Sîrîrî Kaareta Wanî Innape Jesus Kuꞌnenan Judeuyamîꞌ Ton Pe 2:1-18
2 Mîrîrî yeꞌnen kureꞌne esenumenkan eꞌpai awanî mîrîrî eꞌpîikaꞌtîntoꞌ yekare Jesus winîpainon unetaꞌpîkon pîꞌ. Mîrîrî yairon yekare winîpai atariman namai esenumenkanpaiꞌnîkon.
2 Pena Moisés nurîꞌtî pîꞌ inserîyamîꞌ nekaremekîꞌpî itekare wanîꞌpî yairon pe puꞌkuru. Maasa pra ikupî tîuya taasaꞌ tîuya yawîrî, Paapaya penaronkon tîmaimu yawîronkon pepîn tarumaꞌtîꞌpî.
3 Mîrîrî yentai oꞌnon yeꞌka pe eꞌpîikaꞌtîꞌnîkon eꞌpainon Jesus winîpainon mîrîrî eꞌpîikaꞌtîntoꞌ yekare yewanmîrîsaꞌnîkon ya? Eꞌpîikaꞌtîn pepîn. Maasa pra Uyepotorîkon Jesus Cristoya ekaremekîꞌpî eꞌpîikaꞌtîntoꞌ yekare upîꞌnîkon. Moropai manniꞌkan etatîponoꞌsanya innape ikupîtîponoꞌsanya yairî awanî ekaremekîꞌpî upîꞌnîkon.
4 Moropai yairî awanî epuꞌtîꞌnîkon maasa pra Paapaya anîꞌ nîkupî eserîkan pepîn tuꞌkan kupî toꞌya emapuꞌtîꞌpî. Moropai tiwin pîꞌ toꞌ tîîse toꞌ nîkupî ton meruntî tîrîꞌpî Paapaya siꞌta toꞌ kaisarî Morî Yekaton Wannî wenai. Îꞌ kaiꞌma ituꞌse tîwanî yawîrî itîrîꞌpîiya. Mîrîrî yeꞌnen yairon pe puꞌkuru awanî epuꞌtî uurîꞌnîkonya.
Pemonkon Pe Cristo Enaꞌpî
Pemonkonyamîꞌ Pîikaꞌtîpa
5 Inserîyamîꞌya pata koꞌmannîꞌtoꞌpe Paapaya meruntî tîîsaꞌ pra man, manniꞌ amenan pe ikoneka tîuya kupî manniꞌ, amenan inkoneka pîꞌ eseurîman sîrîrî.
6 Tîîse Paapa maimu eꞌmenukasaꞌ po taꞌpî tiaronya:Paapa, anîꞌkan pemonkonyamîꞌ,toꞌ pîꞌ eesenumenkapa ipîkku pe?Îꞌ ton pe morî pe toꞌ munkîyamîꞌ pîꞌ awanî,inkamoro pîikaꞌtîya?
7 2:7,8 Pemonkonyamîꞌ kupîꞌpîya inkamoroinserîyamîꞌ maꞌre tîweꞌsanon pe.Tîîse mîrîrî tîpo ipîkku pe toꞌ kupîꞌpîya,tamîꞌnawîrî ankonekaꞌsan eꞌtoꞌpetoꞌ maimukon yawîrî
taasaiꞌya. Tamîꞌnawîrî tînkonekaꞌsan esaꞌ pe pemonkonyamîꞌ kuꞌsaꞌ Paapaya yeꞌnen, tiwin kin tiwinanya toꞌ maimu yuwaꞌka pepîn. Tîîse sîrîrî tîpose inkamoro pemonkonyamîꞌya tamîꞌnawîron koꞌmannîpî eraꞌma pra man.
8 Eraꞌmakî 2:7
9 Tîîse tiwinanya tamîꞌnawîron koꞌmannîpî eraꞌmaꞌnîkon sîrîrî, mîîkîrî Jesus. Pemonkon pe inserîyamîꞌ maꞌre ikupîꞌpî Paapaya, maasa pra tamîꞌnawîronkon pemonkonyamîꞌ ton pe aasaꞌmantatoꞌpe kaiꞌma. Mîrîrî wenai morî pe Paapa eꞌtoꞌ eseraꞌma pemonkonyamîꞌ yarakkîrî. Tarîpai ipîkku pe, morî pe Jesus wanî eraꞌma uurîꞌnîkonya. Tamîꞌnawîronkon esaꞌ pe eenasaꞌ, maasa pra tîweꞌtarumaꞌtîi aasaꞌmantasaꞌ wenai.
10 Îꞌ ton pe Jesus eꞌtarumaꞌtî yuꞌse Paapa wanîꞌpî? Manniꞌ Paapa tamîꞌnawîron konekaꞌtîpon, moropai tamîꞌnawîron koꞌmannîꞌnen. Mîîkîrî rî wanîꞌpî tuꞌkankon tînmukuyamîꞌ yuꞌse toꞌ koꞌmantoꞌpe tîîpia tamîꞌnawîron esaꞌ pe. Mîrîrî kupîpa, tînmu yarimaꞌpî Paapaya aweꞌtarumaꞌtîtoꞌpe. Mîrîrî wenai tîpemonkonoyamîꞌ yarîton pe eenaꞌpî kaꞌ pona, tîweꞌtarumaꞌtîi tîîsaꞌmantatoꞌ wenai. Mîrîrî yeꞌnen mîîkîrî neken enaꞌpî eꞌpîikaꞌtîntoꞌ esaꞌ pe.
11 Mîrîrî yeꞌnen Jesus yonpa pe eꞌnî. Maasa pra morî pe pemonkonyamîꞌ kuꞌnen wanî Paapa munmu pe. Moropai ipemonkonoyamîꞌ, morî pe Jesus nîkupîꞌsan wanî nîrî Paapa munkî pe. Mîrîrî yeꞌnen Jesus eppepî pepîn tîpemonkonoyamîꞌ pîꞌ, “uyonpayamîꞌ” taapa.
12 Mîrîrî warantî esatîiya epuꞌtîꞌnîkon, maasa pra pena teeseurîma yai tîmaimu eꞌmenukasaꞌ po taꞌpî Jesusya:Paapa, eseurîma kupî sîrîrîuyonpayamîꞌ pîꞌ ayekaremekîuyamoropai apîꞌ eserenkatamîꞌnawîronkon emurukuntîꞌsan koreꞌta siꞌma
taꞌpîiya.
13 Inîꞌrî taꞌpîiya:Innape mîîkîrî kuꞌnen uurî
taꞌpîiya. Moropai inîꞌrî taꞌpîiya:Tarî wanî sîrîrî, Paapa,uupia anrumakaꞌsanuyonpayamîꞌ yarakkîrî.
Mîrîrî warantî Jesus eseurîmaꞌpî upîꞌnîkon Paapa maimu eꞌmenukasaꞌ po.
14 Pemonkon pe itonpayamîꞌ wanî yeꞌnen tîpun ke, moropai tîmînî ke, inkamoro warantî Jesus ena eꞌpai awanîꞌpî pemonkon pe. Pemonkon pe eenaꞌpî tîîsaꞌmantapa kaiꞌma pemonkonyamîꞌ ton pe. Mîrîrî tîîsaꞌmantatoꞌ wenai, Makui, pemonkonyamîꞌ saꞌmantatoꞌ ton eneꞌnen yaretîꞌkapa kaiꞌma pemonkon pe eenaꞌpî.
15 Tîwîrî pemonkonyamîꞌya imakuiꞌpî kupî, ituꞌse Makui eꞌtoꞌ yawîrî, tîîkoꞌmamîkon pîkîrî. Mîrîrî wenai eranneꞌ pe toꞌ wanî tîîsaꞌmantatoꞌ pîꞌ, tîweꞌtarumaꞌtîtoꞌ pîꞌ. Mîrîrî yeꞌnen tîîsaꞌmantatoꞌ wenai inkamoro pîikaꞌtîꞌpî Jesusya. Makui meruntîri winîpai tîpemonkonoyamîꞌ moꞌkaꞌpîiya.
16 Inna seruꞌ pepîn inserîyamîꞌ pîikaꞌtîi aaiꞌsaꞌ pra man. Tîîse aaipîꞌpî pemonkonyamîꞌ, Abraão nurîꞌtî payannîꞌsan pîikaꞌtîi, manniꞌkan innape Paapa kuꞌnenen Abraãoya ikupîꞌpî warantî.
17 Mîrîrî yeꞌnen pemonkon pe eenaꞌpî tonpayamîꞌ warantî teepîremasanon esanon yepotorî pe teenapa. Tonpayamîꞌ tonpe teeseurîmasen pe awanî wenai Paapaya inkamoro yapisî emapuꞌtînen pe eenaꞌpî. Mîîkîrî tonpayamîꞌ tonpe teeseurîmasen wanî pemonkonyamîꞌ saꞌnamanen pe moropai innape toꞌ nîkupî ton. Moropai imakuiꞌpî toꞌ nîkupîꞌpî yeꞌmapa, aasaꞌmantaꞌpî inîꞌrî Paapa ekoreꞌma namai toꞌ pîꞌ, tîîse tîmîrî ton pe toꞌ yapiꞌtoꞌpeiya.
18 Mîrîrî yeꞌnen Jesus wanî uurîꞌnîkon pîikaꞌtînen pe uyepuꞌtoꞌkon, uyonpatoꞌkon winîpai. Maasa pra pena mîrîrî yeꞌka tonpatoꞌ epuꞌtîꞌpîiya. Mîrîrî wenai aweꞌtarumaꞌtîꞌpî tîîse itentai eenaꞌpî, mîrîrî yeꞌnen upîikaꞌtîiyaꞌnîkon.
