌ koꞌmannî manniꞌ aaipî kupî manniꞌ.
15 Mîrîrî yeꞌnen Paapa yapurîpaiꞌnîkon man tîwîrî rî Jesus Cristo nîkupîꞌpî wenai. Mîrîrî yapurîtoꞌ wanî unpoꞌtîkon pe tîweꞌsen warantî itîrî uurîꞌnîkonya. Ipîꞌ eseurîman yeꞌka pe, morî Paapa anna pîikaꞌtînen taa yeꞌka pe, yapurîꞌnîkon imîrî pe eꞌnî yeꞌnen.
16 Tîwî morî kuꞌtoꞌyaꞌnîkon tîkuꞌse pra ikupî pîꞌ aakoꞌmamîkon eꞌpai man tiaronkon pîikaꞌtîkonpa. Maasa pra mîrîrî kupî pîꞌ aakoꞌmantoꞌkon wanî Paapa wakîri pe, manniꞌ antîrîkon ayekînkon yentai.
17 Mîrîrî yeꞌnen tauya manniꞌkan ayeꞌmaiꞌnorîkon pe tîweꞌsanon inkamoro maimu yawîrî akoꞌmantî. Maasa pra inkamoro esenyakaꞌma tîwîrî rî amîrîꞌnîkon tonpe. Maasa pra epuꞌtî toꞌya kupî tîuyaꞌnîkon amîrîꞌnîkon pîꞌ Paapaya toꞌ ekaranmapo kupî sîrîrî. Innape toꞌ maimu yawîrî awanîkon ya, moriya inkamoro esenyakaꞌma tîwakîrikon pe puꞌkuru taatausinpai. Tîîse toꞌ maimu yawîrî pra awanîkon ya, teesewankonoꞌmai toꞌ esenyakaꞌma amîrîꞌnîkon pîikaꞌtî eserîke pra tiwin kin.
18 Mîrîrî yeꞌnen tauya eepîremakon pîꞌ akoꞌmantî. Esaꞌtî Paapa pîꞌ anna ton pe nîrî. Maasa pra innape puꞌkuru anna yewan yaꞌ morî pe awanî epuꞌtî pîꞌ anna man. Maasa pra tîwîrî rî yairon ankuꞌpai anna wanî yeꞌnen.
19 Moropai esatîuya apîꞌnîkon îꞌ kaiꞌma amîrîꞌnîkon koreꞌta ennaꞌpotoꞌpe Paapaya ikuꞌtoꞌpe eepîremakon yuꞌse wai kaꞌneꞌ panpîꞌ mîrîrî kuꞌtoꞌpeiya eepîremakon yuꞌse wai.
Epîremantoꞌ
20 13:20,21 Paapa, anna yunkon, manniꞌ tîwanmîra eꞌnîtoꞌ tîînen amîrî. Manniꞌkan ituꞌse aweꞌtoꞌkon pia amaimu yawîrî inkamoroya ikuꞌtoꞌpe. Moropai Jesus Cristo saꞌmantaꞌpî wenai tamîꞌnawîrî ituꞌse aweꞌtoꞌ kuꞌtoꞌpe annaya anna pîikaꞌtîkî. Maasa pra Paapa anna yepotorî Jesus Cristo pîmîꞌsaꞌkaꞌpîya saꞌmantantoꞌ yapai. Mîrîrî tîîsaꞌmantatoꞌ wenai kureꞌne ikupîꞌpîiya apemonkonoyamîꞌ pîꞌ eesenyakaꞌma koꞌmannîpî. Moropai iniꞌkamoꞌpî imînî wenai amaimuya taasaꞌ yawîrî ikupîꞌpîiya. Mîrîrî yeꞌnen îꞌ pensa mîrîrî inkupîꞌpî ena pepîn îꞌ pe pra rî. Mîrîrî warantî Cristo yapurî eꞌpai man ipatîkarî mîî pîkîrî pra. Mîrîrî warantî eꞌpai man.
21 Eraꞌmakî 13:20
Panamantoꞌ Ikîꞌpî
22 Uyonpayamîꞌ, esatîuya sîrîrî apîꞌnîkon tîîtîꞌnapanse panamantoꞌ yekare etakonpa teesetaꞌkai pra. Maasa pra sîrîrî kaareta unmenukaꞌpî wanî kureꞌne puꞌkuru tîweꞌsen pe pra.
23 Moropai epuꞌtîyaꞌnîkon yuꞌse wai îꞌ kaiꞌma uyonpakon Timóteo epaꞌkaꞌpî yekare atarakkannîtoꞌ tapai. Kaꞌneꞌ pe mîîkîrî iiꞌsaꞌ ya uupia, uyarakkîrî attî amîrîꞌnîkon eraꞌmapîꞌse uutî yai.
24 Tarîpai umaimu yarimauya tamîꞌnawîronkon manniꞌkan ayeꞌmaiꞌnorîkon pe tîweꞌsenon mororonkon pia. Moropai tamîꞌnawîrî Paapa pemonkonoyamîꞌ pia. Moropai uyonpakon, Itália ponkonya nîrî tîmaimukon yarima pîꞌ man aapiaꞌnîkon.
25 Paapaya epeꞌmîra tîntîrî tîrî yuꞌse wai tamîꞌnawîronkon amîrîꞌnîkon pia. Mîrîrî neken.
